Oil price hike, non-stop — PISTON... P10 dagdag-pasahe sa jeep

ni Jeff Tumbado @News | July 22, 2026

Photo: PISTON / File

Nagprotesta ang transport group na PISTON sa harap ng isang gasolinahan sa East Avenue sa Quezon City nitong Martes upang aprubahan ang hiling nilang dagdag-pasahe.

May nakabinbing petisyon ang PISTON sa Land Transportation Franchising and Regulatory Board (LTFRB) na humihiling ng P10 dagdag sa kasalukuyang minimum na pasahe sa jeepney, na magtataas sa minimum fare mula P13 hanggang P23.

Ayon kay PISTON President Mody Floranda, nakabatay ang kanilang panukalang dagdag-pasahe sa patuloy na pagtaas ng presyo ng langis.

Ani Floranda, umaabot sa P1,850 kada araw ang lugi ng mga tsuper dahil lamang sa gastos sa krudo. Kailangan umano nilang kumita ng humigit-kumulang P4,600 kada araw upang mabayaran ang krudo at boundary.

Patuloy din umanong tumataas ang halaga ng mga piyesa ng sasakyan.

Muli ring nanawagan ang PISTON sa pamahalaan na ibasura o suspendihin ang Oil Deregulation Law, na anila'y isa sa mga dahilan ng patuloy na pagtaas ng presyo ng petrolyo.

P11 dagdag-presyo sa diesel... Piso taas-pasahe — LTFRB

ni Jeff Tumbado @News | July 19, 2026

Photo: File

Isusumite na ng Land Transportation Franchising and Regulatory Board (LTFRB) sa Department of Transportation (DOTr) ang rekomendasyon na P1 na dagdag-pasahe sa mga pampasaherong jeepney kasunod ng inaasahang P11 taas-presyo sa diesel.

Kabilang din sa panukala ang P10 kada litro na fuel subsidy para sa mga kwalipikadong operator at tsuper.

Ayon kay LTFRB Chairman Vigor Mendoza II, tugon ito sa direktiba ng DOTr na pag-aralan ang dagdag na ayuda para sa transport sector.

Suportado ng LTFRB ang hiling ng mga transport group dahil sa inaasahang pagtaas ng presyo ng langis bunsod ng tensyon sa pagitan ng Estados Unidos (US) at Iran.

Naniniwala rin ang ahensya na hindi gaanong mararamdaman ang dagdag-pasahe dahil sa ipinatupad na umento sa minimum na sahod sa National Capital Region (NCR).

Maaari namang bawiin ang dagdag-pasahe kapag bumaba ang presyo ng langis, ngunit kailangan muna itong dumaan sa public hearing.

P7 dagdag-singil sa kuryente, napigil ng DOE

ni Gina Pleñago @News | May 6, 2026

Photo: Energy Secretary Sharon Garin - Department of Energy Philippines

Napigil ng Department of Energy (DoE) ang pagtaas ng P7 sa presyo ng kuryente. 

Ayon kay Energy Secretary Sharon Garin, bunsod ito ng kanilang mga inisyatibo bilang kanilang pangunahing mandato.

Aniya, mapabababa pa ang singil kung aalisin ang value-added tax (VAT) nito.

Subalit diin ng Kalihim, kailangang pag-aralang maige ang panukalang VAT removal para matukoy kung ikabubuti ito ng buong bansa. 

Bagama’t suportado, sinabi ni Garin na hindi ang DoE ang magdedesisyon nito kundi ang Economic managers at Kongreso dahil may mas malawak itong epekto sa ekonomiya.

Kailangan kasi aniyang masiguro na balanse ang mababang electricity costs sa ibinibigay na serbisyo-publiko ng gobyerno.

Nitong Lunes, naghain si Senadora Risa Hontiveros ng Senate Bill 2076 na layong alisin ang VAT sa electricity systems loss na kasalukuyan nating pinapasan.