Gin Kings itinabla ang serye, bumawi sa 1-1

ni Anthony E. Servinio @Sports | May 23, 2026

Photo: Hindi alintana ni Rain or Shine Elasto Painters Gian Mamuyac ang todo depensa ni Justine Brownlee sa bahaging ito ng kanilang bakbakan sa PBA Commissioner's Cup semifinals Game 2 best-of-seven series sa Mall of Asia Arena, Pasay City kahapon. (Reymundo Nillama)

Laro sa Linggo - MOA

5:15 PM Meralco vs. TNT

7:30 PM Ginebra vs. ROS

Tabla na sa 1-1 ang serye matapos ang matinding 109-101 panalo ng Barangay Ginebra sa Rain Or Shine Elasto Painters sa pagpapatuloy ng 2025 PBA Commissioner's Cup semifinals kagabi sa punong MOA Arena. Kasunod ito ng 115-111 tagumpay ng ROS noong Miyerkules sa Ynares Center Antipolo.

Pinalamig ng mga free throw ni Scottie Thompson ang malupit na paghabol ng E-Painters, 103-97, at 1:03 sa orasan. Kinapos ng panahon ang ROS at sinigurado ng mga puntos nina Troy Rosario at RJ Abarrientos ang resulta.

Lumundag ang E-Painters sa maagang 12-5 lamang subalit hanggang doon lang sila sabay walang shoot si Jaylen Johnson sa unang 12 minuto. Uminit sina Justin Brownlee at Abarrientos at unang quarter pa lang ay lumampas na sila ng 10 puntos para itulak ang Ginebra, 33-20.

Sumama si reserba Rosario sa pagbuhos ng opensa para itayo ang 62-40 bentahe. Bago nito ay natamasa ng Barangay ang pinakamalaking lamang, 62-38.

Nanguna si Best Player Brownlee na may 31 puntos mula limang tres at 15 rebounds. Sumunod si Abarrientos na may 25 subalit susuriin ang kanyang ilong na posibleng nabasag kaya umupo siya sa huling quarter at humabol ang ROS.

Nagtala ng 20 para sa ROS si Adrian Nocum. Parehong tig-19 sina Johnson at bayani ng Game One Jhonard Clarito.

Pag-aagawan ng mga koponan ang liderato sa Game Three ngayong Linggo sa parehong palaruan. Bago niyan ay ang pangatlong sagupaan ng defending champion TNT Tropang 5G at Meralco Bolts. (A. Servinio)

Heading ng Tropang 5G inisahan agad ang Bolts

ni Anthony E. Servinio @Sports | May 21, 2026

Photo: Malakas na umangat si KJ Quinto ng Meralco Bolts para pakawalan ang bola upang hindi abutan ng matinding depensa ng katunggaling ng Talk 'N Text Tropang 5G sa unang tagpo nila sa semifinals game ng PBA Commissioner's Cup best of seven series sa Ynares Center Antipolo City. (Reymundo Nillama)  

Laro sa Biyernes - MOA

5:15 PM ROS vs. Ginebra

7:30 PM TNT vs. Meralco

Sumandal ang defending champion TNT Tropang 5G sa malakasang huling quarter upang mabigo ang Meralco Bolts, 94-89, sa pagbubukas ng 2026 PBA Commissioner's Cup Semifinals kagabi sa Ynares Center Antipolo.

Huling hinawakan ng Bolts ang 75-74 bentahe at mula doon ay gumana ng todo sina Calvin Oftana, Roger Pogoy at Jordan Heading upang ibalik sa 11 ang agwat, 88-77. Unang lumamang ang Tropa, 32-21, unang minuto ng pangalawang quarter.

Hindi basta tumiklop ang Meralco at lumapit sa four-points ni Bong Quinto, 89-92. Sinagot ito ng buslo ni super import Bol Bol upang makahinga ang Tropa at kumapit sila sa nalalabing 46 segundo.

Napiling Best Player si Heading na may 15 puntos bilang reserba. Nagsumite muli ng halimaw na numero si Bol na 37, 11 rebounds, walong assists at anim na tapal sa 42 minuto.

Ayon kay Coach Chot Reyes, ang pundasyon ng laro nila ay huwag sila daigin ng Meralco pagdating sa trabaho. Kailangan higitan nila ang enerhiya ng kalaro.

Nagtala ng 22 at 14 rebounds si Marvin Jones. Sumunod sina Quinto na may 17 at CJ Cansino na may 12. Tinatapos kagabi sa 2nd game ang unang laro ng #2 Barangay Ginebra at #3 Rain Or Shine Elasto Painters. Tinambakan ng Gin Kings ang ROS sa elimination, 114-90, noong Mayo 3 sa likod ng 40 ni Justin Brownlee.

12th title sinungkit ng SMB; Fernandez trophy finals, MVP kay Fajardo

ni Anthony E. Servinio @Sports | February 1, 2026

Photo: Pormal na Ipinagkaloob ni El Presidente Ramon Fernandez ang Final MVP ng PBA Philippine cup conference para kay San Miguel Beermen center June Mar Fajardo. (Reymundo Nillama)

Walang duda sa determinasyon ng defending champion San Miguel Beermen at matagumpay na nanatili ang korona sa Game Six ng 2025-26 PBA Philippine Cup Finals sa 92-77 panalo sa TNT Tropang 5G Linggo ng gabi sa punong MOA Arena. Nagwakas ang seryeng best-of-seven, 4-2, para sa ika-12 titulo ng Beermen sa itinuturing na pinakamatimbang sa tatlong tropeo ng liga.

Napiling pinakaunang tumanggap ng Ramon Fernandez Finals MVP si June Mar Fajardo. Ito ang kanyang ika-limang Finals MVP at ang tropeo ay iginawad ni Fernandez mismo.

Sinimento ni JMF ang kanyang karapatan sa karangalan sa 29 puntos at 23 rebound. Double-double din siya sa lahat ng laro sa serye kahit hindi siya napiling Best Player sa unang tatlong panalo ng SMB.

Dala pa rin ang positibong enerhiya mula sa 96-82 tagumpay sa Game Five, ipinasok ng SMB ang unang 12 puntos at inabot ng anim na minuto bago naka-shoot ang Tropa. Lumaki ito sa 26-5 subalit hindi basta sumuko ang TNT.

Photo: Sinikap na makapag basket ni San Miguel Beermen center June Mar Fajardo sa kabila ng mahigpit na depensa ni Brondon Ganuelas-Rosser ng Talk N Text Tropang 5G sa ilang bahagi ng aksyon sa PBA 50th Season Philippine Cup game 6 finals best of seven series sa Mall of Asia Arena, Pasay City. (Reymundo Nillama)

Mag-isang itinala ni Calvin Oftana ang unang 13 ng pangalawang quarter para lumapit, 23-26. Nagising ang SMB hanggang bumanat ng four-points si CJay Perez at ibalik sa 43-33 ang bentahe.

Nagbunga na rin ang tiyaga ng Tropa at natikman ang nag-iisang bentahe, 68-66, sa walong sagot na puntos. Kinontra ito ng 12 puntos ng SMB para isara ang pangatlong quarter, 78-68.

Tuluyang gumuho ang kampanya ng Tropa. Bumira ng mga pandiin na buslo sina Marcio Lassiter, JMF at Rodney Brondial para maging 89-73 papalapit sa huling dalawang minuto.

Umani ng suporta si JMF kay CJAy Perez na may 19. Double-double din si Brondial na 15 at 13 rebound.

Nagtapos na may 28 si Oftana. Sumunod sina Jordan Heading na may 14 at Poy Erram na may 11.