Pinoy nagbunyi nang agawin ni Tugawin ang Stage 8 win

ni Elyssa Nichole @Sports | May 8, 2026

Photo: MPTC

Paoay, Ilocos Norte - Nagsaya ang Pinoy cycling fans na nag-abang sa finish line matapos sikwatin ni Ryan Tugawin ng Excellent Noodles Cycling team ang Stage 8 ng MPTC Tour of Luzon 2026 na nagsimula sa Pagudpud, Ilocos Norte at nagtapos sa San Agustin Church dito, kahapon.

Nasaksihan ng mga fans ang husay ni 36-year-old Tugawin sa rematehan ng makipagkaskasan laban sa apat na siklistang nakatunggali kasama sina Ariff Noor Roseidi ng  National Team Malaysia at pambato ng Go for Gold, Marvin Mandac na dumating ng segundo at tersero ayon sa pagkakasunod.

Kasama nina Tugawin, Roseidi at Mandac na tumawid sa meta sina Charles Olsen Ferrer ng CCN at Nash Joshua Lim ng MPT Drivehub Cycling team sa karerang suportado ng  Metro Pacific Tollways Corp., Philippine Sports Commission, (PSC) sa pamumuno ni chairman Patrick "Pato" Gregorio.

Nakapagtala ng pare-parehong tiyempo na 3 oras, 16 minuto at 58 segundo sa 148.4 kms Pagudpud - Paoay sina Tugawin, Roseid, Mandac, Ferrer at Lim, dinaanan nila ang lugar na Bangui, Burgos, Pasuquin, Bacarra, Batac at Currimao. "Nu'ng last 40 kilometers nag-usap-usap na kaming mga Pinoy para hindi foreigner ang manalo, kaya nag-breakaway kami tapos dumikit, tapos ayun, nagkabanatan ulit," sabi ni Tugawin.

Huling Pinoy na nagwagi ng lap ay si Emmanuel Dave Montemayor ng Go for Gold Philippines sa Stage 3 at pagkatapos ay dinomina na ng foreign riders ang karera.

Samantala si Russian rider Nikita Shulchenko ng LCW UAE Cycling team ang may hawak ng yellow jersey at isusuot nito ngayong araw sa 142.60 Stage 9 Laoag - Candon City.

Nasa pangalawa pa rin sa Individual General Classification si Syrian cyclist Yousef Ibraheim Alrefai ng LSW UAE Cycling team habang pangatlo si Mervin Corpuz ng 7Eleven Cliqq Roadbike Philippines. 

Iinit ang pagbabalik ng riders sa Stage 8 ng Tour of Luzon

ni Elyssa Nichole @Sports | May 7, 2026

Photo: Nagpahinga sa Pagudpud, Ilocos Norte ang mga siklista tampok ang apat na nangungunang riders ng MPTC Tour of Luzon na sina  Joe Dae Yeong, Nikita Shulchenko, Yousef Ibrahim Alrefai at Pinoy Mervin Corpuz kahapon. (mptcpix) 

Pagudpud, Ilocos Norte - Mas iinit ang labanan para sa overall title pagbalik padyak ng mga siklista sa Stage 8 ng MPTC Tour of Luzon 2026, ngayong araw.

Nagkaroon ng isang araw ng pahinga kahapon kaya asahang lahat ng teams ay nagplano kung paanong diskarte ang gagawin paglarga ng 157.40 kms. na magsisimula sa Pagudpud at magtatapos sa Paoay, Ilocos Norte.

Halos lahat ng mga mata ng coaches at siklista ay nakatutok sa may suot ng yellow jersey at Stage 7 Individual Time Trial winner, Russian rider Nikita Shulchenko ng LCW UAE Cycling Team.

Nakalikom si Shulchenko ng kabuuang 19 oras, 31 minuto at 20 segundo sapat upang ikahon ang top spot ng Individual General Classification,  nakaungos ito ng isang minuto at 38 segundo sa kakamping si Syrian cyclist Ibrahiem Yousef Alrefai.

Malaki ang lamang ni Shulchenko sa ibang katunggali, bentahe siya ng apat na minuto at 15 segundo sa third placer sa IGC na si Pinoy rider Mervin Corpuz ng 7Eleven Cliqq Roadbike Philippines.

Nasa pang-apat na puwesto ang teammate ni Corpuz na si Ronnilan Quita at naghahabol ito sa overall leader ng 4 na minuto at 46 segundo.

Pero ayon kay Head Commissaire Lorenzo "Jun" Lomibao Jr. hindi pa masasabi kung sino ang mananalo dahil mas mahirap ang pedalan sa huling 7 stages na natitira at isa sa tinutukoy niya ay ang akyatin sa Bessang Pass sa Cervantes, Ilocos Sur sa Stage 10.

Isang Hors Categorie climb ang Bessang Pass na tinatayang may 30 kilometers na akyatin.  "Anything can happen," patungkol ni Commissaire 2 Sunshine Joy Vallejos sa Bessang Pass.

May 148.4 kilometers ang Stage 8 Pagudpud - Paoay, Ilocos Norte ang bakbakan ngayong araw.

Shulchenko dumalawa na sa podium ng Tour of Luzon

ni Elyssa Nichole @Sports | May 6, 2026

Photo: Ang Stage 7 Individual Time Trial Podium Winners na sina 1. #123 Shulchenko, Nikita (LCW) 00:30:06 (gitna) 2. #126 Alrefai, Yousef Ibrahiem (LCW) (kaliwa) at 3. #91, MIN, Kyeong Ho (SCT) sa 22.9 km Pagudpud Municipal Hall-to-Bangui, Pagudpud, Ilocos Norte sa idinaraos na MPTC Tour of Luzon 2026 na inihatid ng Philippine Sports Commission kaagapay ang Philippine Olympic Committee at PhilCycling. (mptctolpix)

Pagudpud, Ilocos Norte - Umalagwa sa overall si Russian rider Nikita Shulchenko ng LCW UAE Cycling Team matapos sikwatin ang panalo sa Individual Time Trial Stage 7 ng MPTC Tour of Luzon kahapon.

Inirehistro ni Shulchenko ang 30 minuto at anim na segundo sa 22.9-kilometer lap sa event na suportado ng Metro Pacific Tollways Corp., Manny V. Pangilinan Group of Companies at Philippine Sports Commission, (PSC) sa pamumuno ni chairman Patrick "Pato" Gregorio.

Second best time naman ang naitala ng teammate ni Shulchenko na si Ibrahiem Yousef Alrefai, 49 segundo ang lamang ng una sa pangalawa, tumersero si Seoul Cycling Team bet at Stage 6 winner Kyeong Ho Min.

Pangalawang podium finish na ni Shulchenko, una ay noong pumangalawa siya kay Stage 1 ruler Alrefai.

Lalong lumaki ang lamang ni Shulchenko sa second placer na si Alrefai sa Individual General Classification matapos makalikom ng 19 oras, 31 minuto at 20 segundo, nakaungos ito ng isang minuto at 38 segundo.

Nagkaroon ng pagbabago sa pangatlong puwesto sa IGC matapos umakyat ni Pinoy rider Mervin Barnachea Corpuz ng 7-Eleven Cliqq Roadbike Philippines pero medyo malaki ang hahabulin na oras kay Shulchenko kaya kailangan nitong maka-umento sa mga susunod na laps.

Naka-puwesto naman sa pang-apat si Ronnilan Quita ng 7Eleven Cliqq Roadbike Philippines habang pang-lima si British cyclist Tyler Hannay ng local team Excellent Noodles.

Ang dating nasa tersero puwesto na si  Emmanuel Dave Montemayor ng Go for Gold ay nalaglag sa pang 11th place.

Samantala, nanatili sa unahan ng Team General Classification ang Go for Gold sa nalikom na 77 oras, 13 minuto at 38 segundo, nasa pangalawa ang Standard Insurance Philippines at pangatlo ang 7Eleven Cliqq Roadbike Philippines.