PBBM, feeling BFF si Pres. Trump, ‘Pinas dinagdagan naman ng taripa

ni Pablo Hernandez @Prangkahan | July 27, 2026

VP SARA TOP ULI SA PRESIDENTIAL SURVEY SA RATING NA 49%, HABANG SI SEN. RISA KULELAT SA RATING NA 0.01% – Sa 14 na pangalan ng mga pulitiko at opisyal ng gobyerno na isinama sa presidential survey ng Pulse Asia para sa 2028 elections, dalawa pa lamang ang hayagang nagdeklara ng kanilang kandidatura sa pagkapangulo—sina Vice President Sara Duterte at Sen. Risa Hontiveros.

Hindi na natin isasama ang resulta ng ibang personalidad dahil hindi pa naman sila deklaradong tatakbo sa 2028 presidential election. Magpokus na lang tayo kina VP Sara at Sen. Risa.

Muli, nanguna si VP Sara sa survey sa nakuha niyang 49% rating. Samantala, si Sen. Risa ang naging sentro ng pangungutya ng ilang netizens sa social media dahil siya ang nakakuha ng pinakamababang rating na 0.01%, malayong-malayo sa resulta ng bise presidente. Ha-ha-ha!

XXX

‘PINAS PINATAWAN NG TATE NG 12.5% TARIPA, IBIG SABIHIN NIYAN HINDI ITINUTURING NI US PRES. TRUMP NA BFF NIYA SI PBBM – Nagpataw si US President Donald Trump ng karagdagang 12.5% tariff o buwis sa lahat ng produktong iniluluwas ng Pilipinas sa Amerika.

Hay naku, kung magpabida si PBBM sa publiko ay parang ipinapalabas niyang BFF forever sila ni Pres. Trump. Pero kung talagang ganoon ang kanilang samahan, bakit nagpataw pa rin ang US ng ganoon kalaking taripa sa mga produktong Pilipino? Boom!

XXX

MAY NAGPASABOG NA NG IED SA MINI-CASINO SA BAGUIO CITY, MAY NAGPAPUTOK NA NG BARIL SA SAKLAAN SA CAVITE, PERO AYAW PANG IPA-STOP – Noong April 13, 2026, isang minero ang nagpasabog ng improvised explosive device (IED) sa mini-casino nina "Patrick" at "Nestor" sa Baguio City dahil umano sa pandarayang ginagawa sa kanya. Labintatlong katao ang nasugatan sa insidente.

Samantala, naging viral naman noong nakaraang linggo ang pagwawala at pagpapaputok ng baril ng isang negosyanteng natalo sa sakla ni "Turok" sa Kawit, Cavite.

Sa kabila ng mga insidenteng ito, tuloy pa rin ang operasyon ng mini-casino nina "Patrick" at "Nestor" sa Baguio City, gayundin ang sakla ni "Turok" sa Kawit. Ang masaklap, mayroon na ring sakla sa mga bayan ng Indang at Noveleta na umano'y pinatatakbo nina "Atan" at "Eric."

Hay naku, tila hihintayin pa yata ng mga awtoridad na may mamatay bago tuluyang ipatigil ang mga ganitong ilegal na raket sa kanilang nasasakupan. Mga pwe!

SONA, dapat maghatid ng tunay na pag-asa

ni Leonida Sison @Boses | July 27, 2026

Dinggin ang hinaing ng Pilipino dahil ang tunay na sukatan ng isang makabuluhang State of the Nation Address (SONA) ay hindi ang dami ng nagawang proyekto kundi ang malinaw na direksyon kung paano lulutasin ang mga problemang araw-araw na kinakaharap ng mamamayan. 

Sa gitna ng mataas na presyo ng mga bilihin, kakulangan sa trabaho at iba pang suliranin, mas inaasahan ng publiko ang mga konkretong hakbang kaysa sa listahan ng mga tagumpay ng administrasyon.

Ito ang lumabas sa isinagawang pre-SONA survey ng public affairs at stakeholder relations firm na EON, kung saan 1,200 Pilipinong nasa hustong gulang mula sa iba’t ibang bahagi ng bansa ang tinanong mula Hulyo 7 hanggang 10, 2026. Ayon sa resulta, 48.3% ng mga respondent ang nagsabing nais nilang marinig sa ikalimang SONA ni Pangulong Ferdinand Marcos Jr. ang mga solusyon sa kasalukuyang suliranin ng bansa.

Samantala, 22% lamang ang nagsabing mas nais nilang marinig ang mga naging tagumpay ng administrasyon, ang pinakamababang bilang sa mga pagpipilian.

Bukod dito, 35.6% ang naghihintay ng mas matitibay na hakbang laban sa korupsiyon at reporma sa pamahalaan, habang 34.7% ang nais ng update sa mga naunang ipinangako ng administrasyon. Nasa 32.8% naman ang umaasang maririnig ang konkretong plano upang mapababa ang presyo ng mga pangunahing bilihin. Mayroon ding 27.2% na humihiling ng tapat na pagtalakay sa tunay na kalagayan ng bansa at 23.5% ang gustong malaman ang mga programa ng gobyerno para sa susunod na taon.

Sa usapin naman ng mga problemang dapat pagtuunan ng Pangulo, nanguna ang ekonomiya at inflation na binanggit ng 67.1% ng mga respondent. Sinundan ito ng trabaho at sahod na may 56.2% , edukasyon na may 53.%, agrikultura at seguridad sa pagkain na may 47.3% , kalusugan na may 44.7%, gastos sa pamumuhay na may 43.3%, krimen at kaligtasan ng publiko na may 42.4%, at korupsiyon na may 42.2%.

Kapansin-pansin ding 30.8% lamang ng mga respondent ang naniniwalang maisasakatuparan ng pamahalaan ang mga pangakong ilalahad sa SONA. Ipinapakita nito na hindi lamang mga bagong pangako ang hinahanap ng publiko kundi patunay na ang mga ito ay maipatutupad.

Mahalagang maging gabay ang sentimyento ng mamamayan sa nilalaman ng SONA. Ang mga Pilipino ay naghahanap ng pag-asa na nakabatay sa konkretong plano, malinaw na pananagutan at agarang aksyon. Kung tunay na nais ng pamahalaan na mapalakas ang tiwala ng publiko, dapat nitong ipakita hindi lamang ang mga nagawa kundi ang malinaw na landas sa paglutas ng mga suliraning matagal nang pasan ng bawat pamilyang Pilipino. Ang pinakamahalagang talumpati ay yaong may kasunod na resulta na tunay na mararamdaman sa hapag-kainan, sa trabaho at sa pang-araw-araw na buhay ng taumbayan.

Sa mga tumuturing sa amin bilang unggoy, tingnan muna ang inyong sarili

ni Fr. Robert Reyes @Kapaayapaan / Patakbo-takbo | July 26, 2026

Dalawang beses tayong sumama sa mga grupong nagsagawa ng misyon sa West Philippine Sea. Sa unang biyahe, sumakay tayo sa isang training ship na may kakayahang magsakay ng mahigit isang daang pasahero. Dahil sa laki ng barko, panatag ang pakiramdam ng lahat. Ngunit hindi natin alam kung gaano karami at kalalaki ang mga barkong naghihintay sa gitna ng dagat.

Ibang usapan pala kapag kaharap mo na ang napakalalaking barko ng mananakop. Sa ilan sa amin, ang malalim na pananampalataya sa Diyos ang naging sandigan ng lakas ng loob. Ngunit para sa lahat, higit na nangingibabaw ang nag-aalab na pagmamahal sa bayang patuloy na inaagawan ng karapatan sa sariling karagatan.

Sa ikalawang misyon, tatlong karaniwang lantsang pangisda ang sinakyan ng mga estudyante, propesyonal, kinatawan ng lokal at dayuhang media, at tatlong paring Katoliko. Sa parehong biyahe, nasilayan namin ang malinaw na pagpapakita ng puwersa ng mananakop at ang patuloy nitong pagbaluktot sa kasaysayan at sa ating lehitimong karapatan sa West Philippine Sea. Ngunit higit na umalingawngaw ang sigaw ng lahat: "West Philippine Sea, Atin 'To!"

Magdadalawang taon na ang lumipas mula nang isagawa ang dalawang misyong iyon. Habang tumatagal, lalo lamang tumitibay ang paninindigan ng mga Pilipino na ang West Philippine Sea ay atin at dapat itong ipaglaban sa mapayapa ngunit matatag na paraan. Kasabay nito, lalo ring tumitindi ang panggigipit at pang-aabuso ng mananakop.

Paulit-ulit ang paggamit ng water cannon laban sa ating mga tauhan ng Philippine Coast Guard at maging sa mga karaniwang mangingisdang nangingisda lamang sa sarili nating karagatan. Patuloy na ipinagtatanggol ng ating mga tagapangalaga ng karagatan ang ating soberanya. Walang ibang bansa ang may karapatang magdikta kung ano ang maaari o hindi natin gawin sa sarili nating teritoryo.

Patuloy ding iginigiit ng mananakop ang kanilang "nine-dash line," kahit malinaw nang ibinasura ito ng internasyonal na batas at patuloy silang pumapasok sa ating Exclusive Economic Zone (EEZ). Tayo pa ang kanilang inaakusahan na nanghihimasok sa sarili nating karagatan. Kaya nararapat lamang pasalamatan ang Philippine Coast Guard at Philippine Navy sa kanilang walang sawang pagtatanggol sa ating karapatan.

Lalo pang tumindi ang tensyon nang isang maliit na bangka ng mananakop ang nagtangkang lumapit sa BRP Sierra Madre. Agad itong hinarang ng ating mga tauhan sakay ng maliliit na rubber boat upang protektahan ang barko at ang mga marinong nakatalaga rito.

Sa gitna ng komprontasyon, hinampas ng ilang tauhan ng mananakop ang ating mga kawani gamit ang mga bakal na truncheon. Tinamaan sa ulo ang isang Pilipino at duguang isinugod sa ospital.

Kasabay ng pisikal na karahasang ito, lumabas din ang isang cartoon na malinaw na nang-insulto sa sambayanang Pilipino. Ipinakita rito ang isang unggoy na nakasuot ng Barong Tagalog, takot na takot at walang kalaban-laban. Sa sumunod na eksena, binuhat ito ng dambuhalang mga kamay at inihagis sa malakas na buga ng water cannon hanggang matangay sa West Philippine Sea.

Ipinakikita ng cartoon na ito ang pananaw ng mananakop—na mahina, maliit at walang magagawa ang Pilipinas laban sa kanila. Nakalulungkot na tila ganito rin ang naging pananaw ng nakaraang pangulo at ng kanyang anak na ngayo'y Bise Presidente: na dahil napakalakas ng kalaban, mas mabuting makisama na lamang kaysa manindigan.

Ngunit hindi tayo dapat pumayag sa ganitong pag-iisip. Nang lapitan ng mga tauhan ng mananakop ang BRP Sierra Madre, buong tapang na humarap ang ating mga marino upang ipagtanggol ang ating teritoryo. Kahit plastik na sagwan lamang ang kanilang panangga laban sa bakal na truncheon, hindi sila umatras. Nasugatan man ang isa sa kanila, agad namang naghain ng diplomatikong protesta ang ating pamahalaan.

Tulad ng dati, binaligtad ng mananakop ang kuwento. Iginiit nilang tayo umano ang unang nanghimasok at sila lamang ang nagtatanggol sa kanilang teritoryo.

Sa kabila nito, dumarami ang mga Pilipinong namumulat sa katotohanan. Malaki ang naitutulong ng social media upang makita ng publiko ang tunay na nangyayari at matukoy ang tama at mali.

Salamat kina Commodore Jay Tarriela at Defense Secretary Gilberto "Gibo" Teodoro Jr. sa kanilang malinaw at matapang na paninindigan. Higit sa lahat, salamat sa dumaraming mamamayang lalong lumalalim at lumalakas ang pagmamahal sa ating Inang Bayan.