Lillard at Giannis ginitla agad ang 76ers ni Harden

ni Anthony E. Servinio @Sports | October 28, 2023

Naghatid ng matinding patikim ang Milwaukee Bucks sa 118-117 panalo sa bisitang Philadelphia 76ers sa pagpapatuloy ng NBA kahapon sa Fiserv Forum. Ipinasok ng pinakabagong Buck Damian Lillard ang kanilang huling 11 puntos upang maabot ang bagong marka 39 puntos na pinakamarami para sa unang laro suot ang uniporme.

Tinuldukan ni Lillard ang kanyang gabi sa dalawang paniguradong free throw na may 12 segundo sa orasan, 118-114. Lumipat siya sa Milwaukee noong Setyembre at iniwan ang Portland Trail Blazers, ang kanyang tahanan mula pa noong 2012.

Sumuporta si Giannis Antetokounmpo na may 8 ng kanyang kabuuang 23 puntos at 13 rebound sa 4th quarter. Sinayang ng Milwaukee ang 57-38 lamang sa second quarter at bumangon ang 76ers upang itayo ang 102-94 bentahe at iyan ang hudyat para kay Lillard at Giannis na magtrabaho.

Sa gitna ng pagbalik ng NBA ay naiwan ang tanong sa estado ni James Harden sa 76ers.

Hindi pinayagan ang bituin na sumama sa lakbay at lumakas ang usapin na ililipat siya sa bagong koponan.

Sa isa pang laro, bumawi ang Los Angeles Lakers at pinalamig ang ng Phoenix Suns, 100-95. Sumandal ang Lakers sa apat na free throw ni Anthony Davis sa huling 7 segundo upang maipreserba ang kanilang unang tagumpay.

Halimaw si Davis sa kanyang 30 puntos at 12 rebound habang 21 si LeBron James.

Natalo ang Lakers sa World Champion Denver Nuggets noong isang araw, 107-119, upang buksan ang ika-78 taon ng liga.

Nagbagsak ng 39 puntos at 11 rebound si Kevin Durant para sa Suns at lampasan ang alamat na si Hakeem Olajuwon sa ika-12 na pinakamaraming puntos sa NBA. Umakyat si Durant sa 26,949 kumpara sa 26,946 ni Olajuwon at susunod niyang hahabulin si Elvin Hayes na may 27,313.

Manila, sasalang sa FIBA 3x3 Al Bidda Challenger

ni Anthony E. Servinio @Sports | October 17, 2023

Mga laro ngayong Martes – Al Bidda Park

11:55 PM Antwerp vs. Manila

3:15 AM Utrecht vs. Manila

Daraan sa malupit na hamon ang Manila Chooks sa pagsalang nila ngayong araw sa 2023 FIBA3x3 Al Bidda Park Challenger sa Qatar. Nakatakdang harapin ng nangungunang koponang Filipino ang mga bigatin na Antwerp ng Belgium at Utrecht ng Netherlands sa Grupo B para makamit ang isa sa tatlong tiket patungong Manama Masters sa Nobyembre 16 at 17 sa Bahrain.

Lalong lumaki ang suliranin ng Manila Chooks matapos hindi isama sa listahan para sa torneo ang numero unong Pinoy 3x3 manlalaro Mark Jayven Tallo. Sa mga nakalipas na araw, nakita si Tallo na nag-eensayo sa Converge FiberXers ng PBA at palakihin ang spekulasyon na pinakawalan na siya ng Manila.

Dahil dito mas determinado sina Paul Desiderio, Dennis Santos, Marcus Hammonds at Tosh Sesay na kaya nilang itaas ang bandila sa gitna ng biglang pagliban ni Tallo. Unang haharapin ng #10 Manila ang #2 Antwerp simula 11:55 ng gabi, oras sa Pilipinas at #7 Utrecht sa 3:15 ng madaling araw ng Miyerkules.

Kung papalarin, makakaharap ng Manila sa quarterfinals ang isa sa mga papasok galing Grupo D na Futian at Wuxi ng Tsina at Lusail ng host Qatar. Ang quarterfinals ay magsisimula ng gabi ng Miyerkules.

Nasa Grupo C ang Amsterdam ng Netherlands, Sansar MMC Energy ng Mongolia at Al Bidda ng Qatar. Ang numero unong koponan Ub Huishan NE ay nasa Grupo A at hihintayin ang dalawang aangat mula sa qualifying round na maaaring Podgorica ng Montenegro, Brussels ng Belgium, Siliguri ng India, Wuhan ng Tsina at Doha Expo at Al Wakrah ng Qatar.

Lady Tigresses, mabangis sa teritoryo, Maroons, petmalu

ni Anthony E. Servinio @Sports | October 09, 2023

Mga laro sa Miyerkules – Adamson Gym

(Women’s)

9 a.m. UST vs. NU

11 a.m. DLSU vs. AdU

1 p.m. UP vs. FEU

3 p.m. UE vs. ADMU

Lalong humigpit ang maagang karera sa 86th UAAP Women’s Basketball Tournament matapos gulatin ng University of the Philippines ang defending champion National University, 72-69, sa University of Santo Tomas Quadricentennial Pavilion Linggo ng hapon. Hindi nagpahuli ang UST Tigresses at tinambakan ang De La Salle University, 91-57, at pumantay sa Lady Maroons sa 3-0.

Inaalagaan ng UP ang 70-67 lamang at isinalba sila ng kanilang depensa. Inagaw ni Christie Bariquit ang bola at agad ipinasa kay rookie Louna Ozar para sa paniguradong buslo na may dalawang segundo sa orasan, 72-67.

Nagsumite si Onoh ng 18 puntos at 15 rebound habang 13 puntos si Bariquit. Huling nanalo ang Lady Maroons sa Lady Bulldogs noong Agosto 29, 2011 sa kanilang pangalawang tapatan noong 74th UAAP, 60-59.

Nakaganti ang UST sa Lady Archers, ang koponan na tumalo sa kanila sa Final Four noong nakaraang taon. First quarter pa lang ay umarangkada ang Tigresses sa 35-12 bentahe at hindi na nila binitiwan ito.

Pinangunahan ni Ana Mae Tacatac ang atake sa kanyang 25 puntos galing sa pitong three-points. May apat pa siyang kakampi na may 10 o higit para sa balanseng opensa.

Sa unang laro, dalawang magkasunod na ang tagumpay ng Ateneo de Manila Blue Eagles at binaon ang wala pa ring panalong Adamson University, 69-59. Walang nakapigil kay sentro Kacey dela Rosa sa kanyang 28 puntos at 10 rebound.