Hindi pagtanggap ng resignation letter

ni PAO Chief Persida Rueda-Acosta @Magtanong Kay Attorney | July 21, 2026

Dear Chief Acosta,

Sinubukan kong magpasa ng resignation letter sa boss ko pero hindi siya pumayag at ayaw itong tanggapin. Maaari ba akong piliting manatili at magtrabaho sa kumpanya? — Leila

---

Dear Leila,

Ang involuntary servitude o sapilitang pagtatrabaho na labag sa kalooban ay hindi pinahihintulutan ng ating batas. Malinaw itong nakasaad sa Artikulo III ng Saligang Batas:

“Section 18.

(2) No involuntary servitude in any form shall exist except as a punishment for a crime whereof the party shall have been duly convicted.”

Batay sa nabanggit na probisyon ng batas, hindi ka maaaring pilitin na manatili sa trabaho ng iyong boss. Gayunpaman, ayon sa ating batas, kinakailangan ang hindi bababa sa isang buwan na paunang abiso (advance notice), maliban kung may dahilan ayon sa batas na nagpapahintulot sa empleyado na magbitiw agad, o paikliin o talikdan ng employer ang nasabing notice. Kung hindi ito susundin, maaaring pagbayarin ng danyos ang empleyadong magbibitiw sa trabaho. Ang mga sumusunod ay ang mga nauugnay na probisyon sa ilalim ng ating Labor Code of the Philippines: 

“Art. 285. Termination by employee.

1. An employee may terminate without just cause the employee-employer relationship by serving a written notice on the employer at least one (1) month in advance. The employer upon whom no such notice was served may hold the employee liable for damages.

2. An employee may put an end to the relationship without serving any notice on the employer for any of the following just causes:

1. Serious insult by the employer or his representative on the honor and person of the employee;

2. Inhuman and unbearable treatment accorded the employee by the employer or his representative;

3. Commission of a crime or offense by the employer or his representative against the person of the employee or any of the immediate members of his family; and

4. Other causes analogous to any of the foregoing.”

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

P12.3B para sa libreng kolehiyo, oks na

ni Kuya Win Gatchalian @Win Tayong Lahat | July 21, 2026

Ikinagalak ng inyong lingkod ang balitang nakatakdang bayaran ng administrasyon ang naging kakulangan sa pondo ng libreng kolehiyo mula 2022 hanggang 2025. Kasunod ito ng paglabas ng Joint Memorandum No. 2026-01 ng Commission on Higher Education at ng Department of Budget and Management, kung saan nakasaad ang mga pamantayan para mapunan ang naturang kakulangan sa pondo.

Kung ating babalikan ang naging mga talakayan sa 2026 national budget, matatandaang P12.3 bilyon ang lumalabas na naging kakulangan sa pondong kinakailangan para maipatupad ang libreng kolehiyo sa mga naturang taon.

Noong nanungkulan ang inyong lingkod bilang Chairman ng Senate Committee on Finance, binigyang-diin natin ang posibleng pinsala sa ating mga State Universities at Colleges (SUCs) kung mananatiling kulang ang pondo para sa libreng kolehiyo.

Isa na rito ang epekto sa kalidad ng edukasyon. Halimbawa, maaapektuhan ang kanilang kakayahang tustusan ang mga dagdag na mga pasilidad, mga silid-aralan, mga laboratoryo, pati na rin ang pag-hire ng mga bagong guro — mga bagay na makakatulong sana sa mga SUC na tumanggap ng mas marami pang mga mag-aaral at maiangat ang kalidad ng hinahatid nilang edukasyon.

Kaya naman noong binuo natin ang 2026 national budget, tiniyak nating mababayaran ang P12.3 bilyong naging kakulangan sa pondo ng libreng kolehiyo ng mga nagdaang taon.

Sa isang special provision sa national budget, pinahihintulutan natin ang paggamit ng P7.821 bilyon mula sa hindi nagagamit na balanse ng Free Higher Education Development Fund ng CHED. Naglaan din ang 2026 national budget ng P4.486 bilyon upang makumpleto ang halagang kailangan para mapunan ang kulang na pondo sa libreng kolehiyo nitong mga nakaraang taon.

Naglaan din tayo ng karagdagang pondo para sa mga SUCs upang mapalawak nila ang kanilang kapasidad. Matatandaang batay sa pagsusuring ginawa ng ating tanggapan, lumalabas na hindi bababa sa 168,493 na mga kwalipikadong mag-aaral ang hindi nakapag-enroll dahil sa kakulangan ng slots sa mga SUCs.

Lumabas din kasi na marami sa ating mga SUCs ang puno na o lumagpas na sa kapasidad ang dami ng kanilang mga mag-aaral. Upang madagdagan ito, naglaan ang Senado ng P6.3 bilyong pondo para sa mga SUCs.

Sa naturang pondo, P5.2 bilyon dito ang isinulong ng ating tanggapan upang matulungan ang ating mga SUCs na makapagpatayo ng mga dagdag na pasilidad. Sa ganitong paraan, matitiyak nating hindi na mapagkakaitan ng pagkakataong makinabang sa libreng kolehiyo ang mga kwalipikadong mag-aaral. 

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Mas mahigpit na beripikasyon sa ride-hailing services

ni Leonida Sison @Boses | July 21, 2026

Sa bawat biyahe ng mga motorcycle taxi rider ay hindi lamang kita ang nakataya kundi pati ang kanilang buhay. Matagal nang nakatuon ang mga safety feature ng ride-hailing services sa proteksyon ng mga pasahero, ngunit ipinakita ng magkakasunod na krimen na panahon na ring bigyan ng kaparehong antas ng seguridad ang mga rider na araw-araw na nagsisilbi sa publiko.

Kumikilos na ang Philippine National Police (PNP) upang makipag-ugnayan sa mga ride-hailing companies at iba pang ahensya ng pamahalaan para palakasin ang mga hakbang na magbibigay ng mas mataas na antas ng proteksyon sa mga motorcycle taxi rider. Ayon sa PNP, layunin ng kanilang pakikipagpulong na makabuo ng mga preventive at proactive na hakbang upang maiwasan ang mga krimen bago pa ito mangyari, sa halip na umasa lamang sa pagresolba ng mga kaso matapos ang insidente.

Isa sa mga pangunahing isinusulong ng PNP ay ang mas mahigpit na pagberipika sa pagkakakilanlan ng mga pasaherong gumagamit ng booking applications. Naniniwala ang pulisya na mahalagang matiyak ang tunay na identidad at pagiging lehitimo ng bawat nagbu-book upang mabawasan ang panganib na malagay sa alanganin ang mga rider habang nasa biyahe.

Ang pagpapalakas ng seguridad ay isinulong matapos ang dalawang magkahiwalay na insidente ng pagpatay sa motorcycle taxi riders. Noong Hulyo 14, isang rider ang pinagnakawan at sinaksak ng ice pick ng kanyang pasahero. Kinabukasan naman, isa pang rider ang pinaslang matapos umanong holdapin ng pasaherong nag-book ng biyahe mula Maynila patungong Cavite. Bukod sa pagpatay, inakusahan din ang suspek na nangikil ng pera mula sa asawa at kapatid ng biktima.

Iniulat ng PNP na nasa kanilang kustodiya na ang dalawang suspek na sangkot sa magkahiwalay na krimen at nahaharap na sa kaukulang kaso. Patuloy rin ang imbestigasyon habang pinaigting ang police operations upang mapanagot ang mga responsable.

Malaki ang papel ng motorcycle taxi riders sa pang-araw-araw na buhay ng maraming Pilipino dahil sila ang nagsisilbing mabilis at maaasahang transportasyon ng libu-libong pasahero. Dahil dito, hindi lamang kapakanan ng mga rider ang nakataya kundi maging ang tiwala ng publiko sa kaligtasan ng mga serbisyong kanilang ginagamit.

Mahalagang maisakatuparan agad ang mas mahigpit na sistema ng seguridad, kabilang ang mas maayos na identity verification, mas mabilis na koordinasyon sa pagitan ng mga kumpanya at awtoridad, at paggamit ng makabagong teknolohiya upang matukoy ang mga kahina-hinalang booking. Hindi dapat maging normal na bahagi ng trabaho ng isang rider ang panganib na hindi na siya makauwi sa kanyang pamilya.

Ang pagprotekta sa mga motorcycle taxi rider ay hindi lamang responsibilidad ng pamahalaan at mga ride-hailing company. Isa rin itong usapin ng malasakit sa mga manggagawang nagsisikap kumita nang marangal para sa kanilang pamilya. Kung magiging mas ligtas ang bawat biyahe, mas magiging panatag din ang mga pasahero at mas mapapalakas ang tiwala ng taumbayan sa sistemang dapat ay nagbabantay sa kapakanan ng lahat.