Mambabatas, humingi ng paliwanag sa DOJ sa mga nakabinbing kaso

ni Mylene Alfonso @News | September 18, 2026

Photo: Department of Justice - Philippines

Humingi ng paliwanag si Samar 2nd District Rep. Reynolds Michael Tan sa Department of Justice hinggil sa paghawak nito sa mga matagal nang nakabinbing Petitions for Review at Motions for Reconsideration.

Sinabi ni Tan, miyembro ng House Committee on Justice, na nais niyang magsagawa ng congressional inquiry upang suriin ang estado ng mga kasong matagal nang nasa departmental review, matapos makatanggap ng liham mula sa pamilya ng isang magsasakang napatay noong 2017.

Sa liham kay Acting Justice Secretary Fredderick Vida, hiniling ni Tan ang paliwanag ng DOJ sa status at procedural history ng MR sa kaso ni Enrique Manas Sr.

Nag-ugat ang Manas case sa ambush killing kay Enrique Manas Sr. sa Sta. Margarita, Samar noong 2017. 

Matapos ang ilang pagbabago sa DOJ disposition, ibinalik ni dating Justice Secretary Jesus Crispin Remulla noong Enero 2025 ang prosecution laban sa mga akusado.

Nakatanggap naman ang RTC Tacloban ng criminal information noong Marso 2026, ngunit muling naantala ang proseso matapos maghain ng MR ang dating military colonel na si Emilio Zosa.

Sinabi ni Tan na ang usapin ay hindi lamang tungkol sa isang kaso, kundi sa kung paano matitiyak ang mas mabilis at makatarungang pagresolba ng mga nakabinbing review sa DOJ.

Matagal nang nakabinbin... Hirit sa DOJ: Higit na transparency sa mga kasong kriminal

ni Mylene Alfonso @News | September 7, 2026

Photo: File

Nanawagan ang isang mambabatas ng higit na transparency sa paghawak ng Department of Justice (DOJ) sa mga kasong kriminal na matagal nang nakabinbin dito. 

Ginawa ang panawagan ni Rep. Michael Tan ng 2nd District ng Samar, miyembro ng House Committee on Justice, kaugnay ng halos siyam na taong ng nakabinbing kaso ng ambush noong 2017 na ikinamatay ni Enrique Manas Sr. sa Sta. Margarita, Samar. 

Noong Agosto 20, sumulat si Tan kay Acting Justice Sec. Fredderick Vida upang humingi ng impormasyon tungkol sa status ng kaso ni Manas at kung ano na ang estado ng nakabinbing Motion for Reconsideration (MR) na inihain ng akusadong si Emilio Zosa. 

Hiniling din niya sa DOJ na ilahad kung ilan ang kasalukuyang nakabinbing Petitions for Review (PetRev), gaano na katagal nakabinbin, at paano pinoproseso at dini-dispose ang mga naturang kaso.

Humingi rin siya ng impormasyon sa mga proseso at timeline ng DOJ sa paghawak ng PetRevs at motions for reconsideration, gayundin ng updated statistics sa mga nakabinbing kasong kriminal sa National Prosecution Service. Makatutulong umano ang impormasyong ito upang matukoy kung ang matagal na proceedings ay mga isolated na pangyayari o nagpapakita ng mas malawak na problema sa sistema ng hustisya. 

Sa Manas case, binaligtad ni dating Justice Sec. Boying Remulla ang 2019 disposition ng DOJ at iniutos ang pagsasampa ng criminal charges laban kay Zosa at sa kanyang mga kapwa akusado. Kasunod nito, naihain ang criminal information sa Regional Trial Court sa Tacloban noong Marso 2026.

VP Sara, kinasuhan ng grave threat ng DOJ

ni Jeff Tumbado @News | August 12, 2026

Photo: File / Inday Sara Duterte - FB

Pormal nang nagsampa ang Department of Justice (DOJ) nitong Martes ng kasong grave threats laban kay Vice President Sara Duterte sa Quezon City Regional Trial Court (QC RTC), kaugnay ng kanyang kontrobersyal na pahayag laban sa mga pinakamataas na opisyal ng pamahalaan.

Sa isang pahayag, kinumpirma ng DOJ na naihain ang reklamo ala-1:30 ng hapon noong Agosto 11 sa Office of the Clerk of Court ng QC RTC.

Nag-ugat ang kaso sa mga reklamong inciting to  sedition at grave threats na inihain noon ng National Bureau of Investigation (NBI).

Batay sa reklamo, sinabi umano ni Duterte sa isang Zoom briefing noong nakaraang taon na nag-utos siya na ipapatay sina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez sakaling siya ay mapaslang.

Kalaunan ay iginiit ng Bise Presidente na inalis umano sa tamang konteksto ang kanyang mga naging pahayag.

Ayon sa DOJ, ibinasura nito ang reklamong inciting to sedition ngunit itinuloy ang paghahain ng kasong grave threats laban kay Duterte.

Sa panig ng Bise Presidente, sinabi ng kanyang abogado na si Atty. Paul Lawrance Lim na inaasahan na nila ang paghahain ng kaso at nakahanda silang harapin ito.

Iginiit din niya na bilang isang nakaupong opisyal na maaaring ma-impeach, hindi maaaring usigin sa kasong kriminal ang Bise Presidente para sa isang umano'y paglabag na siya ring paksa ng kasalukuyang impeachment proceedings.