Sindikato ng oil pilferage at oil smuggling sa Cavite, Batangas at Quezon, dapat lansagin

ni Pablo Hernandez @Prangkahan | October 1, 2025

INABANGANG ‘PASABOG’ NI SEN. ESCUDERO, WALANG NABULAGA -- Inabangan ng publiko ang sinabi ni Sen. Chiz Escudero na mayroon daw siyang "pasabog" sa gagawin niyang privilege speech.

Ito na ang siste, nang mag-privilege speech na si Sen. Chiz, wala namang nabulaga sa kanyang pasabog dahil nga ang sinabi niyang si Leyte Rep. Martin Romualdez ang nasa likod ng impeachment kay Vice Pres. Sara Duterte-Carpio ay matagal nang alam iyan ng publiko, nang aprubahan ng Kamara noong Feb. 5, 2025 ang mga articles of impeachment laban sa bise presidente ay alam na ng mamamayan na ang dating House Speaker ang pasimuno nito.

Maging ang sinabi ni Escudero patungkol sa kickback nina Cong. Romualdez at resigned Ako Bicol Partylist Rep. Zaldy Co ay alam na rin ng publiko, dahil nga sinabi na rin ito ng mag-asawang Curlee at Sarah Discaya, at ni ret. Sgt. Orly Guteza sa hearing ng Senate Blue Ribbon Committee.

Dahil mga lumang isyu na ang "pinasabog" ni Sen. Chiz, nabuwisit na naman sa kanya ang netizens, pinutakti siya ng pamba-bash sa social media, boom!

XXX

DAHIL SA CLOSED-DOOR HEARING, PINAGDUDUDAHAN NA NGAYON ANG IMBESTIGASYON NG ICI SA MGA SANGKOT SA FLOOD CONTROL PROJECTS SCAM -- Pinagdududahan ngayon ng publiko ang isinasagawang imbestigasyon ng Independent Commission for Infrastructure (ICI) sa mga sangkot sa flood control projects scam dahil sa desisyon ng komisyon na gawing closed-door ang kanilang hearing.

Dapat atasan ni Pres. Bongbong Marcos (PBBM) ang ICI na isapubliko ang hearing para makita ng publiko kung sino ang mga guilty at hindi guilty sa mga isinasangkot sa flood control projects scam, period!

XXX

MAY MGA ‘GHOST’ FLOOD CONTROL PROJECT NA, MAY MGA ‘GHOST’ FARM-TO-MARKET ROAD PROJECTS PA! -- Ibinulgar ni Sec. Francisco Tiu Laurel ng Dept. of Agriculture (DA) na may nadiskubre raw siyang mga "ghost" farm-to-market road projects worth P75 million sa Mindanao.

Grabe na talaga ang kurakutan sa Pilipinas, mantakin n’yo, may "ghost" flood control projects na, may "ghost" farm-to-market road projects pa, tsk!

XXX

SINDIKATO NG OIL PILFERAGE AT OIL SMUGGLING SA CAVITE, BATANGAS AT QUEZON, DAPAT LANSAGIN NINA PNP-REGION 4-A GEN. KENNETH LUCAS AT CUSTOMS COMM. ARIEL NEPOMUCENO -- Nadagdagan ang bilang ng mga sindikato ng "paihi" o oil pilferage at oil smuggling sa Cavite, Batangas at Quezon.

Dati ay sina alyas "Dondon Alahas," "Violago," "Amang" at "Aldo" lang ang may ganitong sindikato, ngayon ay nadagdag pa na sina alyas "JP Cruz," "Madick" at "Rico."

Dapat magsanib-puwersa sina PNP-Region 4-A Director, Brig. Gen. Kenneth Lucas at Customs Commissioner Ariel Nepomuceno na lansagin ang mga sindikatong ito dahil ang raket ng mga ilegalistang ito ay malinaw na economic sabotage, period!

Ga-graduate sa 4Ps, tiyak na magkakabahay

ni Leonida Sison @Boses | October 1, 2025

Matagal nang nakikipaglaban ang ating lipunan sa kahirapan, kaya malaking hakbang ang anumang programa ng gobyerno na hindi lang nagbibigay ng pansamantalang tulong kundi nagtatatag din ng pangmatagalang pundasyon para sa mga pamilyang Pinoy. 

Sa mga mahihirap na kababayan, hindi nagiging sapat na puro ayuda at cash grants ang ipinamamahagi, kailangan din ng maayos na tahanan na magsisilbing matibay na sandigan ng bawat pamilya. 

Kaya naman pinagtibay ng Department of Human Settlements and Urban Development (DHSUD) at ng Department of Social Welfare and Development (DSWD) ang isang kasunduan na mag-uugnay sa Pantawid Pamilyang Pilipino Program (4Ps) at sa Expanded Pambansang Pabahay para sa Pilipino (4PH) Program. Sa pamamagitan ng Joint Memorandum Circular (JMC) na nilagdaan ng dalawang kagawaran, tiniyak ng mga ito na ang mga pamilyang graduating o magtatapos na mula sa 4Ps ay magkakaroon ng housing assistance o pabahay. 

Ang Abuab Towers, na nasa San Mateo Rizal, ay isa sa flagship projects ng Expanded 4PH. Ito ay binubuo ng 17 gusali na may kabuuang 4,330 housing units sa loob ng 4.6-ektaryang lupain. Dito rin isinagawa ang seremonyal na turnover ng mga unit sa piling pamilya, patunay na ang programa ito ay hindi lamang pangako kundi aktuwal na tulong sa mga benepisyaryo. 

Ayon kay DHSUD Secretary Jose Ramon Aliling, ang inisyatibong ito ay nagpapatibay ng pagkakaisa o ugnayan ng gobyerno na nagbibigay ng mas ligtas, matatag, at marangal na tahanan. 

Binigyang-diin niya na ito ay alinsunod sa utos ng Pangulo na tiyaking lahat ng tulong ay makararating sa higit na nangangailangan. 

Sinabi naman ni DSWD Secretary Rex Gatchalian na ang pangmatagalang epekto ng kolaborasyon ay ang integrasyon umano ng 4Ps at 4PH na magbibigay ng mas malaking benepisyo sa mga pinakamahihirap na pamilya, dahil ang pabahay ay nagsisilbing karugtong ng cash transfers at livelihood programs na nakatutulong sa kanila para sa mas matatag na kinabukasan. 

Masasabi natin na isa itong konkretong halimbawa ng whole-of-government approach na mainam na isinusulong na rin ng gobyerno upang palakasin ang suporta ng bawat ahensya at lokal na pamahalaan. 

Kung tutuusin sa mas malalim na pag-unawa, ang hakbang na ito ay hindi simpleng pagpapatayo ng bahay, kundi ito ay pagtulong sa mga mahihirap na kababayan na magkaroon ng sariling kuwento ng tagumpay. 

Kung ang bawat pamilya ay may maayos na tirahan, mas nagiging posible ang masiglang kabuhayan, maayos na kalusugan, at mas ligtas na pamumuhay. Ito ang magiging batayan ng isang bagong Pilipinas -- isang lipunang hindi lamang nakakaraos, kundi may kakayahang umasenso sa buhay.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Gising na ang marami, may pag-asa na

ni Fr. Robert Reyes @Kapaayapaan / Patakbo-takbo | September 30, 2025

Hinintay ng marami si “Opong’, ang bagyong galing sa katimugan ng Bicol Region. Bago dumating ang bagyo ay tinawagan natin ang binuo naming Parish Quick Response Team o PQRT 1 (bubuuin pa naming ang PQRT 2). 

Ang karaniwang tanong ng maski na sino at kahit saan, “Babaha kaya?” 

Nakita nating muli ang epekto ng mga pekeng flood control projects. Merong mga flood control project na mahina at halos wala talaga. May nai-report na “accomplished” o tapos nang flood control project ngunit wala maski na anong tanda na merong sinimulan at nagpapatuloy na ginagawa. Kapag ganito, matakot na ang mga residente ng lugar dahil kapag dumating ang baha, totoong manganganib ang buhay ng mga naroroon.

Dahil meron nang balita tungkol sa bagyo, mababaw ang tulog natin. Gising na tayo bandang alas-3:00 ng madaling-araw. Anumang higa walang tulog na dumarating, kaya’t umupo na lang tayo at nagsimulang magsulat. Tuloy, isang tula ang ating nalikha:

LAHING DAKILA

Kaluluwang lahing dakila

Kayumangging marungis

Nagpupunyagi, nagwawagi

Tubig-baha sako’t abo 

Kayumanggi, lahing ‘di paaapi

Lilinis, dumi ng marami.

Lingkod-bayan, eletistang poo’y salapi. 

Pulitika, gobyerno ‘di mawari

Pondong laan, dinastiya’t kontratista kinawatan

Kapal mukha, luho’t layaw.

Ayuno’t dasal, ating lakas.

‘Sang kahig ‘sang tuka, lalabas.

 Mamamayang aba, Diyos ang bahala.

Nag-aalala ang marami sa pagdating ng bagyo. Naghihintay at handang magsama-sama at magtulungan ngunit awa ng Diyos tuluyan nang humupa hanggang mawala ang bagyo. 

Ganap na alas-5 ng hapon, natuloy ang misang bayan na planong ipagdiwang ng Conference of Major Religious Superiors of the Philippines sa kumbento ng Good Shepherd Sisters sa Aurora Boulevard. 

Hindi lang karaniwang pari ang nagdiwang kundi ang dating chair ng CMRSP na ngayo’y obispo na ng Cubao, si Obispo Elias Ayuban. Nang marinig nito ang planong mag-alay ng misa ang CMRSP, siya na mismo ang nagprisintang magmisa. Laking tuwa ng board ng CMRSP, gayundin naming mga pari ng Diyosesis ng Cubao kaya’t dalawa sa amin ang dumalo bagama’t hindi kami relihiyoso. Dumalo si Padre Guido, kura ng St. Joseph Shrine. Dumalo rin tayo bilang Priest Minister ng Justice Peace and Integrity of Creation-Urban Poor.

Punung-puno ang kapilya, maraming mga “scholastics,” seminarista at mga madre, sampu ng mga paring galing sa iba’t ibang kongregasyon ang dumalo. 

Nagnilay si Bishop Ely sa mga nangyayari sa kasalukuyan. Binanggit din niya ang kanyang karanasan noong nakaraang linggo sa People Power Monument. Binalikan niya ang kanyang pakikilahok sa EDSA I, 39 na taon nang lumipas. 

Matagal-tagal ding ‘nakatulog’ ang marami ngunit ayon kay Obispo Ely, “Ngayong gising na ang marami, mahirap nang muling matulog at manahimik ang mga ito.” 

Salamat sa isang banda sa iskandalo ng perang winaldas at pinaghati-hatian ng mga kontratista, kawani ng DPWH at mga pulitiko. Nagalit, namuhi, nandiri at nagising ang marami. Naging malinaw ang matinding korupsiyon na pinalalampas dahil sa halagang binubulsa. Kung libo, daang libo, milyon at ilang milyon lang ang ninanakaw, ibang usapan na ang bilyon at trilyong binubulsa ng mga walang karapatan, walang konsensya’t kahihiyan.

Nang matapos ang misa naghanay-hanay ang lahat sa labas ng kapilya. Iniladlad ang dalawang streamer at pinahawak sa mga madre, pari at laikong naroroon. Marahang naglakad ang lahat palabas sa Aurora Boulevard. Isang mahabang pila ng mga pari, madre, seminarista at relihiyosong kasapi ng iba’t ibang kongregasyon ang makikita sa harapan ng gate ng Good Shepherd Sisters. Nagdasal kami ng rosaryo. Paminsan-minsan merong bumubusina hanggang sa madagdagan ng ilan pang nakikiisa sa mga raliyistang taga-simbahan.

Malutong na sigaw, “Eeee — kulong…. mga kurakot! Eee -- kulong mga kurakot!” Nakatutuwang makita ang mga madreng naka-belo, mga paring naka-sutana’t mga seminarista at ibang relihiyoso na sumisigaw at nanghihikayat sa lahat na bumisina at makiisa sa aming pithaya. Sigaw na sigaw ang lahat. Napapalingon na lang ang mga pasahero sa mga dyip, motorsiklo at bus. Ilang madre ang sumenyas na paingayin ang mga busina.

Gumigising o gising na? Umaasa o may pag-asa na? Gising na… may pag-asa na!