Lady Blazers nakabawi, UST nagpatibay pa sa SSL

by Gerard Arce @Sports News | July 22, 2026

Photo: Sumiguro ng spike na hindi mahadlangan ng dalawang depensa nina #18 Michaella Ma at # 10 Jasmine Salvani ng Endurance College ang atake ni Fionna Inocentes ng College of Saint Benilde sa maaksiyong tagpo na ito sa Shakey's Super League National Invitationals Rising Stars, Elite Talent, Global Stage Collegiate division sa Ninoy Aquino Stadium kahapon. (Reymundo Nillama)

Mga laro ngayon 

(Ninoy Aquino Stadium)

1 p.m. - UST vs Southern Storm

3 p.m. - HCM vs Enderun

5 p.m. - CSB vs Letran 

Matagumpay na nakabalik sa panalo ang 5-time collegiate champion Saint Benilde Lady Blazers matapos pataubin ang Enderun Colleges sa 21-25, 27-25, 25-18, 25-22, habang humambalos ng ikatlong sunod na panalo ang UST Golden Tigresses sa 25-22, 25-17, 25-13 laban sa Letran kahapon sa 2026 Shakey’s Collegiate National Invitationals sa Ninoy Aquino Stadium sa Malate, Manila.

Kasunod ng pagkabigo sa unang set, nakipagbiradahan sa pagtabla ang Lady Blazers  at ibigay sa Lady Titans ang  ikatlong sunod na pagkatalo.  Pakitang gilas para sa Benilde si rookie winger Mhonniecka Soliven sa 20 puntos  sa  kompetisyong sinuportahan ng Shakey’s Pizza Parlor, Potato Corner, at R and B Milk Tea, upang makabawi sa 4-set na pagkatalo laban sa UST. “Marami pa ring bagay na nagla-lack pero I think mas magi-improve pa kami sa mga next games namin,” wika ni Soliven, na sinegundahan  ni Camila Bartolome sa 19 marka.

Bumira ng 36 kills ang Golden Tigresses kasama ang 9 aces, subalit muling kinakitaan ng maraming errors sa 23, na puntiryang mapanatili ang unbeaten marka laban sa Australian guest team Southern Storm Melbourne.

Ika-5 sunod na finals seat kinagat ng NU Bulldogs

by Gerard Arce @Sports News | May 3, 2026

Photo: Dobleng depensa ang ginawa ni #18 Regina Grace Jurado at #5 Avril Denise Bron ng UST Golden Tigresses sa palo ni #18 Arah Ella Panique ng NU Lady Bulldogs sa UAAP Season 88 Women's Volleyball Tournament sa Smart Araneta Coliseum kahapon. (Ben Maniclang via Bulgar)

Mga laro sa Miyerkules

(MOA Arena)

Separate ticket

Best-of-3 Finals

12 noon – FEU vs NU (Men Finals)

5 p.m. – DLSU vs NU (Women Finals)

Magkakaroon ng ikalawang pagkakataon ang NU Lady Bulldogs na madepensahan ang korona na kakagat sa ika-5 sunod na finals appearance matapos tuldukan ang ratsada ng UST Golden Tigresses sa 20-25, 26-24, 26-24, 25-21 kasunod ng mahusay na pagmamando sa opensa ni ace playmaker Camila “Lams” Lamina para harapin ang undefeated na DLSU Lady Spikers, kahapon sa UAAP Season 88 volleyball tournament stepladder semifinals sa Smart Araneta Coliseum.

Bukod tangi ang naging pagpapakita ng kahusayan sa pagpapatakbo ng opensa ng Lady Bulldogs ng 24-anyos na two-time Best Setter at sa eksaktong laro ng mga spikers na sina Arah Panique at Vange Alinsug, gayundin si middle blocker Chamy Maaya. “Very happy kase lahat kami talagang pinagtrabahuhan namin itong game na ito kase very crucial, do-or-die game and very happy ako sa performance ng team, sana magtuloy-tuloy siya hanggang championship,” pahayag ng 5-foot-7 setter na tubong Guimaras na namahagi ng 34 excellent sets, kasama ang anim na digs, at tatlong puntos, na makakalaban ang La Salle sa pang-apat na pagkakataon.

“Very challenging talaga yung La Salle,  kase kumpleto sila and kami naman all we have to do is back to basic and prepare kung ano talaga yung usual na preparation namin sa team at yung preparation. Iisang mindset pa rin, is to get the championship crown.”

Nanguna sa atake si dating Alas Pilipinas hitter Arah Panique sa 23 puntos na sinundan ni senior spiker Alinsug sa 18 marka habang umiskor si Maaya ng 14 puntos at Alexa Mata sa 9 puntos at apat na digs.