ni VA - @Sports | July 16, 2020
Muling magkakaroon ng tsansa ang E-Gilas Pilipinas na magningning sa international scene matapos na ihayag ng International Basketball Federation (FIBA) ang balak nilang idaos ang susunod nilang esports tournament.
Pagkaraan ng matagumpay na pagdaraos nila ng inaugural FIBA E-Sports Open noong nakaraang buwan, sinabi ng world basketball governing body na mas maraming koponan ngayon ang nagpahayag ng interes upang sumali.
Buhat sa naunang 17 national federations na lumahok sa unang pagdaraos ng event, umabot sa 35 ang bilang ng mga bansang naghayag ng interes na sumali para sa misyong tulungan ang FIBA na palaganapin ang sports sa virtual arenas.
Nagsipanalo ang Philippines (Southeast Asia), Australia (Oceania), Saudi Arabia (Middle East), Argentina (America) at Italy (Europe)sa kanilang mga conferences ng FIBA event na ipinalabas sa mahigit 100 bansa at nakakuha ng mahigit na 5 million social media views.
"It's been a huge success and a lot of fun and we are excited about the prospects of more FIBA esports competitions in the future," ayon kay FIBA Secretary General Andreas Zagklis. "FIBA's Central Board identified this esports initiative as relevant and consistent with the strategic aim to enlarge the FIBA family and this event has been great for the promotion of basketball."
Samantala, siniguro ng E-Gilas na binubuo nina Rial “Rial” Polog Jr., Aljon “Shintarou” Cruzin, Custer “Aguila” Galas, Philippe “Izzo” Herrero IV at Clark Banzon na handa silang muling maging kinatawan ng bansa kasunod ng kanilang pagwalis sa Indonesia upang makopo ang Southeast Asian title sa nakaraang FIBA Esports Open.