Fajardo sa ika-13 PBA Best Player of the Conference

ni Anthony E. Servinio @Sports | January 29, 2026

Photo: Itinaas ni SMB center June Mar Fajardo ang plake bilang Best Player of the Conference ng PBA Philippine Cup nang igawad sa kanya nina SMB Governor Robert Non (kaliwa), Rachelle Sale, PBA Commissioner Willie Marcial at Alfrancis Chua halftime ng PBA game. (Ben Maniclang)

Laro ngayong Biyernes - Ynares Antipolo

7:30 PM TNT vs. SMB

Pormal na kinoronahan si June Mar Fajardo ng San Miguel Beermen na 2025-26 PBA Philippine Cup Best Player of the Conference kahapon sa MOA Arena. Ito na ang kanyang pangkalahatang ika-13 at ika-10 sa itinuturing na pinakaprestihiyoso sa tatlong torneo ng liga.

Hindi naging mahigpit ang karera. Napakalayo na nalikom na numero ni JMF kumpara sa mga humahabol na sina Calvin Abueva ng Titan Ultra, Juan Gomez de Liano at Justine Baltazar ng Converge at Zavier Lucero ng Magnolia.

Dagdag dito, lahat ng ibang nominado ay bigong makapasok sa semifinals. Ang pangalawa na si Abueva ay hindi nakalampas ng elimination. Kasama rin sa pagpili ang mga boto ng PBA Press Corps. May boto rin ang mga kapwa manlalaro.

Nasundan ni JMF ang kanyang BPC sa 2025 Philippine Cup noong Hulyo. Huling matagumpay na nakamit niya ang magkasunod na tropeo noong 2017-18 Philippine at Commissioner's Cup subalit nabigo na maitala ang bihirang "Grand Slam" nang mapunta kay Paul Lee ng Magnolia ang Governors' Cup.

Mula kanyang unang BPC sa 2013-14 Philippine Cup ay nagwagi ng anim na sunod sa nasabing torneo si JMF. Naputol lang ito nina Stanley Pringle ng Barangay Ginebra noong 2020 at Abueva ng Magnolia noong 2021 pero nakabawi si JMF at apat na sunod na ang tropeo.

Ang iba pang BPC niyan ay dumating noong 2015 at 2024 Governors' at 2018 Commissioner's Cup na may mga import. Subalit nakatutok pa rin si JMF na maghatid ng isa pang kampeonato sa Beermen bago isipin ang indibidwal na karangalan.

Perez bumida sa panalo ng SMB, 2-1 na vs. 5G

ni Anthony E. Servinio @Sports | January 26, 2026

Photo: Umariba ng paniguradong pag basket si San Miguel Beermen Moala Tautuaa habang naiwan sa depensa si Brandon Ganuelas Rosser ng Talk N Text Tropang 5G sa maaksyong tagpo nila sa PBA Philippine Cup finals game 3 best of seven series na ginanap sa Mall of Asia Arena, Pasay City. (REYMUNDO NILLAMA)

Laro ngayong Miyerkules - MOA

7:30 PM SMB vs. TNT

Mag-isang isinalba ni CJay Perez ang defending champion San Miguel Beermen sa 95-89 panalo sa TNT Tropang 5G sa Game Three ng 2025-26 PBA Philippine Cup Linggo ng gabi sa MOA Arena. Lamang na ang Beermen sa seryeng best-of-seven, 2-1.

Lamang ang SMB, 86-79, pero bumira ng 10 sunod ang Tropa tampok ang dalawang tres nina Calvin Oftana at Rey Nambatac at tinuldukan ng malakas na dunk ni Henry Galinato para maagaw ang bentahe, 89-86. Subalit iba ang plano ni Perez para sa huling 50 segundo.

Bigla siyang pumukol ng four-points na nagbalik ng lamang sa SMB, 90-89. Sinundan ito ng mabuting depensa na naging daan para makatira ng pandiin na tres si Perez at tuluyang sinelyuhan ng mga free throw ni Marcio Lassiter ang resulta.

Maganda ang simula ng Beermen at nakuha ang unang quarter, 33-19. Nagising ang TNT hanggang makamit ang unang lamang, 42-40, at naging dikdikan hanggang sa huling minuto.

Tatlong puntos lang si Perez sa unang tatlong quarter subalit uminit siya kung kailan pinakakailangan para sa 17 ng kaniyang 20 sa huling quarter. Sumuporta si Don Trollano na may 11 ng kanyang 19 sa pangatlo at halimaw si June Mar Fajardo na may 16 at 27 rebound.

Nagtapos na may 25 si Oftana. Sumunod sina Jordan Heading at Brandon Ganuelas-Rosser na may tig-15 at humakot ng 13 rebound si BGR.

Ang Game Four ay ngayong Miyerkules sa parehong palaruan. Igagawad din ang Best Player of the Conference sa araw na iyon.

Beermen niresbakan ang Tropang 5G sa Game 2 Finals

ni Anthony E. Servinio @Sports | January 24, 2026

Photo: Lakas loob na harapang tumirada ng pagbasket si San Miguel Beermen Miguel Tiongson na hindi naging sagabal sa kanya ang depensa ni Jp Erram ng Talk N Text Tropang 5G sa maaksyong tagpo nila ng PBA Philippine Cup finals Game 2 best of seven series sa Ynares Center, Antipolo City. (Reymundo Nillama)

Laro ngayong Linggo - MOA

7:30 PM TNT vs. SMB

Bumalik ang bagsik ng defending champion San Miguel Beermen sa tamang panahon at tinalo ang naghahamon TNT Tropang 5G, 111-92, sa Game Two ng 2025-26 PBA Philippine Cup Finals Biyernes ng gabi sa Ynares Center Antipolo. Tabla na ang seryeng best-of-seven sa 1-1.

Dumaan sa maagang pagsubok ang SMB at apat na minuto pa lang ang lumipas ay napilitan umupo si CJay Perez dahil sa pangatlong foul. Kahit wala siya ay humataw ang Beermen at itinala ang huling 13 puntos ng pangalawang quarter, 57-33.

Matalinong inalagaan ng SMB ang bentahe sa gitna ng mga banta ng Tropa. Lumapit ng TNT, 87-97, sa likod ni Kevin Ferrer subalit kulang ang nalalabing dalawang minuto.

Pinalitan ni Don Trollano ang problemadong si Perez at gumawa agad ng 12 tungo sa kabuuang 22. Double-double si June Mar Fajardo na 17 at 16 rebound.

Nanguna sa TNT si Rey Nambatac na may 17. Sumunod si Brandon Ganuelas-Rosser na may 15.

Ang Game Three ay lilipat sa MOA Arena ngayong Linggo. Doon din gaganapin ang Game Four at ang pagkilala sa Best Player of the Conference. (A. Servinio)