Walang lusot — Leonen... Korupsiyon sa Korte, stop

ni Mylene Alfonso @News | October 2, 2026

Photo: Supreme Court Acting Chief Justice Marvic Leonen - Supreme Court PH

Hinimok ni Supreme Court Acting Chief Justice Marvic Leonen ang mga justice, hukom, abogado at kawani ng korte na huwag manahimik kapag may nalalamang katiwalian sa hudikatura.

“To remain silent in the face of corruption is to become complicit in injustice,” ani Leonen sa Memorandum Order No. 94-2026 na inilabas nitong Setyembre 30, 2026.

Inatasan ni Leonen ang mga justice, hukom, litigant at kawani ng korte na i-report ang mga insidente at impormasyong dapat imbestigahan kaugnay ng paglabag sa mga batas laban sa graft at corruption na kinasasangkutan ng sinumang judge, justice o court personnel sa alinmang antas ng hudikatura.

Maaaring ipadala ang mga report sa Judiciary Integrity Email na integrity@judiciary.gov.ph.

Kabilang sa dapat i-report ang lihim na pakikipag-usap ng isang litigant sa judge o justice tungkol sa kaso, paghingi o pag-aalok ng pera, regalo o pabor kapalit ng desisyon o serbisyo ng korte, at pagbibigay ng impormasyong hindi dapat inilalabas tungkol sa takbo ng isang kaso.

Maaari ring isumbong ang mga taong nag-aangking may impluwensiya sa korte, pati ang mga judge, justice, kawani ng korte o abogado na nagpapalakad ng pabor sa loob ng hudikatura.

Bawal sa impeachment trial ni VP Sara... Sen. Jinggoy, nagpasaklolo SC

ni Mylene Alfonso @News | July 26, 2026

Photo: File / Jinggoy Estrada sa BJMP - Jeff Tumbado

Nais makadalo ni Senador Jinggoy Estrada sa impeachment trial ni Vice President Sara Duterte. 

Bunsod nito, naghain ang kampo ni Estrada ng petition for certiorari sa Supreme Court (SC) upang baligtarin ang desisyon ng Sandiganbayan na pagbasura sa hiling ng mambabatas na makadalo at makalahok sa impeachment trial laban kay Vice President Sara Duterte. 

Ayon kay Estrada, mahalaga rin magampanan niya nang maayos ang kanyang tungkulin bilang senator-judge. 

Sa kanilang inihaing Petition for Certiorari, iginiit ng law firm Flaminiano Arroyo & Dueñas, ang legal counsel ni Estrada, na nagkaroon ng grave abuse of discretion amounting to lack or excess of jurisdiction ang Sandiganbayan Fifth Division nang tanggihan nito ang mosyon ng senador noong Hulyo 9, 2026. 

Ayon sa mga abogado mula sa Flaminiano Arroyo & Dueñas, bagama’t nakakulong sa New Quezon City Jail sa Brgy. Payatas si Estrada kaugnay ng kasong plunder, hindi ito nangangahulugang nawawala na ang kanyang tungkulin at karapatan bilang isang incumbent senator ng bansa. 

Giit din ng kanyang legal counsel na ang pakikilahok sa isang makasaysayang impeachment trial ay isang solemn at napakahalagang tungkuling itinakda ng Saligang Batas na nangangailangan ng kanyang personal na pagdalo upang makinig sa mga ebidensiya, makapag-akda ng mga tanong, at makaboto nang maayos. Nilinaw nila na hindi sila naghahabol ng piyansa o kalayaan si Estrada para sa kanyang sariling kaso, kundi humihiling lamang ng pansamantalang pahintulot na makadalo sa pagdinig sa ilalim pa rin ng buong pangangalaga at kustodiya ng Bureau of Jail Management and Penology (BJMP). 

Dahil sa matinding urgency at kahalagahan sa pampublikong interes ng nasabing usapin, umaasa ang Flaminiano Arroyo & Dueñas at si Estrada na agad itong bibigyan ng pansin at kaukulang aksiyon ng Kataas-taasang Hukuman upang magampanan ng senador ang kanyang mandato sa bayan bilang senator-judge. 

Nahaharap si Estrada sa kasong plunder na may kinalaman sa flood control scandal.

Petisyon kontra-NCAP, ibinasura ng SC

ni Jeff Tumbado @News | July 10, 2026

Photo: File / MMDA

Ibinasura ng Korte Suprema ang petisyong kumukuwestiyon sa legalidad ng No Contact Apprehension Policy (NCAP) na ipinatutupad ng ilang local government units sa Metro Manila.

Sa desisyong isinulat ni Associate Justice Rodil N. Zalameda noong Hunyo 3 ngunit isinapubliko lamang nitong Huwebes, sinabi ng Korte na nawalan na ng saysay ang petisyon dahil sa mga pagbabago sa umiiral na mga regulasyon.

Binigyang-diin ng Korte Suprema na ang pagpapatupad ng unified traffic code sa buong Metro Manila ay naglatag ng iisang pamantayan sa pagpapatupad ng mga batas-trapiko, kaya hindi na kailangang resolbahin ang mga isyung inilahad sa petisyon.

Ayon pa sa hukuman, wala nang aktuwal na kontrobersiyang dapat pagpasiyahan dahil sa mga bagong patakaran ng mga ahensya at lokal na pamahalaan.

Dahil dito, ibinasura ang petisyon bilang moot and academic o usaping wala nang praktikal na saysay upang pagdesisyunan pa ng korte.