VP Sara, na-bash ng netizens dahil ‘di sinita sina Atty. Topacio at Cong. Suntay sa kanyang Women’s Month speech

ni Pablo Hernandez @Prangkahan | March 10, 2026

KAPAG GUILTY SA KASO, MALAMANG MABANSAGANG 18 'MARITES ANG 18 EX-MARINES – Sinampahan ni ML Partylist Rep. Leila de Lima ng kasong cyberlibel sa National Bureau of Investigation (NBI) ang 18 ex-marines at ang kanilang abogadong si Atty. Levi Baligod dahil sa umano’y paninirang ginawa sa kanyang pagkatao. Kaugnay ito ng paratang na kabilang umano siya sa mga nabigyan ng maleta na naglalaman ng pera mula sa kickback ni dating Ako Bicol partylist Rep. Zaldy Co.

Kung mapatunayang guilty ang 18 ex-marines sa pagdinig ng kaso, maaari na rin silang bansagang 18 “marites,” dahil ikinalat umano nila ang kuwento na tumanggap si Cong. De Lima ng maletang may pera kahit hindi naman pala. Boom!

XXX

DAPAT HINDI NA NAGMENSAHE NG PAGBATI SA WOMEN'S MONTH SI VP SARA KUNG HINDI RIN LANG NIYA BABATIKUSIN SINA CONG. SUNTAY AT ATTY. TOPACIO NA NAGSALITA NG KABASTUSAN SA KABABAIHAN – Sa mensahe ng pagbati ni Vice Pres. Sara Duterte para sa Women’s Month nitong nakalipas na March 8, 2026, inulan siya ng batikos mula sa netizens dahil wala siyang sinabi tungkol sa umano’y pambabastos ni Quezon City 2nd District Rep. Bong Suntay kay actress Anne Curtis, gayundin ni Atty. Ferdinand Topacio sa kapatid nitong si Jasmine Curtis.

Para sa ilang netizens, kung wala rin lang siyang balak punahin sina Duterte Diehard Supporter (DDS) Cong. Suntay at DDS Atty. Topacio, mas mabuti pang hindi na siya naglabas ng pagbati para sa Women’s Month. Dahil dito, batikos tuloy ang inabot niya sa social media. Period!

XXX

DAPAT IPATAWAG AT IMBESTIGAHAN NI LTO CHIEF MACALINAO AT NG SANGGUNIANG PANGLALAWIGAN NG BULACAN SI NANCY CARVAJAL DAHIL SA PINOST NITONG PEKENG LTO SHOW CAUSE ORDER – Dapat ipatawag at imbestigahan nina Land Transportation Office (LTO) chief Markus Lacanilao at Bulacan Vice Gov. Alex Castro, presiding officer ng Sangguniang Panlalawigan, si DZME anchor Nancy Carvajal na unang nag-post sa social media ng umano’y pekeng LTO show cause order na naglalaman ng mga plaka ng sasakyan ng Bulacan Provincial Government na nasangkot daw sa road rage.

Dahil sa naturang post, may mga nanira na kay Gov. Daniel Fernando matapos kumalat ang paratang na convoy umano ng lalawigan ang nang-harass kay presidential son Vinny Marcos, kahit wala namang ganitong insidente na nangyari sa NLEX.

Para hindi na ito maulit, dapat sampahan ni LTO chief Lacanilao si Carvajal ng kasong falsification of public documents. Sa panig naman ng Sangguniang Panlalawigan, maaari silang magpasa ng resolusyon upang sampahan siya ng kasong cyberlibel dahil sa umano’y paninirang idinulot ng kanyang post laban sa Bulacan Provincial Government, kung saan inilabas pa ang mga plate number ng mga sasakyang sinabing sangkot sa road rage kahit hindi naman. Period!

XXX

SI GEN. HANSEL MARANTAN NA ANG RD NG PNP-REGION 4-A KAYA TAPOS NA ANG HAPPY DAYS NG MGA 'TONGPATS COLLECTOR' SA CALABARZON – May bagong Regional Director (RD) ang PNP-Region 4-A sa katauhan ni Brig. Gen. Hansel Marantan.

Dahil kilala si Gen. Marantan bilang disiplinadong pulis, asahan nang tapos na ang “happy days” ng mga umano’y “tongpats collector” sa CALABARZON (Cavite, Laguna, Batangas, Rizal, at Quezon). Kabilang umano sa mga ito sina alyas “Tsan Parak,” “Obet,” “Adlawan,” “Dimapeles,” “Rico,” “Jong,” “Hero,” “Minong,” “Kevin,” “Ady,” “Milan,” “Sandoval,” “Marcial,” “Jak,” at “Jame,” pati na si “Panganiban.” Boom!

Mga sakop na produkto at serbisyo ng OTOP Program

ni Atty. Persida Rueda-Acosta @Magtanong Kay Attorney | March 10, 2026

Dear Chief Acosta,

Nabalitaan ko ang tungkol sa One Town, One Product (OTOP) Philippines Program ng ating gobyerno. Ano ang mga produkto o serbisyo na kasama sa nasabing OTOP Philippines Program? Salamat po. — Dannie Yan

---

Dear Dannie Yan,

Matatagpuan ang kasagutan sa iyong katanungan sa Seksyon 6 ng Republic Act (R.A.) No. 11960, na kilala rin sa tawag na “OTOP Philippines Act.” Ayon dito:

“Section 6. Products and Services Covered. - The OTOP Philippines Program shall cover products and skills-based services known to an area or locality. This shall include, but not limited to, the following products and services:

(a) Processed foods such as fruits and nuts, local delicacies, juices, wines, tea, and other beverages, pastries and baked goods, preserved food sauces, cakes and dessert products, food supplements, and culinary-based specialty products;

(b) Agricultural-based products such as coffee, cacao, and other agricultural produce, agri-processed products like processed meats, coconut oil, and preserved and processed seafood products;

(c) Home and fashion, and creative artisanal products such as gifts, souvenir items, furniture, ornaments, houseware, garments, fabrics, and textiles;

(d) Arts and crafts such as coco coir, weaves, bamboo products, paper artistry, and wood;

(e) Skills-based services and other products such as hilot or traditional Filipino massage, sculpting, essential oils and other wellness products, industrial goods, soaps, and other personal care goods, and cosmetics; and

(f) Such other goods and services that are eligible under Section 7 of this Act and as approved by the DTI.”

Ayon sa polisiya ng ating gobyerno, kailangang bumuo ng isang pambansang ekonomiya na umaasa sa sarili, malaya, at epektibong kontrolado ng mga Pilipino, sa pamamagitan ng mga patakaran at programa na nagtutulak sa inklusibong lokal na aktibidad sa ekonomiya at nagpapalakas ng pambansang paglago ng ekonomiya. Kinikilala rin ng Estado ang napakahalagang papel ng pribadong sektor at negosyo, at ang pangangailangang magbigay ng mga insentibo upang mapalakas ang pagsulong sa mga negosyo, lalo na ng mga tinatawag na micro, small and medium enterprises (MSMEs).

Dahil dito, ang One Town, One Product (OTOP) Philippines Program ay itinatag at idineklarang maging isa sa mga programa ng gobyerno upang pasiglahin at hikayatin ang paglago ng mga MSMEs.

Kung kaya, bilang kasagutan sa iyong katanungan, nabanggit sa taas ang mga produkto at serbisyo na maaaring mabilang o makasama sa OTOP Philippines Program.  Ang ilan dito ay (a) mga naprosesong pagkain; (b) mga produktong pang-agrikultura;  (c) produktong pambahay at pang-moda, at mga malikhaing produktong artisanal; (d) mga sining at kasanayan; (e) serbisyong nakabatay sa kasanayan at iba pang kaugnay na mga produkto; at (f) iba pang mga produkto at serbisyo na karapat-dapat sa ilalim ng Seksyon 7 ng R.A. No. 11960 at ayon sa inaprubahan ng Department of Trade and Industry.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Kumpletong aklat para sa bawat mag-aaral sa 2026

ni Kuya Win Gatchalian @Win Tayong Lahat | March 10, 2026

Sa loob ng mahabang panahon, hindi nakatanggap ang ating mga mag-aaral ng kumpletong mga aklat na may mahalagang papel sa kanilang pagkatuto. Ngayong taon, naglaan tayo ng sapat na pondo upang matiyak na bawat mag-aaral ay magkakaroon ng kumpletong mga aklat.

Sa ilalim ng 2026 national budget, P19.5 bilyong pondo ang inilaan natin para makumpleto ang mga textbook na kinakailangan ng ating mga mag-aaral mula Kindergarten hanggang Grade 12.

May ilang mga pag-aaral na ang kakulangan ng mga aklat sa ating mga mag-aaral ay nagpakita ng pinsala sa kanila.

Ayon sa 2024 Southeast Asia Primary Learning Metrics, 42% ng mga mag-aaral sa Grade 5 ang nagbabahaginan ng mga aklat. Kung ihahambing sa datos noong 2019, lumalabas na halos kalahati ng mga mag-aaral ang nawalan o kinulang ng mga aklat noong 2024.

Kung susuriin pa natin ang datos ng 2024 SEA-PLM, lumalabas na 23% ng mga mag-aaral ang gumagamit ng aklat kasama ang isa pang mag-aaral, samantalang 19% ang gumagamit ng aklat kasama ang dalawa o higit pang mag-aaral. Lumabas din sa SEA-PLM na para sa mga mag-aaral na Pilipino, ang pagkakaroon ng mga aklat ay maiuugnay sa mas mataas na marka sa reading at mathematics.

Sa 2022 Programme for International Student Assessment (PISA) naman, lumabas na 55% ng ating mga 15-taong gulang na mga mag-aaral ay pumapasok sa mga paaralan, kung saan iniulat ng punong-guro ang kakulangan sa mga educational materials, kabilang ang mga textbook, information and communications technology (ICT) equipment, library o laboratory materials.

Samantala, 49% naman ang mga nasa paaralan kung saan iniulat ng mga punong-guro nila ang kakulangan o mababang kalidad ng mga educational materials.Noong 2024, iniulat din ng Second Congressional Commission on Education (EDCOM II) ang mga hamong may kaugnayan sa kakulangan ng mga textbooks.

Lumabas sa pag-aaral ng Komisyon na mula 2014 hanggang 2023 ay 27 textbooks lamang ang nabili ng Department of Education (DepEd).

Ayon pa sa Komisyon, mga mag-aaral sa Grade 5 at 6 lamang ang nagkaroon ng kumpletong mga textbooks.Pinuna rin ng EDCOM II na nitong mga nagdaang taon, hindi lubos na nagamit ng DepEd ang pondong inilaan para sa pagbili ng mga textbooks.

Matatandaang iniulat ng Komisyon na sa P12.65 bilyong inilaang pambili ng textbooks mula 2018 hanggang 2022, 951.9 milyon o pitong porsyento lamang ang na-disburse. Kamakailan ay sinimulan na ng DepEd ang mga reporma pagdating sa pagbili ng mga textbooks.

Kung dati ay umabot lamang sa 27 na mga titles ng aklat ang nabili ng DepEd, umabot na ito sa 105 noong 2025. Ngayong taon na naglaan na tayo ng pondo para tiyaking bawat mag-aaral ay may aklat, mahalagang matiyak ng DepEd ang pagpapatuloy ng mga repormang maghahatid ng kumpletong mga textbook sa ating mga mag-aaral.

Patuloy naman nating babantayan kung paano ginagastos ng pamahalaan ang 2026 national budget, lalo na ang makasaysayang pondong inilaan natin para sa sektor ng edukasyon.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com