St. Clare vs. Fatima handa sa winner-take-all final

ni Anthony E. Servinio @Sports | December 4, 2023

Mga laro ngayong Lunes – Buddhacare

9 AM St. Clare vs. OLFU (Jr)

10:30 AM UMak vs. OLFU (W)

Maghaharap sa 21st National Athletic Association of Schools, Colleges and Universities (NAASCU) Men’s Basketball Super Finals ang defending champion St. Clare College of Caloocan at Our Lady of Fatima University matapos talunin ang magkahiwalay na kalaro sa Final Four noong Huwebes sa Amoranto Sports Complex. Ang winner-take-all ay gaganapin sa Disyembre 12 sa FilOil EcoOil Centre.

Unang pinauwi ng #1 St. Clare ang #4 Enderun Colleges, 71-59, ang dalawang paaralan na lumaban para sa titulo noong nakaraang taon. Bumanat ng 15 puntos si Best Player Drick Acosta at tumanggap ng tulong mula kay Megan Galang na may 12 at Babacar Ndong na may 11.

Sa kabilang serye, madaling tinapos ng #2 Fatima ang #6 AMA University, 67-51.

Nagsabog ng 17 puntos ang reserba at Best Player Gab Gotera upang suportahan ang higanteng si Mamadou Toure na may 18.

Sa Juniors, sinelyuhan ng #1 New Era University unang tiket sa Super Final at pinabagsak ang #4 Philippine Christian University, 69-51. Nagtala ng bihiring triple double na 11 puntos, 14 rebound at 10 tapal si Divine Adili upang mahirang na Best Player.

Maghihintay pa ng kalaro ang Junior Hunters at binigo ng #3 at defending champion St. Clare ang #2 Fatima, 86-78. Namayani si Best Player Chris Ian Dumancas sa kanyang 21 puntos.

Sa Women’s, pasok na ang #1 at defending champion Enderun at tinambakan ang PCU, 85-34. Best Player si Kyla Laylo na may 14 puntos.

Ang mga knockout para sa nalalabing upuan sa Super Finals ay ngayong Lunes sa Buddhacare Gym sa Quezon City. Unang maghaharap ang Junior Saints at Junior Phoenix sa 9:00 at susundan ng Lady Herons at Lady Phoenix sa 10:30 ng umaga.

Eridanus at Chiefs positibo at masaya sa NBL-Pilipinas

ni Anthony E. Servinio @Sports | December 4, 2023

Binuksan ng Eridanus Santa Rosa ng positibo ang kanilang kampanya sa 2023 National Basketball League (NBL-Pilipinas) Chairman’s Cup sa pinaghirapang 104-99 panalo sa bisita at kapitbahay Tatak GEL Binan sa Santa Rosa Multi-Purpose Complex. Umuwi ding masaya ang Muntinlupa Chiefs matapos magwagi sa Circus Music Festival Makati, 102-96.

Sumandal ang Santa Rosa sa mga pandiin na puntos ni John Lester Maurillo sa huling minuto upang masugpo ang paghabol ng Tatak GEL. Nagtapos na may 30 puntos si Maurillo habang 17 ang nagbabalik na si Alex Junsay at maghari sa tinaguriang Laguna Clasico.

Naglabas ng bagong armas ang Binan na sina Art Patrick Aquino na may 29 at Michael Joseph Homo na may 25 subalit kinapos sila ng tulong sa mga beteranong kakampi. Umabot sa semifinals ang Tatak GEL sa nakaraang President’s Cup.

Tampok ang ilang manlalaro mula sa dating kinatawan ng lungsod, pinagpag ng Chiefs ang mapagal na simula at bumangon sa likod ng mainit na si Buboy Barnedo. Mula doon ay siniguro ni point guard Francis Abarcar na hindi masasayang ang trabaho ng kakampi at ipinasok ang mga mahalagang puntos sa fourth quarter upang mapiling Best Player.

Nanguna si Barnedo na may 33 puntos habang 14 si Abarcar. Nagtala ng 14 para sa Makati si Rommel Saliente na sinundan nina PJ Intia at Jexter Tolentino na parehong may 12.

Ang iba pang kalahok ngayong President’s Cup ay ang defending champion Taguig Generals, CamSur Express at Boss ACE Zambales Eruption. Ginaganap ang mga laro tuwing Biyernes at Linggo.

DLSU humirit ng Game 3, LATVIA champion sa WBPT

ni Anthony E. Servinio @Sports | December 4, 2023

Mga laro sa Miyerkules - Araneta

12 PM UST vs. NU (W)

4 PM DLSU vs. UP (M)

Inilabas ng De La Salle University Green Archers ang lahat na nalalabing pana upang sugpuin ang University of the Philippines, 82-60, sa Game 2 ng 86th UAAP Men's Basketball Finals kahapon sa Araneta Coliseum. Gaganapin ang winner-take-all Game 3 sa Miyerkules sa parehong palaruan.

Kabaligtaran ng kanilang unang tapatan noong Nob. 29 na nagtapos sa 97-67 pabor sa Fighting Maroons, naglabas ng nahigpit na depensa ang DLSU at nilimitahan ang UP sa tig-11 puntos sa huling tatlong quarter. Kumuha ang Green Archers ng hindi inaasahang lakas mula kay Francis Escandor na pumukol ng apat na tres para lumamang sa halftime, 44-38.

Hindi na pinaporma ang UP at walang nakapigil sa arangkada ng DLSU. Isang balanseng atake ang nagsigurado na may laro sa Miyerkules.

Samantala, ipinakita nina Tina Graudina at Anastasija Samoilova ng Latvia ang kanilang katatagan bilng magpartner ng 7 taon nang gapiin ang tambalan nina Daniela Alvarez Mendoza at Tania Moreno Matveeva ng Spain, 21-14, 21-18 upang tanghaling kampeon ng pinakabagong women's team ng Volleyball World Beach Pro Tour Challenge kahapon sa world-class Nuvali Sand Courts sa Sta. Rosa City.

“We’re very happy that we’ve become even more solid as a pair, although we needed to make some adjustments in both sets,” ayon sa 6-foot na si Graudina, 25, na nagsimulang maglaro kasama si Samoilova noong 2016, at magwagi ng 2x sa European Championships 2019 sa Moscow at 2022 sa Munich.

Bilang ranked world No. 14, ang duo ang crowd favorite sa world class courts ng Nuvali kung saan si Graudina ang malakas ang hatak sa fans, naglaro sa semifinal at final na may benda sa kanang pilik-mata.