Hirit ng OSG sa SC... Petisyon ni Bato vs. ICC, ibasura

ni Mylene Alfonso @News | May 18, 2026

Photo: Donald J. Trump - FB

Hiniling ng Office of the Solicitor General sa Korte Suprema na ibasura ang petisyon ni Senador Ronald “Bato” dela Rosa laban sa warrant of arrest na inisyu ng International Criminal Court.

Nauna rito, naghain si Dela Rosa ng urgent manifestation noong Mayo 11 na nagsasabing maaari nang magdesisyon ang korte sa isyu dahil nakumpirma na ang pagkakaroon ng ICC warrant.

Hindi naglabas ng temporary restraining order ang Korte Suprema at sa halip ay humingi ng komento sa mga ahensya ng gobyerno na sangkot sa pag-aresto kay dating Pangulong Rodrigo Duterte noong Marso 2025, kabilang ang Office of the Executive Secretary, Ombudsman, Department of the Interior and Local Government at Philippine

National Police.

Solicitor General Darlene Berberabe

Tinukoy ng warrant of arrest ng ICC si Dela Rosa bilang “co-perpetrator” sa kasong crimes against humanity laban kay Duterte kung saan libu-libong pagkamatay ang naitala sa war on drugs noong panahon ng kanyang pagkapangulo.

Ang OSG, na kumatawan sa mga opisyal ng gobyerno, ay nangatwiran na ang Republic Act 9851 ang Philippine Act on Crimes Against International Humanitarian Law, Genocide, and Other Crimes Against Humanity ay nagpapahintulot sa gobyerno na ipatupad ang warrant of arrest ng ICC nang hindi nangangailangan ng validation ng korte ng Pilipinas.

Inulit din ng solicitor general na ang kaso ni Dela Rosa ay hindi sakop ng extradition rules, na binanggit na ang isang ICC surrender kung saan ang estado na naghahatid ng isang tao sa korte ay naiiba sa extradition, na nasa pagitan ng estado.

Iginiit din ng OSG na ang parliamentary immunity na sinasabing nagbibigay-proteksyon kay Dela Rosa laban sa pag-aresto ay naaangkop lamang sa mga kasong may kaparusahang hindi hihigit sa anim na taong pagkakakulong.

Ang crimes against humanity sa ilalim ng Article 7 ng Rome Statute ay may kaparusahang habambuhay na pagkakabilanggo, habang ang Republic Act No. 9851 naman ay nagpapataw ng parusang mula reclusion temporal hanggang reclusion perpetua.

Hirit ng PAO at OSG sa SC.. Pagbasura sa kaso vs. 2 dentista na tumanggi sa HIV patient, repasuhin

ni Madel Moratillo | April 27, 2023

Hiniling ng Public Attorney’s Office at Office of the Solicitor General sa Korte Suprema na repasuhin ang pagkakabasura sa kasong kriminal laban sa 2 dentista na tumangging bigyan ng serbisyo ang isang HIV patient.

Una rito, pinagtibay ng Court of Appeals ang desisyon ng Taguig City regional trial court na nag-grant sa petition for demurrer to evidence na inihain nina Dr. Sarah Jane Mugar at Dr. Mylene Igrubay.

Ito ay kaugnay ng reklamong isinampa ni Henry Se dahil sa paglabag sa Republic Act 8504 o ang Acquired Immune Deficiency Syndrome (AIDS) Prevention and Control Act of 1998 laban sa dalawa.

Nakasaad sa petisyon na bumisita umano si Se sa Enhanced Dental Clinic sa Taguig City noong Pebrero 16, 2017 para magpakonsulta dahil sa masakit na ngipin.

Pero matapos niyang sabihin na sumasailalim siya sa medical treatment para sa HIV, pinayuhan umano siya ni Mugar na kumuha muna ng clearance mula sa kanyang doktor.

Matapos makakuha ng clearance ay nagpapa-schedule na sana umano siya para sa pagpapabunot ng ngipin subalit na-reject umano siya sa kadahilanang wala umanong UV type desterilization equipment ang nasabing clinic.

Ang sabi sa kanya, batay na rin umano ito sa instruction ng may-ari na si Igrubay.

Sa petisyon, sinabi ng OSG na ang provision and standard pagdating sa oral health care services ng mga pasyente ay dapat na patas anuman ang kondisyon nito.

Sa kanilang panig, iginiit naman ng PAO na dapat igiit dito ang RA 8504.

Giit ng PAO, kahit may batas sa anti-discrimination sa bansa, malibang kilalanin at ipatupad ito ng estado ay hindi matitigil ang diskriminasyon.

Ayon sa OSG, nagkaroon ng grave abuse of discretion ang CA nang sabihin nitong bigo ang prosekusyon na mapatunayang guilty beyond reasonable doubt ang dalawa.

Ayon kasi sa CA, ang pagtanggi ng EDC ay dahil sa kawalan ng kinakailangang desterilization equipment pero ayon sa OSG na-establish naman na ang nasabing klinika ay may first class materials, sterilized dental instruments, at disposable dental supplies'.

Ayon pa sa PAO, dapat ay ini-refer umano ang pasyente sa ibang klinika kung wala sila ng nasabing equipment.

OSG, pinagpapaliwanag ng COA sa P1.16M undocumented travel expenses

ni Lolet Abania | August 31, 2020

Pinagpapaliwanag ng Commission on Audit (COA) ang Office of the Solicitor General (OSG) na kasalukuyang pinamumunuan ni SolGen Jose Calida tungkol sa undocumented travel expenses na nagkakahalaga ng P1.16 million noong 2019.

Ayon sa state auditors, sa 2019 Annual Audit Report ng OSG, nakapaloob sa P1.16 million na gastos ang local at foreign travel kung saan maaaring unliquidated o hindi suportado ng kinakailangang mga dokumento – isang paglabag sa COA Circular No. 2012-001 at Presidential Decree (PD) No. 1445.

Nakasaad sa COA Circular 2012-001 na ang expenses para sa local travel ay dapat na justified o makatwiran, na mayroong certificate of appearance/attendance at certification mula sa head ng ahensiya, pati na ang absolute necessity o ganap na pangangailangan ng gastusin, kung saan umaayon dapat sa bills o resibo nito.

Gayundin, sa parehong COA circular, ang mga gastusin sa official travel na lumampas sa prescribed rate per day o nakatakdang rate kada araw ay hindi maaaring i-justify ng isang certification o affidavit of loss at hindi dapat ikonsidera bilang angkop na kapalit para sa kailangang hotel/lodging bills at receipts.

Para sa travel abroad, nakapaloob sa COA circular na kinakailangan ang mga sumusunod: certificate of appearance/attendance para sa partisipasyon sa training/seminar; at narrative report sa trip undertaken/report ng pakikilahok.

Dagdag pa rito, nakasaad sa PD 1445 ang claims para sa government funds ay dapat na suportado ng kumpletong dokumentasyon.

“Audit of the liquidation reports of the 17 officers and employees granted with cash advances for local and foreign travels in 2019 totaling P1,169,121.61 showed that liquidation reports were not properly documented in violation of the above COA Circular and PD 1445,” ayon sa state auditors.

“The following documents were not attached, such as: certification from the head of the agency authorizing the claims of actual hotel accommodation/lodging as the same is absolutely necessary in the discharge of its official function; certificate of participation/attendance, and training report," sabi pa ng COA.

Ayon pa sa COA, pumayag na ang OSG sa rekomendasyon ng state auditors, na iatas sa Chief Accountant na siguraduhing kumpleto ang supporting documents ng liquidation reports bago parehong ibigay sa Audit Team para sa final disposition ng audit.