Karapatan sa ilalim ng “Anti-Mail Order Spouse Act”

ni PAO Chief Persida Rueda-Acosta @Magtanong Kay Attorney | July 26, 2026

Kamakailan lamang ay nagkaroon ng Memorandum of Understanding (MOU) ang ating Tanggapan at ang Commission on Filipinos Overseas (CFO) kung saan ang Public Attorney’s Office (PAO) ay makatutulong sa pagsusulong ng adhikain ng CFO na mabigyan ng proteksyon ang ating mga kababayan na naninirahan sa ibayong dagat. Isa sa mga sektor na binibigyan ng proteksyon ng Estado, sa pamamagitan ng CFO, ay ang mga kababaihang maaaring mabiktima ng “Mail Order Spouse” scheme.

Ayon sa polisiya ng Republic Act (R.A.) No. 10906 o ang tinatawag na “Anti-Mail Order Spouse Act,” patakaran ng Estado na bigyan ng proteksyon at garantiya ang mga indibidwal na karapatan ng mamamayang Pilipino. Para sa layuning ito, dapat pigilan ng Estado ang pananamantala sa mga Pilipino, at magbigay ng proteksyon mula sa mga ilegal na mga gawain, negosyo, at pakanang pag-alok ng kasal ng mga mapagsamantalang dayuhan. Sa gayon ay malalayo ang mga Pilipino sa pang-aabuso, pananamantala, prostitusyon, at iba pang marahas na sitwasyon. 

Ipinagbabawal ng naturang batas ang mga sumusunod na gawain:

“(a) Engage in any business or scheme for money, profit, material, economic or other consideration which has for its purpose the matching or offering of a Filipino to a foreign national for marriage or common law partnership on a mail-order basis or through personal introduction, email, or websites on the internet;

(b) Exhibit, advertise, publish, print, or distribute, or cause the exhibition, advertisement, publication, printing, or distribution of brochures, flyers, or propaganda materials which are calculated to promote the prohibited acts in the preceding paragraph, or to post, advertise, or upload such materials through websites on the internet;

(c) Solicit, enlist, or in any manner, attract or induce any Filipino to become a member in any club or association whose objective is to match Filipino nationals to foreign nationals for the purpose of marriage or common law partnership for a fee; and

(d) To use the postal service or any website on the internet to promote the prohibited acts under this section.  The above notwithstanding, legitimate dating websites, which have for their purpose connecting individuals with shared interests in order to cultivate personal and dating relationships, are not covered by this Act.”

Sa pagninilay sa mga nabanggit na probisyon, ipinagbabawal ang negosyo na ang layunin nito ay ang pagtutugma o pag-aalok ng isang Pilipino sa isang dayuhan para sa kasal o common law partnership batay sa mail-order o sa pamamagitan ng personal na pagpapakilala, email, o mga website sa internet. Ito ay nangangahulugan na ang pag-aalok, pagtutugma, o pagpapakilala ay ginagawa upang kumita ng salapi ang taong nag-aalok ng kasal at magdadala ng kapahamakan sa taong iniaalok o ipinakikilala.

Sa ating bansa, hindi negosyo ang pagpapakasal sapagkat malinaw ang mga batas na sumasakop sa kasal bilang isang institusyon. Mabigat din ang responsibilidad ng bawat panig kapag sila ay ikinasal. Kaya naman hindi ito ginagawang uri ng kalakal bilang pagkilala sa pagiging sagrado nito. Nang dahil dito, mabigat ang parusa na naghihintay sa anumang paglabag sa mga nabanggit na ipinagbabawal na gawain, katulad ng mga sumusunod:

“SEC. 4. Penalties. – Any person found guilty by the court to have committed any of the prohibited acts provided under Section 3 of this Act shall suffer the penalty of imprisonment for fifteen (15) years and a fine of not less than five hundred thousand pesos (P500,000.00) but not more than one million pesos (P1,000,000.00).”

Sinumang tao na kakutsaba o makikipagtulungan sa pagpapatupad ng mga ipinagbabawal na gawain na binanggit sa Seksyon 3 ng batas na ito, sa pamamagitan ng nauna o kasabay na mga aksyon, ay dapat maparusahan ng parehas na kaparusahan na binanggit sa itaas. Kung ang paglabag ay ginawa ng isang sindikato o ginawa sa malawakang sukat, mas mataas ang parusang iaatang. Ang taong lumabag ay maparurusahan ng 20 taong pagkakulong at multang hindi bababa sa P2 milyon ngunit hindi hihigit sa P5 milyon. Ang ipinagbabawal na gawain ay itinuring na ginawa ng isang sindikato kung ito ay ginawa ng isang grupo ng tatlo o higit pang mga tao na nagsabwatan o nagkaisa sa paggawa ng mga ipinagbabawal na akto ng batas.

Ang isang kriminal na aksyon na nagmumula sa paglabag sa batas na ito ay maaaring isampa sa lugar kung saan ginawa ang paglabag, kung saan nangyari ang alinman sa mga elemento nito, o kung saan aktwal na naninirahan ang biktima. Ang hukuman kung saan unang isinampa ang aksyong kriminal ay magkakaroon ng ekslusibong hurisdiksyon.

Bukod sa kasong kriminal na maaaring isampa ng biktima, mayroon ding karapatan ang nasabing biktima na lumapit sa mga sangay ng pamahalaan na nabigyan ng mandatong magbigay ng mga tulong katulad ng Department of Foreign Affairs (DFA), Department of Social Welfare and Development (DSWD), Department of Justice (DOJ), Philippine Commission on Women (PCW), at CFO. 

PBBM, ‘wag nang uulit sa mga sablay na statement sa SONA kung ayaw ma-bash

ni Pablo Hernandez @Prangkahan | July 26, 2026

KAPAG MAY SABLAY NA STATEMENT SA SONA NI PBBM, ASAHAN NANG MABA-BASH ULI SIYA SA SOCIAL MEDIA – Bukas ay ikalimang State of the Nation Address (SONA) ni Pangulong Ferdinand “Bongbong” Marcos Jr. (PBBM).

Kapag may mga sablay na naman sa kanyang SONA, asahan na niyang aani ito ng batikos mula sa mga netizen sa social media. Boom!

XXX

SUNUD-SUNOD NA NAMAN ANG BIGTIME OIL PRICE HIKE, DAPAT SUSPENDIHIN NA NI PBBM ANG VAT SA LANGIS AT OIL EXCISE TAX – May panibagong bigtime oil price hike na naman sa susunod na linggo. Tataas ng P6 kada litro ang diesel, P5.90 ang gasolina, at P4.30 ang kerosene.

Sa totoo lang, hindi na nakapagtataka ang sunud-sunod na taas-presyo ng langis dahil sa panibagong tensyon sa Middle East na kinasasangkutan ng Amerika at Iran. Gayunman, may hakbang na maaaring gawin upang mabawasan ang epekto nito sa mga nasa public transport sector at mga motorista—ang pansamantalang pagsuspinde sa value-added tax (VAT) at excise tax sa langis.

Kapag ipinasuspinde ni Pangulong Ferdinand “Bongbong” Marcos Jr. (PBBM) ang dalawang buwis na ito, tiyak na malaking ginhawa ito para sa mamamayan. Period!

XXX

SA PAGLAGAPAK NG PISO KONTRA-DOLYAR, ASAHAN NA ANG KASUNOD NA PAGTAAS NG PRESYO NG MGA BILIHIN AT BAYARIN – Malaki ang ibinagsak ng halaga ng piso laban sa dolyar dahil umabot na sa P61.84 ang palitan sa bawat $1.

Dahil dito, asahan ding tataas ang presyo ng mga bilihin at iba pang bayarin sa bansa, lalo na ang mga inaangkat na produkto. Naku po!

XXX

KUNG TOTOO ANG MGA ALEGASYON NI SEN. LACSON, MALAMANG AY BAKA MAKULONG NGA SI SEN. ALAN CAYETANO – Ibinulgar ni Sen. Ping Lacson na, batay sa isinagawang pag-iimbestiga ng kanyang mga tauhan, natukoy na umano nila ang dalawang bagman ni Sen. Alan Cayetano na sangkot sa mga umano'y ghost projects sa Taguig City. Ayon pa kay Lacson, ang isa sa mga ito ay may rekord na P500 milyon na win-loss sa casino.

Kung mapatutunayang totoo ang mga alegasyong ito, posibleng magkaroon ng katuparan ang pahayag ni Sen. Ping na nais niyang makulong si Sen. Alan. Abangan!

Serbisyong pangkalusugan, dapat umabot sa pinakamalayong komunidad

ni Leonida Sison @Boses | July 26, 2026

Malaking tulong sa bawat Pilipino ang pagkakaroon ng mabilis at maaasahang serbisyong medikal, lalo na sa oras ng emergency. Hindi lahat ng pamilya ay may kakayahang magbayad ng pribadong ambulansya o agad na makapunta sa ospital.

Kaya ang pagkakaroon ng sapat na patient transport vehicles sa bawat lokal na pamahalaan ay hindi lamang dagdag na kagamitan kundi konkretong paglapit ng serbisyong pangkalusugan sa mga komunidad.

Inanunsyo ni Pangulong Ferdinand “Bongbong” Marcos Jr. na nakumpleto na ng pamahalaan ang pamamahagi ng Patient Transport Vehicles (PTVs) sa lahat ng 82 lalawigan sa bansa. Sa pamamagitan ng pinakahuling distribusyon ng 34 na yunit sa Northern at Central Luzon, mayroon nang magagamit na PTV ang bawat lalawigan, lungsod at munisipalidad upang maghatid ng mga pasyente papunta at pabalik sa mga pagamutan nang libre sa oras ng pangangailangan.

Kasama ng First Lady Liza Araneta-Marcos, pinangunahan ng Pangulo ang turnover ng mga bagong sasakyan sa San Fernando, Pampanga. Sa kabuuang 34 na yunit, 14 ang napunta sa Region III, anim sa Cordillera Administrative Region (CAR), anim sa Region I, at walo sa Region II. Tumanggap ng tig-iisang PTV ang Abra, Apayao, Benguet, Ifugao,

Kalinga at Mountain Province. Sa Region I, nakatanggap ng tig-isang yunit ang Ilocos Norte at Ilocos Sur, habang tig-dalawa naman ang La Union at Pangasinan. Dalawang PTV rin ang inilaan sa bawat lalawigan ng Batanes, Cagayan, Nueva Vizcaya at Quirino sa Region II.

Ayon sa Pangulo, ang bawat sasakyan ay kumpleto sa mahahalagang kagamitang medikal tulad ng stretcher, spine board, wheelchair, blood pressure monitor, first aid kit at oxygen system. Mayroon din itong early warning device at fire extinguisher upang matiyak ang kaligtasan ng mga pasyente habang isinasakay at dinadala sa ospital.

Inihayag din ni Marcos na ang susunod na yugto ng programa ay ang paglalagay ng mga medical transport boat para sa mga isla at malalayong komunidad. Sa ganitong sistema, maipapasok ang mismong patient transport vehicle sa bangka upang hindi na kailangang ilipat pa ang pasyente, na makatutulong upang mabawasan ang panganib at mapabilis ang pagresponde sa mga emergency.

Ang ganitong programa ay nagpapakita na mahalaga ang pagkakaroon ng maayos na transportasyon sa serbisyong pangkalusugan. Gayunman, hindi dapat magtapos ang pagsisikap sa pamamahagi ng mga sasakyan. Kailangang tiyakin ng bawat lokal na pamahalaan na ang mga PTV ay maayos na namementina, may sapat na sinanay na tauhan, at laging handang gamitin anumang oras. Kapag naging tuluy-tuloy ang ganitong serbisyo, mas maraming buhay ang maaaring mailigtas at mas mararamdaman ng taumbayan na ang serbisyong pangkalusugan ay tunay na umaabot hanggang sa pinakamalayong komunidad.