Sec. Gadon, imbes tulungan ang mahihirap, rating ni VP Sara ang inaatupag

ni Pablo Hernandez @Prangkahan | July 28, 2026

IMBES NA ATUPAGIN NI SEC. GADON KUNG PAANO MAPABUTI ANG BUHAY NG MAHIHIRAP NA PINOY, RATING NI VP SARA ANG PINUPUNTIRYA – Pinupuntirya ni Presidential Adviser for Poverty Alleviation Sec. Larry Gadon ang mga survey firm na naglabas ng napakataas na performance rating ni Vice President Sara Duterte. Aniya, wala naman umanong ginagawa ang bise presidente, madalas pang nasa abroad, pero binigyan pa rin ng mataas na grado.

Sa aming pananaw, ang ganitong pahayag ay mas nararapat manggaling sa Presidential Communications Office (PCO) spokesperson na si Usec. Claire Castro, at hindi kay Sec. Gadon.

Ang nais naming ipunto ay dapat pagtuunan ni Sec. Gadon ang kanyang pangunahing tungkulin—ang paghahanap ng mga paraan upang mapabuti ang kalagayan ng mga mahihirap na kababayan—sa halip na atakihin ang mga survey firm at si VP Sara. Period!

XXX

MGA MILITANTE, JOIN NA SA MGA DDS SA IPINAPAKITANG GALIT KAY PBBM – Bago magsimula ang State of the Nation Address (SONA) kahapon ni Pangulong Ferdinand “Bongbong” Marcos Jr. (PBBM), nagkagulo na sa Commonwealth Avenue, Quezon City nang atakehin ng mga militanteng grupo ang barikada ng mga pulis. Dahil dito, may mga raliyistang inaresto.

Ang ipinakitang galit ng mga militante kay PBBM ay katulad din ng ipinakikitang galit ng mga Duterte Diehard Supporters (DDS).

Ibig sabihin niyan, hindi lang mga DDS ang galit kay PBBM, kundi maging ang mga militante. Boom!

XXX

SEN. ALAN CAYETANO, KONTRA-SONA – Matapos ang SONA ni PBBM kahapon, si Sen. Alan Cayetano naman umano ang magsasagawa ngayong araw ng kontra-SONA, na nangangahulugang kokontrahin niya ang mga sinabi ng Pangulo sa kanyang talumpati.

Kung ano man ang mga sasabihin ni Sen. Cayetano sa kanyang kontra-SONA ay malamang na pag-atake kay PBBM, dahil tila wala itong planong magsabi ng anumang positibo tungkol sa administrasyong Marcos.

XXX

HINDI PAGSIPOT SA SONA NG MGA SENADOR SA SENATE MINORITY, PAGPAPAKITA ITO NA PALALA NANG PALALA ANG MAGULONG PULITIKA SA ‘PINAS – Ilang senador mula sa Senate minority ang hindi sumipot sa SONA ni PBBM sa Batasang Pambansa sa Quezon City.

Ang kanilang hindi pagdalo ay malinaw na pagpapakita ng matinding hidwaan sa pagitan nila at ng Pangulo. Patunay rin ito na lalo pang umiinit at gumugulo ang sitwasyon ng pulitika sa bansa. Tsk!

Paliwanag sa “wage distortion”

ni PAO Chief Persida Rueda-Acosta @Magtanong Kay Attorney | July 28, 2026

Dear Chief Acosta,

Kapag po ba nagkaroon ng bagong minimum wage o wage order, at halos napantay na ang sahod ng matagal nang empleyado sa sahod ng bagong empleyado, o halos kapantay na ang sahod ng empleyadong may mas mataas ang posisyon sa sahod ng nasa mababang posisyon, ito po ba ang tinatawag na wage distortion? — Claire

---

Dear Claire,  

Para sa iyong kaalaman, ang wage distortion ay may tiyak na kahulugan sa ilalim ng Artikulo 124 ng Labor Code of the Philippines, na naamyendahan ng Republic Act (R.A.) No. 6727, o mas kilala bilang Wage Rationalization Act. Nakasaad sa nasabing batas:

“As used herein, a wage distortion shall mean a situation where an increase in prescribed wage rates results in the elimination or severe contraction of intentional quantitative differences in wage or salary rates between and among employee groups in an establishment as to effectively obliterate the distinctions embodied in such wage structure based on skills, length of service, or other logical bases of differentiation.” 

Sa mas payak na paliwanag, nagkakaroon ng wage distortion kapag ang pagtaas ng minimum wage o itinakdang wage rate sa bisa ng batas o wage order ay natatanggal o lubhang nagpapaliit sa dating makatwirang agwat ng sahod ng iba’t ibang grupo ng empleyado sa isang establisimyento. Halimbawa, kung dahil sa bagong wage order ay halos napantay na ang sahod ng bagong pasok o ng may mababang posisyon sa sahod ng mas matagal na empleyado o may mas mataas na posisyon, maaaring magkaroon ng wage distortion kung mawawalang bisa ang dating pagkakaiba batay sa kasanayan, tagal ng serbisyo, ranggo, o iba pang makatwirang batayan.

Gayunman, hindi lahat ng hindi pagkakapantay-pantay o pagbabago sa sahod ay agad na maituturing na wage distortion sa ilalim ng batas. Sa kasong Prubankers Association vs. Prudential Bank and Trust Company (G.R. No. 131247, ika-25 ng Enero 1999, isinulat ni Kgg. na Punong Mahistrado Artemio Panganiban) ipinaliwanag ng Korte Suprema ang apat na elemento ng wage distortion:

“Wage distortion involves four elements:

1. An existing hierarchy of positions with corresponding salary rates

2. A significant change in the salary rate of a lower pay class without a concomitant increase in the salary rate of a higher one

3. The elimination of the distinction between the two levels

4. The existence of the distortion in the same region of the country”

Mahalaga ang ikaapat na elemento ng wage distortion. Ang pagkakaiba ng sahod ng mga empleyado sa magkaibang rehiyon ay hindi awtomatikong wage distortion, sapagkat maaaring magkaiba ang umiiral na wage order sa bawat rehiyon.

Samakatuwid, ang wage distortion ay hindi simpleng reklamo na “hindi pantay ang sahod.” Ito ay isang partikular na sitwasyon kung saan ang pagtaas ng sahod dahil sa batas o wage order ay nagbubura o lubhang nagpapaliit sa makatuwirang agwat ng sahod sa loob ng wage structure ng isang establisimyento. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Pagbabalik-sesyon ng Kongreso: Pagbangon ng ekonomiya

ni Kuya Win Gatchalian @Win Tayong Lahat | July 28, 2026

Kasunod ng State of the Nation Address ng Pangulo kahapon, nagbabalik-sesyon din ang dalawang kapulungan ng Kongreso upang talakayin ang mga mahahalagang panukalang batas na tutugon sa mga hamong kinakaharap ng bansa. 

Sa ating mga kababayan, nais kong ipaabot ang isang malinaw na mensahe: naririnig ng inyong Senado ang inyong mga hinaing at nauunawaan namin ang bigat na inyong dinadala sa inyong mga pang-araw-araw na buhay. Bilang Pangulo ng Senado, tinitiyak ko sa ating mga kababayan na malinaw ang aming prayoridad bilang mga mambabatas: mga panukalang batas na magbibigay solusyon sa inyong mga pangangailangan at magbubukas ng mas maraming oportunidad tungo sa mas magandang kinabukasan. 

Malinaw na hamon sa atin ang pagbangon ng ating ekonomiya. Iniulat kamakailan ng Development Budget Coordination Committee na bumaba ang tinataya nilang paglago ng ekonomiya para sa taong ito: mula lima hanggang anim na porsyento pababa sa 3.5 hanggang 4.5 porsyento. Kung babagal ang paglago ng ekonomiya, babagal din ang pagsugpo natin sa kahirapan at mababawasan ang bilang ng mga trabahong ating malilikha. Sa madaling salita, ang ating mga kababayan ang lubos na mahihirapan.

Kaya naman sa pagbabalik-sesyon ng Kongreso, tututukan natin ang pagbangon ng ating ekonomiya. Hindi sapat ang magagandang mga numero o istatistikang iuulat natin sa ating mga kababayan. Kailangang maramdaman nila ito sa presyo ng mga bilihin, sa mga trabahong nililikha, at sa pagkaing hinahain sa mesa ng bawat pamilya. 

Upang matugunan ang mga hamong ito, bibigyang-prayoridad ng inyong Senado ang limang mahahalagang paksa: mataas na presyo ng mga bilihin, mababang sahod na inuuwi ng mga manggagawa, mataas na singil sa kuryente, kakulangan sa imprastraktura at transportasyon, at kawalan ng kasiguruhan sa hanapbuhay ng ating mga kababayan. 

Isa sa mga pinakamahagalang hakbang na magagawa natin upang tugunan ang mga usaping ito ang napapanahong pagpasa sa 2027 national budget. Kung maipapasa natin ang national budget sa tamang oras, mapopondohan natin ang mga mahahalagang proyekto at programang tumutulong sa ating mga kababayang makatawid sa pang-araw-araw nilang pamumuhay. 

Kung magagastos naman ng ating pamahalaan nang tama ang inilaang pondo para sa mga mahahalagang proyekto, mabibigyang-sigla nito ang ating ekonomiya upang makalikha ng mas maraming trabaho at mga oportunidad para sa ating mga kababayan.

Matatandaan din natin na noong nakaraang taon, sinimulan natin ang mga reporma upang isulong ang transparency sa pagbuo ng national budget. Umaasa ang inyong lingkod na magpapatuloy ang mga repormang ito upang matiyak na mapupunta sa tama ang bawat sentimo ng buwis na binabayad ng ating mga kababayan. 

Sa ating mga kababayan, makakaasa kayo na magiging kaisa ninyo ang inyong Senado sa inyong pagsusumikap na mabigyan ang inyong mga pamilya ng mas magandang kinabukasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com