Virology at Vaccine Institute, maitatatag na sa ‘Pinas

ni Bong Go @Bisyo Magserbisyo | September 26, 2025

Ngayong naipasa na ang Republic Act No. 12290, na ako mismo ang principal author at co-sponsor, pormal na nating itatatag ang Virology and Vaccine Institute of the Philippines (VIP) sa ilalim ng Department of Science and Technology. Sa madaling salita, meron na tayong sariling pambansang sentro para sa advanced virology at vaccine research.

Sabi ko nga, hindi tayo puwedeng laging umaasa sa ibang bansa pagdating sa bakuna at gamot. Kailangan nating palakasin ang ating sariling kakayahan para masiguro ang kalusugan ng bawat Pilipino. Ang totoo, kung may natutunan tayo sa COVID-19 pandemic, ito’y ang hirap ng umaasa lang sa imported na bakuna.

Kaya sobrang importante ng VIP. Dito magsasama-sama ang pinakamagagaling nating siyentipiko para mag-research tungkol sa mga virus — hindi lang sa tao kundi pati na sa hayop at halaman. Magkakaroon tayo ng high-level labs, virus gene bank, at sariling teknolohiya para sa diagnostics, vaccines, at therapeutics.

Ang ibig sabihin, kung may bagong banta ng sakit, mas mabilis tayong makakakilos at hindi na tayo kailangang umasa sa iba. Matagal nang panawagan ito ng ating mga eksperto. Ngayon, may batas na para rito. Ang hamon, masiguro na maipatupad ito nang maayos at may sapat na pondo.

Tuluy-tuloy ang ating laban para sa isang mas maayos at handang sistema ng kalusugan. Hindi ito simpleng proyekto — ito ang susi para hindi na tayo muling mabigla kapag may bagong banta sa ating kalusugan. 

Samantala, noong September 21, dumalo ako sa Pray for the Philippines gathering sa Davao City para ipagdasal ang kalusugan, kaligtasan at kalayaan ni dating Pangulong Rodrigo Duterte. Ipinagdasal din natin sa naturang prayer rally na maputol na ang systemic corruption ng gobyerno. Malinaw kong inihayag sa ating mga kababayan: hangga’t hindi natutumbok ang tunay na mga nasa likod ng korupsiyon sa bansa, tuluy-tuloy lang ang ganitong bulok na sistema. 

Noong nakaraang linggo, umabot ang aking Malasakit Team sa mga komunidad sa grassroots para tuluy-tuloy na magbigay ng kinakailangang tulong. Agad naming naabutan ng ayuda ang pitong biktima ng sunog sa Malitbog, Southern Leyte; 50 sa Caloocan City; 309 sa Bacolod City; at 99 sa Cebu City.

Nagbigay din kami ng karagdagang suporta sa mga biktima ng iba’t ibang uri ng kalamidad gaya ng bagyo at biglaang pagbaha. Tumulong kami sa 168 biktima sa Tarragona at 41 sa Banaybanay, Davao Oriental; 109 sa Plaridel, Misamis Occidental; at 19 sa New Corella, Davao del Norte.

Nagpaabot din kami ng dagdag na tulong sa 72 biktima ng sunog sa Cagayan de Oro City at 14 sa Davao City. Tumanggap din ang mga benepisyaryo ng pinansyal na tulong mula sa pambansang pamahalaan para muling maipatayo ang kanilang mga tahanan.

Noong nakaraang linggo rin, dinaluhan ng Malasakit Team ang ika-25 anibersaryo ng pagiging lungsod at ang Talakudong Festival sa Tacurong City, Sultan Kudarat, pati na rin ang ika-50 anibersaryo ng Institute of Integrated Electrical Engineers of the Philippines, Inc. (IIEE) kasama si National President Alberto Herrera sa Quezon City.

Tandaan natin, minsan lang tayo daraan sa mundong ito. Kung anumang kabutihan o

tulong na puwede nating gawin sa ating kapwa ay gawin na natin ngayon dahil hindi na tayo babalik sa mundong ito.

Bilang inyong Senator Kuya Bong Go, patuloy akong magseserbisyo sa inyong lahat habang kaya ng aking katawan at oras dahil bisyo ko na ang magserbisyo at ako ay naniniwala na ang serbisyo sa tao ay serbisyo ‘yan sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Ang krimen na direct assault

ni Atty. Persida Rueda-Acosta @Magtanong Kay Attorney | September 26, 2025

Dear Chief Acosta,

Ano ba ang krimen na direct assault? Saklaw ba nito ang isang guro na pinaslang ng kanyang 20 gulang na estudyante habang nagtuturo sa silid-aralan? Ang dahilan diumano ng pamamaslang ay ang mababang gradong ibinigay ng guro. Maraming salamat.

-- Robinhood

---

Dear Robinhood, 

Ang iyong katanungan ay binigyang kasagutan sa mga kaugnay na kaso ng Korte Suprema at ng probisyon ng Act No. 3815, na inamyendahan ng Republic Act (R.A.) No. 10951, o mas kilala sa tawag na “The Revised Penal Code,” espesipiko, ang Artikulo 148 ng nasabing batas na nagsasaad:

 “Art. 148. Direct assaults -- Any persons who, without a public uprising, shall employ force or intimidation for the attainment of any of the purposes enumerated in defining the crimes of rebellion and sedition, or shall attack, employ force, or seriously intimidate or resist any person in authority of any of his agents, while engaged in the performance of official duties, or on occasion of such performance, shall suffer xxx.” 

Kaugnay ng nabanggit na batas, ibinahagi ng Korte Suprema sa kasong People vs. Vidal (G.R. No. 229678, 20 June 2018) sa panulat ni Honorable Chief Justice Diosdado M. Peralta, ang mga rekisito ng nasabing krimen:

“[T]he elements of which are: 1) that there must be an attack, use of force, or serious intimidation or resistance upon a person in authority or his agent; 2) the assault was made when the said person was performing his duties or on the occasion of such performance; and 3) the accused knew that the victim is a person in authority or his agent, that is, that the accused must have the intention to offend, injure or assault the offended party as a person in authority or an agent of a person in authority.”

Hinggil sa nabanggit, ang Direct Assault ay isang krimen kung saan: (1) may naganap na pag-atake, paggamit ng dahas, seryosong pananakot, o matinding pagtutol laban sa isang taong may awtoridad o kanyang kinatawan; (2) ang nasabing pag-atake ay ginawa habang ginagampanan ng biktima ang kanyang tungkulin o may kaugnayan sa pagtupad nito; at (3) alam ng gumawa ng krimen na ang kanyang biktima ay isang taong may awtoridad o kinatawan nito, at may layunin siyang saktan o lapastanganin ito bilang ganoon.

Sa kasong People vs. Balbar (G.R. Nos. L-20216 and L-20217, 29 November 1967), sa panulat ni Honorable Chief Justice Querube C. Makalintal, nilinaw ng Kataas-taasang Hukuman na ang isang guro ay itinuturing na isang person in authority gamit ang probisyon patungkol sa krimen na Direct Assault:

“By express provision of law xxx, ‘teachers, professors, and persons charged with the supervision of public or duly recognized private schools, colleges and universities shall be deemed persons in authority, in applying the provisions of Article 148.’ This special classification is obviously intended to give teachers protection, dignity, and respect while in the performance of their official duties. xxx.” 

Bilang buod, kung mapatutunayan ang mga alegasyon na iyong naibahagi – maaaring mapunan ang mga rekisito upang managot sa krimeng Direct Assault ang 20 taong gulang na estudyante na pinaslang ang kanyang guro habang nagtuturo sa silid-aralan dahil sa mababang gradong ipinagkaloob sa kanya. Bukod pa rito, sapagkat ang pag-atake sa guro ay nagdulot sa pagkasawi, ang estudyante ay maaari ring managot sa krimeng complex crime na Direct Assault with Murder or Homicide alinsunod sa nabanggit na kasong People vs. Vidal: 

“When the assault results in the killing of an agent or of a person in authority for that matter, there arises the complex crime of Direct Assault with murder or homicide. Xxx When the offense is a complex crime, the penalty for which is that for the graver offense, to be imposed in the maximum period.” 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala. 

Onli in da ‘Pinas lang may sangkatutak na mga ‘buwayang’ opisyal ng gobyerno

ni Pablo Hernandez @Prangkahan | September 26, 2025

KUNG SI ESCUDERO PA RIN ANG SENATE PRESIDENT AT SI ROMUALDEZ PA RIN ANG HOUSE SPEAKER, MALAMANG TULOY PA RIN ANG ‘KURAKUTAN’ SA KABAN NG BAYAN -- Matapos ibulgar ni Dept. of Public Works and Highways (DPWH) former Usec. for Operations Roberto Bernardo na sangkot din si ex-Senate President, Sen. Chiz Escudero, ay ibinulgar din ng isang nagngangalang Orly Guteza, dating security aide ni Ako Bicol Partylist Rep. Zaldy Co, na ang ilang bahagi ng male-maletang pera na dinadala sa mga bahay ng partylist congressman, ay dinadala rin daw nila sa mga bahay ni ex-House Speaker, Leyte Rep. Martin Romualdez.

Buti na lang nabulgar ang flood control projects scam, at buti na lang parehong formers Senate President at House Speaker na lang ang dalawang lawmakers na ito, kasi kung si Sen. Escudero pa rin ang lider ng Senado at si Cong. Romualdez pa rin ang lider ng Kamara, naku po, baka patuloy silang ‘mangungurakot’ sa kaban ng bayan, mga pwe!

XXX

NABULGAR NA SANGKATUTAK NA SENADOR NA SANGKOT SA KATIWALIAN SA DPWH, PANG-GUINNESS WORLD RECORDS NA -- Si DPWH-Bulacan 1st Asst. District Engr. Brice Hernandez unang nagbulgar na may mga senador umano na sangkot sa flood control projects scam, pinangalanan niya sina Sen. Jinggoy Estrada at Sen. Joel Villanueva, sumunod na nagbulgar si DPWH-Bulacan 1st District Engr. Henry Alcantara, kinumpirma niyang sangkot sa katiwalian daw sina Sen. Jinggoy at Sen. Joel, at idinagdag si ex-Sen. Bong Revilla, at sa pagbubulgar naman ni DPWH Usec. Bernardo, isinama niya sa iba’t ibang uri pa rin ng katiwalian umano sa DPWH sina Sen. Escudero, former Senator at ngayo’y Makati City Mayor Nancy Binay.

Sa mga ‘pasabog’ na iyan nina Hernandez, Alcantara at Bernardo ay puwede nang itala ito sa Guinness World Records, na onli in da ‘Pinas lang may sangkatutak na mga “buwayang” senador, boom!

XXX

PARANG DAGA NA SI CONG. ZALDY CO NA NAGHAHANAP NG LUNGGANG PAGTATAGUAN -- Si Navotas City Rep. Toby Tiangco ang unang nagbulgar na may higit P13 billion "pork barrel" insertions si Cong. Zaldy Co sa 2025 national budget, pagkaraan niyan ay idinawit na ni Alcantara sa flood control projects scam ang partylist congressman na ito, kinumpirma naman ito ni Hernandez na nagsabi pang may pagkakataon umano na nagdeliber sila ng P1B kickback kay Cong. Zaldy Co at sa pasabog ni Bernardo ay sinabi niya na ang kongresistang ito ng Ako Bicol Partylist na dating chairperson ng House Committee on Appropriations ang may sangkatutak na “komisyon” (kickback) na natanggap mula sa pondo ng DPWH.

Hindi na talaga safe si Cong. Zaldy Co sa anomalyang ito kung kaya’t ayaw na niyang umuwi ng Pilipinas, torete na, palipat-lipat na ng mga bansang pinuntahan, mistula na siyang daga na naghahanap ng lunggang pagtataguan, period!

XXX

WITHDRAWAL SA BANGKO NG SUNUD-SUNOD NA DAAN-DAANG MILYONG PISO DAW NG ‘GHOST PROJECT’ NG CONTRACTOR NA SI SALLY SANTOS, NANGYARI NA RIN NOON SA BANGKO RIN PARA SA CONFI FUNDS NI VP SARA -- Dapat gumawa ng batas ang Kongreso na kapag may mga tauhan ng gov’t. officials at mga kontraktor na magwi-withdraw ng P50M pataas sa gov’t. bank na Land Bank of the Philippines (LBP) ay i-report agad ito sa Anti-Money Laundering Council, Ombudsman, Commission on Audit (COA) at Dept. of Budget and Management (DBM) para sundan at kuwestiyunin agad ang mga gov’t. officials kung saan nila gagamitin ang winidraw at sa kontraktor kung tapos na ang nakuha nitong proyekto sa DPWH.

Ang nabulgar kasi sa imbestigasyon ng Senate Blue Ribbon Committee na nagawa ng DPWH na “ghost project” ng contractor na si Sally Santos na nakapag-withdraw ng higit tig-P200M sa dalawang pagkakataon, na ang total ay higit P400M, ay may pangyayari na rin na ganyan noon, na sa imbestigasyon dati sa House Quad Committee ay ang mga tauhan ni Vice Pres. Sara Duterte-Carpio ay nakapag-withdraw din tig-P125M sa apat na pagkakataon na ang total ay P500M, na ang halagang ito ay para sa confidential fund ng bise presidente.

Sa totoo lang, hindi kasi katanggap-tanggap sa mamamayan na mistulang hinuholdap ng mga gov’t. official at mga kontraktor ang kaban ng bayan na nakaimbak sa gov’t. bank na LBP, tsk!