Ika-5 sunod na finals seat kinagat ng NU Bulldogs

by Gerard Arce @Sports News | May 3, 2026

Photo: Dobleng depensa ang ginawa ni #18 Regina Grace Jurado at #5 Avril Denise Bron ng UST Golden Tigresses sa palo ni #18 Arah Ella Panique ng NU Lady Bulldogs sa UAAP Season 88 Women's Volleyball Tournament sa Smart Araneta Coliseum kahapon. (Ben Maniclang via Bulgar)

Mga laro sa Miyerkules

(MOA Arena)

Separate ticket

Best-of-3 Finals

12 noon – FEU vs NU (Men Finals)

5 p.m. – DLSU vs NU (Women Finals)

Magkakaroon ng ikalawang pagkakataon ang NU Lady Bulldogs na madepensahan ang korona na kakagat sa ika-5 sunod na finals appearance matapos tuldukan ang ratsada ng UST Golden Tigresses sa 20-25, 26-24, 26-24, 25-21 kasunod ng mahusay na pagmamando sa opensa ni ace playmaker Camila “Lams” Lamina para harapin ang undefeated na DLSU Lady Spikers, kahapon sa UAAP Season 88 volleyball tournament stepladder semifinals sa Smart Araneta Coliseum.

Bukod tangi ang naging pagpapakita ng kahusayan sa pagpapatakbo ng opensa ng Lady Bulldogs ng 24-anyos na two-time Best Setter at sa eksaktong laro ng mga spikers na sina Arah Panique at Vange Alinsug, gayundin si middle blocker Chamy Maaya. “Very happy kase lahat kami talagang pinagtrabahuhan namin itong game na ito kase very crucial, do-or-die game and very happy ako sa performance ng team, sana magtuloy-tuloy siya hanggang championship,” pahayag ng 5-foot-7 setter na tubong Guimaras na namahagi ng 34 excellent sets, kasama ang anim na digs, at tatlong puntos, na makakalaban ang La Salle sa pang-apat na pagkakataon.

“Very challenging talaga yung La Salle,  kase kumpleto sila and kami naman all we have to do is back to basic and prepare kung ano talaga yung usual na preparation namin sa team at yung preparation. Iisang mindset pa rin, is to get the championship crown.”

Nanguna sa atake si dating Alas Pilipinas hitter Arah Panique sa 23 puntos na sinundan ni senior spiker Alinsug sa 18 marka habang umiskor si Maaya ng 14 puntos at Alexa Mata sa 9 puntos at apat na digs.

UST Junior Tigresses at Nuns-B mga kampeon sa SGVIL rising stars

by Gerard Arce @Sports News | May 2, 2026

Photo: Circulated

Pinusuan ng husto ng University of Santo Tomas Junior Golden Tigresses ang pag-ahon pabalik sa laban para iangat tungo sa panalo sa pangunguna nina Kim Rubin at Mary Nicole Pelaez para makuha ang come-from-behind 16-25, 26-24, 19-25, 28-26, 15-10 kontra Bacolod Tay Tung sa winner-take-all Finals ng Shakey’s Girls Volleyball Invitational League (SGVIL) Rising Stars Cup Division 1 kahapon sa La Salle Green Hills Gym.

Naging matibay na sandalan ng UST sina Rubin at Pelaez na nagbigay ng apat na puntos na bentahe sa UST sa 9-5 iskor sa fifth set, ngunit naging matatag ang determinasyon ni Rhose Almendralejo na hindi nito isusuko ng ganoon kadali ang laban sa patuloy na pagbira para sa Tay Tung.

Gayunman, mas lalong lumayo ang kalamangan ng Junior Golden Tigresses matapos ang magkasunod na attack errors ni Almendralejo para madala sa 13-7 ang bentahe ng UST. Sinubukang bumawi ng outside hitter mula Bacolod para tapyasin sa 13-8, ngunit agad namang sinundan ito ng isang service error ni Almendralejo para manganib sa 14-8.

Hindi agad bumigay ang Tay Tung na nakakuha ng dalawang karagdagang puntos mula kina Jhaennine Mayang at isang error ng UST para lumapit sa 14-10 ang iskor. Subalit tuluyang sinaraduhan ni Pat Mendoza ang opensiba ng Bacolod mula sa matinding butata para makamit ng UST ang panalo.

Nakuha naman ng NUNS ang Division 1 bronze medal sa pangwawalis sa Far Eastern University-Diliman sa 25-18, 25-21, 25-18, habang kampeon naman sa Division 2 ang NUNS-B laban sa Batangas High School sa iskor na 33-31, 25-17, 25-23, samantalang Bronze medal ang nakuha ng Bacolod Tay Tung sa Division 2 ng talunin ang Corpus Christi School sa 25-15, 25-21, 18-25, 25-20.

UST binalibag ang Nuns, finalist na vs. Bacolod

by Gerard Arce @Sports News | May 1, 2026

Photo: Shakey’s Girls Volleyball Invitational League (SGVIL) / Shakey's Super League

Napatalsik ng University of Santo Tomas Junior Golden Tigresses ang defending champion National University Lady Bullpups sa kanilang trono sa pamamagitan ng dikdikang aksyon na nagtapos sa 25-22, 19-25, 17-25, 25-19, 15-11 para harapin ang Bacolod Tay Tung sa winner-take-all finals nang walisin ang Far Eastern University-Diliman sa 25-22, 25-13, 25-23 kahapon sa Shakey’s Girls Volleyball Invitational League (SGVIL) Rising Stars Cup Division 1 Final Four La Salle Green Hills Gym.

Nabitbit ng Junior Golden Tigresses ang momentum mula sa fourth-set panalo upang mapuwersa ang deciding set, kaakibat ang 7-1 atake sa fifth frame, upang maamoy ang sarap ng tagumpay sa come-from-behind panalo para gulatin ang Lady Bullpups sa pambihirang tagumpay sa unang final appearance.

Matapos mapatalsik ng maaga sa huling dalawang edisyon, nakatakdang harapin ng UST ang last season runner-ups na Tay Tung na madaling dinispatsa ang FEU-Diliman sa hiwalay na semifinal match sa pinakamalaking grassroots volleyball league na suportado ng Shakey’s Pizza Parlor, Potato Corner, at R and B Milk Tea. Bumida para sa Junior Tigresses si Kimberly Rubin sa 20 points, na sinundan ni Patricia Mendoza sa 12 marka.