Mavs, tumabla sa Jazz, 76ers, 2-0 na vs. Raptors

ni Anthony E. Servinio - @Sports | April 20, 2022

Binura ng Dallas Mavericks ang lamang ng bisitang Utah Jazz sa huling 8 minuto upang makamit ang 110-104 panalo at itabla ang seryeng best-of-seven, 1-1 sa NBA Western Conference Playoffs, kahapon sa American Airlines Center. Humataw ang Philadelphia 76ers kontra Toronto Raptors, 112-98, upang gawing 2-0 ang kanilang serye sa Eastern Conference.

Binuo ni Donovan Mitchell ang three-point play para sa 93-86 lamang subalit sinagot ito ang 10 sunod-sunod na puntos ng Mavs upang lumamang, 96-93. Tinabla muli ng tres ni Royce O’Neale ang laban, 96-96, ngunit bumira ng dalawang three-points si Maxi Kleber, 102-96, at mula roon ay kumapit ang Dallas sa huling 3 minuto.

Kinailangang mag-doble ng trabaho ang Mavs at hindi naglaro sa pangalawang sunod na araw sina Luka Doncic at Tim Hardaway Jr. Bumuhos ng 41 puntos si Jalen Brunson habang nag-ambag ng 25 puntos si Kleber bilang reserba.

Sa first quarter lang pinaporma ng 76ers ang bisitang Raptors at lumobo ng 29 ang kanilang lamang bago magwakas ang 3rd quarter, 95-66, matapos ang magkasunod na three-points nina Matisse Thybulle at Tyrese Maxey. Sinubukan humabol ng Toronto sa likod nina Chris Boucher at OG Anunoby subalit masyadong malaki ang agwat at kapos sa panahon.

Double-double ang kandidato para sa Most Valuable Player Joel Embiid na 31 puntos at 11 rebound. Sinuportahan siya nina Maxey na may 23 puntos at Tobias Harris na may 20 puntos.

Pinagpag ng Golden State Warriors ang malamyang simula at tinambakan ang bisitang Denver Nuggets, 126-106, para umabante ng 2-0 sa serye. Ipinasok ng Nuggets ang unang 7 puntos ng laro at pinalaki nila ito sa 43-31 sa 2nd quarter subalit mula roon ay puro Warriors ang gumawa ng ingay at nagtayo ng 112-89 lamang na may 6:45 pa sa orasan.

Embiid, Giannis at Jokic, mga NBA MVP finalists

ni Anthony E. Servinio - @Sports | April 19, 2022

Itinanghal na 2021-22 NBA MVP finalists ng liga sina reigning NBA Most Valuable Player Nikola Jokic ng Denver, Joel Embiid ng Philadelphia 76ers at Giannis Antetokounmpo ng reigning champion Milwaukee Bucks, kahapon.

Ang trio ng global superstar big men ang nag-angat sa kontensiyon ng kani-kanilang team at naghahabulan din para sa NBA crown ngayong playoffs.

Samantala, bumangon ang #2 Boston Celtics at inagaw ang panalo sa #7 Brooklyn Nets, 115-114, sa 2nd day ng NBA Playoffs, kahapon sa TD Garden. Pinatunayan din ng Miami Heat at Phoenix Suns bakit sila ang mga numero-unong koponan sa Eastern at Western Conference, matapos tambakan ang hiwalay na katunggali sa Game One ng seryeng best-of-seven.

Nasayang ang 39 puntos ni Kyrie Irving, kasama ang tres na nagbigay sa Nets ng 114-111 lamang at 45 segundo ang nalalabi. Sinagot ito ng shoot ni Brown upang lumapit, 113-114, at nagmintis ng tres si Kevin Durant kaya itinakbo agad ng Boston ang bola para ipanalo ang laban at makauna sa seryeng best-of-seven.

Bumanat ng walong 3-points ang reserbang si Duncan Robinson at nagtapos na may 27 puntos sa 23 minuto upang itulak ang Miami sa 115-91 tagumpay sa bisitang #8 Atlanta Hawks. Gumawa ng 13 puntos si Robinson sa 4th quarter kung saan umabot ng 32 ang lamang, 110-78, at 3:30 sa orasan.

Nalimitahan si Trae Young sa 8 puntos lang, lahat sa first half at hindi na siya naglaro sa 4th quarter. Malaking bagay din ang pagliban ni Clint Capela na napilay ang tuhod sa Play-In noong Sabado kung saan nanalo ang Hawks sa Cleveland Cavaliers, 107-101, para sa karapatang harapin ang Heat.

Hawak ng Phoenix ang lamang sa buong 48 minuto upang makamit ang 110-99 tagumpay sa bisitang #8 New Orleans Pelicans. Kumuha ng lakas ang Suns kay Chris Paul na may 30 puntos at 10 assist at Devin Booker na may 25 puntos.

Sinimulan ng #3 Milwaukee Bucks ang pormal na depensa ng korona sa 93-86 pagwagi sa bisitang #6 Chicago Bulls. Namuno sa Bucks si Giannis Antetokounmpo sa 27 puntos at 16 rebound kahit hindi siya pumuntos sa 4th quarter.

Dobleng dagok dinanas ng Rockets vs. Raptors

ni Anthony E. Servinio - @Sports | August 14, 2021

Nagwagi ang Toronto Raptors sa Houston Rockets, 92-76, sa pagpapatuloy ng 2021 NBA Summer League kahapon sa Thomas & Mack Center ng Las Vegas, Nevada. Ito ang unang talo ng Rockets at tumanggap pa ng dobleng dagok matapos mapilay sa hita ang Fil-Am gwardiya Jalen Green ng pangalawang napili sa nakaraang NBA Draft.

Nadulas at inilabas si Green na may 2:28 na nalalabi sa second quarter at lamang ang Raptors, 43-33. Bago siya napilay, nakapagtala na siya ng 13 puntos sa 12 minuto ng aksyon at humahabol ang Houston matapos lumamang ang Toronto, 41-19.

Dahil sa talo, lumabo ang pag-asa ng Rockets na maglaro para sa kampeonato ng torneo. Ang dalawang may pinakamataas na kartada matapos ang apat na laro ang maghaharap sa Agosto 18 at may limang koponan na walang pang talo.

Nanguna para sa Toronto si Ish Wainwright na may 20 points buhat sa apat na tres. Sinundan siya ni Precious Achiuwa na may 19 puntos. Sinubukan buhatin ni Josh Christopher ang Rockets sa kanyang 14 puntos habang nag-ambag ng 11 si Marcus Foster. Haharapin ng Houston ang Orlando Magic sa kanilang huling laro sa Lunes at tututukan ang paghilom agad ni Green na gumawa ng pinagsamang 48 puntos sa kanilang mga panalo sa Cleveland Cavaliers at Detroit Pistons.

Ang Boston Celtics ang unang umakyat sa 3-0 sa bisa ng kanilang 108-71 tagumpay laban sa Orlando Magic sa malapit na Cox Pavilion. Nasa 2-0 ang New Orleans Pelicans, Miami Heat, Minnesota Timberwolves, Utah Jazz at ang Sacramento Kings tampok si assistant coach Jimmy Alapag.

Samantala, tinambakan ng Seattle Storm ang Connecticut Sun, 79-57, upang maging kampeon ng pinakaunang WNBA Commissioner’s Cup sa Footprint Center na bagong pangalan ng Phoenix Suns Arena. Ang Commissioner’s Cup ay bagong pakulo ng WNBA bilang bahagi ng pagdiriwang ng ika-25 taon ng liga.