ni John Jonathan Talastas (OJT) @Special Article | April 8, 2026
Photo: IG Jellie Aw
Muling nagkaroon ng mainit na alitan sa kanyang pamilya ang DJ at content creator na si Jellie Aw matapos siyang akusahan ng kanyang mga kapatid sa iba't ibang isyu.
Sa isang napakahabang Facebook post, mariing ipinaliwanag ni Jellie ang kanyang panig at inilatag ang sama ng loob laban sa mga pinagsasabi ng kanyang pamilya tungkol sa kanya.
Mariing ipinagtanggol ni Jellie ang dati niyang fiancé na si Jam Ignacio laban sa umano’y akusasyon ng pambubugbog.
Si Jam ay dati ring naging karelasyon ni Karla Estrada na ina ni Daniel Padilla.
Ayon sa kanya, hindi totoo ang mga sinasabing insidente at lumipad pa ang buong pamilya sa Japan upang ayusin ang sitwasyon. Binanggit din niya na ang kanyang live selling ay para sa tuition at panghulog sa kotse ng kapatid, at hindi para sa personal na gastusin o iba pang maling balita.
“Just to clarify everything! Gusto ko lang din ipagtanggol side ko bilang ate, sobra na kayo! Ayoko mag-post, pero wrong info na mga sinasabi n’yo about sa ‘min.”
“Sa totoo lang, para sa ating magkakapatid, ‘di na natin kailangang gumawa ng kuwento. Unang-una, sa kapatid kong bunso, hindi totoo ‘yung ipinagkakalat mo na binugbog ako ulit ni Jam.
“‘Wag naman ganyan, naapektuhan negosyo ng tao. May mga anak din ‘yung tao na binubuhay.”
Pinuna rin ni Jellie ang patuloy na pagkakalat ng mga videos at post na nag-uugnay sa kanilang pamilya sa droga at panlilinlang, at mariing ipinahayag ang kanyang sakripisyo para sa pamilya, lalo na sa pangangalaga sa kanilang ina at sa negosyo ng pamilya.
Aniya, “Hindi ako robot, may puso ako at may sakripisyo. Bago mo ako siraan sa ibang tao, isipin n’yo ‘yung tumulong sa inyo.”
Ayon kay Jellie, sa kabila ng sariling hirap, patuloy siyang nagsisikap at humaharap sa mga hamon nang hindi iniwan ang responsibilidad sa pamilya.
Dagdag pa niya, ang ilang kapatid ay ginagamit ang social media upang takpan ang kanilang mga pagkakamali, at ang kanyang layunin ay malinawan ang publiko sa totoong nangyari.
“Bago mo ako siraan sa ibang tao, hindi mo ba naisip kung paano ka nabuo ngayon? Hindi panunumbat, it's just a simple reminder na sana, kahit respeto na lang sa taong tumulong sa inyo. Matanda na ate n’yo, nagawa ko na din part ko bilang anak. Kung ano man ang desisyon ko sa buhay ko, kasalanan ko na ‘yun, ‘di na ‘ko bata.”
Sa kabila ng lahat, sinabi niyang pipiliin pa rin niyang unahin ang kapakanan ng kanilang ina at ang kanyang sariling kaligayahan, habang hinahayaan na lamang ang kanyang mga kapatid.
Ang kanyang pahayag ay mabilis na kumalat online at nagdulot ng diskusyon hinggil sa isyu ng pamilya, responsibilidad, at paggamit ng social media sa paglalabas ng personal na alitan.
Ayaw magpaapekto sa mga bashers…
BELLE, PINIPILI LANG ANG MGA PUNA SA KANYA
Usap-usapan ngayon ang Kapamilya actress na si Belle Mariano matapos aminin na conscious s’ya sa kanyang pag-arte at madalas nagbabasa ng mga kritisismo sa social media tungkol sa kanyang acting career.
Sa panayam sa kanya ni Ganiel Krishnan para sa Oh My Gan!, ibinahagi ni Belle na pinipili lang niya ang mga puna na makakatulong sa kanyang pag-arte.
Ayon kay Belle, nire-reflect niya ang mga “genuine” comments para mas mapabuti ang
susunod niyang roles, pero dedma na raw siya sa mga bashers at trolls.
“I have read some and parang paano ko iibahin ‘yung role kong next. I reflect, sometimes if it matters like parang dini-differentiate ko na ‘yung mga kapag troll ‘yan or bashers, hayaan mo na sila or if it’s someone na genuine ‘yung comment, that’s what I take into heart and I reflect on it.”
Samantala, aminado rin ang aktres na kinakabahan pa rin siya sa bago nilang proyekto ni Donny Pangilinan na Tayo Sa Wakas. Para kay Belle, normal lang ang kaba dahil gusto niyang maiba ang bawat karakter na ginagampanan.
Pagdating naman sa social media, inamin niyang “double-edged sword” ito – may mabuti at may masama. Kaya importante raw na marunong mag-filter at huwag hayaang maapektuhan ang personal na buhay.
Diretsahan ding sinabi ni Belle na hindi nawawala ang bashing online, pero ang mahalaga raw ay kilala mo ang sarili mo at maging responsable sa mga ipino-post online dahil may epekto raw ito sa ibang tao.
Sa kabila ng lahat, labis ang pasasalamat ni Belle sa kanilang mga fans ni Donny, na aniya’y hindi lang supporters kundi parang pamilya na rin.
Hirit pa niya, iwasan ang toxicity sa fandoms at huwag mag-away-away-online — dahil lahat may kapangyarihang makasakit o makatulong sa kapwa sa social media!
