Wembanyama no. 1 overall ng Spurs sa 2023 NBA Draft

ni Anthony E. Servinio @Sports | June 24, 2023

Hindi binigo ng San Antonio Spurs ang kanilang mga tagahanga at agad pinili si sentro Victor Wembanyama na numero uno sa 2023 NBA Draft kahapon sa Barclays Center. Nagrehistro ng sorpresa ang Charlotte Hornets sa pagkuha kay forward Brandon Miller na pangalawa kaya agad napunta sa Portland Trail Blazers si point guard Scoot Henderson.

Walang duda ang kalidad ng 7’4” at 19 anyos na si Wembanyama na naglaro para sa Metropolitans 92 sa French League. Ngayon pa lang ay inihahambing na siya sa mga alamat na higante ng NBA bunga ng taglay niyang kilos at liksi na bihira sa mga matatangkad.

Hinihintay tawagin ang pangalan ni Henderson subalit iba ang ibinigkas ni Commissioner Adam Silver. Ilang oras bago ang seremonya ay hati pa rin ang mga dalubhasa kung sino sa dalawa ang mauunang kunin matapos kay Wembanyama.

Sabay nagdiwang sina Amen Thompson at Ausar Thompson nang magkasunod silang kinuha ng Houston Rockets at Detroit Pistons sa #4 at #5, ang unang kambal na nakuha hindi lang sa Top 10 kundi sa Top Five. Sisikapin na ng mag-utol na ibangon ang kanilang mga bagong koponan na parehong nagtapos sa pinakailalim ng Western at Eastern Conference.

Pang-anim si guwardiya Anthony Black na napunta sa Orlando Magic. Ika-pito si Bilal Coulibaly na kakampi ni Wembanyama sa Metropolitans 92 subalit hindi nagtagal ay ipinadala siya ng Indiana Pacers sa Washington Wizard kapalit ni #8 Jarace Walker.

Hindi nagpahuli ang Boston Celtics at kinuha nila mula sa Wizards si Kristaps Porzingis. Kasama sa transaksyon ay ang paglipat nina Marcus Smart ng Celtics sa Memphis Grizzlies at Tyus Jones ng Grizzlies sa Wizards.

Wembanyama, Henderson, Miller at Thompson, handa sa NBA Draft

ni Anthony E. Servinio @Sports | June 23, 2023

Tandaan ang mga pangalang Wembanyama, Henderson, Miller, Thompson at marami pang ibang nangangarap sa 2023 NBA Draft ngayong araw mula sa Barclays Center. Isa-isa silang tatawagin ni Commissioner Adam Silver sa entablado, ang simbolikong unang hakbang patungo sa pagiging susunod na bituin ng liga.

Hawak ng San Antonio Spurs ang karapatan na unang pumili at hindi nila itinago ang nais na kunin ang 7’4” sentrong Pranses na si Victor Wembanyama upang buhayin ang prangkisa na nagtala ng 22-60 panalo-talo. Kung madali ang desisyon ng Spurs, magsisimula ang hulaan sa mga susunod na koponan.

Pipiling pangalawa ang Charlotte Hornets at hati sila kay 6’2” point guard Scoot Henderson ng G League Ignite o 6’9” forward Brandon Miller ng University of Alabama. Nandiyan ang tanong kung kukunin ang pinaka-talentado (Henderson) o 'yung aayon sa kanilang pangangailangan (Miller).

Malamang ay kukunin ng Portland Trail Blazers ang hindi kukunin ng Hornets. Determinado ang Portland na kumuha ng malakas na kakampi para kay All-Star Damian Lillard at ang kukunin nilang rookie ay maaaring ipagpalit nila para sa beterano na makakatulong agad.

Nakakaintriga ang kambal na 6’7” Amen Thompson at Ausar Thompson, mga produkto ng Overtime Elite kung saan dapat maglalaro ang ngayon ay UP Maroon Francis Lopez. Maaaring sila ang maging unang pares na mapapabilang sa Top 10, isang bagay na hindi natamasa ng ilang mga tanyag na kambal sa NBA.

Isa sa mga Thompson ay napipisil na mapupunta sa Houston Rockets na pipili sa ika-lima. Hahanapan ng makakasama si kabayan Jalen Green upang maangat ang Rockets mula sa kartadang 22-60.

Fan engagement sa NBA teams, nasusuri na sa social media

ni Gerard Arce @Sports | June 20, 2023

Itinuturing na pangunahing men’s professional basketball league worldwide at isang prominenteng organisasyon ang National Basketball Association (NBA) na may 30 professional basketball teams sa North America.

Nakabuo ang NBA ng malawak na social media presence at ngayo’y may pinakamaraming followers, partikular sa Facebook, base sa 7-day research study ng Capstone-Intel Corporation dahil na rin sa pagiging well-respected at globally renowned sports brand.

Ang Capstone-Intel ay isang “high impact research company which uses innovative research technologies, tools and methods to convert data and information into breakthrough insights and actionable intelligence outputs.”

Makapagbigay ng komprehensibong pang-unawa sa fan behavior sa sports industry gamit ang Facebook bilang platform for analysis ang target ng research na isinagawa noong Mayo 16 hanggang 22, 2023.

Sa NBA Finals, nangunguna ang highest-ranking teams na inantabayanan ng general public, kabilang ang Boston Celtics, Denver Nuggets, Los Angeles Lakers, at Miami Heat. Base sa Facebook data mula sa Pilipinas ang pagsubaybay sa teams, gamit ang keyword analysis ng basketball team names upang masukat ang Facebook performance.

Napatunayan ang malaking interes ng mga Pilipino sa basketball bilang primary sport sa bansa kaya patuloy pang pagdami ng mga tumatangkilik dito.

Nagsagawa rin ng sentiment analysis base sa reactions, channels/influencers, at word clouds upang matukoy ang popularidad ng teams.

Gumamit ng graphical elements kabilang ang charts at graphs, upang maipresenta at maanalisa ang numerical data, functions at qualitative structures “in a visually concise and clear manner,” upang maintindihan ng publiko kung bakit usap-usapan ang 2023 NBA Finals.