'Pinas, kapos na sa asukal at sibuyas, kinakapos na rin sa supply ng kuryente

ni Pablo Hernandez III @Prangkahan | May 18, 2023

MGA HOARDER NG ASUKAL AT SIBUYAS, KASUHAN AT IKULONG!—Aprubado na ni Pangulong Ferdinand “Bongbong” Marcos Jr. (P-BBM) ang pag-aangkat ng asukal at sibuyas sa ibang bansa dahil kinakapos na raw sa suplay ang Pilipinas.

Sa totoo lang, kaya kinakapos ang suplay ng asukal at sibuyas ay dahil sa raket ng mga mapagsamantalang traders na itinatago ang tone-toneladang asukal at sibuyas para kapusin sa suplay ang bansa at para maibenta sa mas mataas na presyo ang mga naturang produkto.

Hangga’t hindi ginagamitan ng kamay na bakal ng Marcos administration para makasuhan at ipakulong ang mga mapagsamantalang negosyante na nagho-hoard ng mga asukal at sibuyas, asahan nang patuloy na magtataas ang presyo ng mga produktong ito sa merkado, period!

◘◘◘

MGA PROBLEMA NG PINOY, PALALA NANG PALALA—Palala nang palala ang mga problemang nararanasan ngayon ng mga Pinoy.

Hindi lang kakapusan sa suplay ng asukal at sibuyas ang problema ngayon ng mga Pinoy kundi maging ang supply ng kuryente dahil sa nangyayaring rotational brownouts sa ilang lalawigan sa Luzon, saklap!

◘◘◘

KAKATAPOS LANG IDEKLARA NG WHO NA TAPOS NA ANG PANDEMIC, PERO SA ‘PINAS, ANG DAMI PA RING NAGKAKA-COVID—Matapos ideklara ni Baguio City Mayor Benjamin Magalong ang pagbabalik ng mandatory na pagsusuot ng face mask sa lahat ng pampublikong lugar sa lungsod, ipinag-utos na rin ni Mayor Honey Lacuna ang mandatory na paggamit ng face mask sa loob ng Manila City Hall sa kadahilanang dumarami na naman ang tinamaan ng COVID-19 sa kanilang nasasakupan.

Hay naku, ‘anyare sa ‘Pinas? Kakatapos lang ianunsyo ng World Health Organization (WHO) na hindi na global health emergency o tapos na ang COVID-19 pandemic, pero sa ‘Pinas, ang dami pa ring tinatamaan ng COVID, tsk!

◘◘◘

SANGKATERBANG PASUGALAN AT KUBRADOR, SANHI KAYA NG PAGDAMI NG NAGKAKA-COVID SA BAGUIO CITY AT MAYNILA?—Hindi kaya may kinalaman ang sangkaterbang illegal gambling at mga kubrador sa Baguio City at Maynila, kaya marami pa rin ang nagkaka-COVID sa dalawang lungsod na ito?

Dikit-dikit kasi ang mga mananaya sa mga pasugalang color games at drop balls nina ‘Edna,’ ‘Jimmy,’ at ‘Nestor’ sa Magsaysay Road at Kayang Hill Top, at sa mini-casino ni ‘Patrick’ sa Legarda Road at Bokawkan Road, habang sa Maynila naman, sangkaterbang kubrador nina ‘Boy Abang’ at ‘Lorna’ ang nagbabahay-bahay para magpataya ng bookies at lotteng.

Malinaw na lumalabag sa social distancing ang mga pasugalang ‘yan, at kung hindi ipapatigil nina Mayor Magalong at Mayora Lacuna ang mga ganitong uri ng raket sa kanilang nasasakupan, hindi kataka-taka na magkahawaan at marami pa rin ang nagkaka-COVID sa kanilang lugar, period!

Kontrobersiyal na post ni MMDA Celine Pialago, panira sa mataas na rating ni P-Digong

ni Pablo Hernandez III - @Prangkahan | October 20, 2020

KAKILA-KILABOT NA POST NI MMDA SPOKEPERSON CELINE PIALAGO—Kahit

nakatikim na ng batikos sa publiko ay pinanindigan pa rin ni MMDA spokesperson Celine Pialago ang post niyang, “Masyado ninyong ginagawang pang-drama-serye sa hapon ang paghihinagpis niya. Tigilan n’yo!” na patungkol sa detenidong aktibistang si Reina Mae Nasino na tumatangis at nagluluksa sa pagkamatay ng anak niyang 3-months old na si “Baby River”.

Sa totoo lang, kakila-kilabot ang post ni Pialago sa social media kasi may ugaling-demonyo lang ang may kakayahang mag-post na “drama-serye” lang ang paghihinagpis ng ina sa namatay niyang anak, period!

◘◘◘

SA DAMI NG ADMIN SA FB ACCOUNT NI PIALAGO, MISTULANG MERON NA

SIYANG KUMPANYA—Panandaliang nawala sa FB account ni Pialago ang kanyang post

tungkol sa drama-serye ng inang namatayan ng anak, pero ni-repost niya ito at sinabing

aksidenteng na-delete ng isa sa 70 administrators ng kanyang FB account.

Ganu’n? Sa FB account ni Pialago ay may 70 administrators, aba, ang bongga kasi mistulang may isa na siyang kumpanya na maraming pinasusuweldo, boom!

◘◘◘

RATING NI P-DUTERTE, BAKA BUMAGSAK DAHIL KAY PIALAGO—Sa dami nang

nagalit sa post ni Pialago, dapat sibakin na ito ni P-Duterte kasi malaking kasiraan ito sa kanyang gobyerno at baka makaapekto pa ito sa mataas na rating na iminarka sa kanya ng Pulse Asia.

Pero kung pananatilihin pa ito ni P-Duterte sa kanyang gobyerno, huwag siyang magsisi kung ang marka sa kanya ng Pulse Asia na 91% trust and approval ratings ay bumaba dahil sa pag-aalaga niya ng isang tulad ni Pialago na walang puso sa inang namatayan ng anak, period!

◘◘◘

WALA NA RAW “PORK BARREL” ANG MGA CONG. PERO MAY PANG-

PROJECTS—Ayon kay Speaker Lord Allan Velasco, sa kanyang liderato ay pantay-pantay ang pang-“projects” na ibibigay niya sa mga kongresista.

Hay naku, ang sabi ni Velasco, “pork barrel-free” ang ipinasa nilang 2021 National Budget, eh ‘yun pala ay may pinagparte-partehan din palang pang-projects ang mga cong. mula sa kaban ng bayan.

Kapag sinabing pang-projects ng mga cong., ‘yan na ang pork barrel at hindi na ‘yan lingid sa kaalaman ‘yan ng publiko, boom!

Netizens, galit na galit sa diskarte ng DENR na paglalagay ng ‘white sand’ sa Manila Bay...

tulad ng Boracay

ni Pablo Hernandez III - @Prangkahan | September 5, 2020

PILIPINAS AT TAUMBAYAN, MAKIKINABANG KAPAG NAGTAGUMPAY ANG DISKARTE NG DENR SA MANILA BAY—Noong panahon ni ex-Pres. Ferdinand Marcos, Sr., ang Manila Bay ay ginagawang paliguan dahil malinis pa ito, pero sa paglipas ng panahon ay nagmistula itong pusali sa dumi at sa naisin ng Duterte gov’t. na maibalik ang dating ganda at linis nito, dumiskarte ang Department of Environment and Natural Resources na lagyan ito ng white sand para magmistulang beach.

Imbes na papurihan ang DENR, binatikos pa ng mga kritiko, na sayang lang daw pera ng bayan na ginastos dito dahil kapag bumagyo raw ay mawawala rin ang white sand.

Tantanan na ang batikos kasi kapag nagtagumpay ito, tayo rin naman ang makikinabang d’yan at saka na lang bumatikos kapag ito ay pumalpak!

◘◘◘

PURO KONTRA SI HARRY ROQUE—Sa tuwing magbibigay ng suhestiyon si VP Leni Robredo sa Duterte gov’t. patungkol sa laban sa COVID-19, kinukontra agad ito ni Presidential spokesman Harry Roque.

Ang dapat gawin ni Roque, iparating kay P-Duterte ang mga suhestiyon ni VP Leni kasi baka makatulong ito at hindi ‘yung kontra agad siya.

Dapat isalpak ni Roque sa kanyang kukute na ang laban sa COVID-19 sa Pilipinas ay laban ng Duterte gov’t., laban ng OVP (Office of the Vice President) at laban ng sambayanang Pilipino, period!

◘◘◘

ISINUSULONG NA ‘OFW SOVEREIGN FUND’ NG KONGRESO, ‘PANGGAGATAS’ SA MGA OFWs?—Isinulong nina Abang Lingkod Partylist Rep. Joseph Paduano at TUCP Partylist Rep. Raymund Mendoza ang panukalang “OFW Sovereign Fund” na naglalayong mag-invest ang mga OFW ng bahagi ng kanilang remittance sa pamahalaan na gagamiting pang-“urgent national government projects.”

Kung para sa kapakanan ng mga OFWs ‘yan ay good, pero kung para sa kapakanan ng mga “buwaya” sa pamahalaan ay bad ‘yan kasi malinaw na panggagatas ‘yan sa mga Pinoy na nasa abroad, period!