Registration ng Duterte Youth Partylist, kinansela ng Comelec

ni Madel Moratillo @News | May 13, 2025

Photo File: Duterte Youth at George Garcia - FB / Comelec

Kinansela ng 2nd Division ng Commission on Elections (Comelec) ang registration ng Duterte Youth Partylist.

Sa 25 pahinang desisyon, pinagbigyan nito ang petisyon noon pang 2019 na naglalayong mapawalang bisa ang registration ng Duterte Youth.

Ito ay matapos umanong 'di makasunod ang grupo sa jurisdictional requirements patungkol sa publication at hearing kaugnay ng partylist registration.

“Duterte Youth cannot merely hide under the convenient excuse that the Commission had not required it to publish its Petition for registration or that the Commission has not set a hearing, as it reflects poorly on the party's commitment to transparency and accountability,” bahagi ng nakasaad sa resolusyon ng Comelec.

Isa rin sa pinagbatayan ng kanselasyon ang pagkakaroon nito ng overage nominee noong 2019. 2-1 ang resulta ng botohan sa dibisyon.

Sabi naman ni Comelec Chairman George Garcia, hindi pa pinal ang desisyon na ito at puwede pang iapela sa Commission en banc.

Kapatid ang nagdala sa Hague... Sara kay Imee: Du30, ibalik mo sa 'Pinas

ni BRT @News | June 13, 2025

File Photo: VP Sara at Sen. Imee Marcos - OVP, FB

Umaasa si Vice President Sara Duterte na si Senator Imee Marcos ang magbabalik kay dating Pangulong Rodrigo Duterte, na nakakulong ngayon sa The Hague, Netherlands, sa Pilipinas.

Ayon sa Bise, ito ang rason kung bakit niya laging iniimbita ang Senadora, tulad kahapon kung saan sila'y nakiisa sa pagdiriwang ng ika-127 anibersaryo ng Araw ng Kalayaan ng Pilipinas, sa Kuala Lumpur, Malaysia.

“Siyempre inimbita ko si Senator Imee Marcos kung saan man ako pumupunta, dinadala ko siya kasi sinasabi ko sa kanya na hindi ako ang magbabalik kay dating Pangulong Duterte sa Pilipinas. Dahil ang kapatıd mo ang nagpadala sa kanya sa Hague, ikaw ang magbabalik sa kanya sa Pilipinas,” ani Duterte.

“Kaya dala-dala ko ‘yan siya kahit saan. Para siyang naka-hostage. Bibitawan ko lang ‘yan siya kapag si dating Pangulong Duterte nabalik na sa Davao City,” dagdag pa ng Bise.

P200 sa Kamara, P100 sa Senado... Labor groups: Dagdag-sahod, budol

ni Mylene Alfonso @News | June 13, 2025

File Photo: Reuters

Nagsagawa kahapon ng noise barrage ang labor groups sa Boy Scout Circle sa Quezon City kasunod ng adjournment ng 19th Congress nang hindi niratipikahan ang panukalang batas na magtataas ng minimum wage ng mga manggagawa.

Bagama't iminungkahi ng Senado ang P100 na dagdag-sahod isang buwan bago ipasa ng Kamara ang P200 na bersyon nito, nabigo ang dalawang kapulungan na magkaroon ng consensus sa huling sesyon ng Kongreso.

Ayon kay Josua Mata, NAGKAISA Labor Coalition convenor, isinabay nila ang protesta sa Araw ng Kalayaan dahil hindi natamo ng mga manggagawa ang tunay na kalayaan habang tinitiis ang sahod sa kahirapan at mapagsamantalang kondisyon.

“Kami po ay galit na galit sa ginawa ng Kongreso doon sa wage increase bill. Pinaasa nila ang mga manggagawa mahigit dalawang taon. Dapat ay nagse-celebrate tayo ng ating kalayaan subalit 'yung ginawa ng Kongreso at ng Malacañang sa amin kahapon ay pagpapaalala lamang sa ating manggagawa na hindi pa tapos ang ating laban para sa ganap na kalayaan,” pahayag ni Mata.

Tinawag din ng koalisyon ang kabiguan na maipasa ang wage hike bill na "isang napakalaking pagtataksil" sa mga manggagawa, na sinasabing inilantad nito ang katapatan ng mga mambabatas sa mga kapitalista.

“Congress could have corrected a historic problem created ng mga regional wage board natin for 3 decades. Ano 'yung problema na 'yun? Lahat ng mga minimum wage earners sa buong Pilipinas ay below poverty threshold,” punto ni Mata.

“If they had granted as P200, almost all regional wage levels will be lifted above the poverty threshold, which means at least four million na mga manggagawa o minimum wage earners ay maiaangat natin sa kahirapan. Subalit hindi po 'yan ginawa,” saad pa nito.

“Para sa amin 'yan ay fear mongering. Posible pa magkaroon ng dagdag- trabaho dahil once you give money sa mga manggagawa, more workers with more money means mas marami sa kanila ang magpa-participate sa ating economy, and therefore, it can drive the economy further,” hirit ni Mata.

Dagdag ng koalisyon na sa pagtatapos ng 19th Congress ay hindi sila titigil sa kanilang kampanya para sa patas na sahod at katarungan sa ekonomiya.