Barko nasunog, 5 patay, 86 nawawala

ni Mervin Reyes @News | September 11, 2026

Photo: Ang sumabog at nasunog na ferry ng M/V June Aster - PCG

Hindi bababa sa lima ang nasawi at 86 iba pa ang nawawala matapos umanong sumabog at masunog ang ferry na M/V June Aster malapit sa isang tourist hotspot sa Palawan noong Miyerkules ng gabi, ayon sa Philippine Coast Guard (PCG).

Ayon kay Coast Guard Captain Noemi Cayabyab, nasa 2.2 kilometro mula sa baybayin ang barko nang sumiklab ang apoy. 

Sa 134 na nakalistang pasahero at crew, 43 ang nailigtas, kabilang ang mga pasahero at crew, habang lima ang kumpirmadong nasawi.

Nilinaw na maaaring magbago ang bilang habang nagpapatuloy ang search and rescue operations.

Ayon pa kay Cayabyab, hindi pa nakukuha ng Coast Guard ang impormasyon mula sa mga nailigtas dahil hindi pa nila nakakausap ang mga ito, habang nagpapatuloy ang pag-apula sa sunog.

Batay sa MarineTraffic, nanggaling sa Maynila ang M/V June Aster.

Tugboat na may kargang 15K litro ng diesel, lumubog

by Jeff Tumbado @News | August 25, 2026

Photo: PCG

Tuluyang lumubog sa karagatan ng Botolan, Zambales ang isang tugboat na may sakay na 10 tripulante habang isinasagawa ang emergency salvage operation nitong Lunes ng umaga, Agosto 24.

Ayon sa Philippine Coast Guard (PCG), ligtas ang lahat ng 10 katao na sakay ng tugboat at wala namang naiulat na nasugatan.

Agad na nagsitalunan sa dagat ang mga crew nang mapansin nilang tuluyan nang lumulubog ang sasakyang-dagat.

Bago ito tuluyang lumubog, isinadsad muna sa pampang ang tugboat matapos pasukin ng tubig ang butas sa hull nito.

Dahil dito, napuno ng tubig ang engine room at kinailangang ilipat ang sasakyang-dagat sa mas ligtas na lugar sa pamamagitan ng salvage operation.

Alas-7:46 ng umaga nang mangyari ang insidente habang hinihila ang tugboat palayo sa pampang.

Habang isinasagawa ang operasyon, unti-unti itong tumagilid sa kanang bahagi hanggang sa tuluyang lumubog sa tinatayang 24-metrong lalim.

Nabatid na may kargang humigit-kumulang 15,000 litro ng diesel ang tugboat nang mangyari ang insidente.

Bagama't sinasabing buo pa ang fuel tank, mahigpit na mino-monitor ng PCG ang lugar dahil sa posibilidad ng pagtagas ng langis.

Patuloy namang inaalam ng PCG ang eksaktong dahilan ng paglubog ng tugboat.

4 Coast Guard, sibak sa paglubog ng MV Trisha Kerstin

ni Mai Ancheta @News | February 27, 2025

Photo File: Philippine Coast Guard

Sinibak ng Philippine Coast Guard ang apat na enlisted personnel, habang sinuspinde ng isang taon nang walang suweldo ang dalawang opisyal nito kaugnay sa trahedya nang paglubog ng M/V Trisha Kerstin 3 noong February 24, 2026.

Ito ang inilabas na desisyon ng PCG matapos ang ginawang imbestigasyon ng Coast Guard Inspector General-Internal Affairs Service.

Lumitaw sa imbestigasyon na nabigo ang apat na enlisted personnel na magsagawa ng independent verification sa totoong bilang ng mga pasahero ng barko at hindi maayos na dinokumento ang load line markings ng barko.

Na-demote naman ng isang ranggo ang duty officer na si PO3 Jestoni Barreto dahil sa kapabayaan sa kanyang  tungkulin.

Sinuspinde naman ng isang taon ng walang sahod ang dalawang senior officers na sina LCDR Tristan Jenner Erediano at Lt. Jason Pagbonocan na nagsilbing station commander at acting Station commander sa Zamboanga.

Inatasan ang mga ito na sumailalim sa mandatory retraining sa ship inspection standards at superbisyon ng PDI teams.

Sinabi ni PCG Spokesman Noemi Cayabyab na hindi kinukunsinti ng Coast Guard ang mga ganitong uri ng paglabag sa maritime safety standards at palalakasin ang inspection protocols at training ng personnel upang hindi maulit ang trahedya.