KADALASAN, kapag tayo ay tinatanong kung ano ang ating paboritong subject sa klase, marami ang sasagot ng Math o Science, pero hindi mawawala ang Physical Education (P.E.) sa kanilang listahan.
Pagkatapos ng mahabang oras ng pakikinig sa teachers, pagbabasa at pagsusulat ng leksiyon, kailangan din ng mga mag-aaral ang balanseng aktibidad tulad ng sports.
Ang salitang “sports” ay nagmula noong 1300 sa Old French na “desport” na ang ibig sabihin ay paglilibang. Isa itong uri ng palakasan na nagbibigay ng sigla at katuwaan sa ating lahat.
Bukod sa sayang dala nito ay may gampanin din ito sa ating kalusugan. Ipinaaalala ng health experts na ang pag-e-exercise at paglalaro ng sports ay isang paraan ng pangangalaga at pagpapaunlad ng pangangatawan ng mga estudyante.
Binibigyang-diin ng P.E. at Health teachers na hikayatin at sanayin ang mga estudyante na maging aktibo sa athletics o sports habang sila ay bata pa kaya ang pagtuturo ng P.E. subject ay dapat magsimula sa nursery.
Base sa mga pananaliksik, narito ang mga importansiya ng sports sa kalusugan ng mga batang manlalaro:
Nagpapalakas sa resistensiya upang maging mahusay at makaiwas sa sakit.
Humuhusay sa pag-iisip at mabilis makapagbigay ng solusyon sa problema.
Aktibo at praktisado ang utak.
Malakas ang loob sa pakikisalamuha at pakikibagay.
Nakatatanggal ng stress.
Bukod dito, may limang prinsipyo ang pag-eehersisyo upang maging matatag sa paglalaro ang bata:
Overload—walang humpay na pagsasanay na pabigat nang pabigat hanggang sa maging pamilyar na ang katawan.
Progression—patuloy na pag-angat ng hirap at bigat ng gawain.
Specificity—pagtukoy ng paraan ng ehersisyo.
Variation—paggamit ng iba’t ibang estilo sa ehersisyo.
Reversibility—kapag masakit ang katawan sa ehersisyo, pansamantalang ihinto, tukuyin ang pinanggagalingan at magpagaling.
Napakaraming estudyante ang interesado na maging parte ng sports team, ngunit, hindi nakasasali ang iba dahil sa problema sa mahinang pangangatawan, kakulangan sa taas o hindi sapat ang bilis at lakas sa pagkilos.
Maaaring gumawa ang guro at eskuwelahan ng strategy para matugunan ito at mapili ang estudyante sa kinahihiligang sports.
Ating tandaan, sa halip na maging hadlang sa pag-aaral ang paglalaro ng sports, dapat ay magtugma ito upang mabalanse at mapabuti lalo na ang kaalaman sa academics at physical education ng ating kabataan.
Ang mahalaga, may kaakibat na responsibilidad at disiplina sa sarili, sa loob at labas ng klasrum. Patuloy nating hikayatin at suportahan ang kabataan sa paglalaro!