ni PAO Chief Persida Rueda-Acosta @Magtanong Kay Attorney | July 1, 2026
Dear Chief Acosta,
Nag-asawa po ako noong taong 2025. Wala naman po kaming pinirmahang anumang kasunduan bago ang aming kasal. Ngunit bago ako ikasal ay nagmamay-ari na ako ng iba’t ibang alahas. Gusto ko lang malaman kung ang mga nasabi bang alahas ay magiging pag-aari ko lang o kasama sa ari-arian na parehas kami ang may-ari?
— Marinel
Dear Marinel,
Ang lahat ng ikinasal pagkatapos ng ika-3 ng Agosto 1988, kung kalian nagkabisa ang Family Code of the Philippines, at walang mga pre-nuptial agreement o kasunduan na may kaugnayan sa kanilang pag-aari, ay sinasakop ng tinatawag na absolute community of property.
Alamin natin kung anu-anong pag-aari ang sinasakop ng absolute community of property. Ayon sa Article 91 ng Family Code of the Philippines:
“Art. 91. Unless otherwise provided in this Chapter or in the marriage settlements, the community property shall consist of all the property owned by the spouses at the time of the celebration of the marriage or acquired thereafter.”
Samakatuwid, maliban sa mga pag-aaring hindi isinama ng batas, ang lahat ng pag-aari ng mag-asawa kahit pa man bago sila ikasal ay magiging parte ng kanilang community of property o sa madaling-sabi ay magiging pag-aari nilang parehas.
Gayunpaman, mayroong mga pag-aari na hindi sinasakop ng absolute community of property. Ang mga ito ay mananatiling pag-aari lang ng isa sa mag-asawa. Ayon sa Article 92 ng Family Code:
“Art. 92. The following shall be excluded from the community property:
Property acquired during the marriage by gratuitous title by either spouse, and the fruits as well as the income thereof, if any, unless it is expressly provided by the donor, testator or grantor that they shall form part of the community property;
Property for personal and exclusive use of either spouse. However, jewelry shall form part of the community property;
Property acquired before the marriage by either spouse who has legitimate descendants by a former marriage, and the fruits as well as the income, if any, of such property.”
Ayon sa nasabing probisyon ng batas, ang mga alahas, bagama’t ito ay itinuturing na personal na ginagamit ng isa sa mag-asawa, ay hindi labas sa tinatawag na absolute community of property. Bagkus, ito ay kasama at sinasakop ng nasabing probisyon ng batas, at magiging pag-aari ng parehong mag-asawa.
Sa iyong sitwasyon, dahil kayo ay walang pre-nuptial agreement at ikinasal kayo pagkatapos ng August 3, 1988, ang sumasakop sa inyong property relation ay ang absolute community of property. Kaya naman, kahit ang mga pag-aari ninyo bago kayo ikasal ay magiging pag-aari ninyong pareho. Ang iyong mga alahas ay kasama rito, kahit na ang mga ito ay ipinundar mo bago kayo ikasal, dahil sinasabi mismo ng batas na ang mga alahas ay hindi magiging parte ng community property ng mag-asawa.
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.
