Active threat drills sa mga iskul kontra-karahasan

ni Leonida Sison @Boses | July 17, 2026

Sa panahon na dumarami ang mga insidente ng karahasan sa loob at paligid ng mga paaralan, malinaw na hindi na sapat ang umasa lamang sa mabilis na pagtugon kapag may nangyaring sakuna. Mas mahalaga ang maagap na paghahanda upang maprotektahan ang buhay ng mga mag-aaral, guro, at iba pang kawani. Ang kaligtasan sa paaralan ay hindi lamang responsibilidad ng pamahalaan kundi ng buong komunidad.

Bilang tugon, inilunsad ng Department of Education (DepEd) ang pilot active threat simulation drills sa mga pampublikong paaralan sa buong bansa upang higit na mapalakas ang kahandaan sa oras ng emergency. Sinimulan ito sa National Safe Schools Summit and Safety Drill sa Manila Science High School, kung saan sabay-sabay na isinagawa ang lockout, lockdown, at evacuation drills sa pakikilahok ng mga estudyante, guro, school personnel, mga kinatawan ng lokal na pamahalaan, at iba pang ahensya.

Layunin ng programa na masukat ang kahandaan ng bawat paaralan sa pagtugon sa mga posibleng banta at matiyak na may malinaw at epektibong sistema ng pagresponde. Bawat paaralan ay hinihikayat ding magkaroon ng sariling active threat response plan na naaayon sa kanilang sitwasyon at kapaligiran, sa halip na umasa sa iisang pamamaraang ipatutupad sa lahat.

Bahagi rin ito ng direktiba ni Pangulong Ferdinand Marcos Jr. na paigtingin ang seguridad sa mga paaralan kasunod ng ilang insidente ng karahasan sa mga campus.

Sa isinagawang simulation, sinanay ang mga kalahok sa tamang lockdown procedures kapag hindi posible ang agarang paglikas. Kabilang dito ang pagsasara at pagbabarikada ng mga silid-aralan, pagpapatay ng ilaw, pagsi-silent ng mga cellphone, pananatiling hindi nakikita hanggang ideklarang ligtas ang lugar, at maayos na pagpunta sa itinakdang reunification area matapos ma-neutralize ang banta.

Kasabay ng mga drill, nagsagawa rin ng mga talakayan ang iba't ibang ahensya ng pamahalaan, lokal na pamahalaan, civil society organizations, at pribadong sektor upang higit pang mapalakas ang koordinasyon sa usapin ng school security. Tinalakay ang contingency planning, psychological first aid, learner protection, cyber safety, at paggamit ng Adopt-a-School Program at Special Education Fund para sa paglalagay ng CCTV cameras at iba pang kagamitang pangkaligtasan.

Nakabatay ang programa sa DepEd Order No. 006, s. 2026 na naglalayong pag-isahin ang mga polisiya sa learner protection at school safety upang matiyak ang ligtas at maayos na kapaligiran sa pag-aaral. Kaakibat nito ang patuloy na pakikipagtulungan ng Philippine National Police, Bureau of Fire Protection, Department of the Interior and Local Government, at mga lokal na pamahalaan sa pagpapalakas ng police visibility, emergency response systems, CCTV installation, at iba pang hakbang sa seguridad.

Malinaw na ang ganitong uri ng paghahanda ay may direktang epekto sa kapakanan ng bawat pamilyang Pilipino. Kapag alam ng mga magulang na may malinaw na plano ang paaralan sa oras ng panganib, mas nagiging panatag ang kanilang loob sa pagpapapasok ng kanilang mga anak.

Gayunman, hindi dapat magtapos ang pagpapalakas ng school safety sa isang drill lamang. Kinakailangan itong maging tuluy-tuloy, may sapat na pondo, at may aktibong pakikilahok ng buong komunidad. Sa ganitong paraan, masisiguro na ang mga paaralan ay mananatiling ligtas na lugar para sa pagkatuto at paghubog ng kinabukasan ng kabataang Pilipino. Ang tunay na tagumpay ng edukasyon ay hindi lamang nasusukat sa kalidad ng pagtuturo, kundi sa katiyakang ligtas na nakakauwi ang bawat mag-aaral araw-araw.

Atty. Zuleika, ‘di na ihaharap sa trial, ano’ng kinatatakutan ng House?

ni Pablo Hernandez @Prangkahan | July 15, 2026

'PREPARE FOR TYPHOON INDAY' KAYA ANG DAHILAN KAYA ‘DI NA GINAWANG HOSTILE WITNESS NG HOUSE AND PRIVATE PROSECUTORS SA IMPEACHMENT SI ATTY. ZULEIKA LOPEZ? – Hindi na itinuloy ng House of Representatives at ng private prosecutors ang pagkuha kay Atty. Zuleika Lopez, chief of staff ng Office of the Vice President (OVP), bilang hostile witness sa impeachment trial ni Vice President Sara Duterte.

Ang tanong ngayon, bakit bigla nilang inatras ang planong ito? Nasindak kaya sila sa posibilidad na personal na humarap si VP Sara sa impeachment court?

Sa panayam ng media kay Atty. Lopez, hindi nito direktang sinagot ang tanong kung handa ba siyang maging hostile witness. Sa halip, sinabi lamang niya ang, "Prepare for Typhoon Inday." Hindi naman niya nilinaw kung ang tinutukoy niya ay ang paparating na bagyong "Inday" o si VP Sara, na kilala rin sa palayaw na "Inday." Boom!

XXX

DAPAT BIGYANG-LINAW NI SEN. PADILLA ANG SINABI NIYANG ISA SIYANG KOMUNISTA – Sa ikalimang araw ng impeachment trial nitong July 14, 2026, sa pagtatanong ni Sen. Robin Padilla sa witness na si NBI officer Atty. Jeremy Lotoc, nabanggit ng senador na isa siyang komunista.

Dapat linawin ni Sen. Padilla ang pahayag na ito kung nagkamali lamang siya sa kanyang nasabi, dahil sa ilalim ng Anti-Terrorism Act of 2020, kabilang ang Communist Party of the Philippines (CPP) sa mga idineklarang teroristang grupo sa bansa. Period!

XXX

SABI NG NBI, IIMBESTIGAHAN NILA ANG MGA ANOMALYA SA 2019 SEA GAMES, SI SEN. ALAN CAYETANO NA KAYA ANG NEXT NA MAKUKULONG? – Iimbestigahan ng National Bureau of Investigation (NBI) ang kontrobersiyang may kaugnayan sa 2019 Southeast Asian (SEA) Games, partikular ang umano'y P10 bilyong kontrata na napunta sa isang private firm nang walang bidding, gayundin ang umano'y overpriced na P50 milyong cauldron.

Ang namahala sa 2019 SEA Games ay ang Philippine SEA Games Organizing Committee (PHISGOC) na pinamunuan noon ni dating House Speaker Alan Cayetano.

Kung mapatutunayan ng imbestigasyon ng NBI na may naganap na anomalya, posibleng maharap sa kasong plunder ang mga responsable, dahil parehong may kaugnayan dito ang umano'y P10 bilyong kontrata at ang P50 milyong cauldron.

Kaya sinasabing maaaring may susunod na mapanagot sa kasong ito, lalo na't mayroon nang mga personalidad na dati ring nakulong kaugnay ng mga kasong plunder. Boom!

XXX

SA EDAD NA 72 AT SENADOR PA SI SEN. MARCOLETA, DAPAT SA DETENTION CELL NG CAMP CRAME SIYA IKULONG, HINDI SA CITY JAIL – Ipinag-utos ng Sandiganbayan na alisin sa hospital arrest si Sen. Marcoleta at ilipat ito sa Quezon City Jail.

Pambihira naman, 72-anyos na at senador pa si Sen. Marcoleta. Sana ay isinaalang-alang ng Sandiganbayan ang kanyang edad at katayuan bilang mambabatas. Ang nais lang nating ipunto, sana ay sa Camp Crame detention facility na lamang siya ikinulong at hindi sa city jail. Tsk!

Kailan nagiging child abuse ang pagpalo sa bata?

ni PAO Chief Persida Rueda-Acosta @Magtanong Kay Attorney | July 16, 2026

Dear Chief Acosta,

Umiiyak at may bukol sa noo nang umuwi ng bahay ang 10 taong gulang kong anak. Nang tanungin ko siya kung ano ang nangyari, nagsumbong siya na habang naglalaro sa labas ay may bata kaming kapitbahay na pinagbabato silang magkaibigan. Agad akong lumabas ng bahay para kausapin at pagsabihan ang bata. Dala ng aking emosyon, napalo ko ang kamay ng bata. Nagbanta ang kapitbahay naming kakasuhan ako dahil sa nabanggit na pangyayari. Maaari po bang maituring na child abuse ang nagawa ko?

— Keren

---

Dear Keren,

Una sa lahat, ang patakaran ng ating Estado ay magbigay ng espesyal na proteksyon sa mga bata mula sa lahat ng uri ng pang-aabuso, kapabayaan, malupit na pagsasamantala, diskriminasyon, at iba pang negatibong kundisyon.

Sa kasong George Bongalon vs. People of the Philippines, G.R. No. 169533, 20 Marso 2013, sa panunulat ni Honorable Chief Justice Lucas P. Bersamin, pinasiyahan ang mga sumusunod:

“Section 10. Other Acts of Neglect, Abuse, Cruelty or Exploitation and other Conditions Prejudicial to the Child’s Development. –

(a) Any person who shall commit any other acts of child abuse, cruelty or exploitation or be responsible for other conditions prejudicial to the child’s development including those covered by Article 59 of Presidential Decree No. 603, as amended, but not covered by the Revised Penal Code, as amended, shall suffer the penalty of prision mayor in its minimum period.

Child abuse, the crime charged, is defined by Section 3 (b) of Republic Act No. 7610, as follows:

Section 3. Definition of terms. –           

(b) ‘Child Abuse’ refers to the maltreatment, whether habitual or not, of the child which includes any of the following:

(1) Psychological and physical abuse, neglect, cruelty, sexual abuse and emotional maltreatment;

(2) Any act by deeds or words which debases, degrades or demeans the intrinsic worth and dignity of a child as a human being;

(3) Unreasonable deprivation of his basic needs for survival, such as food and shelter; or

(4) Failure to immediately give medical treatment to an injured child resulting in serious impairment of his growth and development or in his permanent incapacity or death.  

Although we affirm the factual findings of fact by the RTC and the CA to the effect that the petitioner struck Jayson at the back with his hand and slapped Jayson on the face, we disagree with their holding that his acts constituted child abuse within the purview of the above-quoted provisions. The records did not establish beyond reasonable doubt that his laying of hands on Jayson had been intended to debase the "intrinsic worth and dignity" of Jayson as a human being, or that he had thereby intended to humiliate or embarrass Jayson.”

Batay sa nasabing kaso, hindi lahat ng pagkakataon ng pagpalo sa kamay ng bata ay maituturing na pang-aabuso sa bata (child abuse) sa ilalim ng Section 10 (a) ng Republic Act (R.A.) No. 7610, o “Special Protection of Children Against Abuse, Exploitation and Discrimination Act.” Ang isang akto ay maituturing na child abuse kung ang pananakit o pamamalo ay maipapakita nang lampas sa makatwirang pagdududa na nilayon ng akusado na pababain ang halaga at dignidad ng bata bilang tao.

Samakatuwid, kailangang mapatunayan ng iyong kapitbahay na ang pagpalo mo sa kanyang anak ay may intensyon na pababain ang halaga at dignidad ng huli bilang tao, para masabing may pang-aabuso o child abuse. Ayon sa nasabing kaso, ang pagpalo sa kamay ng bata na ginawa nang biglaan at dahil sa galit, ay nagpapahiwatig ng pag-aalala bilang magulang. Sa pagkawala ng pagpipigil sa sarili, maaaring walang tiyak na layunin na pahiyain o pababain ang halaga ng bata bilang tao. Gayunpaman, ang akusado ay maaaring managot sa ibang krimen sa ilalim ng Revised Penal Code, depende sa mga pangyayari.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.