Wala raw galit sa puso niya… CARLOS, GINAWA NA RAW ANG LAHAT PARA MAKABATI ANG PARENTS

ni Mercy Lejarde @Showbiz Talkies | March 25, 2026

Photo: File

Nag-guest ang two-time Olympic gold medalist na si Carlos Yulo at ang kanyang girlfriend na si Chloe San Jose sa Fast Talk with Boy Abunda recently.

Tanong ni Boy kay Chloe, “Kumusta ang relasyon mo sa mga kapatid ni Carlos?”

Saad ni Chloe, “We’re good po. Actually, not to magbuhat ng bangko, pero it’s always been me na nag-e-encourage, even if he really didn’t want to at the time na it was super crazy and talagang maingay and stuff. I have always been the one to encourage him na, ‘Mahal, if you don’t want to ano… the other parts of your family, at least, your siblings.’”

Sa panayam ay napag-usapan ang tungkol sa mga magulang ni Carlos na sina Mark Andrew Yulo at Angelica Yulo.

Tanong ni Boy, “Ano’ng dasal n’yo para sa inyong mga pamilya?”

Ani Carlos, “Ako, madasalin po kasi ako. Palagi ko pong ipinagdarasal na sana ay nasa maayos kaming lugar palagi, safe palagi, at healthy para mas magampanan po namin kung ano ‘yung ibinigay ni Lord sa amin at mai-share po namin sa mga totoong nangangailangan. 

“Yes, s’yempre, sa personal ko pong panalangin, maabot ko kung ano ‘yung purpose na ibinigay sa akin ni Lord dito. Para pagdating po ng panahon, kung tatanungin n’ya ako, marami po akong kuwento na natutunan, na-experience, especially sa mga tao na nasa paligid ko na palagi n’yang ipino-provide sa akin. Nakukuha ko ‘yung pagmamahal from that po. Gusto ko pong ikuwento sa kanya at, actually, i-share ko sa mga kapatid ko kung ano po ‘yung meron ako ngayon. Kung ano ‘yung natutunan ko, na-experience ko, gusto ko ma-experience rin nila.”

Tanong ni Boy Abunda kay Carlos, “‘Pag dumating ang panahon na ‘yun at sinabi ng Panginoong Diyos, ‘Carlos, kumusta ka bilang anak sa iyong mga magulang?’ ano’ng sagot mo?”

Ani Carlos, “Ginawa ko po ‘yung part ko at naglakas ako ng loob. Humihingi ako actually po sa inyo ng lakas ng loob upang kausapin sila, ma-explain kung ano ‘yung nangyari, especially sa nagawa po nila sa akin. Ako, wala akong galit sa puso ko. Wala kahit anong galit, sama ng loob, pagtatampo. Wala akong naramdaman na ganu’n. Ngayon, kung tatanungin ako ni Lord, ‘Gusto mo ba silang makasama?’ Wala naman pong problema. Ako tinray ko ‘yung best ko na kausapin sila. Mapag-ayos ang lahat, pero ‘di ko po hawak ‘yung sagot na ‘yun.”

Well, wish ni yours truly na sana, magkaayos na si Carlos at ang mother dearest niyang si Angelica at daddy dearest na si Mark Andrew Yulo. 

Paalala lang po ni yours truly sa mga kabataan sa panahon ngayon – walang makakatalo sa sakripisyo ng magulang para sa anak. Bawat pawis ng magulang ay binubuo ng pangarap para sa kinabukasan ng pamilya. 

‘Yun na!

---

KASADO na ang 2026 Star Awards for Music sa June 25, sa Teatrino Theater, Greenhills, San Juan City sa direksiyon ni Calvin Neria.

Ito ay matapos pumirma ng kontrata ang Echo Jham Entertainment Production sa pamumuno ni Ms. May Alma Arenas bilang producer ng parangal.

Ang contract signing ay ginanap sa opisina ng Echo Jham sa Malabon City noong March 18 na pinangunahan nina PMPC Star Awards, Inc. Pres. Fernan de Guzman at Sec. Eric Borromeo na siya ring chairman ng 17th Star Awards for Music. 

Saksi ang mga miyembro ng Music Executive Committee na sina Leony Garcia, Mildred Bacud, Mell Navarro, Boy Romero, at Rommel Placente, kasama si Philippine Movie Press Club (PMPC) Auditor Joey Austria.

Hindi na bago sa awards night production ang Echo Jham dahil ilang parangal na rin ang kanilang ginawa, maliban pa sa pagiging concert producer, kabilang ang concert ng Rainmakers, ang Golden Binibini sa March 28. 

“Matagal na kami sa production at we are happy, finally, to be part of the PMPC. We look forward to an exciting and fruitful collaboration,” saad ni Ms. Arenas.

Nagpasalamat naman ang PMPC sa Echo Jham sa bagong pagsasanib-puwersang ito. 

“Salamat sa pagtitiwala sa amin. Sana maging simula ito ng maganda nating samahan. Tulung-tulong tayo para maging successful ang lahat,” sambit ni De Guzman.

Ang PMPC ay samahan ng entertainment press across all media platforms at pinakamatagal na award-giving body sa Pilipinas. Ito ang organizer ng Star Awards for Movies, Television, at Music na kabilang sa mga inaabangang showbiz events at awards night taun-taon.

‘Yun lang, and I thank you.

Kinukunsinti ang mga bakla at tibo, kasalanan daw sa Diyos… FAST TALK NI BOY SA GMA-7, IPINASASARA NI ALVIN

ni Biz @Special Article | March 25, 2026

Photo: Boy Abunda at Alvin Aragon - Fast Talk with Boy Abunda

Naglabas ng open letter ang dating StarStruck avenger na si Alvin Aragon sa kanyang Facebook page para manawagan kay GMA Network Senior Vice-President Annette Gozon-Valdez na ipasara ang talk show na Fast Talk with Boy Abunda.

Sa kanyang trending post na ngayon sa social media, iginiit ni Alvin na dapat umanong “alisan ng show” ang tinaguriang King of Talk na si Boy Abunda, pati na ang writer ng programa, dahil sa nilalaman nito. 

Sa kanyang post, inakusahan ni Alvin na ginagamit umano ang programa bilang plataporma upang “hikayatin at impluwensiyahan,” ang mga Pilipino, lalo na ang mga magulang na tanggapin ang LGBTQIA+ community. 

Ang nilalaman ng open letter (published as is), “Maam Annette,

“Ang king of talk ang dapat inaalisan ng show at ang writer ng show. Kasi he uses, they uses (sic) this platform to encouraged (sic) and influenced (sic) Filipino people especially Filipino parents. 

“Gusto nila palabasin na ok lang, na walang masama ang maging bakla, maging tomboy, maging trans at maging queer,” ani pa ni Alvin, na agad namang nagdulot ng magkakaibang opinyon sa social media. 

Dagdag pa sa post nito, “Maam annette alam natin na kasalanan yan sa Mata ng King of kings natin.

“Stop propagating Sin of homosexuality because it is against the Lord Jesus.”

Matatandaang kamakailan lamang ay nag-guest si Alvin kasama ang kanyang misis na si Izzy Trazona, dating miyembro ng Sexbomb Girls, sa Fast Talk with Boy Abunda. 

Sumunod ding nag-guest sa naturang show ang kanyang stepdaughter na si Sofia Trazona, na proud transwoman ngayon. 

Dahil dito, umugong ang espekulasyon ng ilang netizens na tila nagpapapansin lamang si Alvin, lalo’t may naging pahayag si Tito Boy kaugnay ng kanyang mga patutsda laban sa LGBTQIA+ community. 

Sa panig ni Tito Boy, iginiit niyang sumobra na umano si Alvin, lalo na sa pagbanggit nito sa pangalan ng mga magulang na sumusuporta sa kanilang LGBT na anak, na ayon kay

Alvin ay hindi raw dapat gawin dahil taliwas umano ito sa kautusan ng Diyos. 

Ani Tito Boy, tila pinipilit umano ni Alvin na ang kanyang paniniwala ang “tamang” paraan ng pagpapalaki ng anak. 

Matapang na pahayag noon ni Boy, “Alvin, you cannot impose your faith, your parenting, yourself on us. Para sa akin, ‘yan ang sobra, wala kang pakialam at walang puwedeng humusga sa amin. Walang puwedeng magsabi sa amin, not everyone, not anyone. Kung iba ang iyong paniniwala, sobra ang paggalang ko sa ‘yo.” 

Dagdag na tanong pa ni Boy, “Pupunta ba ‘ko sa impiyerno dahil ako’y queer, dahil I am gay? At pupunta ba ang mga magulang at mga anak na yumayakap sa kanilang mga anak with love and dignity? Hindi kami pupunta sa impiyerno.” 

Samantala, may mga nagkokomento naman sa post ni Alvin na gusto lang daw nitong kumita sa pamamagitan ng engagement kaya todo-papansin ito ngayon at ginagamit pa diumano ang pangalan ng Diyos para siya mag-viral.

---

KASUNOD ng post na open letter ni Alvin Aragon, nag-react naman ang transwoman na anak ni Izzy Trazona na si Sofia Trazona laban sa bagong hirit ng kanyang stepfather.

Sa isang shared post na mabilis kumalat online, diretsahang binanatan ni Sofia si Alvin.

“You weren’t supposed to be on that show. The irony is sumampa ka sa show knowing na Tito Boy is part of the community because you’ll benefit from it, pero nu’ng other guests shared their piece, ayaw mo na sa show?” prangkang sabi ni Sofia. 

At lalong tumindi ang tensiyon dahil sa patutsada niyang… “Also, wala na ‘bang ibang issue? Why not try speaking for oil price hike or hindi pagpasok ng mga

government officials?”

Oh, ha? Palaban na rin itong si Sofia at mukhang hindi naman siya sinasaway ng kanyang inang si Izzy.

So, hindi lang tungkol sa pananampalataya at pagtanggap ang usapin dito, kundi mas mabigat ang relasyon ng mag-ina na naapektuhan dahil naiipit si Izzy sa pagitan ng kanyang asawa at anak.

Feeling jackpot, proud na proud sa GF… CARLOS KAY CHLOE: I LOVE YOU PO, SOBRA!

ni Mercy Lejarde @Showbiz Talkies | March 23, 2026

Photo: Chloe San Jose at Carlos Edriel Yulo - Instagram

“I love you po, sobra,” ang pahayag ng two-time Olympic gold medalist na si Carlos Yulo para sa kanyang dyowa na si Chloe San Jose.

Nagbahagi si Carlos sa kanyang Instagram (IG) post ng birthday wish para sa kanyang loving girlfriend. 

Aniya, “Ang dami kong gusto sabihin pero puro pasasalamat at paghanga sa ‘yo ang lumalabas sa puso ko. ‘Di mo alam kung gaano ako ka-proud sa lahat ng ginagawa mo. Mapa-school o work, bukod pa ru’n sa suporta at effort na ibinibigay mo sa akin.

“Grabe! Ikaw ‘yung may birthday pero ako ‘yung niregaluhan ng big time ni Lord. Hehehe!

“Ang wish ko para sa ‘yo, pinakaminamahal ko ay maabot mo lahat ng pangarap at ninanais mo sa buhay. Palagi mong tatandaan na nandito lang ako, mahal ko, para samahan, ingatan, suportahan, at mahalin ka sa lahat ng ‘yun. I love you po sobra - Dada.”

Super lucky talaga si Chloe San Jose at bonggang pag-ibig ang alay sa kanya ni Carlos Yulo. 

Anyway, happy birthday, Chloe!

---

Buking daw sa suot na singsing…

CARMINA: BAGONG BF NI CASSY, BIGLAAN LANG

KUWENTUHANG pampamilya ang naging ganap sa Fast Talk with Boy Abunda (FTWBA) nang mag-guest ang mag-asawang Carmina Villarroel at Zoren Legaspi.

Sa panayam, napag-usapan ang napapabalitang boyfriend ng anak nilang si Cassy. 

Tanong ni Boy Abunda, “Valentine’s Day, nag-post si Cassy. There was this guy, she was with a guy in a gray hoodie. Maraming nagsasabi, si Vince Maristela ba ‘yan? Maraming nagsasabi namang hindi. Sino s’ya? Tayu-tayo lang.”

Sagot ni Carmina, “Parang dapat si Cassy na lang ang tanungin n’yo, pero s’yempre, kilala namin kung sino ‘yan. Pero ano lang naman ‘yan, parang biglaan lang talaga. ‘Di naman talaga s’ya nakaplano.”

Saad naman ni Zoren, “Pero ‘yan, halata ko ‘yung kamay.”

Sagot ni Carmina, “O, ‘wag na nating sabihin. Alam naman nila dahil daw du’n sa singsing, kaya nila nabuking!”

Pabirong saad pa ni Zoren, “‘Yung kamay, makikita mo, mahilig mag-workout.”

Samantala, pinuri ni Boy sina Carmina at Zoren sa paraan ng pagpapalaki nila sa kanilang mga anak. 

Saad ni Zoren, “Actually, dumating din sa point na ‘di sila nakikinig sa amin. May point na ganu’n, eh.”

Sabi ni Boy, “Palagay ko, natural sa journey nila, ‘di ba?”

Saad ni Zoren, “Yeah. At du’n ko na-realize na ‘di ko pala puwedeng kontrolin ‘to habambuhay. Dumating ‘yung chapter na you keep talking, you keep giving them advice, ‘di makikinig, at darating pala sa point na magigising sila mismo at sasabihin, ‘Tama pala kayo.’

“Hanggang ngayon, si Cassy, kakausapin pa rin ako. Pupunta ‘yan sa room ko o habang may lunch o sa dining table, apat na oras magsasalita kahit na late na ako sa meeting ko. Alam mo, Tito Boy, ‘yung nasa isip ko, if I stop this conversation, sabi ko, minsan lang ‘to, ‘di na ulit mauulit. I’d rather not miss this kaysa sa gym time ko.”

Sabi naman ni Carmina, “Ang maganda kasing iregalo, ‘yung time mo para sa mga anak mo.”

Saad pa ni Zoren, “Actually, si Maverick (Mavy), kakain ako, biglang may tubig na ganyan, inaabutan ako ni Maverick ng tubig kahit ‘di ako humihingi. Minsan, kakatok sa kuwarto ko, bibigyan ako ng sandwich.”

Talaga namang napalaki nina Zoren Legaspi at Carmina Villarroel ang kanilang mga anak nang maayos.

---

INILABAS na ng ABS-CBN ang official poster para sa inaabangang action-drama series na Blood vs. Duty (BVD) na malapit nang mapanood sa primetime.

Nagbigay-pasilip ang poster sa papel na gagampanan nina Richard Gutierrez, Bela Padilla at Gerald Anderson, kasama sina Baron Geisler at Barbie Imperial. Mula sa disenyo ni Justin Besana, ang poster ay patikim sa posibleng tunggalian sa pagitan ng mga aabangang karakter ng Kapamilya series.

Bago ang poster reveal, ipinasilip din ng JRB Creative Production ang teaser kung saan makikitang may dalang baril si Richard habang may hawak na kris si Gerald, hudyat ng kanilang magiging maaksiyong harapan sa serye. Inilabas din ang isa pang teaser tampok si Bela, kung saan maririnig ang nakakakilabot niyang linya, “They are being butchered and so severely outnumbered.” Samantala, maririnig naman ang putok ng baril at sirena ng kapulisan sa teaser ni Richard habang binabanggit ang linyang, “Bunga ito ng malawakang pagkalat ng mga baril sa bansa.”

Isa ang BVD sa mga bagong handog ng ABS-CBN ngayong taon mula sa direksiyon nina FM Reyes, Bjoy Balagtas, Rico Navarro, kasama ang action director na si Erwin Tagle. Unang inanunsiyo ito noong Enero 19, kasabay ng pasilip sa matinding training na pinagdaanan ng cast bilang paghahanda sa serye.

‘Yun lang, and I thank you.