Parusa sa pagtatak ng organic sa mga produktong ‘di sertipikado

ni Atty. Persida Rueda-Acosta @Magtanong Kay Attorney | November 19, 2025

Dear Chief Acosta,

Napapansin ko na dumarami na ang tumatangkilik at bumibili ng mga organic na produkto sa mga grocery stores. Madalas din ay tinitingnan ko kung may tatak na organic ang isang produkto bago ko ito bilihin. Dahil dito, nais ko sanang itanong kung may batas ba patungkol sa mga dapat nakalagay sa tatak ng mga organic na produkto? Salamat sa pagbibigay atensyon sa katanungan ko. -- Sabel

---

Dear Sabel,

Matatagpuan ang kasagutan sa iyong katanungan sa Seksyon 18 ng Republic Act (R.A.) No. 10068, o “Organic Agriculture Act of 2010”, na inamyendahan ng R.A. No. 11511. Ayon dito:

“Section 18. Labeling of Organic Produce. - The label of organic produce shall contain the name, logo or seal of the OCB and the accreditation number issued by the BAFS. The organic label/mark shall also include the trade name, as defined by pertinent domestic property rights laws, and the address of origin of the produce.

Products which are certified and guaranteed by third-party organic certification system and the PGS shall be allowed to be labelled and sold as organic.”

Mababasa sa nabanggit na probisyon ng batas na ang tatak ng mga organic na produktong agrikultural ay dapat maglaman ng pangalan, logo o selyo ng organic certifying body (OCB), at ang numero ng akreditasyon na ibinigay ng Bureau of Agriculture and Fisheries Standards (BAFS). Ang nasabing organic na tatak o marka ay dapat ding kasama ang trade name at ang lugar na pinagmulan ng produkto. Karagdagan dito, ang mga produktong sertipikado at ginagarantiyahan ng isang third-party organic certification system at ng participatory guarantee system (PGS) ay dapat payagang matatakan at ibenta bilang organic.

Maliban dito, nais din namin ipaalam sa iyo na may karampatang parusa ang pagtatak ng organic sa mga produktong hindi sinertipika bilang organic ng mga OCB. Ito ang nakasaad sa inamyendahang Seksyon 27 ng R.A. No. 10068:

“SEC. 27. Penal Provisions and Other Penalties. - Any person who willfully and deliberately: x x x

(c) mislabels or claims that the product is organic when it is not in accordance with the existing standards for Philippine organic agriculture or this Act shall, upon conviction, be punished by imprisonment of not less than one (1) month nor more than six (6) months, or a fine of not more than Fifty thousand (P50,000.00), or both, at the discretion of the court. If the offender is a corporation or a juridical entity, the official who ordered or allowed the commission of the offense shall be punished with the same penalty. If the offender is in the government service, he/she, in addition, be dismissed from the office: Provided, That any OBC found to have issued a certification to a farm or producer established to be not compliant with any of the PNS for organic agriculture or with the provisions of this Act, shall be penalized by the BAFS as follows:

(1) First Offense: Written warning

(2) Second offense. Suspension of accreditation.”

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Video ni Zaldy Co, taob sa ‘pasabog’ ni Sen. Imee vs. PBBM

ni Pablo Hernandez @Prangkahan | November 19, 2025

TAOB ANG VIDEO NI ZALDY CO SA ‘PASABOG’ NI SEN. IMEE LABAN KAY PBBM -- Taob ang video na “pasabog” ni former Cong. Zaldy Co sa isyung nagpa-insert si Pres. Bongbong Marcos (PBBM) ng P100 billion sa Bicam at pagtanggap ng Presidente at pinsan nitong si former Speaker Martin Romualdez ng kickback sa flood control projects, sa pinasabog na isyu ni Sen. Imee Marcos na sugapa umano sa droga ang mag-asawang PBBM at First Lady Liza Araneta-Marcos, at ang kanilang mga anak.

Mas pinag-uusapan na kasi ngayon ng publiko ang atake ni Sen. Imee sa kanyang kapatid na Presidente, hipag at kanyang mga pamangkin kaysa sa atake ni Zaldy Co sa magpinsang PBBM at Cong. Romualdez, period!

XXX

ATE IMEE NA NIYA ANG NAGSANGKOT SA KANYA SA PAGGAMIT DAW NG DROGA KAYA’T DAPAT MAGPA-HAIR FOLLICLE DRUG TEST NA SI PBBM -- Ang panawagan noon ng magkakapatid na sina Vice Pres. Sara Duterte, Mayor Baste Duterte at Cong. Pulong Duterte kay PBBM na magpa-hair follicle drug test ito ay dinededma lang noon ng Presidente sa katuwirang fake news daw ang pagsasangkot sa kanya sa paggamit umano ng droga.

Ngayong mismong kapatid na niya, ate niya na si Sen. Imee ang nagsangkot sa kanya sa paggamit daw ng droga, ay dapat na talaga siyang magpa-hair follicle test at ipakita sa publiko ang resulta nito, boom!

XXX

MALI ANG AKALA NG MGA DDS NA PAMUMUNUAN NG INC ANG PEOPLE POWER PARA MAPATALSIK SI PBBM, HINDI PALA -- Hindi na itinuloy ng kapatiran ng Iglesia ni Cristo (INC) ang pangatlong araw sana nilang protesta kontra-corruption sa Quirino Grandstand sa kadahilanang pagod na raw ang kanilang mga kapatid sa relihiyon, at nasabi naman na raw nila ang mga dapat nilang sabihin na panawagan sa pamahalaan na panagutin lahat ng mga sangkot sa flood control projects scam.

Hindi man aminin ay tiyak masakit sa damdamin ng mga Duterte Diehard Supporters (DDS) ang desisyong ito ng INC dahil akala nila pamumunuan ng relihiyong ito ang People Power para patalsikin sa puwesto si PBBM, iyon pala ay hindi, kasi nga matapos sabihin ni INC spokesman Edwil Zabala na ang protesta ay laban lang sa corruption at hindi para pabagsakin ang Marcos administration, ay stop na rin ang pang-ikatlong araw nilang protesta kontra-katiwalian, period!

XXX

KARAMIHAN NG UPI MEMBERS, MGA DATING MAY PUWESTO SA DUTERTE ADMIN AT MARAHIL KAYA NANAWAGAN SILANG MAG-RESIGN SI PBBM PARA KAPAG SI VP SARA DUTERTE NA ANG PRESIDENTE, MAY PUWESTO ULI SILA SA GOBYERNO -- Nanawagan ang mga miyembro ng United People’s Initiative (UPI) kay PBBM na mag-resign na sa puwesto para si Vice Pres. Sara Duterte-Carpio na ang magpatakbo ng bansa.

Para sa kaalaman ng publiko, karamihan sa mga miyembro ng UPI ay dating may mga posisyon sa panahon ng Duterte admin, at natanggal sila sa kanilang mga puwesto nang pumasok ang Marcos admin.

So, alam na ngayon ng ating mga kababayan kaya nananawagan ang UPI na mag-resign na si PBBM, kasi nga naman kapag si VP Sara na ang pangulo, magkakaroon uli sila ng mga posisyon sa Sara Duterte admin, boom!

Planong long-term solution kontra-baha, tiyakin sana sa buong bansa

ni Leonida Sison @Boses | November 19, 2025

Kung may isyung dapat matagal nang nabigyan ng seryoso at pangmatagalang solusyon, ito ang baha, isang problemang taun-taon na lang ay parang normal na laging nararanasan ng taumbayan. 

Kaya ngayon ay iginiit ng Quezon City Government na panahon na para tumodo sa science-based at long-term solution, isa itong hakbang na dapat noon pa sana ginawa, hindi lang sa QC, kundi sa buong bansa. 

Sa pagbubukas ng QC Flood Summit 2025, sinabi ni Mayor Joy Belmonte na ang paulit-ulit na pagbaha ay nagiging “collective trauma” na ng mga residente, lalo na sa mga lugar na madalas nang binabaha. 

At hindi ito exaggeration, dahil noong 2024, mahigit 22,000 pamilya ang inilikas sanhi ng mga bagyong nagdulot ng malawakang pagbaha, pruweba na matindi na ang pinsalang idinulot ng problema sa tubig-baha at kapabayaan. 

Sa 142 barangay ng lungsod, 59 ang classified bilang flood-prone, na halos kalahati. 

Gaya ng sinabi ng alkalde, hindi sapat ang patchwork fixes o iyong tagpi-tagping solusyon lang. Kailangan ng sistemang nakabatay sa datos at pangmatagalang pagpaplano para mabawasan ang pinsala ng matinding pag-ulan. 

Nasa sentro ngayon ng QC ang Drainage Master Plan, na nabuo kasama ang UP Resilience Institute. May 15 priority projects ito na layong pabagalin ang agos ng tubig, dagdagan ang water absorption, at bawasan ang flood volume. Kasama rito ang nature-based solutions tulad ng permeable pavements, rainwater harvesting systems, detention basins at retention ponds, at mas maayos na drainage systems. 

Habang inaasahang matatapos sa 2026 ang malaking retention pond sa Quezon Memorial Circle, na kayang kumolekta ng 928 cubic meters ng tubig. Operational naman ang detention basins sa community courts ng Gloria 2 at Palmera Homespace 3, na nagsisilbi ring public spaces. 

Samantala, ang high-capacity drainage systems sa West Avenue at Fairview ay nakakatulong na sa pagpapadaloy ng tubig kapag malakas ang ulan. 

Patuloy din ang kampanyang “Tanggal Bara, Iwas Baha,” at ang rehabilitasyon ng San Juan River at bahagi ng Tullahan River hanggang sa La Mesa Dam, sa tulong ng MMDA at San Miguel Corporation, at walang gastos ito para sa lungsod. 

Pero hindi lang imprastraktura ang dapat pagtuunan. Dagdag ni Belmonte, ang baha ay hindi hiwalay sa climate change. Kaya naman ang QC ay nagpatupad ng ban sa single-use plastics, paglipat sa electric vehicles, mga gusali ng gobyerno na solar-powered, circular waste solutions, at pinalakas na early warning systems sa ilalim ng I-Rise Up Program, na naghatid ng zero casualties noong Super Typhoon Uwan. 

Malinaw na ang baha ay hindi simpleng problema ng pagbara dulot ng malalakas na pag-ulan. Ito ay suliranin ng pamamahala, urban planning, at climate adaptation. Kung hindi ito aayusin nang buong puso at tapang, paulit-ulit tayong lulubog at malulunod sa baha na nagiging normal na lang. 

Panahon nang gawing seryosong misyon ang pagkontrol sa matinding pinsalang dulot ng mga unos at sakuna, at hindi lamang gawing seasonal inconvenience ang pagbibigay ng atensyon dito. Nararapat na maging handa ang buong bansa, para wala na muling pamilya o kababayan ang mapeperhuwisyo at mawawalan ng buhay ng dahil lamang sa baha.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com