Ipinalit ni P-Digong na “bagong boss” sa PhilHealth, aminadong wa’ alam sa public health

ni Korina Sanchez - @Isyung 'K' | September 3, 2020

May napili nang kapalit ni Ricardo Morales si Pangulong Rodrigo Duterte para pamunuan ang PhilHealth na lubog ngayon sa alegasyon ng katiwalian—si Dante Gierran na dating direktor ng NBI.

Sa isang panayam, agad niyang inamin na wala siyang alam sa public health at hindi niya alam ang operasyon ng ahensiya, na hindi tulad sa NBI kung saan siya nagtrabaho ng 27 taon bago naging direktor.

Aminado itong natatakot siya sa bagong trabaho pero nangako namang hindi siya magiging mahinhin. Hinimok niya ang publiko na bigyan siya ng pagkakataong linisin ang PhilHealth para mawala na ang deka-dekadang katiwalian.

Mabuti at naririnig natin ang saloobin ni Gierran. Malaking trabaho at sakit ng ulo ang hinaharap ngayon ng PhilHealth kaya sana ay hindi siya maimpluwensiyahan sa ahensiya. Inutusan siya ng Pangulo na balasahin ang mga regional vice-presidents. Tila pahiwatig ito na sa kanila nagmumula ang korupsiyon sa ibang rehiyon, kung saan karaniwan na lang ang kalakaran kaya nahahanapan ng paraan para sa katiwalian.

Sibakin at kasuhan na lamang ang mga sangkot sa katiwalian at huwag nang ilipat sa ibang rehiyon.

Ayon kay Morales, ang dapat imbestigahan ay ang mga ospital at doktor dahil doon nagaganap ang korupsiyon. Sang-ayon tayo riyan, pero hindi ‘yan mangyayari kung iniimbestigahan ng PhilHealth ang mga singil nila.

Samantala, ang mga dialysis center na paborito umano ng ilang opisyal ng PhilHealth ang nais imbestigahan ng Senado. Ito na ang kanilang pagkakataon upang linisin ang kanilang pangalan at imahe kung hindi sila sangkot sa katiwalian.

Gayunman, hindi lahat masaya sa bagong puwesto ni Gierran sapagkat may batas umano na ang dapat mamuno sa nasabing ahensiya ay may pitong taong karanasan sa public health at marunong sa pinansiyal na kalakaran na hindi nasunod kay Morales na dating sundalo.

Si Gierran ay abogado at accountant kaya siguro sa kanya humingi ng pagkakataon para linisin ang PhilHealth. Tingnan na lang natin. Huwag sana siyang makain ng bulok na sistema.

DFA Sec. Locsin at DND Sec. Lorenzana, pumalag sa pambu-bully ng China

ni Korina Sanchez - @Isyung 'K' | September 1, 2020

Nakakapanibago ang naririnig natin mula sa mga opisyal ng gobyerno na alam nating sumusunod sa yapak ni Pangulong Rodrigo Duterte kapag China ang pinag-uusapan.

Binatikos ni Defense Sec. Delfin Lorenzana ang pahayag ng China na itigil na ng Pilipnas ang mga ilegal na panghahamon sa kanila.

Ito ay matapos lumipad ng ating mga eroplano sa Panatag Shoal. Iginiit ni Sec. Lorenzana, na nasa loob ng ating Exclusive Economic Zone (EEZ) ang Panatag Shoal kaya may karapatan tayo. Ang China ang dapat tumigil sa pagbanta sa ating mga piloto dahil sila ang wala sa lugar sa pag-aangkin sa ating teritoryo.

Samantala, nagsampa na rin ng protesta ang Department of Foreign Affairs (DFA) sa China dahil sa pagkumpiska ng kagamitang pangisda ng ating mga kababayan noong Mayo. Hindi pa natin alam kung ibinalik na ang mga ito. Matagal na nating binabanggit ang patuloy na pagbanta ng China sa ating mga piloto, maging sa militar o sibilyan na eroplano.

Hindi rin pumayag si DFA Sec. Teodoro “Teddy Boy” Locsin, Jr., na maglagay ng tauhan ang Philippine Coast Guard sa Beijing dahil tila ibinibigay na ang soberanya ng karagatan sa China. Nais din ni Locsin na ipagbawal ang mga kumpanyang gumawa ng mga artipisyal na isla sa WPS na gumawa ng mga proyekto sa Pilipinas. Ang proyektong palakihin ang paliparan sa Sangley Point sa Cavite ay pinangungunhan ng isang kumpanya na ipinagbawal ng Amerika dahil sa nagbanggit na dahilan.

Bakit nga naman sila pa ang gagawa ng paliparan kung umaalma na tayo sa mga nilikhang isla sa karagatan? Sa tingin natin, hindi kakanselahin ni Pangulong Duterte ang kontrata sa China Communications Construction Co. sa kabila ng hiling ni Sec. Locsin.

Panahon na para palagan ang mga walang batayang pag-aangkin ng China sa ating teritoryo. Marami na silang nalikhang isla na maliwanag na para sa militar. May mga sundalo pa tayo sa Ayungin Shoal na nangangailangan ng mga supply na kadalasan ay hinaharang o ginugulo ng Chinese Coast Guard.

Gawing madalas na ang paglipad sa Panatag Shoal at iba pang lugar na nasa loob ng ating EEZ. Hindi lang naman tayo ang tumutulak sa China ngayon, kundi ang matagal na nating kaalyadong mga Amerikano, kahit tila ayaw ng Pangulo.