Kilabot daw talaga… IBINUKING NI PAULO: LAHAT NG MAGAGANDA SA TEATRO, DUMAAN KAY JC

ni Reggee Bonoan - @Sheet Matters | November 30, 2020

“Naku, kilabot ‘yan ng teatro at kilabot ng stylist,” ang panlalaglag ni Paulo Avelino kay JC Santos sa Dirty Little Secrets episode 9 nitong Biyernes (Nobyembre 27) ng #AskAngelica, ang online show ni Angelica Panganiban.

Ang mga leading men niya sa teleseryeng Walang Hanggang Paalam na sina Zanjoe Marudo, Paulo at JC ang special guests ni Angelica, at kasama rin niya ang mga ka-TT (tropang totoo at tropang tanga) niyang sina Kean Cipriano at Viva Antonio.

Tinanong ni Angge si JC kung ano ang dirty little secrets nito noong wala pa siyang pamilya at si Paulo nga ang nambuking sa aktor.

Dagdag pa ni Pau, “Kilabot siya ng teatro kasi walang maganda (babae) sa teatro na hindi nakakakilala kay JC kasi dumadaan sa kanya lahat. Kilabot ng stylist kasi kilabot talaga siya.”

Tawang-tawa naman si JC habang ibinubuking siya ng co-actor niya sa Walang Hanggang Paalam, “Dito na tayo sa laglagan portion. Sa totoo lang, hindi ko alam kung paano ko sasagutin ‘yan.”

Hirit ulit ni Paulo, “’Wag mo nang sagutin kasi wala ka nang panalo rito.”

At dahil sa kadaldalan ni Emman (karakter ni Pau sa WHP) ay siya naman ang tinanong ni Angelica kung ano ang dirty little secrets niya.

“Ikaw, Pau, ang friendly mo sa social media, ‘di ba? Friendly ka sa Twitter, sumasagot ka sa fans, kahit sa totoong buhay, ganu’n ka. Mayroon bang nangyari na may isang fan na nagandahan ka, tapos magdi-DM (direct message) or halimbawang ‘yung fan na nag-DM sa ‘yo ay may ipinadalang something, tapos nagustuhan mo?”

“To be honest, Angge, hindi ko kaya kasi mas ano talaga ako, eh, mas (tinitingnan ko) personality kasi ako na person. So, kung okay ‘yung personality ng babae, baka puwede,” seryosong sagot ng aktor.

“May point din naman,” saad ng #AskAngelica host.

Samantala, ang take away ng aktres sa dirty little secrets, “Hindi masamang may itinatago tayo sa pagkatao natin, but we have to face it. Kailangan nating harapin kung ano ‘yung mga sikreto natin, kinakatakutan natin, kasi ‘yan ‘yung mga dark areas, ‘di ba?

“I-embrace, i-reveal ang kuwento natin sa mga taong nakakaintindi at mararamdaman mo rin na welcome ka rin na normal ka rin at hindi ka nagkamali na it happens, makakakuha ka ng mga grupo na ito rin ang pagkakamali nila at ito na rin ‘yung mga dapat nating iwasan para rin to better ourselves,” pahayag ng aktres.

And speaking of Walang Hanggang Paalam na umeere mula Lunes hanggang Biyernes sa A2Z channel sa digital at analog ng TV boxes, Kapamilya Online Live sa YouTube channel at Facebook page ng ABS-CBN Entertainment ay malapit nang mabisto ni Angelica as Celine ang pagkakasangkot ng kasintahan niyang si Anton (Zanjoe) sa kidnapping ng anak niya at ang ilegal na negosyo ng kanilang pamilya.

'Di raw makalimutan ang kakaibang sarap na nangyari nu'ng July 11…

PAULO, BAGONG NAGPAPASAYA KAY ANGELICA

ni Reggee Bonoan - @Sheet Matters | November 10, 2020

May namamagitan ba kina Angelica Panganiban at Paulo Avelino?

Magkasama ang dalawa sa teleseryeng Walang Hanggang Paalam kung saan kasama rin nila si Zanjoe Marudo mula sa Dreamscape Entertainment.

Pa-blind item kasing tinanong si Angelica ni Direk Andoy Ranay sa birthday episode niya sa #AskAngelica online show kung bakit importante ang petsang Hulyo 11.

Ang tanong ni Direk Andoy, “Ano ang pinakamahalagang date sa ‘yo at bakit?"

Tawa nang tawa ang #AskAngelica host at na-curious din ang mga co-hosts niyang sina Kean Cipriano at Via Antonio kung anong meron sa July 11.

"Sagutin mo ‘yun!" sabi ng huli.

Ang paliwanag ni Angge, “Naalala ko ito, eh, kasi pagod na pagod ako nu'ng panahon na ito, tapos naalala ko, gusto kong magpahinga and ito ‘yung unang break ng Walang Hanggang Paalam kasi nagtatrabaho kami araw-araw, unang break kami ng July 11.”

Hirit kaagad ni Via, “Sinong kami?”

“'Yung grupo nga ng Walang Hanggang Paalam kasi nga nag-celebrate kami, rest day. So, ginawa namin, nag-ihaw, nag-inuman kami,” kinikilig na kuwento ng dalaga.

“So, kakaibang sarap ng pag-ihaw nu’ng July 11?” sabi pa ni Via.

Tawang-tawa si Angelica sa tanong at kunwari, kinusot ang mata na naka-dirty finger.

Nang lumabas si Paulo sa video ay natawa si Angelica at sabay sabing, "Paborito natin."

“Sexbomb Angge, may regalo ako sa ‘yo, hindi ko alam kung magagalit ‘yung ano pero ibibigay ko (bleep) sa ‘yo ‘yung sa 'kin,” say ni Paulo.

Tawa naman nang tawa ang lahat sa mga pinagsasabi ni Paulo na hindi namin naintindihan dahil censored.

Hirit pa ni Pau, “Pero magugustuhan mo.”

Nabanggit naman ni Angge na ang paborito niyang leading man ay, "Si nguso Zanjoe kasi nakita kong maganda ‘yung chemistry namin.”

Apat na beses nang nagtambal sina Angge at Z — sa Playhouse (2018), itong Walang Hanggang Paalam at sa dalawang pelikula na 24/7 In Love (2012) at One More Try (2012).

'Pag tapos na raw, tapos na… ANGELICA, 'DI NA FEEL MAGPADILIG SA EX-BF

ni Reggee Bonoan - @Sheet Matters | October 6, 2020

“'Kakaloka, nooooo waaaaay!” ito ang grabeng reaksiyon ni Angelica Panganiban sa tanong ng netizen sa digital show niyang #AskAngelica last Sept. 27.

Ang tanong ni Gerson Maranan kay Angge ay, "‘Pag inaya ka ng ex mo na diligan ang mga tuyot niyang halaman, sasamahan mo ba?"

Hirit ng komedyanang si Via Antonio na co-host ni Angelica sa kanyang online show, "Bakit Angge? Bakit grabe ang reaksiyon mong no? Bilang plantita ka, love for the tagtuyot?"

"Nadiligan ka na noon, hindi ka naman nabuhay, 'di ba? Bakit ka pa magpapadilig ulit kung ikakamatay mo rin lang naman!” katwiran ni Angelica.

Napapalakpak si Via, at maging si Bela Padilla na guest sa show that time kasama ni Kim Chiu, sa sagot ng aktres.

Hirit pa ni Angelica, “Tantanan na natin ang mga ex na ‘yan! Ex is X, X (sign) is wrong and Check (sign) is right.”

Dagdag din ni Bela, “Dapat 'pag tapos na, tapos na.”

“Right. I think tayong mga babae, ganu’n tayo (tapos na tapos na),” sambit ni Via.

Tanong naman ni Kean Cipriano (co-host din ni Angge) sa tatlong aktres, “Wait, wala ba kayong mga ex na kaibigan n’yo pa rin or in good terms kayo?”

Sagot kaagad ni Bela, “Okay lang na kaibigan pero kung more than that, pero 'pag adult na, dapat meron kang age na kaya mo nang harapin ‘yung mga tao. Ang liit-liit lang ng Manila, 'di ba? Paano kapag nagkasalubong kayo, dapat okay kayo.

"Puwedeng mature relationship na kaya kong kaibiganin ‘yung ex ko, pati ‘yung bago niyang girlfriend, pero ‘yung kailangan mong maligo kasi magkikita kayo, alamin mo rin muna, baka naghihingalo pala kaya kailangan ng tulong at gustong magkita kayo.”

Ang paliwanag naman ni Kim, “Hindi na, ‘di na. Wala nang ganu’n. Hi (and) hello na lang ‘yun (sabay muwestra ng kamay), ganyan na lang, tapos, alis na.”

“Ganyan ka ba mag-hi sa mga ex mo?” natatawang tanong ni Bela kay Kim.

Sagot kaagad ni Kim, “Grabe ka naman maka-mga, isa pa lang naman.”

Oo nga naman, isa pa lang naman ang ex ni Kim, si Gerald Anderson, at pagkatapos nila ay si Xian Lim na ang naging boyfriend ng dalaga na pakiwari namin ay siya na ring future niya.

Ang next question ay ano ba ang uunahin — ang love life o self-love?

Ang payo ni Angge, “Huwag n’yong minamadali kasi ang mga sarili ninyo, hindi naman nagkakaubusan ng tao sa mundo. May taong para sa inyo, huwag n’yo ring ilagay ang mga tao sa posisyon dahil hindi pa kayo ready. Huwag ilagay sa posisyon dahil kailangan n’yo lang o convenient lang.”

Dagdag-payo rin ni Kean, "Enjoy-in mo rin ‘yung time na hindi pa kayo officially. Kasi ‘yun ang pinakamasarap na stage, ‘yung naglalandian pa kayo."

Samantala, sa simula ng #AskAngelica ay natanong ni Angge ang mga kaibigang sina Bela at Kim kung tagtuyot sila o tag-ulan.

“Ikaw Momshie Bela sa tagtuyot, nakaka-relate ka ba?”

“Siyempre, ha, ha, ha!” tumawang sagot ng dalaga.

“Ay, ang bilis ng sagot, ha, ha, ha!” biro naman ni Angelica.

“Oo, ibigay na natin, alam naman nilang lahat (single ako). Ang hirap na nga dati, nag-pandemic pa, ha, ha, ha!” masayang sabi ni Bela.

Nagkatawanan naman sina Angelica, Kean at Kim.

Sinayaw ng apat ang theme song ng #AskAngelica at dapat sa dulo ay may ‘umm’.

Tinanong ni Kim kung ano'ng spelling ng "Umm."

Sagot kaagad ni Bela, “Ummh..Z”

Sabay-sabay na tanong nina Angelica, Kean at Kim, “Ay, bakit may Z?”

Si Zanjoe Marudo kasi ang huling lalaking na-link kay Bela.

At natawa rin ang bida ng pelikulang 100 Tula Para Kay Stella, “Tigilan mo ako, Zian (baling kay Kean) ay, Kean.”

“Ay, bakit mo naman isinali si Xian, nagpapahinga ‘yun?” tanong ni Kim sa kaibigan.

“Kasi ikaw na raw ‘yung tagtuyot, Momshie,” natawang sabi ni Bela.

Si Kim naman ang tinanong ni Angelica, “Momshie, how are you? Are you tag-ulan?”

Inosenteng tanong ni Kim, “Anong tag-ulan?"

Inalaska tuloy siya nina Kean, Bela at Angelica, “Oh, you’re so innocent.”

Samantala, tatlong taon nang single si Angelica at nagpapasalamat siya sa mga kaibigang sina Bela at Kim dahil sila ang karamay niya sa panahong dumaan siya sa matinding pagsubok pagdating sa love life.

“Ang ganda ng take-away ng friendship na kahit hindi kayo nag-uusap regularly, kahit na nagkakasama-sama kayo — siguro twice a year na kaming tatlo, siyempre, nagkakasama-sama rin kami like tig-isa sa aming tatlo like kami ni Bela or si Bela at si Kim, kami ni Kim — iba-iba rin talaga ‘yung nagiging bonding.

“For me, ang nakikita kong pinakaimportanteng relationship sa buhay ay family and friends and of course, relationship with myself. As long as kaya mong maging masaya alone, then it will flourish, talagang para ka na lang sprinkle diyan sa garden na nagbibigay ka ng joy sa lahat, ikaw ‘yung nagdidilig para sa lahat, kasi punumpuno ka na ng ganu’ng happiness, punumpuno ka na ng love na kaya mo nang i-share."

Pag-amin pa ni Angge, “And Kim and Bela, sila ‘yung unang taong tinakbuhan ko noong inindiyan ako ng ex ko sa panahong dapat makikipaghiwalay siya sa akin. Nandoon sila, nagko-Korean-Korean lang sila ru'n.

“So, nandu'n sila and the friendship blossomed, mahal na mahal namin ang isa’t isa at kaya kong pumatay para sa kanila (emosyonal na sina Kim at Bela).

“I survived 3 years of my single life because of Kim and Bela (tuluyan nang naluha ang dalawa).

“Itong tagtuyot, hindi mo ito makukuha sa lalaki or sa love life, puwede mo itong makuha sa pamilya mo at sa friends mo. Hindi porke tagtuyot, wala kang ganap. You are loved! You are so loved!

“Hindi mo ibabase ang buhay mo sa isang tao lang. Ibabase mo ang buhay mo dahil sa paniniwala mo, sa pagkatao mo at doon ka tatayo,” mahabang paliwanag ni Angelica.