ni Ryan Sison @Boses | Abril 1, 2024
Hindi na bibigyan ng arrival sticker ang mga Filipino travelers kapag dumaan sila sa mga electronic gate (e-gates) na naka-install sa mga international port of entry, simula April 1, 2024.
Ayon sa Bureau of Immigration (BI), sa halip na mga sticker, ang mga inbound Filipino travelers ay makakatanggap ng email confirmation ng kanilang pagdating sa pamamagitan ng address na kanilang inilagay sa eTravel system.
Gayunman, maaaring hilingin ng mga pasahero na ang kanilang mga passport ay i-affix o lagyan ng mga arrival stamps ng mga BI officer.
Sinabi ni Immigration Commissioner Norman Tansingco na nagpasya ang kagawaran na i-streamline ang pagpoproseso ng e-gates para mapakinabangan ang kahusayan nito at lumipat sa label-free border clearance.
Sa ngayon, ang mga pangunahing international airports sa bansa ay mayroong 21 e-gates na naka-install, at mas marami pa ang inaasahang madaragdag sa loob ng taong ito.
Pahayag pa ni Tansingco, ang pagtanggal ng sticker-printing feature ng e-gates ay naaayon din naman sa mandato ng BI na maghatid ng epektibo at episyenteng immigration service para sa mga Filipino traveler.
Mainam ang naging desisyon ng pamahalaan na hindi na bigyan ng arrival sticker at gawin na lamang ang mas mabilis na proseso ng e-gates para sa mga Pinoy na galing abroad.
Mababawasan na ang kanilang abala at nasasayang na oras sa mga airport sa tuwing uuwi at nagbabalik sila sa ating bansa.
Mas magiging kumbinyente pa ito para sa mga biyaherong Pinoy dahil email confirmation na lamang ang kailangan habang nagagamit pa ang ating eTravel system.
Hiling lang natin sa kinauukulan na patuloy na magpatupad ng mga programang makakatulong at may mas pakinabang talaga para sa mga mamamayan.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com