Duterte gov’t, masyadong bukas-palad sa mga kumpanya mula China

ni Korina Sanchez - @Isyung 'K' | September 15, 2020

Tuluy-tuloy na ang dalawang proyekto kung saan papasok ang mga kumpanya mula China sa mga base-militar ng ating bansa.

Nilagdaan na ni Defense Sec. Delfin Lorenzana ang kasunduan para magtayo ng cellphone towers, ang Dito Telecommunity Corp. sa ilang base-militar ng bansa.

Samantala, ilang grupo naman ang nagpahayag ng pangamba na maaaring mag-ispiya ang China sa pagtayo ng cellphone towers sa loob ng bansa—na sa base-militar pa.

Ayon kay Sen. “Kiko” Pangilinan, ang pagbabawal ng Amerika at iba pang bansa sa mga kumpanyang telco mula China ay dahil inakusahan ang mga ito ng pag-iispiya—na dapat ay magbigay-babala sa ating bansa.

Tiniyak ni AFP spokesperson Maj. Gen. Edgard Arevalo na handa ang AFP na kontrahin ang anumang kilos ng pag-iispiya na maaaring gawin ng China. Pero kung ipagbawal ito ng Amerika at iba pang bansa, hindi kaya dapat sumunod tayo sa kanila?

Samantala, ang China Communications Construction Co. Inc. (CCCC), isa sa mga kumpanyang naglikha ng mga artipisyal na isla sa South China Sea na ngayon ay ginagamit na ng militar ng China. ‘Yan ang dahilan kaya sila blacklisted ng Amerika, pero sa Pilipinas, tila welcome pa sila.

Gayundin, tutol ang PH Navy sa planong tambakan ang makasaysayang Cañacao Bay, ang lugar kung saan naganap ang Battle of Manila Bay—hindi raw ito dapat tambakan lang.

Mabuti na lang at listo ang ating AFP sa mga proyektong ito. Tataas naman ang kilay natin dahil sa pagkabukas-palad ng administrasyon sa mga kumpanya mula China, kahit may mga pag-aalala at pangamba mula sa mamamayan.

Sana nga’t handa ang AFP sa anumang gagawin ng China na hindi maganda kung maganap nga ito. Nasa loob na ito ng ating bakuran, kung hindi mapigilan ang China na maglikha ng mga isla sa South China Sea, ano pa ang kaya nilang gawin kapag nasa bakuran na natin?

Isyu ng ‘absolute pardon’ kay Pemberton at ‘beautification’ sa Manila Bay, sapaw sa COVID-19

ni Korina Sanchez - @Isyung 'K' | September 12, 2020

Ayon sa isang grupong mananaliksik mula UP, maaaring nagkaroon na ng “flattening of the curve” sa bansa dahil bumababa na ang pang araw-araw na bilang ng kaso. Pero hindi raw ito dahilan para magsaya o maging kampante.

Kailangan pa ring ipagpatuloy ang pag-iingat at paggamit ng mga face mask at face shield kapag lumalabas ng tahanan. Tandaan na nasa ilalim pa rin ng GCQ ang Metro Manila.

Sa totoo lang ay tila nagiging manhid na ang tao sa mga balita na may kaugnayan sa COVID-19.

Marami ang tumanggap na sa bagong normal kung saan face mask at face shield ay bahagi na ng kasuotan araw-araw at pagpapatupad ng social distancing.

Tila mas interesado na ang mga tao sa balitang nabigyan ng ‘absolute pardon’ si US Marines Lance Cpl. Joseph Pemberton, gayundin ang kontrobersiyal na paglalagay ng ‘mala-Boracay Island’ na buhangin sa Manila Bay para pagandahin umano ito.

Ang Pilipinas pa rin ang may pinakamaraming kaso ng COVID-19 sa ASEAN. Patunay na mas maganda pa rin ang nagagawa ng ibang bansa para labanan ang pandemya. Kaya kahit may kaunting ebidensiya na bumabagal na ang bilang ng mga kaso, kailangan pa rin mag-ingat. Mabuti na lang at maraming sumusunod sa mga health protocols.

Hindi tulad sa Amerika, kung saan marami ang tutol sa pagsuot ng face mask habang nasa labas ng tahanan dahil labag umano sa kanilang kalayaan o karapatan.

Samantala, nasa pangalawang linggo pa lang tayo ng Setyembre, pero may anunsiyo na ang lokal na pamahalaan ng Maynila na isasara ang mga sementeryo sa Undas para maiwasan ang pagkalat ng COVID-19, at sumunod na rin ang Mandaluyong.

Kakaiba na talaga ang pamumuhay sa ‘bagong normal’.

Photo ni Mar, in-edit daw, nagmukhang Obama…KORINA SA NETIZEN: BOBO AT IDIOT!

ni Beth Gelena - @Bulgary Files | September 4, 2020

Nagalit si Korina Sanchez at nakapagsalita nang hindi maganda sa isang netizen na binash ang photo ng asawang si Mar Roxas kung saan kasama nito ang anak nilang kambal na sina Pepe at Pilar.

Ayon sa basher, in-edit daw ni Korina ang photo ng kanyang mister na former politician para magmukhang guwapo, pero ang kinalabasan ay kamukha ni President Barrack Obama at pinagtawanan pa nito ang picture.

“Grabeee naman maka-edit, nagmukha na siya ni Pres. Obama, hahaha,” comment ng netizen sa IG post ni Korina.

Lumabas ang pagkaprangka ng Rated K host at sinagot ang basher. Hindi rin niya napigilang magsalita nang hindi maganda. Tinawag niyang ‘bobo’ at ‘idiot’ ang basher.

Sey ni Koring, “What the hell are you talking about? Bobo mo naman mag-troll! Get lost idiot!”

Ang taray!