Malabon, Mandaluyong, Cavite, Parañaque, nabiktima... Shooting threat sa mga iskul, non-stop

ni Gina Pleñago @News | July 23, 2026

Photo: File / PNP Parañaque City Police Station

Pinabulaanan ng Parañaque City Police ang nakababahalang viral post sa Facebook na may planong pamamaril sa mga paaralan sa Lungsod ng Parañaque.

Ayon kay Parañaque CPS P/Colonel Nicolas Piñon, noong Martes ng gabi, agad silang nagsagawa ng validation at verification at lumabas na negatibo at walang ebidensiyang sumusuporta sa bantang pamamaril.

Kahit walang batayan, sinabi ng hepe ng Parañaque Police na hindi nila babalewalain at lalo pang paiigtingin ang pagbabantay sa seguridad at koordinasyon sa pamunuan ng mga eskwelahan para masiguro ang kaligtasan, hindi lamang ng mga mag-aaral at guro, kundi ng publiko. 

Una nang binulabog ng shooting at bomb threats ang ilang eskwelahan sa Malabon, Mandaluyong at Cavite.

MMDA enforcer nag-counterflow sa EDSA Bus Lane, hulicam

ni Gina Pleñago @News | July 19, 2026

Photo: SS / MMDA

Ipinost mismo ng Metropolitan Manila Development Authority (MMDA) sa kanilang official Facebook page ang viral video na hindi itinatago ang pagkakamali ng isang MMDA traffic enforcer na nag-counterflow sa EDSA bus lane ng Sabado ng madaling-araw.

Ayon kay MMDA Chairman Atty. Don Artes, hindi tino-tolerate ng ahensiya ang mga maling gawain ng sinuman sa tauhan nito. Hindi rin aniya itinatago ang mga maling gawain ng mga kawani ng ahensya para hindi pamarisan.

Aniya, mahaharap sa multang P5,000 dahil sa paggamit sa bus lane at administrative sanction ang enforcer na si alyas Jeffrey.

Sa video makikita ang tila pagpupumilit na maisiksik ng traffic enforcer ang kanyang motorsiklo na nagkataong hindi sila magkasya ng isang sasakyan na nagsasabi pa sa kanya na. 'hindi kasya 'yan... balik ka balik… bumalik ka ru'n, ikot ka ru'n,’ subalit hindi agad sinunod ang payo kundi pilit pa ring iginigilid ang motorsiklo.

Sabi pa ng kasalubong na sasabit ang sasakyan niya kung ipipilit ng traffic enforcer na manatili, at sinabihan siya na mukhang nakainom ng alak.

Nakarating na rin sa Land Transportation Office (LTO) ang ginawang paglabag ng traffic enforcer na inisyuhan na ng show cause order.

2 bebot, timbog din... Delivery rider, kulong sa P6.8M shabu

ni Gina Pleñago @News | July 18, 2026

Photo: File

Natiklo sa buy-bust operation ng Makati City Police Station-Drug Enforcement Unit (SDEU) ang isang delivery rider at dalawang babae na may dalang mahigit P6.8 milyong halaga ng hinihinalang shabu sa Makati City, Biyernes ng madaling-araw.

Ayon kay Southern Police District (SPD) Director P/BGen. Glenn Oliver Cinco, dinakip ang mga suspek na pawang high value individuals (HVIs) na sina alyas Wewel, 30; Aiko, 20; at Aneng, 33, alas-3:42 ng madaling-araw ng Hulyo 16, sa Kalayaan Ave., Brgy. Singkamas, Makati.

Sinasabing nakipagtransaksyon ang rider sa poseur-buyer habang ang nasa 1,010 gramo ng shabu na nagkakahalaga ng P6,868,000 ang iniabot ng dalawang babaeng suspek.