Breadwinner ng pamilya… JOSHUA, TODO-KAYOD AT TIPID PARA MAKAPAGPATAYO NG SARILING BAHAY

ni Erlinda Rapadas @Teka Nga | May 26, 2026

Photo: IG _garciajoshuae

Breadwinner ang aktor na si Joshua Garcia kaya ganoon na lamang ang sipag at dedikasyon niya sa kanyang showbiz career. 

Marami ang umaasa sa kanya kaya maingat siya sa paghawak ng kanyang kinikita. Prayoridad niya ang mabigyan ng maginhawang buhay ang kanyang pamilya. 

Nakapagpatayo na siya ng three-storey townhouse para sa kanyang mga magulang. Pangarap din niyang makapag-franchise ng fast food sa kanilang bayan sa Batangas.

Bilang bahagi ng kanyang pag-iipon, nagbawas din siya ng mga sasakyang hindi na niya ginagamit, pati na ang isang high-end na motorsiklo. Plano rin niyang magpatayo ng sariling bahay kapag mas naging stable na ang kanyang finances. 

Well, alam niyang walang kasiguraduhan sa showbiz kaya patuloy siyang nag-iipon habang may mga proyekto. Simple rin ang kanyang pamumuhay at hindi siya magastos.

---

SOBRANG excited ang aktres na si Kylie Padilla sa kanyang role sa bago niyang action series sa GMA-7, ang Taskforce Firewall (TF). 

Punumpuno ito ng action scenes at malaking hamon ito sa kanyang kakayahan.

Bagama’t may ilang mga risky na stunts, kinaya ito ni Kylie dahil nag-e-enjoy siya sa kanyang role. Nakikipagsabayan siya kina Jak Roberto at Miguel Tanfelix. 

Para kay Kylie, exciting ang paggawa ng mga stunts na hindi pa niya nasusubukan. Astig na astig ang kanyang porma.

Aminado si Kylie na noong single pa siya at wala pang mga anak, wala siyang inuurungan sa kanyang mga shows. May pagka-daredevil siya noon. 

Ngayon na may dalawa na siyang anak, mas maingat na siya lalo na sa mga delikadong

eksena. 

Gayunman, marami pa rin siyang stunts sa Taskforce Firewall na tiyak na magugustuhan ng mga viewers.

Nagsimula nang umere sa GMA-7 ang naturang serye.

---

MASAYANG nag-guest sina Camille Prats, Iya Villania at Suzie Entrata-Abrera sa Fast Talk with Boy Abunda (FTWBA). Ramdam ang kanilang chemistry dahil dati na silang magkakasama sa hosting ng Mars. 

Pitong taong nakasama ni Camille si Suzie sa naturang programa, mula 2012 hanggang 2019. 

Noong una, aminado si Camille na nag-alinlangan siya sa pagho-host dahil drama ang kanyang forte at wala pa siyang experience sa hosting. Ngunit sa tulong ng beteranang host na si Suzie, unti-unti siyang nahasa.

Naging bihasa si Camille sa hosting hanggang sa magtapos ang Mars noong 2022. 

Nang ibalik ito bilang Mars Pa More (MPM), sina Iya Villania at Kuya Kim Atienza naman ang nakasama niya. 

Ayon kay Boy Abunda, puwede ring i-revive muli ang programa at pagsamahin sina Camille, Iya at Suzie bilang mga hosts. Maraming viewers ang sumang-ayon sa ideya.

---

Naayos na ng Comedy King bago namatay… 

MGA ANAK NI DOLPHY, ‘DI NAG-AWAY-AYAW SA MANA

SA 18 na naging anak ng yumaong Comedy King na si Dolphy, maayos na naipamahagi ang kanyang mga ari-arian sa mga ito. Bago pa siya pumanaw, naayos na ang hatian ng kanyang yaman.

Si Eric Quizon ang pinagkatiwalaan sa pag-aayos at pangangasiwa ng mga ito, sa gabay din ni Zsa Zsa Padilla.

Walang naging isyu sa pagitan ng magkakapatid dahil malinaw ang naging paghahati ng mana. 

Ayon kay Eric, maayos ang relasyon ng pamilya at walang banggaan pagdating sa ari-arian.

Sobrang proud… ALEX, PINAGAWAN NG BILLBOARD MAI-FLEX LANG ANG PAGBUBUNTIS

ni Erlinda Rapadas @Teka Nga | May 25, 2026

Photo: FB Alex Gonzaga

Marami ang natuwa sa balitang buntis ngayon ang aktres-vlogger na si Alex Gonzaga. Sila mismo ng mister niyang si Mikee Morada ang nagkumpirma nito.

Kaya naman halos lahat ng malalapit nilang kaibigan sa showbiz ay nagpaabot ng pagbati sa magandang balitang ito. 

Ilan sa mga natuwa ay sina Pauleen Luna, Melai Cantiveros, Maja Salvador, Ivana Alawi, Robi Domingo, Luis Manzano, Jessy Mendiola, Karen Davila, Vicki Belo at Bettina Carlos.

Buong pamilya Gonzaga at Morada ay labis ding nagpapasalamat sa blessing na dumating kina Alex at Mikee Morada. Answered prayers ito para sa mag-asawa.

Finally ay mabibiyayaan na sila ng baby matapos ang anim na taong pagsasama at tatlong miscarriages ni Alex. Hindi sila nawalan ng pag-asa at patuloy na nagdasal para sa kanilang little angel.

Dahil sa saya ng mga netizens, isang malaking billboard pa ang ipinagawa para kay Alex ng kanyang ineendorso na produkto na ngayon ay makikita sa EDSA-Guadalupe.

Samantala, payo naman ng mga nagmamalasakit kay Alex Gonzaga, dapat pa rin siyang mag-ingat ngayon at kung kakayanin ay total bed rest upang masigurong magiging ligtas ang kanyang kalagayan hanggang sa siya ay manganak.

---

HINDI ikinaila ni Vice Ganda na malaki ang utang na loob niya sa isang Japanese lady na nagpaaral sa kanya kaya siya nakapagtapos ng kolehiyo. 

Gusto niya itong ma-meet nang personal upang pasalamatan. Ito ang kanyang purpose nang magpunta kamakailan sa Japan.

Nalaman ito ng media sa Japan kaya naman tinulungan nila si Vice na matunton kung nasaan na si Ms. Noriko Takura, ang Haponesang nagpaaral sa kanya.

Nahanap naman ito, pero hindi sila nagkaroon ng pagkakataong magkita ni Vice Ganda. Very private person daw ang nagpaaral kay Vice kaya hindi nagpakita.

Ganunpaman, alam ng Haponesa na nakatapos sa pag-aaral si Vice Ganda at ngayon ay isa nang sikat na TV host-comedian.

Ang tanging bilin lang nito kay Vice Ganda ay ipagpatuloy ang pagtulong tulad ng ginawa niya.

---

Nasapawan na sa kasikatan, ‘di na bida…

KYLINE, CAREER DAW MUNA, PASS SA BF

PAHINGA na raw muna sa love life ang Kapuso actress na si Kyline Alcantara. Mas magpo-focus na muna siya sa kanyang career at bibigyan ng panahon ang kanyang sarili.

Aminado ang aktres na sobra-sobra siya kung magmahal at halos wala na siyang itinitira para sa kanyang sarili.

Ngayon ay tahimik at kalmado na ang kanyang mundo, mas nakaiiwas sa mga isyu at kontrobersiya si Kyline kapag walang karelasyon.

Marami siyang realizations sa buhay habang nagma-mature at kahit zero ang kanyang love life, marami naman siyang kaibigang nagpapasaya sa kanya tulad ni Barbie Forteza na karamay niya sa panahon ng kanyang kalungkutan.

Pero nagre-react ang mga fans ni Kyline kung bakit medyo bumaba ang kanyang premium bilang isa sa prized artists ng Sparkle GMA Artist Center.

Dati-rati ay pang-lead role siya, pero sa bagong action series ay second lead na lang siya kay Kylie Padilla.

Pero hindi naman siya madedehado sa kanyang role sa Taskforce Firewall dahil magaling siyang aktres at siguradong lulutang siya sa serye.

Wais sa pera… ENRIQUE, NAKAPAGPUNDAR BAGO SILA NAGHIWALAY NI LIZA

ni Erlinda Rapadas @Teka Nga | May 24, 2026

Photo: IG _matteogprimetime & _lizasoberano

Itinuturing ang aktor na si Enrique Gil na ehemplo ng pagiging praktikal sa paghawak ng kinikita sa showbiz. 

Sa kasagsagan ng kanyang kasikatan, nakapag-ipon at nakapagpatayo siya ng iba’t ibang ari-arian.

Hindi niya inuna ang luho, bagkus ay nag-invest sa mga ari-arian tulad ng farm, beachfront resort, isang bahay sa Spain, at pitong prime lots sa Metro Manila.

Sa kabila nito, nananatiling aktibo si Enrique Gil sa showbiz kahit naghiwalay na sila ni Liza Soberano bilang love team at magdyowa. Patuloy siyang tumatanggap ng mga proyekto at nananatiling maingat sa kanyang pera.

Sa dami ng kanyang naipundar, hindi na siya kakabahan para sa kanyang kinabukasan.

---

NOONG May 22 ay inalala ng mga malalapit na kaibigan sa showbiz ang yumaong direktor na si Lino Brocka sa kanyang 35th death anniversary. 

Si Lino Brocka ay ginawaran ng National Artist Award (posthumous) noong 1997. Gayunman, hindi siya inilibing sa Libingan ng mga Bayani (LNMB) kundi sa Himlayang Pilipino Memorial Park. 

Kaya naman, bilang pag-alala at pagtanaw ng utang na loob, nais ni Phillip Salvador na ipalipat ang kanyang labi sa LNMB bilang pagkilala sa kanyang ambag sa sining bilang National Artist. Dito rin nakalibing ang iba pang National Artists tulad nina Nora Aunor, Marilou Diaz-Abaya, Ishmael Bernal, atbp..

Si Lino Brocka ang nagsilbing mentor ni Phillip at tumulong sa kanyang paghubog bilang aktor. 

Nagkaroon man sila ng tampuhan noong ginawa nila ang OraProNobis, nagkabati rin sila bago pumanaw ang direktor.

Ayon sa ulat, nakipag-ugnayan na si Kuya Ipe sa mga namamahala sa LNMB para mailipat si Lino Brocka.

---

NANAWAGAN ang mga Noranians sa magkakapatid na Lotlot, Matet, Kiko at Kenneth de Leon na huwag isama ang lahat ng mga fans sa isyu, sakaling may ilang bashers na namba-bash sa kanila.

Giit ng ilan, hindi naman lahat ng Noranians ay galit kina Lotlot, Matet, Kiko at Kenneth. Nangyari ang tensiyon noong first death anniversary ni Nora Aunor sa Libingan ng mga Bayani (LNMB), kung saan iilan lamang ang naiulat na namba-bash kina Lotlot at Matet.

Sa pagdiriwang ng 73rd birthday ng Superstar noong May 21, inasahan ng ilang tagahanga na makikita ang mga anak nito, ngunit walang dumating. Nauna na umanong dumalaw sina Lotlot, Matet, Kiko at Kenneth sa puntod ng kanilang ina noong May 20 upang maiwasan ang tensiyon.

Labis itong ikinalungkot ng ilang mga Noranians, habang sina Ian de Leon at iba pang tagahanga ay nagtipon sa Iriga City upang ipagdiwang ang kaarawan ng yumaong Superstar at National Artist.

Iginiit ng mga loyal Noranians na nananatili ang kanilang respeto at pagmamahal sa pamilya ni Nora Aunor.