Ibinulgar ni Jeric… AJ AT ALJUR, 2 NA ANG ANAK, LALAKI AT BABAE

ni Reggee Bonoan @Sheet Matters | August 25, 2025

Photo: Mayor Vico Sotto / viral posts / Circulated - FB

Makalipas ang isang taong pagde-deny na nabuntis at may anak na si AJ Raval, heto at inamin na mismo ng tatay niyang si Jeric Raval na dalawa na ang apo niya kay AJ at si Aljur Abrenica ang ama.

Binalikan namin ang nasulat dito sa BULGAR noong Agosto 29, 2024 na mariing itinanggi ni Jeric ang tsikang may viral photo na may kasamang bata si AJ at boyfriend nitong si Aljur.

Sagot noon ni Jeric sa amin, “Apo ko ‘yun sa anak ko, si Ace, ‘yung rapper. Alam n’yo, ang dami kong apo, 13, magpo-14 na. Sabay-sabay ‘yan, maliliit pa. Siguro, isa sa mga apo ko ang kasama (sa viral photo). Natawa lang ako nu’ng makita ko.”

At heto nga, Agosto 2025, ang edad ng mga apo ni Jeric kay AJ ay isang taon at apat na buwan, at isang siyam na buwan. Bahala na ang mga readers na magbilang.

Nakakatuwa ring parehong event namin siya nakausap, noong nakaraang taon sa premiere night ng Mamay: A Journey to Greatness (MAJTG) sa SM Megamall, at ngayong taon naman sa victory dinner ng pelikula matapos makakuha ng limang FAMAS awards mula sa 10 nominations, bukod pa sa dalawang special awards para kay Nunungan Vice-Mayor Marcos Mamay: ang Best Producer at Presidential Award.

Sa kasalukuyan, ayaw na raw ni AJ mag-artista kahit ilang beses siyang sinasabihan ng tatay niyang si Jeric at hinahanap pa siya ng Viva at ilang kilalang aktres na gustong isama siya sa project.

Aniya, “Ayaw na mag-artista kasi maramdamin ‘yun. Dinidibdib n’ya ‘yung mga namba-bash

sa kanya, sensitive s’ya sa ganu’n. Sabi ko nga sa kanya (AJ), basta mainit sa kusina, lumabas ka. Eh, ngayon, napagkumpara n’ya, mas tahimik ngayon (wala sa showbiz).”

Hindi naman daw pinagbabawalan ni Aljur si AJ na magbalik-showbiz.

“Wala, nasa bahay lang s’ya. Sabi ko nga, bumalik na, eh, walang sagot, make face lang,” kaswal na sabi ng itinanghal na 73rd FAMAS Best Supporting Actor para sa Mamay.

Nabanggit din kung malaki na ba ang mga apo niya kay AJ, “Kakapanganak pa lang, eh. ‘Yung mga bali-balita noon, hindi naman ‘yun (sabay kamot sa ulo). Ngayon lang, siyam na buwan pa lang.”

Tinanong namin kung sino’ng kamukha, “Ako!” natatawang sabi ng proud lolo.

Babae ang bunsong apo na siyam na buwan pa lang, at lalaki ang panganay na isang taon at apat na buwan na.

“Babae at lalaki, dalawa na. Tawag ko (sa lalaking apo), AlJunior,” masayang sabi ng aktor.

For the record, sino nga ba ang tatay ng panganay na anak ni AJ? 

“Si Aljur,” sagot ni Jeric.

Kung dati ay malapit ang bahay ni Jeric kina AJ, ngayon ay hindi na.

“Dati isang subdivision lang kami, few blocks lang. Ngayon sa Carmenville na sila, sa Angeles, Pampanga.”

Sa edad na 23, naniniwala si Jeric na makakabalik pa sa showbiz ang anak niya. Bata pa raw ito at may paghuhugutan na kaya mas magiging mahusay pagbalik.

Samantala, muling napatunayan ni Nanay Cristy Fermin ang kanyang scoop dahil siya ang unang nagbalita noon na buntis si AJ at malapit nang manganak.

Mariin man itong itinanggi noon ng Viva management ni AJ, nanindigan si ‘Nay Cristy na totoo ang impormasyon niya dahil napaka-reliable ng kanyang source.

Isinulat din namin ang balitang ito hanggang sa hindi na kami naimbitahan ng Viva sa events nila dahil sinisira raw namin ang kanilang prime talent na si AJ, na that time ay kaputukan ng projects at halos linggu-linggong may presscon.

Kaya sa mga pilit na sumisira sa kredibilidad ni ‘Nay Cristy na puro tsismis lang daw ang ibinabalita, paano ngayon ‘yan, lumabas din ang totoo!

Lagi ngang sinasabi ni ‘Nay Cristy sa programa niyang Cristy Ferminute (CF) kasama si Romel Chika, at sa online show na Showbiz Now Na! (SNN) kasama sina Romel at Wendell Alvarez, “Maghintay lang tayo ng tamang panahon at aamin din ‘yan.”

Going back to Jeric, sobrang saya niya dahil sa 35 years niya sa industriya, ngayon lang siya na-nominate at sinuwerte pang nanalo bilang Best Supporting Actor.

“Dati kasi, feeling ko, wala akong value kasi ni nomination, wala ako, eh. Kaya nagpapasalamat talaga ako kay Mayor Mamay kasi isinama ako sa movie. Laking utang na loob ko sa kanya, alam niya ‘yun. At siyempre sa FAMAS na napansin ako,” pahayag ni Jeric Raval.

Prof. sa Journalism, nagsalita, may nilabag daw sa Code of Ethics… KORINA AT JULIUS, SABLAY SA INTERVIEW SA MAG-ASAWANG DISCAYA

ni Reggee Bonoan @Sheet Matters | August 24, 2025

Photo: Mayor Vico Sotto / viral posts / Circulated - FB

Hot topic pa rin hanggang ngayon si Julius Babao dahil sa panayam niya sa mag-asawang Curlee at Sarah Discaya kung saan ipinakita sa Unplugged YouTube (YT) channel nito ang napakaraming high-end cars ng mga Discaya at ang pag-aming yumaman sila dahil sa Department of Public Works and Highways (DPWH) projects nila.

Kabilang ang mga negosyo ng mag-asawang Discaya sa mga binanggit ni Pangulong Bongbong Marcos, Jr. (PBBM) na 15 contractors na may diumano’y anomalya sa flood control projects.

Napakaraming online hosts na ang nakisawsaw sa isyung Julius Babao with Sarah at Curlee na kinastigo ni Pasig City Mayor Vico Sotto. Isa na rito ang dating news reporter ng TV Patrol na si Christian Esguerra at professor ng Journalism sa University of Santo Tomas (UST).

Sa kanyang Facts First (FF) YT channel ay nagbigay siya ng pahayag tungkol sa panayam ni Julius sa mga Discaya, base na rin daw sa mga requests sa kanya dahil nagtuturo nga siya ng Journalism Ethics sa UST.

Simula ni Prof. Esguerra, “Hindi ko naman napanood nang buo dati ‘yun (vlog ni Julius), nakita ko lang ‘yung mga clips na nagsusulputan.

“Ang dami kong nakitang ethical issues doon sa interview ni Julius Babao at saka ni Korina Sanchez sa mga Discaya.” 

Wala naman daw siyang personal na galit sa dalawang broadcast journalists.

“Pero ang dami kong nakitang ethical issues pagdating po sa journalism dito sa kanilang mga ginawang interview.

“Unang-una, ‘yung atake ng interview. Maganda nga na nagsalita itong si Mayor Vico Sotto kaya saludo rin tayo dito, he called a spade a spade. Hindi lang ako sigurado sa binanggit niya na halaga raw para ru’n sa interview, I wouldn’t know.

“Pero ‘yung ethical issues na obvious na obvious, unang-una, bakit mo iinterbyuhin ang mga Discaya bago mag-eleksiyon? Obviously, gustong i-promote ang mga sarili nila. Number 2, hindi puwedeng palusot ‘yung ‘lifestyle interview’ na binanggit.

“Pero makikita n’yo ‘yung binanggit ni Mayor na grey area, palusot po ‘yun. Kaya hindi mo maiwasan ang mga tao na kumita, ‘yung mga vloggers na ‘yan o nabayaran du’n sa interview na ‘yun.

“Again, we wouldn’t know dahil sila lang ang makakasagot nu’n at ‘yan ang problema sa ganyang kalakaran, hindi mo alam kung nagkapalitan ng pera. Magkakaroon ka lang ng hinala,” pahayag ni Prof. Christian.

Nabanggit pa na magkakaroon lang ng bayad sa mga viewerships kung maraming nanonood o milyun-milyon ang nanonood. 

“I don’t know. Pero kung kumita pa sila lalo kunwari binayaran sila ng mga Discaya para interbyuhin sila, eh, lalong napaka-unethical po nu’n.

“Next point naman po nu’n, ‘yung atake ng interview. Kung ikaw, respetadong journalist ka at gusto mo talaga silang interbyuhin, dapat at the very least probing questions, hindi ‘yung tipong ang lamya-lamya,” paliwanag pa ng propesor.

Naikumpara pa ang panayam ni Julius sa isang sports analyst, television personality and radio host na si Stephen A. Smith na ininterbyu si Floyd Mayweather, Jr. at ibinida raw ang kanyang car collections at mansion.

“Tapos, si Stephen A. Smith ay talagang manghang-mangha, tapos mesmerized s’ya as an interviewer, tapos mga tanong n’ya, napaka-softball, napaka-patronizing, etc.

“Naalala ko ‘yung interview na ‘yun ni Stephen A. Smith kay Floyd Mayweather dito sa interview ni Julius Babao sa mga Discaya. Nandu’n ka na, eh, sana, diniinan mo na ‘yung tanong.

“Naitanong naman na kahit papaano na medyo malamya, although hindi naman kilala si Julius Babao bilang isang hard-hitting journalist at may mga nagkukuwestiyon pa nga kung journalist s’ya at all. Journalist naman si Julius at newsreader d’yan sa TV5. 

“Pero again, sorry sa mga colleagues natin, you have to be discriminating naman kung alam ninyong nagagamit kayo sa ganyang interviews, eh, hinay-hinay naman,” pahayag pa ni Prof. Christian.

“Kasi hindi puwedeng nagdi-discuss tayo ng mga maling gawi ru’n sa mga tao na ginagawa sa pamahalaan o nasa kapangyarihan, o magbubulag-bulagan tayo rito sa mga questionable practices at the very least ng ating mga kabaro, ng ating mga kasama sa industriya,” diin pa niya.

Sabi pa nito, “I don’t like din ‘yung mga journalists na napakaseryoso pagdating sa mainstream media pero pagpunta naman sa social media, kung anu-anong walang kapararakan ang ginagawa nila para lang kumita, ‘yung meron silang split personality?

“‘Yung seryoso sa mainstream, pero sa social media, puro kababawan, ‘di ba? Wala naman akong pakialam kung talagang mababaw na tao sila pero ‘wag nang magpanggap, at sana, ‘wag magpagamit du’n sa mga taong questionable ang character, ‘yun ang punto ko po.

“Sana, ‘wag nang magpagamit,” huling hirit pa nito.

Anyway, bukas ang BULGAR sa panig nina Julius Babao at Korina Sanchez tungkol sa mga sinabi ng kabaro nilang si Prof. Christian Esguerra.

Dawit sa anomalya ng flood control projects… MAYOR VICO: DISCAYA, GAME MAGBAYAD NG P10 M MAINTERBYU LANG NI JULIUS

ni Reggee Bonoan @Sheet Matters | August 23, 2025

Photo: Mayor Vico Sotto / viral posts / Circulated - FB

Ramdam namin ang galit ni Pasig City Mayor Vico Sotto kay Sarah Discaya na nakatunggali niya sa pagka-mayor sa nakaraang 2025 midterm elections dahil kasama ang pangalan nito sa 15 contractors na may maraming flood control projects.

Dalawang kumpanya ang pag-aari ni Discaya sa 15 na binanggit ni Pangulong Bongbong Marcos (PBBM), ang Alpha & Omega Gen. Contractor & Development Corp. at St. Timothy Construction Corporation.

Bukod sa dalawang kumpanyang ito ay binanggit ni Mayor Sotto na ang iba pang pag-aaring kumpanya ng Discaya family ay ang St. Gerrard Construction, Elite General Contractor and Development Corp., St. Matthew General Contractor & Development, Great Pacific Builders and General Contractor, YPR General Contractor and Construction Supply, Amethyst Horizon Builders and General Contractor & Dev’t Corp., at Way Maker OPC.

Nakilala nang husto ng publiko ang mag-asawang Sarah at Curlee Discaya sa panayam ni Julius Babao sa kanyang YouTube (YT) channel noong Setyembre 17, 2024, dahil ikinuwento nila na dati silang mahirap pero nang tumanggap sila ng mga proyekto sa Department of Public Works and Highways (DPWH) ay nabago ang antas nila sa buhay dala ng kanilang pagsisikap.

At dahil sa pag-aming ito ng mag-asawang Discaya na konektado sila sa DPWH ay nag-one plus one na ang mga netizens na kabilang sila sa umano’y may anomalyang proyekto sa flood control nationwide, lalo’t binanggit ni PBBM ang dalawang kumpanyang pag-aari nila.

Sa kanyang Facebook (FB) account ay ipinost ni Mayor Vico ang screenshots ng panayam ni Julius sa mag-asawang Discaya at nanawagan sa mga journalists tungkol dito, na umano’y may bayad na P10 million ang nasabing interview.

Ang caption ng Ama ng Pasig City, “With these interviews again going viral, let’s look at it from a different angle..

“Bago tanggapin ng mga kilalang journalists ang alok para mag-interview ng Contractor na pumapasok sa pulitika, hindi ba nila naisip na, ‘Uy, teka, ba’t kaya handa ‘to magbigay ng P10M para lang magpa-interview sa akin?’

“I know for a fact that there are many good, honest people in the media who are disappointed, if not angered, at practices like this which undermine the integrity of their profession.

“In this case, maybe they didn’t do anything technically ‘illegal,’ but at the very least it should be considered shameful and violative of the spirit of their code of ethics. Puwede silang magtago sa grey areas, ‘Hindi naman journalism ito, more of lifestyle lang, kailangan kasi ng sponsor…’ Pero ‘wag na tayong maglokohan. They rose to national prominence as broadcast journalists/news personalities; puhunan (dapat) nila ang kanilang reputasyon at kredibilidad at sa ganitong kalakaran, ito rin ang reputasyon at kredibilidad na pinahihiram nila sa mga

corrupt kapalit ng (emoji paper bills).

“Let’s remember that corruption is systemic... it permeates into every sector of society, not just government. But we can slowly but surely break this cycle if more and more of us consistently do our part, wherever we are and whatever our position may be, one step at a time. (Not an exact figure pero alam n’yo na).”

Dagdag pa niya sa comment section, “Hindi naman sa gusto kong gumawa ng bagong kaaway, pero tingin ko, kailangan ding mapag-usapan ito, eh. Nagkataon malakas ako nu’ng halalan pero kung sa iba nila ginawa ‘to, baka wala na. Anyway. Kayo na po ang bahala sa ‘kin (praying hands emoji).”

Trending ang post na ito ni Mayor Vico dahil umabot na ito sa 28,000 shares at 5,500 comments as of this writing.

Samantala, pinalagan ito ng TV5 news anchor ng Frontline Pilipinas (FP) na walang halagang involved sa kanyang panayam sa mga Discaya. Nagpadala kami ng mensahe kay Julius Babao sa kanyang Facebook (FB) Messenger at Instagram (IG) Direct Message pero hindi pa niya ito nababasa.