Trabaho o bitag? OFWs, mag-ingat sa pekeng recruitment

ni Leonida Sison @Boses | June 22, 2026

Ang pagkakasagip sa 78 overseas Filipino worker (OFW) applicants sa isang hindi rehistradong accommodation facility sa Makati ay muling nagpapakita na nananatiling malaking banta ang ilegal at mapanlinlang na recruitment sa mga kababayan nating naghahanap ng mas magandang kinabukasan.

Sa isinagawang operasyon ng Department of Migrant Workers (DMW) sa Barangay Palanan, Makati City, natagpuan ang 78 aplikanteng OFW na pansamantalang naninirahan sa isang pasilidad na walang kaukulang clearance permit mula sa ahensya. Lumabas sa imbestigasyon na ang mga aplikante ay inire-recruit ng isang corporate company para sa mga trabahong domestic worker sa ilang bansa sa Asya at Gitnang Silangan.

Ayon sa beripikasyon ng DMW, hindi rehistrado ang naturang pasilidad at nabigong sumunod sa itinakdang pamantayan para sa maayos na panunuluyan ng mga aplikante. Kabilang sa mga natukoy na problema ang kakulangan sa espasyo, mahinang bentilasyon, at mga kondisyon na maaaring maglagay sa panganib sa kaligtasan at kalusugan ng mga naninirahan dito.

Matapos ang rescue operation, agad na nakipag-ugnayan ang DMW sa Overseas Workers Welfare Administration (OWWA) upang mabigyan ng kinakailangang tulong ang mga nasagip na aplikante. Kabilang dito ang pansamantalang matutuluyan at pinansyal na ayuda habang inaasikaso ang kanilang kalagayan. Naging katuwang din sa operasyon ang pamahalaang lungsod ng Makati upang matiyak ang maayos na pagsasagawa ng pagliligtas at pag-aasikaso sa mga apektadong manggagawa.

Hindi lamang ito simpleng usapin ng paglabag sa mga regulasyon. Isa itong paalala kung gaano kadaling malagay sa alanganin ang mga manggagawang desperadong makahanap ng oportunidad sa ibang bansa. Habang patuloy na dumarami ang naghahangad ng trabaho sa ibayong dagat dahil sa kahirapan at kakulangan ng oportunidad sa loob ng bansa, mas nagiging mahalaga ang mahigpit na pagbabantay laban sa mga mapagsamantalang gawain.

Ang insidenteng ito ay malinaw na patunay na hindi sapat ang pangako ng trabaho kung nakompromiso naman ang kaligtasan at kapakanan ng mga aplikante. Dapat maging mas maagap ang mga otoridad sa pagtukoy sa mga kahina-hinalang operasyon, habang nararapat ding maging mas mapanuri ang publiko bago makipagtransaksyon sa mga recruitment agency.

Ang pangarap ng mga Pilipinong makaahon sa buhay ay hindi dapat nauuwi sa panganib, panlilinlang, o pag-abuso. Ang proteksiyon sa mga OFW ay hindi lamang responsibilidad ng gobyerno kundi tungkulin din ng buong lipunan upang matiyak na ang paghahanap ng mas magandang kinabukasan ay nagsisimula sa ligtas at makatarungang proseso.

Ina, saksi sa malagim na sinapit ng anak, kaso nauwi sa pagdududa

ni PAO Chief Persida Rueda-Acosta @Daing Mula sa Hukay | June 22, 2026

• 

ISSUE #400

Ang kuwentong aming ibabahagi sa araw na ito ay hango sa kasong may pamagat na People of the Philippines vs. Jimmy Daigan et al. (Criminal Case No. 2006-3564, October 26, 2011). Isang nagngangalang Elmer ang biktima, at sa hindi inaasahang pangyayari, nagtamo ng mga saksak si Elmer habang kasama niya ang kanyang ina na si Eliakima.

Sama-sama nating tunghayan ang mga pangyayaring humantong sa pagpanaw ni Elmer, gayundin ang naging desisyon ng hukuman sa kasong isinampa laban sa mga napagbintangan sa naturang krimen.

Isang sakdal para sa kasong Murder ang inihain sa Regional Trial Court (RTC) ng Gingoog City laban kina Jimmy, Jahnny, Ignacio at Jaime. Diumano, nagsabwatan at nagtulungan ang mga akusado, at sa pamamagitan ng kataksilan at planadong pag-atake, sinalakay at pinagsasaksak nila si Elmer na noo'y walang kamalay-malay, walang armas at walang kakayahang ipagtanggol ang kanyang sarili. Ang mga tinamong saksak ni Elmer ang naging sanhi ng kanyang agarang kamatayan.

Naganap ang malagim na insidente bandang alas-7:00 ng gabi, noong Nobyembre 6, 2006, sa isang barangay sa Lungsod ng Gingoog.

Bago pa man mabasahan ng sakdal ang mga akusado, naghain ang tagausig ng mosyon upang ibasura ang reklamo laban kina Jahnny, Ignacio at Jaime. Ito ay bunsod ng sinumpaang salaysay ni Eliakima, na umatras sa pag-uusig laban sa tatlong nabanggit na akusado.

Sa bisa ng kautusan ng RTC noong Disyembre 15, 2006, inaprubahan ang pagbasura sa reklamo laban kina Jahnny, Ignacio at Jaime. Dahil dito, si Jimmy na lamang ang naiwan bilang akusado sa kaso.

Batay sa panig ng tagausig, minamaneho ni Elmer ang isang traysikad bandang alas-7:40 ng gabi, noong Nobyembre 6, 2006. Sakay niya rito ang kanyang ina na si Eliakima, habang papalapit umano sila sa isang palimbagan, nakasalubong at nilampasan sila ng isang itim na motorsiklo. Pagkalampas umano nito, bigla umanong sinaksak ng pasaherong nakaupo sa likuran si Elmer gamit ang isang kutsilyo. Napasigaw na lamang umano si Elmer sa kanyang ina na siya ay nasaksak.

Diumano, tumigil pa ang naturang motorsiklo at tinitigan ng mga sakay nito ang mag-ina. Humingi naman ng saklolo si Eliakima, at du’n nagsimulang magtipon ang mga taong nasa paligid. Agad ding dinala ni Eliakima ang kanyang anak sa pagamutan, pero sa kasamaang-palad, binawian pa rin ng buhay si Elmer.

Noong ika-30 ng Enero 2008, pinatotohanan ni Eliakima sa hukuman na nakilala niya si Jimmy na siyang sumaksak sa kanyang anak. Bagaman inamin diumano ni Jimmy sa mga pulis ang naturang pananaksak, hindi ito nagbigay ng kanyang sinumpaang pag-amin.

Sa tulong at representasyon naman ni Manananggol Pambayan C.L. Flores-Gomez na mula sa aming PAO-Gingoog City, Misamis Oriental, pagsamo ng kawalan ng kasalanan ang iginiit ng depensa.

Diumano, si Jaime ang nagmamaneho ng motorsiklo na nakasalubong at nilampasan ang trisikad na minamaneho ni Elmer. Ang sakay ng naturang motorsiklo ay sina Nicanor, Jahnny at Jimmy. 

Ayon kay Jaime, hindi niya umano binagalan ang pagpapatakbo ng nasabing motorsiklo. Hindi rin umano sila huminto matapos nilang malampasan ang nabanggit na trisikad. Inamin din umano ni Jaime na inatras ang reklamo laban sa kanya matapos na mabayaran ng kanyang pamilya ang halaga ng sibil na pagbabayad-pinsala.

Ayon naman kay Jimmy, bandang alas-9:00 ng gabi, noong ika-6 ng Nobyembre 2006 nang mapadaan sila sa kalye, kung saan sinasabing sinaksak ang biktima. Galing umano sila sa isang kainan. Diumano, kinabukasan ay dinala sila sa Gingoog City PNP Station at kalaunan ay pinaratangan sa pamamaslang kay Elmer. 

Giit ni Jimmy, mabilis ang pagpapatakbo ni Jaime ng motorsiklo, kung saan, sila ay nakasakay. Kung kaya’t hindi niya nakita o nakilala ang nakasakay sa nabanggit na trisikad. Iniatras din umano ang reklamo laban sa kanyang mga kapwa-akusado matapos na makapagbayad ang mga ito sa ina ng biktima.

Pinatotohanan din ni Ignacio na nakaupo sa gitna ng motorsiklo si Jimmy at si Jahnny ang nasa dulo ng naturang sasakyan. Hindi umano niya nakita na mayroong sinaksak si Jimmy habang sila ay bumabaybay sa lansangan.

Noong ika-20 ng Mayo 2009, nang maghain ang tagausig ng mosyon na hinihiling ang pagbabasura sa reklamo laban kay Jimmy bunsod ng isinagawa na sinumpaang pahayag ni Eliakima ng kanyang pag-atras sa paghahabla kay Jimmy. 

Kaugnay nito, naghain din ang depensa ng motion for leave to file demurrer to evidence and to admit demurrer to evidence.

Hindi ipinagkaloob ng RTC ang mosyon ng magkabilang panig. Para sa hukuman ng paglilitis, malinaw na kinilala ni Eliakima sa kanyang naging testimonya na si Jimmy ang pumaslang kay Elmer. 

Matapos ang paglilitis sa kasong ito, nagbaba ng desisyon ang RTC na pinapawalang-sala si Jimmy. Hindi nakumbinsi ang hukuman ng paglilitis na naitaguyod ang pagkakakilanlan ng salarin sa krimen.

Para sa RTC ay malamang na hindi totoo na nakita ni Eliakima ang tao na sumaksak kay Elmer sa loob lamang ng dalawang minuto na sinasabi niya na tumigil ang motorsiklo kung saan nakasakay ang mga tumambang sa kanyang anak. Kung sakali man na totoo na tumigil nga ang nasabing motorsiklo nang may dalawang minuto, ‘di sana ay tumulong ang mga tao na nagsimula nang magtipon sa lugar na kanilang pinaghintuan.

Naging kapuna-puna rin sa hukuman ng paglilitis na hindi nakita ni Eliakima ang mismong pagkakasaksak kay Elmer gayung dapat ay nakita niya sa punto pa lamang na sasaksakin ang kanyang anak sapagkat nakaupo umano siya sa harap ng nabanggit na trisikad. Maaari na ipagpalagay na napagtanto lamang ni Eliakima na sinaksak si Elmer matapos niyang marinig ang sigaw nito.

Napuna rin ng hukuman ng paglilitis na pinanindigan ni Eliakima ang kanyang alegasyon na si Jimmy ang salarin matapos ng diumano ay pag-amin ni Jimmy sa mga pulis. Subalit, walang sinumpaang-salaysay ng pag-amin si Jimmy. Ang higit pa na ikinalungkot ng hukuman ng paglilitis ay ang pag-aatras ni Eliakima sa reklamo laban sa mga kapwa-akusado ni Jimmy matapos na siya ay mabayaran ng mga ito. Sapagkat hindi nakapagbayad si Jimmy, itinuloy ni Eliakima ang kaso laban sa kanya. Nagbago ang ihip ng hangin at iniatras ni Eliakima ang reklamo laban kay Jimmy matapos ang pagsasaalang-alang sa pakikipag-areglo ng nasabing akusado.

Malinaw sa hukuman ng paglilitis na hindi naitaguyod ng tagausig ang pagkakakilanlan ng salarin. Kung bigo ang tagausig sa aspeto na ito, nararapat lamang na ipawalang-sala ang akusado. Pagpapaalala ng hukuman ng paglilitis na hindi maaaring iasa ang pag-uusig sa kahinaan ng depensa ng akusado, bagkus sa lakas, tibay at lamang na ebidensya ng nag-uusig.

Binigyan-diin din ng RTC na hindi maaaring ibatay ang paghahatol sa kasong ito sa pabagu-bagong testimonya ng ina ng biktima, lalo pa at taliwas ang kanyang salaysay sa naging testimonya ni Jaime na nagmaneho ng motorsiklo. Hindi na rin nakuwestyon pa ng tagausig si Jaime sa kadahilanang naghain na sila ng mosyon upang ibasura ang reklamo laban sa huli.

Ang kabiguan ng tagausig na itaguyod nang higit pa sa makatuwirang pagdududa ang pagkakakilanlan ng salarin maging ang pagkakasala ni Jimmy ang siyang basehan upang magbaba ang RTC ng hatol ng pagpapawalang-sala. Ang nasabing desisyon ay nilagdaan noong ika-26 ng Oktubre 2011. Hindi na inapela o kinuwestyon ang nasabing desisyon ng hukuman.

Hindi matatawaran ang hinagpis ni Eliakima bilang isang nagdadalamhating ina na naghahanap ng hustisya para sa kanyang pinaslang na anak na si Elmer. Gayunman, sa ngalan ng katarungan, hindi maaaring isantabi ang pamantayang “higit sa makatuwirang pagdududa” sa pagtukoy sa tunay na salarin. Dahil hindi naitaguyod ng tagausig ang pagkakakilanlan ng salarin, minarapat ng hukuman na palayain si Jimmy.

Sa kabilang banda, sa daigdig ng mga yumao, ang daing ni Elmer ay mapapatahimik lamang kapag ang tunay na nagkasala sa kanya ay napanagot na.

Katapatan ng Diyos at karupukan ng tao

ni Fr. Robert Reyes @Kapaayapaan / Patakbo-takbo | June 21, 2026

Dalawang magkasabay na pagdiriwang ang naganap noong nakaraang Biyernes ng alas-sais ng gabi. Hindi tayo nakadalo sa ikalawang araw ng Nobenaryo para sa Ina ng Laging Saklolo dahil sa pagtanggap kay Obispo Elias Ayuban bilang pansamantalang administrador ng Diyosesis ng Parañaque. Siya ang pansamantalang mamumuno sa diyosesis kasunod ng pagreretiro ni Obispo Jesse Mercado.

Dahil dito, hindi tayo nakadalo sa ikalawang Misa Nobenaryo sa Parokya ng Ina ng Laging Saklolo sa Project 8, Quezon City. Pinangunahan ang Misa ni Padre Arlo Yap, SVD. Tulad ng kanyang nakasanayan, naging masigla at puno ng pag-asa ang pagdiriwang. Bagama’t “Kahirapan” ang tema ng ikalawang araw, hindi ito nagtapos sa kalungkutan kundi sa pag-asa.

Magkahalong lungkot at saya ang naramdaman ng mga dumalo sa pagtanggap sa bagong administrador ng Diyosesis ng Parañaque. May lungkot dahil sa pagreretiro ni Obispo Mercado, ngunit may galak din dahil sa bagong pag-asa at mga pangakong hatid ng bagong pamunuan sa ilalim ni Obispo Ayuban.

Mahigit dalawampu’t isang taon nanungkulan si Obispo Mercado, katulad ni Obispo Honesto Ongtioco ng Diyosesis ng Cubao. Sila ang mga kauna-unahang obispo ng dalawang diyosesis na nabuo nang hatiin ang dating dambuhalang Arkidiyosesis ng Maynila sa panahon ni Jaime Cardinal Sin. Malalaki ang hamon ngunit malaki rin ang mga pangakong kinaharap ng mga bagong diyosesis noong panahong iyon.

Sa pagdiriwang ng Pista ng Ina ng Laging Saklolo, binabalikan ng mga mananampalataya ang masasaya at malulungkot na karanasan, mga tagumpay at kabiguan sa loob ng animnapung taon. Sa paggunita sa anim na dekadang kasaysayan ng parokya, muling inuunawa at isinasabuhay ang mahahalagang aral na iniwan ng nakaraan.

Samantala, habang isinasagawa ang ikalawang Misa Nobenaryo at ang pagtanggap kay Obispo Ayuban sa Parañaque, lumabas ang balita tungkol sa planong paglagda ng Estados Unidos at Iran sa isang Memorandum of Understanding sa Switzerland upang wakasan ang digmaan sa pagitan ng dalawang bansa.

Damang-dama hindi lamang sa Gitnang Silangan kundi sa buong mundo ang epekto ng sigalot na ito. Bagama’t bumaba ang presyo ng langis, hindi na ito bumalik sa dating antas. Nanatiling mataas ang presyo ng gasolina, krudo at iba pang pangunahing bilihin, kaya lalong bumigat ang buhay para sa marami, lalo na sa mga mahihirap.

Ayon sa ulat, nilagdaan ni Pangulong Donald Trump ng Estados Unidos ang kasunduan noong nakaraang Miyerkules sa G7 Summit sa Versailles, France. Ayon naman kay Mohammad Bagher Ghalibaf ng Iran, ang kasunduan ay tanda ng “pagkabigo” ng Estados Unidos.

Isa sa mga agarang epekto ng kasunduan ang pag-alis ng naval blockade ng Estados Unidos sa Strait of Hormuz. Nakasaad din sa dokumento na hindi na babalik sa dating kalagayan bago sumiklab ang digmaan. Maniningil na umano ang Tehran para sa paggamit ng Strait of Hormuz. Sa panig naman ng Estados Unidos, itinuturing na malaking tagumpay ang pagsang-ayon ng Iran na bawasan ang kanilang stockpile ng enriched uranium.

Kasama rin sa usapan ang pagbuo ng isang $300 bilyong reconstruction fund para sa muling pagtatayo ng mga nasirang gusali at imprastraktura sa Iran. Samantala, iginiit ni Prime Minister Benjamin Netanyahu na hindi pa aalis ang Israel sa Lebanon habang patuloy nitong tinutugis ang Hezbollah.

Malinaw na sa kabila ng tigil-putukan, pansamantala lamang ito. Katulad ng anumang pamayanang Kristiyano, hindi nawawala ang mga hamon at pagsubok sa landas ng pananampalataya at paglilingkod.

Habang ipinagdiriwang ng Parokya ng Ina ng Laging Saklolo ang animnapung taon ng biyaya at paglilingkod sa Diyos at kapwa, nananatili ang tanong: matapos ang anim na dekada ng pagbubuo ng sambayanang Kristiyano-Katoliko, higit ba tayong namulat, nakaunawa at naging handang harapin ang mga hamon ng tunay na pagsunod kay Kristo?

Ang sagot ng mga parokyano ng Ina ng Laging Saklolo ay malinaw: “Oo. Sisikapin namin, nang may buong tiwala at tapang, na maglingkod sa Diyos, sa kapwa, sa dukha at sa kalikasan sa tulong at gabay ni Kristo at ng Kanyang Ina, si Maria ng Laging Saklolo. Anuman ang mangyari—magkamali man, magkasala o manghina—naririyan lagi si Kristo at ang Kanyang Ina upang gumabay at umalalay sa amin.” Amen.