ni PAO Chief Persida Rueda-Acosta @Magtanong Kay Attorney | July 18, 2026
Dear Chief Acosta,
Nagpakasal po ako noong taong 2025. Wala naman po kaming pinirmahan na kahit anong kasunduan bago ang aming kasal. Gayunman, bago pa po ako ikasal ay nagmamay-ari na ako ng iba’t ibang alahas. Gusto ko lang malaman kung ang mga nasabi bang alahas ay magiging pag-aari ko lang o kasama sa ari-arian na hati kaming mag-asawa? — Marinel
Dear Marinel,
Ang lahat ng ikinasal pagkatapos ng ika-03 ng Agosto 1988, kung kailan nagkabisa ang Family Code of the Philippines, at walang pre-nuptial agreement o kasunduan na may kaugnayan sa kanilang pag-aari, ay sinasakop ng tinatawag na absolute community of property.
Alamin natin kung anu-anong pag-aari ang sinasakop ng absolute community of property. Ayon sa Article 91 ng nasabing Code:
“Art. 91. Unless otherwise provided in this Chapter or in the marriage settlements, the community property shall consist of all the property owned by the spouses at the time of the celebration of the marriage or acquired thereafter.”
Samakatuwid, maliban sa mga pag-aaring hindi isinama ng batas, ang lahat ng pag-aari ng mag-asawa, pati ang kanilang mga ari-arian pa man bago sila ikasal, ay magiging parte ng kanilang community of property o sa madaling sabi ay magiging pag-aari nilang parehas.
Ano naman ang mga pag-aari na hindi sinasakop ng absolute community of property o ang mga ari-arian na mananatiling pag-aari lang ng isa sa mag-asawa? Ayon sa Article 92 ng Family Code:
“Art. 92. The following shall be excluded from the community property:
Property acquired during the marriage by gratuitous title by either spouse, and the fruits as well as the income thereof, if any, unless it is expressly provided by the donor, testator or grantor that they shall form part of the community property;
Property for personal and exclusive use of either spouse. However, jewelry shall form part of the community property;
Property acquired before the marriage by either spouse who has legitimate descendants by a former marriage, and the fruits as well as the income, if any, of such property.”
Ayon sa nasabing probisyon ng batas, ang mga alahas, bagama’t ito ay itinuturing na personal na gamit ng isa sa mag-asawa, ay sakop pa rin ng absolute community of property. Bagkus, ito ay kasama at sinasakop ng nasabing probisyon ng batas, at magiging pag-aari ng parehong mag-asawa.
Sa iyong sitwasyon, dahil wala kayong pre-nuptial agreement at ikinasal kayo pagkatapos ng Agosto 3, 1988, ang sumasakop sa inyong pag-aari ay ang absolute community of property. Dahil dito, ang mga pag-aari ninyo bago kayo ikasal ay naging parte ng inyong magkasasamang ari-arian (common property), kung hindi kasama sa eksklusyon na ibinigay ng batas. Dahil ang iyong mga alahas ay hindi kasama sa mga eksklusyon na ibinigay ng batas, ang mga ito ay naging bahagi ng inyong ari-ariang mag-asawa, kahit na ito ay ipinundar mo bago pa kayo ikasal.
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.
