Laban sa ICC arrest warrant... Walang TRO para kay Bato — SC

ni Jeff Tumbado @News | May 14, 2026

Photo: File / Sen. Ronald Bato Dela Rosa - FB

Inatasan ng Kataas-taasang Hukuman ang Ehekutibo na magsumite ng komento sa loob ng 72 oras kaugnay ng mosyon ni Senador Ronald dela Rosa na kumukuwestiyon sa bisa ng warrant of arrest na inilabas ng International Criminal Court (ICC) laban sa kanya.

Gayunman, hindi naglabas ng Temporary Restraining Order (TRO) ang Korte Suprema kaugnay ng petisyon ng senador.

Kabilang sa mga inatasang magsumite ng paliwanag ang Office of the Executive Secretary, Department of Justice (DOJ), National Bureau of Investigation (NBI) at Philippine National Police (PNP). 

Noong Mayo 11, 2026, inalis ng ICC ang pagiging confidential ng warrant laban kay dela Rosa at pinangalanan siyang “indirect co-perpetrator” sa umano’y mga krimen at crimes against humanity kaugnay ng madugong kampanya kontra ilegal na droga noong administrasyon ni dating Pangulong Rodrigo Duterte.

Ayon sa mga dokumento, unang inilabas nang nakaselyo ang warrant noong Nobyembre 6, 2025.

Nitong nakaraang Lunes ay tinangkang arestuhin ng mga tauhan ng NBI si Dela Rosa sa Senado subalit nakatakas ito. 

Dahil dito, agad na humingi ng interbensyon sa Korte Suprema ang legal team ng senador sa pamamagitan ng isang “extremely urgent supplemental manifestation.”

Dela Rosa kay PBBM: ‘Wag mo akong isuko sa ICC

ni Mylene Alfonso @News | May 13, 2026

Photo: Ronald Bato Dela Rosa - FB

Umapela si Senador Ronald “Bato” dela Rosa kay Pangulong Ferdinand “Bongbong” Marcos Jr. na huwag siyang isuko sa International Criminal Court (ICC) sa gitna ng pagpapalabas ng arrest warrant laban sa kanya dahil sa kontrobersyal na war on drugs.

Kasalukuyang nananatili sa Senado si Dela Rosa na nasa ilalim ng protective custody sa gitna ng warrant of arrest ng ICC kaugnay ng kasong crimes against humanity na kinasangkutan ni dating Pangulong Rodrigo Duterte.

“Mr. President, alam kong wala kang personal na galit sa’kin. Sana naman bilang ama ng ating bansa, alagaan mo ang iyong mga anak. Alagaan mo ang lahat ng mga Pilipino,” wika ni Dela Rosa sa mga mamamahayag.

“Huwag niya ako ipadala sa The Hague... Pareho tayong Pilipino, kung meron akong pananagutan, panagutan ko sa ating local court, huwag sa banyaga,” saad ng senador.

Noong Lunes, tinangka ng mga ahente ng National Bureau of Investigation (NBI) na arestuhin si Dela Rosa sa loob ng Senado.

Makikita sa kuha ng CCTV ang pagtakbo ng senador sa hagdan at corridors patungo sa Plenary Hall para iwasan ang mga humahabol sa kanya na nakasuot ng sibilyan.

Matatandang lumutang si Dela Rosa sa Senado sa unang pagkakataon mula noong Nobyembre 2025 upang dumalo sa plenary session.

Hindi siya dumalo sa anumang sesyon sa Senado sa gitna ng sinasabing naglabas ang ICC ng warrant of arrest laban sa kanya.

'Secret warrant' ng ICC, ibinulgar nu'ng Nov. 2025 — Bato... Boying, salamat, na-enjoy ko ang pagtatago

ni Jeff Tumbado @News | May 13, 2026

Photo: Ronald Bato Dela Rosa at Boying Remulla - FB

Nagpaabot ng pasasalamat si Senator Ronald “Bato” dela Rosa kay Ombudsman Jesus Crispin "Boying" Remulla sa pagbibigay umano nito ng "advance info" patungkol sa arrest warrant na balak ihain sa kanya.

Ani Dela Rosa, nakapagpahinga raw siya ng 6 na buwan at "nakapag-bible study nang husto" dahil dito.

Matatandaang ibinunyag ni Remulla na may kopya siya ng umano’y warrant of arrest laban kay Dela Rosa, na sinasabing inilabas ng International Criminal Court (ICC).

Gayunman, nilinaw ni Remulla na hindi ito opisyal na dokumento at wala pang kumpirmasyon mula sa ICC.

Kaugnay nito, kinumpirma rin sa ICC Office of the Prosecutor, na inisyu nga ang naturang warrant noong Nobyembre 6, 2025 at inilabas ito bilang confidential o “sealed warrant.”

“Mr. Dela Rosa’s warrant of arrest is an important step in the Office's ongoing pursuit of accountability for alleged crimes committed in the context of the so called war on drugs campaign in the Philippines,”  saad ng ICC.

Sa naging pahayag naman ni Dela Rosa, sinabi nitong gagawin nila ang lahat ng legal na hakbang upang pigilan ang kanyang pagkakaaresto.

Muli rin niyang kinuwestiyon ang hurisdiksyon ng ICC sa Pilipinas matapos umatras ang bansa sa Rome Statute noong 2019.