PBBM, ‘pag sumablay ang mga sinabi sa SONA, malamang kahit ex-president na, bina-bash pa rin

ni Pablo Hernandez @Prangkahan | July 29, 2026

DAPAT IHANDA NA NI CONG. ROMUALDEZ ANG KANYANG SARILI KASI TILA MALAPIT NA SIYANG MAKULONG SA CITY JAIL – Ang unang tirada ni Pangulong Ferdinand “Bongbong” Marcos Jr. (PBBM) sa kanyang State of the Nation Address (SONA) ay patungkol sa kanyang pinsan na si Leyte 1st District Rep. at dating Speaker Martin Romualdez. Ayon sa Pangulo, inihahanda na ng Ombudsman ang mga kaukulang kaso laban dito.

Dahil mismong ang Pangulo ang nagsabi nito sa kanyang SONA, dapat nang ihanda ni Cong. Romualdez ang kanyang sarili. Kapag naisampa na ng Ombudsman ang mga kaso sa Sandiganbayan, tiyak na makukulong na siya sa city jail. Period!

XXX

DAPAT TUPARIN NI PBBM ANG KANYANG MGA SINABI SA SONA KUNG AYAW MA-BASH – Maraming magagandang sinabi si PBBM sa kanyang SONA para sa kapakanan ng bayan at mamamayan.

Sana ay matupad ang lahat ng kanyang mga ipinangako. Kung boladas lamang ang mga ito, asahan na niyang puputaktihin siya ng batikos ng mga netizen sa social media, kahit matapos pa ang kanyang termino at maging dating pangulo na lamang siya. Boom!

XXX

ANG DAPAT PAG-INITAN NI SP GATCHALIAN AY MGA CELEBRITY AT VLOGGERS NA NAGPO-PROMOTE NG ONLINE GAMBLING, HINDI 'YUNG MGA MINORS – Hindi katanggap-tanggap para sa publiko ang panukalang batas ni Senate President Sherwin Gatchalian na "Social Media Safety for Children Act", na nagbabawal sa mga menor-de-edad, o 16-anyos pababa, na gumamit ng social media.

Napakaraming menor-de-edad ang, sa kabila ng kanilang edad, ay kumikita sa paggawa ng content na nagpapakita ng kanilang mga talento.

Sa halip na mga menor-de-edad ang pagtuunan ng pansin, mas nararapat sanang isulong ni SP Gatchalian ang panukalang nagbabawal sa mga celebrity at vloggers na mag-promote ng online gambling sa social media. Sa totoo lang, ang online gambling ang may masamang impluwensiya, hindi ang pagpapakita ng talento ng mga menor-de-edad sa Facebook, X, YouTube, TikTok, at Instagram. Period!

XXX

MGA KARGAMENTONG INILALABAS SA CUSTOMS NINA 'GERRY T.' AT 'KIMBERLY GANG', BAKA MAY PALAMANG SHABU KAYA DAPAT IMBESTIGAHAN – May impormasyon na naipupuslit umano nina "Gerry T." at ng "Kimberly Gang" ang kanilang mga kargamento nang hindi na sumasailalim sa inspeksiyon ng ilang tiwaling tauhan ng Customs.

Aba'y dapat itong imbestigahan ng Kongreso dahil baka isa ito sa mga dahilan kung bakit tila muling lumalala ang problema sa ilegal na droga sa bansa. Posible umanong may "palamang shabu" ang ilan sa mga kargamentong naipupuslit palabas ng Customs. Boom!

Serbisyong pangkalusugan, ‘di dapat mailap sa mahihirap

ni Leonida Sison @Boses | July 29, 2026

Malaking ginhawa para sa mga pamilyang may anak na may developmental disabilities ang pagpapalawak ng tulong medikal ng pamahalaan. Sa panahon na mataas ang halaga ng konsultasyon at therapy, ang bawat dagdag na benepisyo ay hindi lamang nakababawas sa gastusin kundi nagbibigay rin ng mas malaking pag-asa na tuluy-tuloy na matutugunan ang pangangailangan ng mga batang nangangailangan ng espesyal na pangangalaga.

Sa kanyang ikalimang State of the Nation Address (SONA), inanunsyo ni Pangulong Ferdinand Marcos Jr. na dodoblehin ng PhilHealth ang benefit package para sa mga batang may developmental disabilities. Bukod dito, itataas din mula 90 hanggang 150 ang bilang ng therapy sessions na sasagutin ng PhilHealth upang mas maraming bata ang makapagpatuloy sa kinakailangang gamutan at rehabilitasyon.

Hindi lamang ito ang hakbang na inilatag ng administrasyon. Ayon sa Pangulo, magbibigay rin ng karagdagang suportang pinansyal ang Department of Social Welfare and Development (DSWD) sa pamamagitan ng Project Aruga, na layong higit pang matulungan ang mga benepisyaryo sa kanilang gastusing pangkalusugan at pangangalaga sa kanilang mga anak.

Ipinagmalaki rin ni Marcos na lumaki ang bilang ng mga pamilyang nakikinabang sa mga programa ng PhilHealth, mula sa mahigit limang milyong pamilya noong 2022 hanggang higit 7.5 milyon sa kasalukuyan. Aniya, naging posible ito dahil sa pinaigting na kampanya sa pagpaparehistro, mas maayos na proseso ng enrollment at mas mabilis na pagbabayad sa mga ospital at healthcare providers.

Binigyang-diin din ng Pangulo ang patuloy na pagpapalawak ng serbisyong medikal para sa mahihirap. Ayon sa kanya, halos tatlong milyong indibidwal na ang nakinabang sa Zero-Balance Billing Program sa mga ospital ng Department of Health (DOH), habang mahigit walong milyong pasyente naman ang natulungan ng Medical Assistance for Indigent and Financially Incapacitated Patients (MAIFIP).

Kasabay nito, inanunsyo rin ang digitalisasyon ng MAIFIP sa pamamagitan ng e-MAIFIP, na maaari nang ma-access sa mga DOH hospital at sa eGovPH app. Dahil dito, dalawang requirements na lamang ang kailangan at hindi na hihingi ng guarantee letter mula sa mga pulitiko. Layunin ng hakbang na gawing mas mabilis, mas simple at mas patas ang pagkuha ng medical assistance para sa milyun-milyong Pilipino. Target din ng pamahalaan na maabot ang higit 56 milyong gumagamit ng eGovPH app. Inihayag din ng Pangulo ang plano sa pagtatayo ng isang Virology and Vaccine Institute upang higit pang mapalakas ang kakayahan ng bansa sa pananaliksik at pagtugon sa mga sakit.

Ang mga programang ito ay nagpapakita ng layuning gawing mas abot-kaya at mas madaling makuha ang serbisyong pangkalusugan. Gayunman, nasusukat ang tagumpay sa kung paano magiging mabilis, tuluy-tuloy at pantay ang pagpapatupad ng mga ito sa bawat komunidad. Kapag ang tulong ay madaling maabot nang walang pabor, mahabang pila o komplikadong proseso, mas mararamdaman ng taumbayan na ang serbisyong pangkalusugan ay tunay na para sa lahat, lalo na sa mga pamilyang higit na nangangailangan. 

“Pekeng” parking at vendor's fee, ‘wag gawing gatasan

ni Ka Ambo @Bistado | July 28, 2026

Pahinga muna ang bakbakan ng US at Iran.

Napagod din ang mga loko!

----$$$--

AI pa rin ang pinakamainit na isyu.

Ang problema, kakaunti ang nakakaunawa nito.

Ito ay isang bagong “monster.”

----$$$--

SA susunod na 2-3 taon, paralisado na ang maraming gobyerno—dahil “dispalinghado” ang sistema sanhi ng AI.

Ibig sabihin, maraming gobyerno ang hindi makakasabay sa nagbabagong teknolohiya.

----$$$--

DAPAT ay ipaubaya ng gobyerno at pribadong sektor ang pangangasiwa sa mga kabataang higit na nakakaunawa ng AI.

Ibig sabihin, baguhin ang konstitusyon at hayaan ang gobyerno at pribadong sektor na pamunuan ng mga batang ehekutibo.

-----$$$--

IPAGBAWAL ang pagkandidato ng mga matatandang pulitiko na sobra-sobra ang karanasan sa technical malversation.

Kahit ang mga huwes o hukom ay magkusang magbawas ng edad—at ipaubaya ang hudikatura sa mga kabataan.

-----$$$--

ANG mga kabataan ngayon ay nabuhay kakambal ang gadgets––cellphone, computer, apps, platform automation, at AI.

Sila ang dapat namumuno sa publiko at pribadong sektor.

-----$$$--

ANG financial transactions—cash-in at cash-out—mula barangay, munisipalidad, siyudad, lalawigan, rehiyon at nasyonal—ay dapat nakalantad o transparent sa publiko.

Ang Ombudsman at COA ay dapat mag-hire ng mga batang “monitoring team” upang matukoy nang mabilis ang “modus sa korupsiyon.”

-----$$$--

HALIMBAWA, ang paniningil ng parking fee, tiket sa mga barangay, munisipalidad, siyudad at lalawigan—ay dapat na “well-audited” o “accounted”—dahil ‘yan ay aktuwal na korupsiyon.

Isipin mong naniningil ng bayad na “parking fee” sa mga kalye at parke—pero ordinaryong papelitos lamang ang resibo.

----$$$--

ANG mga resibo sa LGU ay dapat may “official receipt” mula sa city o municipal treasurer.

Bakit wala?

Tiyaking hindi peke ang mga resibo na ginagamit sa mga parking fee at vendor’s fee—at tiyaking nakakarating ito sa city treasurer.

Aktuwal na korupsiyon ito na nagpapahirap sa taumbayan—pero nakatameme ang lahat.

-----$$$--

GAMIT ang AI, mabilis na mamo-monitor ‘yan ng mga makabagong “apps.”

Pero, hindi ‘yan gagawin ng mga “matatandang pulitiko.”

Iyan kasi mismo ang kanilang “gatasang-baka.”

Unlimited ang daloy ng “dirty money” sa bulsa ng mga mandarambong sa pamahalaan!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.