P1 dagdag-pasahe sa jeep, tablado — LTFRB

ni Mai Ancheta @News | August 15, 2023

Bigo ang transport group na mapagbigyan sa hirit na dagdag-pisong rush hour rate upang makatulong kahit papaano sa epekto ng mataas na presyo ng produktong petrolyo.

Ayon kay Land Transportation Franchising and Regulatory Board (LTFRB) Chief Teofilo Guadiz III, mataas ang pisong hirit na dagdag-pasahe tuwing rush hour.

Mabigat aniya para sa mga sumasakay sa mga pampublikong sasakyan gaya ng jeepney ang pisong dagdag sa pamasahe.

"I think it's too high even one peso for me is a little bit too high. Masyadong masakit sa bulsa

ng mga mananakay," ani Guadiz.

Matatandaang naghain ng petisyon ang ilang transport group para sa dagdag-pisong singil tuwing rush hours upang hindi umano malugi ang mga pampublikong tsuper sa matinding trapik.

Batay sa petisyon, ang paniningil ng surge charge ay mula 4:00am-8:00am; at 5:00pm hanggang 8:00 pm.

Sinabi ni Guadiz na wala ng bisa ang petisyon dahil naghain ng panibagong petisyon ang transport groups para sa dagdag-P2 sa pasahe.

Nakatakdang dinggin ng LTFRB sa susunod na linggo ang panibagong petisyon ng transport groups para sa hirit na dalawang pisong dagdag-pasahe .

Transport groups sa LTFRB: P2 dagdag-pasahe sa jeep

ni Mai Ancheta @News | August 12, 2023

Humingi ng dagdag na P2 sa pamasahe sa jeep ang apat na transport groups upang makabawi sa mataas na presyo sa produktong petrolyo.

Naghain ng petisyon nitong Biyernes ng umaga sa tanggapan ni Land Transportation Franchising and Regulatory Board (LTFRB) Chairman Teofilo Guadiz III ang mga grupong Liga ng Transportasyon at Operators sa Pilipinas, FEJODAP, PISTON, at Stop and Go Movement upang payagan silang magdagdag ng P2 singil sa pamasahe sa unang apat na kilometro ng biyahe.

Ayon kay LTOP President Orlando Marquez, hindi na nila kayang balikatin ang sunud-sunod na pagtaas sa presyo ng produktong petrolyo na umabot na aniya ng P10 ang itinaas kada litro simula noong Hulyo.

Tumaas din umano nang sobra-sobra ang presyo ng piyesa ng mga sasakyan na dagdag-pahirap sa mga tsuper at operators

Humiling ng pang-unawa si Marquez sa mga pasahero dahil nahihirapan na sila sa walang tigil na pagtaas sa presyo ng petrolyo at halos kakarampot na lamang ang naiuuwing kita sa kanilang pamilya.

Kapag maaprubahan ang petisyon ng public transport groups, magiging P14 na ang minimum na pamasahe mula sa kasalukuyang P12.

Oil price hike, non-stop — tsuper.. Piso dagdag-pasahe

ni Mai Ancheta @News | August 1, 2023

Dahil sa sunud-sunod na pagtaas sa presyo ng produktong petrolyo, hihirit ng pisong dagdag sa pasahe ang mga tsuper ng pampasaherong jeep.

Dudulog ngayong Martes sa Land Transportation Franchising and Regulatory Board (LTFRB) ang grupong Pasang Masda para ipaalala ang hirit nilang pisong surcharge sa pasahe tuwing rush hour para makabawi sa non-stop oil price hike.

Ang pisong surcharge ay sisingilin lamang tuwing rush hour mula alas-5 ng madaling-araw hanggang alas-8 ng umaga, at tuwing alas-5 ng hapon hanggang alas-8 ng gabi.

Ayon kay Obet Martin ng Pasang Masda, malaking tulong ang pisong surcharge tuwing

rush hour upang makabawi naman sila kahit papaano sa apat na sunud-sunod na taas-presyo sa petrolyo.

Ngayong Martes, panibagong pasanin ang sasalubong sa mga motorista dahil sa mahigit tatlong pisong dagdag-presyo kada litro sa produktong petrolyo.