Taas-sahod sa Northern Mindanao at Caraga, aprub

ni Mylene Alfonso @News | May 2, 2026

Photo: Bongbong Marcos

Inanunsyo ni Pangulong Ferdinand Marcos, Jr. na makatatanggap ng mas mataas na sahod ang mga minimum wage earner sa Northern Mindanao at Caraga kasabay ng pagdiriwang ng Labor Day.

Ayon kay Marcos, umabot sa 89 wage orders ang inaprubahan ng Regional Tripartite Wages and Productivity Boards mula Hunyo 2023 hanggang Abril 2026.  

“Kabilang dito ang wage hikes na epektibo ngayong araw, tulad ng sa Region 10 at sa Region 13,” pahayag ng Pangulo sa kanyang talumpati sa 124th Labor Day Celebration sa KCC Convention and Events Center sa General  Santos City.

“Ang arawang sahod ng manggagawa sa lugar na ito ay tumaas na sa P500 at P475,” wika ni Marcos.

Ayon sa Department of Labor and Employment (DOLE), nasa P485 hanggang P500 na ang bagong arawang minimum wage sa Northern Mindanao matapos ipatupad ang ikalawang tranche ng P14 na umento sa sahod.

Sa Eastern Visayas at Zamboanga Peninsula, ipatutupad sa Hunyo 1 ang ikalawang tranche ng umento sa sahod na nagkakahalaga ng P18 at P25, ayon sa pagkakasunod.

Nakatakda ring makatanggap ng ikalawang tranche ng kanilang wage adjustments ang Bicol Region at Davao Region sa huling bahagi ng taon.

14,166 pulis, bantay ngayong Labor Day

ni Gina Pleñago @News | May 1, 2026

Photo: Pahirapan ang pagdaan ng mga tao sa barikadang maagang inilatag sa General Solano St., Maynila na isa sa mga daanan papasok ng Malacañang. Bahagi ito ng paghahanda sa mga kilos-protesta na ikinasang ilunsad kaugnay ng paggunita ng Araw ng Paggawa ngayong araw. (Jeff Tumbado)

Magtatalaga ng 14,166 na pulis ang National Region Police Office (NCRPO) para matiyak ang seguridad at kaligtasan ng publiko sa pagdiriwang ng Labor Day ngayong araw, Mayo 1.

Ayon kay NCRPO Director Police Major General Anthony Aberin, itinalaga sa mga estratehikong lugar sa buong Metro Manila ang mga tauhan para sa Civil Disturbance Management (CDM) contingents, anti-criminality operations, counter-terrorism measures, traffic management teams, emergency response units, at iba pang mahahalagang bahagi ng seguridad.

May nakaantabay ding Reactionary Standby Support Force (RSSF) mula sa NCRPO Regional Headquarters para sa mabilis na pagresponde kung kinakailangan.

Hinimok ni Aberin ang publiko na i-report agad ang anumang kahina-hinalang aktibidad sa 911 o sa pinakamalapit na tauhan ng pulisya.

Labor Day, kaliwa't kanan ang protesta... Malacañang, bantay-sarado

by BRT @News | May 1, 2026

Photo: Akbayan Partylist

Malawakan at kaliwa't kanang kilos-protesta ang inaasahan mula sa iba't ibang grupo ngayong Mayo 1 o Labor Day.

Ito ay upang igiit ang nakabubuhay na suweldo ng mga manggagawa, mababang presyo ng mga bilihin, at sapat na subsidiya at ayuda.

Kaugnay nito, nakahanda na ang Philippine National Police (PNP) sa pagbabantay, kung saan mahigit 106,000 operatiba ang ipakakalat sa buong bansa upang matiyak ang kaayusan sa gitna ng mga inaasahang kilos-protesta.

Kahapon, pahirapan na rin ang pagdaan ng mga tao sa barikadang maagang inilatag sa General Solano St., Maynila na isa sa mga daanan papasok ng Malacañang. Bahagi ito ng paghahanda sa mga kilos-protesta.

Ayon naman kay PNP Spokesperson Brig. Gen. Randulf Tuaño, ilalagay ang buong puwersa ng pulisya sa heightened alert simula Huwebes hanggang Sabado. Bagama’t walang natatanggap na seryoso o direktang banta sa seguridad, binigyang-diin ni Tuaño na hindi dapat maging kampante ang hanay ng kapulisan.