Tig-P10 M daw dapat bawat Pinoy… GARDO: P500 NOCHE BUENA, MAHIYA NAMAN KAYO!

ni Mercy Lejarde @Showbiz Talkies | December 1, 2025

Photo: File / FB Gardo _Cupcake_ Versoza

Bonggang-bongga ang reaksiyon ng madlang people sa nag-viral na sinabi ni Department of Trade and Industry (DTI) Secretary Ma. Cristina Roque kaugnay sa kinakailangang budget ng mga Pilipino para sa Noche Buena.

Sa isang panayam, nasabi ni Sec. Roque na, “Kung tutuusin, sa P500 makakabili na kayo ng ham. Makakagawa ka na ng macaroni salad, makakagawa na rin ng spaghetti. Depende rin po ‘yan kung ilan ‘yung tao na kakain. Depende rin ‘yan kung ano ang gusto mong ihain. So, it all depends on the budget.”

Sa social media post ng ilang artista, nagpahayag sila ng kanilang saloobin tungkol sa P500 na pang-Noche Buena.

Saad ng aktor na si Gardo Versoza sa Facebook (FB) post niya, “Wow! Bilyun-bilyon nga, ‘di pa kayo magkamayaw, bakit ‘di n’yo man lang bigyan ng magandang Pasko ang bawat Pilipino kung totoong may malasakit kayo sa taong bayan. Kahit sa tig-P10 milyon sa bawat Pilipino kung may populasyon tayo ng 200 milyon katao, napakalaki pa ng sukli ninyo. Aba, mahiya naman kayo sa sinasabi n’yong P500 na pang-Noche Buena.”

Saad ng TV host na si Susan Enriquez sa post niya, “Ang ibig lang sabihin na kasya ang P500 na pang-Noche Buena para sa apat na miyembro ng pamilya—magpasalamat at may maihahanda pa sa Noche Buena. ‘Yun lang naman ‘yun.”

Saad ng aktres na si Aiko Melendez sa post niya, “P500 Noche Buena package? Saan po makakabili n’yan? ‘Wag n’yo pong insultuhin ang mga Pilipino. Naku po! Queso de Bola? Holen size po ba ito?”

Hirit naman ng Unkabogable Box Office Superstar na si Vice Ganda, “‘Yung P500, puwede na raw na pang-Noche Buena. Eh, di kayo na! Akala mo naman talaga, s’ya nagpa-P500. Talaga itong mga ito, oh!

“Sige, okey, so ngayon, sisiguraduhin natin na ang mananalo rito ay hindi P500 ang pang-Noche Buena. Pipilitin natin na may isa man lang na kababayan natin na hindi P500 ang pang-Noche Buena.

“Because we believe that the Filipino people deserve more!”

Well, sad to say, mahirap maging mahirap. Pak na pak, as in wapak at tumpak!

---

TRENDING at labis na kinabiliban ng mga netizens ang mga pasabog na performances nina Alexa Ilacad at Jason Dy sa kanilang pag-transform bilang si Britney Spears sa Your Face Sounds Familiar Season 4 (YFSFS4).

Sa nangyaring Battle of One Icon, umani ng standing ovation ang performance ni Alexa ng I’m A Slave 4 U matapos niyang kumanta habang may malaking ahas na nakasabit sa kanyang balikat. 

Hindi rin naman nagpakabog si Jason Dy at ipinamalas ang galing sa pagkanta at paggaya sa kanyang bersiyon ng Toxic.

Sa huli, nanguna si Alexa sa leaderboard at itinanghal bilang Week 4 winner habang pumangalawa naman si Jason. 

Sa ngayon, umabot na sa milyon views ang performances nina Alexa at Jason sa iba’t ibang social media platform.

Bukod sa performances nina Alexa at Jason, nagdala naman ng good vibes at major throwback feels ang guest performer at Tawag ng Tanghalan (TNT) champion na si Marko Rudio bilang si Yoyoy Villame.

Para sa Week 5 transformations, abangan sina Dia Mate bilang Michelle Dee, Rufa Mae Quinto bilang Jessi, Akira bilang Tom Jones, JM dela Cerna at Marielle Montellano bilang sina Cynthia Erivo at Ariana Grande, Jarlo Base bilang Chris Martin, Jason bilang Martin Nievera, at Alexa bilang Zsa Zsa Padilla.

Huwag palampasin ang kamangha-manghang transformations sa YFSFS4 tuwing Sabado at Linggo sa Kapamilya Channel, Kapamilya Online Live, A2Z, TV5, at iWant.

---

NAGLULUKSA ang Kapamilya actress na si Nikki Valdez sa biglaang pagpanaw ng kanyang alagang aso na si Trevor.

Kuwento ni Nikki sa post niya, “No pet parent can ever be ready for this kind of pain (heartbreak emoji)... 

“Last night, we lost our beloved senior, Trevor. It was so unexpected and sudden (sad emoji). 

“My boy, my strong boy Trevor... You were so little but had a lot of love and happiness to give. You were a fighter — survived an emergency surgery at 9 years old and continued to fight an enlarged heart since 2021. Up until your last breath, you tried so hard. I thank you for that. It pains me and all of us, especially your Nonna (wala na siyang roommate, babe), but we are grateful knowing you gave us so many happy memories to keep.

“Run free and rest now. Say hi to your bro, Travis, and have the best time in doggie heaven where there is no pain and you can finally have all the bananas, watermelon, and other treats that you love.

“We love you sooooo much, my litol (little) Lolo. Goodnight. Sleep tight.” 

Run free, Trevor.

Magkakapatid kay Aljur… KYLIE, ENJOY PANOORIN ANG BONDING NG MGA ANAK NILA NI AJ

ni Mercy Lejarde @Showbiz Talkies | November 25, 2025

Photo: File / Kylie Padilla

“Sarap panoorin,” ito ang komento ng mahusay na aktres na may pusong mapagparaya na si Kylie Padilla sa post ng aktres na si AJ Raval.

Nagbahagi si AJ Raval sa kanyang Instagram (IG) account ng video clip kung saan makikita na naglalaro ang magkakapatid na sina Alas, Axl at ang anak ni AJ na si Aikina.

Mababakas sa mukha ng magkakapatid na masaya sila na magkakasama habang naglalaro at mahal na mahal nila ang isa’t isa.

Saad ni AJ sa post niya, “She’s growing up with kuyas (mga anak ni Kylie) who adore her... and that’s a blessing I’ll forever be grateful for.”

Bukod sa komento ni Kylie ay pinusuan niya rin ang post ni AJ.

Maraming netizens ang pinusuan ang post ni AJ at humanga kay Kylie.

Komento ng isang netizen, “Mga anak ni Aljur Abrenica, mga pogi at maganda.”

Korek ka d’yan, ateng! Ang guwapo at ang ganda ng mga anak ni Aljur Abrenica at mababait na mga bata.

---

THIS is it pansit. Ito na ang hinihintay ng mga tagahanga ng aktor-TV host ng Rainbow Rumble (RR) na si Luis Manzano.

Sa social media post ng anak ng Star for All Seasons na si Vilma Santos na si Luis ay nagbahagi siya ng video clip kung saan makikita na nagpahayag siya ng latest update tungkol sa pakikipag-usap niya sa management ng ABS-CBN.

Kuwento niya, “‘Yun lang, katatapos lang ng meeting namin sa ABS-CBN. Mukhang matutuloy na ang teleserye na sinasabi nga natin kung saan mga kapatid ko... si Piolo (Pascual), si Joshua (Garcia), si Paulo (Avelino) at saka si Donny Pangilinan. Medyo nagkaayos na kami sa mga talent fee (TF), ‘yun na lang ‘yung naging issue.

“Si Piolo kasi, kada show P2,500. Si Joshua naman, ang sabi lang ni Joshua, basta may pagkain sa set okay lang. Kahit libre na ‘yung taping basta may pagkain. Si Donny, nasa P1,800 yata kada teleserye. Tapos si Paulo Avelino nasa... P1,600 yata.

“Eh, ako, ang bayad kasi sa akin ay P10 million kada linya. Kada linya pa lang, ha? So, okay naman sa management ‘yung budget na ‘yun at saka ‘yung TF.

“Pero ang update po, eh, nag-message sa akin si Alden Richards, alas-tres nang umaga. Sabi niya, ‘Can I call you Kuya Lu (Luis)?’ ‘Yun ang sabi ni Alden. 

“Sabi ko, ‘Bro, tawag ka.’ So umiiyak s’ya sa akin. Sabi n’ya, ‘Kuya Lu, nabalitaan ko may project ka na maganda, so baka puwedeng makasama sa project mo. ‘Yung teleserye na ipo-produce ko. Umiiyak s’ya nang alas-tres, sabi niya, ‘Kuya Lu, sana makasama ‘ko sa project.’

“Sabi ko, ‘Alden kung gusto mo ikaw ang mag-stand double ko. ‘Yung kailangan mahulog sa bangin ‘yung character ko o mahulog sa building, puwede ka. Pero hindi ko maipapangako sa ‘yo kung makikita ‘yung mukha mo, baka kahit likod na lang. 

“Okay naman s’ya. Haping-happy naman s’ya. Natuwa nga ako kay Alden, parang feeling ko, may puwang talaga sa industriya ‘yung batang ‘yun. Sisikat ‘yun. Kaya update lang po sa pinakabagong teleseryeng kaganapan. Ang magiging title po ay ‘Lucky and Friends.’ ‘Yun po ang magiging title ng teleserye kaya sana suportahan ninyo.”

Wow! Bilib talaga si yours truly kay Luis, P10 million kada linya ang TF!

In fairness, napakagaling ng daddy dearest ni Baby Peanut na gumawa ng kuwento na ikasasaya talaga ng manonood. 

At sure si yours truly na may part 3 pa ang kuwento ni Luis Manzano, kaya abangan ang susunod na kabanata.

---

PERSONAL greetings lang po. Congrats to the newly licensed pharmacist of the Philippines:

Maria Elmina, Samantha A. Layague, Jamil S. Calinao, Kaye B. Andres, Phobie Kate S. Ogsimer, Devine Grace B. Mejos, Sophia Gwyneth O. Quidilig, Pauline Jane P. Nunag, at Bea Allyzandra F. Factor.

‘Yun lang, and I thank you.

Ayaw ng bantay… SEN. ROBIN, ATRAS MAGING LEADING LADY SI MARIEL

ni Mercy Lejarde @Showbiz Talkies | November 23, 2025

Photo: FB Mariel Rodriguez Padilla & Robin Padilla

“Wala po akong pinangarap kundi ang mabalik dito sa opisina ng VIVA,” ito ang pahayag ng aktor-pulitiko na si Sen. Robin Padilla sa naganap na contract signing niya with Viva kasama ang mag-amang Boss Vic at Vincent del Rosario.

Saad ni Sen. Robin, “Siguro ‘yung birthday gift na lang, magpapasalamat na lang ako sa birthday gift kasi ito na ‘yung pinakaregalo dahil wala po akong pinangarap kundi mabalik dito sa opisina ng Viva. Kaya dito po ako masaya, Boss (Vic). Kaya ito na po ‘yung greatest gift, Boss, salamat po.”

Saad naman ni Boss Vic Del Rosario, “Ito naman ang mundo mo, ito’ng mundo mo, and welcome ka parati sa Viva. Anytime. Pati picture mo, nasa harap ko everyday, kaya nagpapasalamat ako na ‘yung ibinilin ko sa ‘yo na ‘wag gagawa ng hindi dapat gawin, ginagawa mo naman, and I’m proud of you.”

Samantala, sa panayam, natanong si Sen. Robin kung si Mariel Rodriguez Padilla ay isa sa magiging leading ladies niya sa movie na gagawin niya.

Sagot ni Sen. Robin na may kasamang biro, “May bantay agad? Ikaw naman. Wala munang bantay. Hindi, busy si Mariel sa mga bata. Katunayan, kagabi, medyo dramatic ‘yung eksena namin kasi meron s’yang tinanggihan na bagong trabaho sana sa isang network dahil concentrated s’ya sa mga bata. 

“Sa umaga, naghahatid. Maaga gumising ‘yun, ihahatid sa eskuwela, susunduin n’ya talaga. Nakatutok s’ya. So medyo alam ko na mabigat din sa loob n’ya ‘yun dahil mahal n’ya ‘yung pagho-host. Talagang ‘yun naman. Kaya lang, nanay s’ya.”

Natanong din si Sen. Robin, “Ano ‘yung moments na na-realize ninyo na kailangan mo nang magbago?”

Sagot ni Sen. Robin, “Sa kulungan, Ma’am. S’yempre, ‘pag nasa loob ka na ng selda at ikaw na lang mag-isa, du’n mo mare-realize na, ‘Oops, ‘di puwedeng panindigan ko ‘to. Hindi ako lalaya kaya nag-umpisa akong magpakabait. Hindi ko sinabing mabait ako. Nagpapakabait pa rin dahil hanggang ngayon kasi, struggle ‘yan.”

Hindi rin pinalagpas ang tanong tungkol sa pagiging playboy ni Sen. Robin.

Kuwento ni Sen. Robin na ikinatuwa ng maraming press people, “Alam mo, naku, ‘yang playboy na image, napagbintangan lang ako d’yan. Walang katotohanan ‘yan. Hindi po, kasama lang sa packaging (branding) nu’ng araw. Opo, sa totoo lang, mabait po ako,” sabay tingin sa mga press people at nag-dialogue ng, “Walang naniniwala? Kayo naman, dapat ipinagtatanggol ninyo ako. S’yempre, ‘pag pelikula lalo na ‘pag action, ‘di mawawala ‘yung may leading lady. Kasalanan lahat ni Boss Vic ‘yan.”

Nagtawanan na lang ang mga reporters.

Hirit na tanong, “Bakit nililigawan mo lahat?”

Sagot ni Sen. Robin, “Hindi totoo ‘yan. Publicity lang ‘yan. Itanong ninyo pa kay Tita Baby Gil.”

Napansin ni yours truly na hindi tumatanda si Sen. Robin at talagang guwapo pa rin at maganda ang pangangatawan. Kaya naman tinanong ko kung ano ang kanyang sikreto at bakit tipong hindi siya tumatanda at pabagets nang pabagets.

Sagot ni Sen. Robin, “Siguro po, healthy living. Totoo, naniniwala po ako na kailangan. ‘Di po ako umiinom, ‘di naman po ako naninigarilyo. Ako po, ‘yung yoga ko ay dire-diretso at ako po ay nagpa-fasting. Nag-48 hours po ako. Hindi ko lang magawa ‘yung 76 hanggang 100 hours kasi ‘pag pumasok na ako sa opisina, hindi mo magagawa. Kaya nagagawa ko lang po ‘yun ‘pag Saturday at Sunday. Pagdating ng Monday, ‘di ka na makakapag-fasting kasi ang dami nang problema.”

Dagdag na tanong ni yours truly, “Kasama rin sa pagiging bagets mo ‘yung mga mahal mo sa buhay?”

Sagot ni Sen. Robin, “Ay, s’yempre, s’yempre si Mariel. ‘Yun ang ating ano. Kumbaga, ‘yung energy n’ya iba. Iba ‘yung energy nu’ng tao na ‘yun. Magmula umaga hanggang gabi, nagsasalita ‘yun. Talagang mare-rejuvenate.”

In fairness, effective na pang-rejuvenate si Mariel Rodriguez Padilla. Kitang-kita sa face ng aktor-pulitiko ang pagiging mukhang bata niya.

Happy birthday, Sen. Robin Padilla! Assalamualaikum (peace be upon you).

---

DINALA ng singer na si Maki ang makulay na mundo ng KOLORCOASTER sa Middle East kung saan nakasama niya ang pop-rock royalty na si Yeng Constantino matapos ang sold-out concert niya sa Araneta Coliseum.

Bumisita si Maki sa Doha, Qatar at Dubai, UAE (United Arab Emirates) at naghatid ng all-out performances ng hit songs tulad ng Dilaw, Kahel na Langit, Namumula, at marami pang iba.

Sa pagbabalik ng Kapamilya singer sa bansa, sinalubong siya ng panibagong achievement matapos manalo ang Dilaw bilang Best Pop Recording sa 2025 Awit

Awards.

Kamakailan ay nagkaroon ng collaboration ang Tarsier Records artist kasama ang American pop duo na Joan para sa extended version ng album track na Turning Green. Sa kasalukuyan, umani ang album ni Maki ng mahigit 465 million streams sa Spotify.

Pakinggan ang makulay na kuwento ng KOLORCOASTER ni Maki na available sa iba’t ibang streaming platforms.

‘Yun lang, and I thank you.