Kahit may ‘K’ naman… CHARIZ, ‘DI KAYANG MAGING SEXY STAR

ni Beth Gelena @Bulgary | August 20, 2026

Photo: IG _chariz_solomon

Inamin ng TV host-actress na si Chariz Solomon na muntik na siyang sumabak sa pagiging sexy star noong nagsisimula pa lamang siya sa showbiz.

Sa kanyang pagbisita sa Fast Talk with Boy Abunda (FTWBA), diretsahang tinanong ng King of Talk si Chariz, “Muntik ka nang maging sexy star?”

Pabirong sagot naman ni Chariz, “Ano sa tingin n’yo, guys?”

Ayon kay Chariz, nakikita raw sa kanya noon ang potensiyal para sa ganitong uri ng role, ngunit kalaunan ay napagtanto niyang hindi pala niya kayang gawin ang mga eksenang kinakailangan.

“Opo, ‘yun ‘yung na-feel nila sa ‘kin pero ‘di ko pala kaya, Tito Boy. ‘Pag gumaganyan-ganyan ako, parang nilalagnat ako, Tito Boy. ‘Di pala kaya, ibang klaseng kamandag pala ‘yun,” kuwento niya.

Hindi naman pinalampas ni Boy ang pagkakataong tanungin si Chariz kung tatanggap siya ng sexy role sakaling magkaroon muli ng offer.

“If you have an offer to do a sexy role, gagawin mo?” tanong ng host.

Ayon kay Chariz, kaya naman niyang gawin ang isang sexy role basta hindi ito sobra o masyadong lantad.

“Kaya ko naman po. Pero ‘di ko kaya ‘yung sobrang ano lang… seryoso? Siguro, kaya ko,” sagot niya.

At nang pabirong itanong kung may offer ba sa kanya ngayon, mabilis ang naging sagot ni Chariz, “Meron bang offer ngayon? Kaya ko. After Fast Talk.”

Well, why not, Coconut? Go, Girl! In fairness, sexy pa rin si Chariz. ‘Di ba naman, Buboy Villar?

---

Para lang makabili ng pet duck…

NADINE, PROUD NA NEGOSYANTE NA RIN ANG ANAK

SUPER proud mother ang aktres na si Nadine Samonte kay Heather matapos nitong ipakita ang sipag at determinasyon sa pagtitinda upang makaipon para sa kanyang gustong pet duck.

Sa isang social media post, ani Nadine, “As a mother, I’m so proud of you, Heather. At first, nahihiya pa s’yang magbenta, pero she really wants to buy a pet duck and gagawin n’ya talaga ang lahat para makaipon at mabili n’ya ‘yung pet duck n’ya.”

Kuwento pa ni Nadine, naisip din ni Heather na magbenta ng squishies dahil paborito niya ang mga ito. 

Marami na rin umanong ideas ang kanyang anak at gusto na nitong magkaroon ng sariling online store.

“I will support her all the way,” saad ni Nadine.

Ang pet duck umano ang tanging regalo na gusto ni Heather para sa kanyang nalalapit na ika-10 kaarawan, dahil hindi pa raw talaga puwedeng magkaroon ng aso sa ngayon.

Kuwento pa ng aktres, noong unang araw na nagbenta si Heather ay nag-aalala ito kung may bibili sa kanyang paninda.

“Mom, what if nobody buys?” tanong daw ni Heather.

Payo naman ni Nadine sa kanyang anak, huwag itong mag-expect at maging okay lamang kahit hindi maubos ang paninda. Ngunit laking-gulat nila nang maraming bumili at halos maubos ang kanyang paninda.

Dahil walang pasok kinabukasan, nagdesisyon si Heather na muling magbenta. Kahit malakas ang ulan, hindi pa rin ito sumuko. At sa huli, sold-out muli ang kanyang paninda! Tuwang-tuwa si Heather sa naging resulta at mas lalo pa itong naengganyong magtinda at simulan ang kanyang sariling online store.

Nagpasalamat naman si Nadine sa kanilang mga kapitbahay na sumuporta sa kanyang anak.

“I’m so, so proud of you,” mensahe niya sa kanyang anak.

Samantala, hindi rin nagpahuli si Titus, na tila gustong tumulong sa negosyo ng kanyang ate. 

Ayon kay Nadine, bawat bumibili ay binibigyan nito ng biscuit at juice — mga pambaon sana nila sa school.

“Mga pambaon nila sa school. Naku, lugi ang negosyo, Titus!” biro ni Nadine.

Bilib naman si yours truly sa mga apo ng mahusay na aktres na si Isabel Rivas, talagang bata pa lang ay marunong na sa pagnenegosyo.

Congratulations, Richard Chua at Nadine! Ang ganda ng pagpapalaki na ginawa ninyo sa inyong mga anak.

---

MULING nagpasaya nang bongga ang Unkabogable Star na si Vice Ganda sa noontime show na It’s Showtime (IS), sa segment na Laro Laro Pick.

Matapos piliin ng contestant na si Ocel ang Li-POT (lipat) na nagkakahalaga ng P30,000, nag-alok si Vice Ganda ng P50,000 sa sinumang makakasagot sa ‘Jack-POT’ (jackpot) question mula sa isang Kasambahay contestant. 

Ang tanong, ano’ng ibig sabihin ng letrang ‘R’ sa acronym na PAR?

Agad namang nasagot ni Jengjeng na ‘Responsibility’ ang R sa PAR kaya naiuwi niya ang P50K.

Samantala, tig-P10,000 naman ang natanggap ng bawat contestant.

Isang malaking congratulations! 

Papeles, ‘di naayos agad kaya nagkaproblema… SIKAT NA AKTOR, NAGBENTA NG 2 LUXURY CARS PARA MAIPAGAMOT ANG PADIR

ni Reggee Bonoan @Sheet Matters | August 20, 2026

BLIND ITEM:

Noong nakaraang taon ay nilapitan ng kilalang aktor ang kaibigan niyang ahente ng mamahaling sasakyan para ipabenta ang dalawa niyang luxury cars dahil kailangan niya ng pera para pampagamot sa amang maysakit.

Ang isa ay naibenta ng nilapitan niyang ahente ng mamahaling sasakyan at ang isa ay wala na kaming ideya kung nasaan na.

Maganda ang transaksiyon ng aktor at ahente dahil matagal na silang magkaibigan at sa kanya rin kumukuha ang aktor ng mga sasakyan.

Maraming kliyente ang ahente ng mamahaling sasakyan at kilala siya sa industriya. Sa katunayan, pati mga kilalang tao ay siya ang laging nilalapitan.

Going back sa sasakyan ay biglang nagkaroon ng problema at naalala namin na baka hindi ito naayos agad dahil pumunta sa ibang bansa ang ahente at dahil siguro smooth naman ang lahat, kaya nagkalimutan na hanggang sa dumating ang sinasabing problema.

Naalala rin namin na ganito rin ang nangyari sa kilalang Filipino-British television-events host at dating motoring editor ng CNN na si James Deakin na nahuli sa Skyway noong nakaraang taon ang anak niya dahil sa violation. 

Nang i-check ang papeles, hindi kumpleto dahil hindi pa naayos ng dealer, pero naayos naman na pagkatapos ng lahat.

Anyway, baka inaayos na ngayon ang proper documents ng papeles ng mamahaling sasakyan ng aktor lalo’t parehong kilala ang dalawa.

---

Ka-collab pa rin ang GMA-7… PBB, INILIPAT SA BAGONG BAHAY PARA MAKATIPID ANG ABS-CBN

Photo: Brent Manalo sa PBB House - IG

Sa nakaraang Annual Stockholders Meeting ng ABS-CBN, nabanggit ni Chief Operations Officer (COO) Cory V. Vidanes na sa susunod na buwan, Setyembre, ieere ang Gandang Gabi Vice (GGV).

Aniya, “Gandang Gabi Vice, the new season, will come back next month on GMA, iWant, and Kapamilya Channel.”

Matatandaang pumirma si Vice Ganda ng bagong kontrata sa ABS-CBN at isa pang programa sa Kapamilya na ipapalabas din sa Kapuso Channel.

Inihayag din ni CVV (tawag kay Tita Cory) ang bagong season ng Pinoy Big Brother (PBB) at sa unang pagkakataon ay sa isang bagong bahay ito gagawin dahil mas nakakatipid daw. 

“We are launching Pinoy Big Brother Collab 3.0 in October in partnership with GMA. Yes, we are moving to a new PBB house that will be more cost-efficient for us,” sabi pa ng TV executive.

Nabanggit din ni ABS-CBN President Carlo Katigbak sa Annual Stockholders Meeting na gumawa ng kasaysayan ang ABS-CBN sa pamamagitan ng matagumpay na kolaborasyon sa PBB kasama ang GMA Network noong 2025.

Sa kasalukuyan ay wala pang ibinigay na detalye tungkol sa GGV kung ano’ng oras at araw ito mapapanood, at sa PBB dahil ongoing pa ang auditions.

Wala raw kupas ang bibig sa pagbabalik-hosting… MGA HIRIT NI KRIS, BENTANG-BENTA PA RIN SA MGA FANS

ni Rohn Romulo @Run Wild | August 20, 2026

Photo: Netflix PH

Marami talaga ang aliw na aliw sa pagbabalik ni Queen of All Media Kris Aquino sa pamamagitan ng 3-part promotional campaign ng Netflix Philippines.

Sa three episodes ng C.H.I.K.A. o Chief Head of Insight and Kontent Analysis, muling nasilayan ang trademark ng nag-iisang Kris Aquino, kung saan milyun-milyon na ang nakuhang views nito.

Ang pinag-usapang first episode ay may 7 million views at ang Part 2 naman na in-upload last week ay naka-6.5M views na sa YouTube (YT) channel ng Netflix PH. At ang Episode 3 na lumabas sa kasagsagan ng habagat ay naka-1M views agad after a few hours. As of this writing, pumalo na ito ng 1.7M views.

Dahil nga tuwang-tuwa ang madlang pipol sa mga hirit ni Kris, may nagtanong kung scripted ba ang napanood sa tatlong episodes.

Comment naman ng isang netizen, “I doubt this was scripted. I believe, real talk lang s’ya.”

Sinagot naman ito ni Kris ng “That’s how good GIGIL is, merong scripted and maraming written by yours truly.”

Naaliw din kami sa dulo ng Episode 2 kung saan lumindol at nag-brownout pa, kaya ang nakakalokang sabi niya, “Mabe-vertigo na ‘ko. What’s this? Nawala pa ‘yung kuryente? Hay, naku! Let’s just go home.”

Comment pa ng isa, “Dapat sumigaw s’ya katulad nu’ng sa Feng Shui.”

May mga pumuri naman kay Kris.

“Sobrang iconic ang boses n’ya.”

“Nagkasakit na’t lahat-lahat pero buong-buo pa rin ang ganda. Walang kupas.”

“Sobrang nakaka-happy makita ulit si Krissy.”

“Iba ka talaga, Ms. Kris. Sana, magka-talk show ka ulit but more on the politics side.”

Samantala, sa third and final episode, for sure ay pag-uusapan din ang comment niya kay Piolo Pascual, na guwapung-guwapo siya rito habang ine-edit ang isang eksena sa Manila’s Finest (MF).

Parang kilig na kilig niyang sinabi kay Papa P, “My goodness, date tayo,” at sabay tawa.

Reaction naman ng mga netizens…

“Feeling ko, real talaga ‘yung sinabi ni Madam Kris Aquino kay Papa P.. Hahaha!”

“Nagpi-feeling lang. Hahaha! Nakakatuwa si Kris, nakaka-happy despite all the rains and baha around.”

At sa dulo, tinanong niya ang bagong bestie na si Earljohn (editor) kung marunong ba itong mag-zipline. Mukhang may pa-cliffhanger at posible pa kayang madugtungan?

Kaya sey pa ng mga netizens:

“We need a series for this.”

“I was smiling all throughout this mini-series. Thank you, Netflix, for bringing Kris Aquino back!”

Well, dahil sa bonggang-bonggang response ng mga netizens, abangers na lang tayo kung magga-grant ba ang wishes natin.

And of course, let’s keep praying for her complete recovery.

---

LABIS na nagpapasalamat si Cong. Arjo Atayde dahil kasama siya at pang-8 sa Ten Outstanding Legislators.

Post niya, “Maraming salamat po sa Gawad Pilipino Awards sa karangalang mapabilang sa TOL – Ten Outstanding Legislators – Congressmen in the Philippines 2026!

“Ang parangal na ito ay ‘di lamang pagkilala, kundi dagdag-inspirasyon para mas patuloy nating pagbutihin ang ating serbisyo para sa ating mga kababayan, lalo na sa ating mga mahal na taga-District 1.

“Lahat ng effort, oras at serbisyo natin, ginagawa natin para may maibahagi at may magandang pagbabago sa buhay ng ating mga kababayan.

“Congratulations din sa lahat ng congressmen na napabilang sa TOL 2026! Honored and grateful to share this recognition with all of you!”

Samantala, tuluy-tuloy ang pagtulong nila sa nasasakupang distrito, lalo na sa mga nabiktima ng matinding pagbaha.

Paalala niya, “Mga kadistrito, patuloy po tayong maging alerto at alisto! Kasama po kami sa inyong pag-antabay sa pinakabagong mga balita at reports, upang masigurado ang kaligtasan ng lahat.”

Dagdag pa ni Arjo, “Taos-pusong pasasalamat din sa mga kababayan nating tumutulong at nakikipagbayanihan para sa kapakanan ng mga apektado, lalo na sa mga nakiisa sa ating naganap na food drive sa mga sumusunod na barangay: Bagong Pagasa, Project 6, Katipunan, San Antonio, Paltok, Damayan, Paraiso, Del Monte, Talayan, Masambong, Mariblo, Manresa, Balingasa, atbp..

“Sa maliit o malaki mang paraan, magsama-sama po tayo sa pagbibigay-serbisyo sa ating mga kadistrito. Patuloy po tayong mag-ingat.”