Walang koneksiyon si Philip Laude, ngunit namarkahan sa scam ng partylist!

ni Pablo Hernandez @Prangkahan | January 4, 2026

SEN. ESCUDERO, TILA MAMALASIN NGAYONG YEAR 2026 KASI BUKOD SA HINDI PA PALA SIYA LUSOT SA PAGLABAG SA OMNIBUS ELECTION CODE, POSIBLE PA SIYANG MAKASUHAN SA PAGKAKASANGKOT SA FLOOD CONTROL SCANDAL – Pinag-usapan ng Supreme Court (SC) ang Comelec kaugnay ng hirit ni high school teacher Barry Tayam na baligtarin ang desisyon ng komisyon na nag-absuwelto kay Senador at dating Senate President Chiz Escudero sa kasong paglabag sa Omnibus Election Code. Ito ay may kinalaman sa pagtanggap ng senador ng campaign funds mula sa kontraktor na si Lawrence Lubiano.

Tila mamalasin si Senador Escudero ngayong 2026. Kung hindi magustuhan ng Korte Suprema ang paliwanag o rason ng Comelec at binaligtad nito ang desisyon ng komisyon, awtomatikong matatanggal siya sa pagiging senador at maaari ring makulong ng hanggang anim na taon dahil sa paglabag sa Omnibus Election Code. Bukod dito, posibleng isampa ng Ombudsman ang mga kasong malversation of public funds, bribery, at graft na may kinalaman sa umano’y scam sa flood control projects na kinasangkutan niya. Boom!

XXX

GABRIELA PARTYLIST GUMAGAWA NG AKSYON PARA MAKATULONG SA KABABAIHAN, PERO IBANG PARTYLIST BUSY DAW MANG-SCAM SA KABAN NG BAYAN – Ang kumakatawan sa sektor ng mga kababaihan sa Kamara ay si Gabriela Partylist Rep. Sarah Elago. Dahil maraming nanay ang nahihirapang pagkasyahin ang budget sa mga gastusin sa bahay, nagpasya si Cong. Elago na magsulong ng resolusyon na tanggalin ang 12% VAT sa presyo ng mga bilihin at bayarin.

Iyan ang tunay na marginalized sector na partylist—gumagawa ng aksyon para makatulong sa kinakatawan nilang sektor ng lipunan. Hindi tulad ng ilang representante ng mga partylist tulad ng Ako Bicol, ACT-CIS, CWS, at Uswag Ilonggo na ang ginagawa ay mang-scam sa kaban ng bayan. Period!

XXX

PATI PROMINENTENG NEGOSYANTE NA SI PHILIP LAUDE NA WALANG KINALAMAN SA FLOOD CONTROL, DAMAY KASI NADIKIT SIYA KAY ACT-CIS PARTYLIST REP. EDVIC YAP NA INIIMBESTIGAHAN SA FLOOD CONTROL SCAM – Hindi lang mga pulitiko, Department of Public Works and Highways (DPWH), at mga government contractors ang nasasabit ngayon sa flood control scandal, kundi pati ang prominenteng negosyante na si candy tycoon Philip Laude.

Hindi naman sangkot si Laude sa flood control projects at wala talaga siyang kinalaman dito—matinong negosyante siya at kanyang pamilya. Nasabit lamang siya nang matuklasan ng Anti-Money Laundering Council (AMLC) na ka-joint account niya sa bangko si ACT-CIS Partylist Rep. Edvic Yap, na nasasangkot sa flood control scam sa bansa.

Bagamat naipaliwanag na ng kampo ni Laude na matagal nang sarado ang joint account nila ni Cong. Edvic Yap dahil hindi natuloy ang planong pagsosyohang negosyo, nabahiran na rin ang kanyang pangalan dahil sa pagkakadikit niya sa partylist congressman na iniimbestigahan ng pamahalaan sa isyung flood control scam. Tsk!

XXX

MAY PAGKA-HUNYANGONG-ASAL NI GADON KASI NOON, PANAY PURI NIYA KAY FPRRD PERO NGAYONG MAY PUWESTO SIYA SA MARCOS ADMIN, PANAY NA ATAKE NIYA SA EX-PRESIDENT – Tinirya ni Presidential Adviser for Poverty Alleviation Sec. Larry Gadon si former Pres. Rodrigo Roa Duterte (FPRRD) sa isyu ng pagkabaon ng ‘Pinas sa utang. Ayon kay Gadon, sa nakalipas na 15 taon, kapag pinagsama-sama ang mga naging presidente, nasa P7 trillion ang kabuuang utang ng bansa. Ngunit sa anim na taong panunungkulan ni FPRRD, aniya, P7 trillion na lamang ang utang ng bansa sa mga financial institution sa buong mundo.

May pagka-hunyango rin pala si Gadon: noong panahon ng Duterte administration, panay papuri niya kay Pres. Duterte. Ngunit nang wala na ito sa poder at nabigyan siya ng puwesto ni Pangulong Ferdinand ‘Bongbong’ Marcos Jr. (PBBM), at dahil nagkaroon ng banggaan ang Duterte at Marcos, bigla siyang naging kritiko ng dating presidente. Boom!

Mga nabiktima ng paputok, puwede na makakuha ng PWD ID

ni Leonida Sison @Boses | January 4, 2026

Nararapat lamang na pagtuunan ng pansin ang mga biktima ng firecracker-related injuries, lalo na ang mga nagkaroon ng pangmatagalang kapansanan. Sa gitna ng selebrasyon, madalas nakakaligtaan ang mga taong habambuhay na nagdadala ng marka ng isang iglap na kapabayaan.

Mahalagang paalala ang pahayag ng Department of Social Welfare and Development (DSWD) na ang mga biktimang may permanenteng pinsala ay maaaring makinabang sa disability benefits, depende sa masusing medical evaluation.

Ayon sa DSWD, ang Department of Health (DOH) ang naglalabas ng certificate of disability matapos ang medikal na assessment. Dito tinutukoy kung ang kapansanan ay permanente o pansamantala, lantad o hindi agad nakikita. Kapag may sertipikasyon, maaari nang mag-apply ng Persons with Disability (PWD) ID, na magsisilbing susi para sa mga benepisyong itinakda ng batas. Hindi ito simpleng ID, kundi pagkilala ng estado

sa karapatan at pangangailangan ng mamamayan.

Upang makakuha ng PWD ID, kailangang lumapit ang pasyente sa lokal na Persons with Disabilities Affairs Office (PDAO) matapos makuha ang DOH certificate. Alinsunod sa Magna Carta for Disabled Persons, lahat ng lokal na pamahalaan ay may PDAO na nakikipag-ugnayan sa National Council on Disability Affairs (NCDA).

Ayon sa isang PDAO head officer, walang pinipiling pinagmulan ng pinsala. Kahit saan pa nanggaling ang injury, maaaring i-avail ang benepisyo basta’t may sapat na patunay ng kapansanan. Sa mga kasong hindi makaharap ang pasyente o kulang ang dokumento, handang magsagawa ng personal o remote assessment ang PDAO upang mapabilis ang proseso.

Ipinapakita nito na may puwang ang malasakit at pag-unawa sa sistema, lalo na para sa mga nasa alanganing kalagayan. Sa kabila nito, napag-alaman na wala pang naitalang aplikasyon ng PWD ID mula sa firecracker-related injuries (FWRI) victims sa ilang lugar nitong mga nakaraang taon.

Samantala, ibinahagi ng DOH na maaaring lumampas sa 500 ang kabuuang FWRI cases sa pagtatapos ng monitoring period, habang nasa 235 na ang naitala pagsapit ng Enero 1. Mas kaunti man ang bilang, mas malubha naman ang mga pinsala ngayong season.

Para sa DSWD, ang pagiging PWD ay hindi katumbas ng kawalan ng kakayahan. Ang mga may kapansanan ay patuloy na nakakapagtrabaho, nakakapag-aral, at nakakapag-ambag sa lipunan. Ang tunay na diwa ng suporta ay hindi awa kundi pagkilala sa dignidad. Nararapat na ang tulong ay mabilis, malinaw, at makatao, sapagkat ang kapansanan ay hindi katapusan, kundi panibagong yugto na dapat samahan ng malasakit ng komunidad at gobyerno.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Sagot sa pulitikang pangakong napako: Walang sawang pagmumulat sa lahat lalo na sa kabataan

ni Fr. Robert Reyes @Kapaayapaan / Patakbo-takbo | January 3, 2026

Tuwing magbabagong taon, nasanay na tayong gumawa ng mga pangako na tinatawag nating “New Year’s wishes.” Madalas din nating marinig ang kasabihang: “Ang gaganda ng mga pangako, pero halos lahat ay napako.” Napakadaling mangako. Ginagawa ito ng lahat—mula bata hanggang matanda. Ngunit iilan lamang ang tunay na tumutupad. Bakit nga ba ganito ang marami sa atin?

Alam din ng lahat ang naging pangako ng Pangulo: may makakasuhan at makukulong bago mag-Pasko—hindi raw sila magkakaroon ng “merry, merry Christmas.” Mayroon ngang nakulong, ngunit hindi ang malalaking isda, hindi ang mga “big fish,” ika nga.

Puro mga dulong (Laguna Lake) at sinarapan (Danao Lake, Albay). Lumabas na ang mga pangalan ng mga senador at kongresistang sangkot sa mga “ghost flood control projects.” Kilala na natin sila, ngunit walang nangyari. Dumaan ang Pasko, papalapit na ang Bagong Taon, at malaya pa rin silang gumagalaw hanggang ngayon.

Sagot ng Palace Press Officer na si Claire Castro sa mga batikos: “Konting pasensiya pa po. Nagtatrabaho po kami at may unti-unti nang nangyayari. Naire-refer na po ang mga kaso sa Office of the Ombudsman.” Opo, magpapasensiya po tayo—sanay na sanay na naman ang mga mamamayan sa ganyan. At iyan nga po ang problema. Sobra-sobra ang pasensiya ng karamihan, kaya lalong tumitibay ang loob ng mga tiwali.

Sa darating na ika-25 ng Pebrero 2026, ipagdiriwang natin ang ika-40 anibersaryo ng EDSA People Power Revolution. Isang napakalaki at napakahalagang pagdiriwang ito—at nararapat lamang. Ngunit nakalulungkot balikan ang mga nangyari sa ilalim ng pitong administrasyon mula kina Cory Aquino, Fidel Ramos, Joseph Estrada, Gloria Macapagal-Arroyo, Noynoy Aquino, Rody Duterte, hanggang kay Bongbong Marcos.

Lahat ay nangako. Marami sa mga pangakong ito ang napako. At mas nakalulungkot, nasanay na ang marami na makinig sa mga pangako—at tuluyan na ring nasanay na tanggapin ang kabiguang dulot ng mga ito.

Oo, nasanay na tayo sa mga pangakong napako ng mga pulitiko at makapangyarihang opisyal ng ating bansa. Nasanay na tayo sa mga salitang walang dangal na nagmumula sa mga pagkataong wala ring dangal.

Ngunit panahon na upang labanan ang maling kasanayan at maling ugaling ito. Hindi dapat masanay at hindi dapat tanggapin ang mga pangakong napako ng mga pulitiko. Hindi dapat tanggapin ang pulitikang walang dangal, walang prinsipyo, at walang katiwa-tiwala. Lumalaban na ang marami, lalo na ang kabataan. Sa tingin ng marami, hindi na lalamig at hindi na huhupa ang galit—sapagkat ayaw nilang makita ang sarili nilang lulubog sa burak ng pangakong napako, ng salitang walang dangal, ng pagkataong walang lalim, walang kabuluhan, at walang laman.

Ano ang kabaligtaran ng pangakong napako? Buhay na marangal. Hindi na kailangang magsalita at mangako. Ang buhay na marangal ay hindi nasusukat sa salita kundi sa gawa at sa halimbawang nakikita.

Tapos na ang Pasko. Lumipas na rin ang huling araw ng taon at ang bisperas ng Bagong Taon. Nasaan na ang mga ipinangako nila? Sa panahong ito, mahirap at maselan nang mangako. Galit at gising na ang marami, lalo na ang kabataan. Mulat na ang sambayanan sa sukdulang kabulukan ng sistema ng pamamahala. Oo, maraming bulok na opisyal—ngunit kailangan nila ng sistemang susuporta at magtatanggol sa kanilang kabulukan. Kaya pala madaling magpayaman ang mga pulitiko. Kakampi nila ang sistemang nagdadala sa kanila sa rurok ng kayamanan, na siyang sukatan ng kanilang tagumpay. Pumasok sila sa pulitika hindi upang maglingkod, kundi upang magnakaw at magpayaman.

Kaya pala galit na ang marami. Sawa na. Ubos na ang pasensiya. Hindi na katanggap-tanggap ang mga pekeng pangako na karugtong ng pekeng paglilingkod. Hindi na kahanga-hanga ang kayamanan ng mga naglilingkod dahil malinaw na hindi nila ito kinita—kundi ninakaw. Huwag ninyong maliitin at bale-walain ang galit ng sambayanan. Hindi na ito bunga ng pang-uudyok ng mga sanay manlinlang. Mahirap linlangin ang mulat. Hindi na maaaring patulugin ang gising.

Apatnaput taon na ang EDSA People Power Revolution (Pebrero 1986–2026). Hindi maaaring nanghina o tuluyang namatay ang diwa ng EDSA. Sa halip, ito ay nahinog—at makikita natin ang bunga ng paglago at pagkahinog ng diwa at espiritung pilit nilang pinapatay. Hindi lamang Bagong Taon ang 2026; ito ang Taon ng Pag-asa at ng

Mapayapang Pag-aalsa. Dadami pa ang mulat, ang galit, at ang sawang maniwala at magtiwala sa mga sanay mangako o mahilig mamudmod ng regalo, manuhol, at magbahagi ng ayuda.

Hindi na ninyo kayang bilhin at lokohin ang sambayanang nakita at naramdaman ang matinding paghihirap ni Inang Bayan.