2 bus driver, postibo sa droga

ni Gina Plenago @News | October 28, 2026

Photo: Random drug testing. PITX / MMDA

Dalawang bus driver ang nagpositibo sa paunang random drug test ng Metropolitan Manila Development Authority (MMDA) sa PITX at tatlong bus terminal sa Cubao noong Oktubre 26, bilang paghahanda sa Undas 2026.

Sa 118 driver na sinuri, 116 ang negatibo. Pansamantalang pinagbawalang bumiyahe ang dalawa habang hinihintay ang confirmatory test. Kapag nakumpirmang positibo, babawiin ng Land Transportation Office (LTO) ang kanilang lisensya.

Sinuri rin ng mga awtoridad ang fire extinguishers at emergency equipment ng mga bus upang matiyak ang kaligtasan ng mga pasahero.

Indian, initak ng holdaper, utas

ni Gina Plenago @News | October 28, 2026

Photo: Circulated

Patay ang isang Indian national matapos pagsasaksakin ng itak nang manlaban sa holdaper sa Brgy. Alabang, Muntinlupa City nitong Lunes ng umaga.

Naaresto sa follow-up operation ng Southern Police District (SPD) ang 50-anyos na suspek na si alyas Jun, na kamakailan lamang nakalaya sa bilangguan.

Narekober sa suspek ang duguang itak at sling bag ng biktima na naglalaman ng P750.

Nanawagan si SPD Director P/BGen. Rodel Pastor sa publiko na agad iulat ang anumang kahina-hinalang aktibidad.

Bike patrols, ikakalat sa mga sementeryo

ni Gina Plenago @News | October 27, 2026

Photo: PNP NCRPO

Ide-deploy sa mga sementeryo sa darating na Undas ang bike patrols para sa mas mabilis na pagresponde at mas madaling galawan sa mga makikipot na eskinita sa mga sementeryo.

Inatasan ng National Capital Region Police Office (NCRPO) ang mga district commander nito na mag-deploy ng bike patrols, bukod sa foot patrols ngayong Undas.

Ayon kay NCRPO Officer-in-Charge P/Brig. Gen. Christopher Abrahano, inatasan din ang mga commander na tiyakin ang sapat na police visibility at maayos na deployment ng tauhan sa mga sementeryo at paligid nito.

“Dapat nakikita, nalalapitan, at mabilis rumesponde ang ating kapulisan. Sa pamamagitan ng bike patrols, mas magiging maagap ang ating mga tauhan sa pagbibigay ng tulong at sa pagtiyak ng payapa at maayos na paggunita ng Undas,” dagdag pa ni NCRPO chief.