Ho Min ng Seoul Cycling Team Stage 6 winner ng TOL

ni Elyssa Nichole @Sports | May 5, 2026

Photo: Napa-flex ng masel si Stage 6 Winner #91 Min Kyeong Ho ng Seoul Cycling Team nang unang dumating sa finish line sa oras na 05:13:12 nang matapos ang 228.80 km distance mula sa Tuguegarao City hanggang Pagudpud, Ilocos Norte. MPTC

Pagudpud, Ilocos Norte - Nagpakitang gilas si Kyeong Ho Min ng Seoul Cycling Team matapos nitong tawirin ng mag-isa ang finish line sa Stage 6 ng MPTC Tour of Luzon 2026 na nagsimula sa Tuguegarao City at nagtapos sa Pagudpud Town Hall, kahapon.

Nagtala ng tiyempong limang oras, 13 minuto at 12 segundo sa 228.80 kms. si former Tour of Korea champion Min habang dumating na segundo ang may suot na green jersey na si Russian rider Ivan Anisimov ng LCW UAE Cycling Team.

Nagparamdam na rin si dating Ronda Pilipinas champion Ronald Oranza ng Standard Insurance Philippines matapos nitong tumawid na pangatlo sa meta.

Kasama sina Anisimov at Oranza sa malaking grupo ng siklista na dumating sa finish line, pumang-apat si Sanity Syahmi Mohd-Safee ng National Team Malaysia habang pang-lima si Ronnilan Quita ng 7Eleven Cliqq Roadbike Philippines.

Ayon kay 29-anyos Min na wala sa plano niya ang bumanat sa stage 6 pero nakakita ito ng pagkakataon nang masilayan nitong pagod na ang kanyang mga kasabay sa event. 

Si Russian cyclist Nikita Shulchenko ng LCW UAE Cycling Team na kasama sa second goup ay tumapos ng 16th place pero mananatili sa kanya ang yellow jersey na isusuot ngayong araw sa 22.90 km Individual Time Trial (ITT) Pagudpud - Pagudpud race.

Nakalikom si Shulchenko ng 19:01:14, sapat upang manatili sa tuktok ng Individual general Classification, 49 segundong lamang sa teammate nitong si Yousef Ibraheim Alrefai. 

Dumating sa meta na pang-34th si Korean rider defending champion Joo Dae Yeong ng Gapyeong Cycling Team kaya naman nasa pang 20th siya sa IGC, naghahabol siya ng 3 minuto at 46 segundo.

Nasa pangatlo pa rin ng IGC si Pinoy cyclist Emmanuel Dave Montemayor ng Go for Gold.

Anisimov bumida uli sa Stage 5, Tugawin 2nd, Hoon Lee 3rd

ni Elyssa Nichole @Sports | May 4, 2026

Photo: MPTC

Tuguegarao City - Pinadyak ni Russian rider Ivan Anisimov ng LCW UAE Cycling Team ang back-to-back lap winner matapos nitong sikwatin ang Stage 5 sa MPTC Tour of Luzon na nagtapos dito sa harapan ng City Hall kahapon.

Inirehistro ni 23-year-old Moscow native, Anisimov ang tiyempong 2 oras, 47 minuto at 26 segundo sa 130.60 kms Santiago - Tuguegarao City race sapat upang ungusan ang malaking grupo ng mga siklista na tumawid sa finish line.

Dumating na segundo si Excellent Noodles skipper Ryan Tugawin at tersero ang pambato ng Seoul Cycling Team na si Jung Hoon Lee sa event na suportado ng Metro Pacific Tollways Corp.

Kasama si overall leader sa Individual General Classification Nikita Shulchenko sa nasabing lead group na dumating sa finish line at dahil pare-pareho ang kanilang oras ay mananatili sa kanya ang symbolic yellow jersey sa Stage 6 na ilalarga ngayong araw.

Nakalikom si Shulchenko ng 13:46:45, 49 segundo lang sa second placer at teammate na si Syrian cyclist Ibrahiem Yousef Alrefai, 2  minuto at 4 na segundo naman ang hinahabol ng 3rd placer na si Pinoy rider Emmanuel Dave Montemayor ng Go for Gold Philippines sa una.

Nasa 4th hanggang 10th sa IGC sina Excellent Noodles bet Sumiso Basalan (+2:09), 7-Eleven Roadbike Philippines riders Mervin Corpuz (+2:15) at Antoine Huby (+2:16), Standard Insurance Philippines cyclist Dave Cangayao (+2:16), Ronnilan Quita (+2:22) ng 7-Eleven, Excellent Noodles member Tyler Hannay (+2:51) at Rench Michael Bondoc (+2:55) ng Go for Gold.

Sa katunayan nagbalak ang Filipino riders na kumawala sa kaagahan ng pedalan kung saan ay kasama si Tugawin sa 13-man lead pack pero hindi sila nahabol ng main peloton kaya kumpulan silang dumating sa meta. Samantala, ilalarga ngayong araw ang 228.80 Tuguegarao City hanggang Pagudpod, Ilocos Norte.

TOL: Russian Anisimov bida sa Stage 4, Nikita sa Yellow Jersey

ni Elyssa Nichole @Sports | May 3, 2026

Photo: Nanguna si Ivan Anisimov ng team LCW UAE Cycle sa stage 4 sa oras na 03:59:41 sa 159 km  mula Palayan City hanggang Bayombong, Nueva Vizcaya habang si Emmanuel Montemayor ay nanguna sa 22 puntos sa individual qualification ng MPTC Tour of Luzon kahapon. (mptctolpix)

Bayombong City - Mananatili ang Yellow Jersey kay Russian rider Nikita Shulchenko ng LCW UAE Cycling Team matapos nitong makasabay sa mga tigasing riders sa Stage 4 ng  MPTC Tour of Luzon sa Nueva Viscaya.

Hindi rin nagalaw ang puwesto nina Syrian cyclist Ibrahiem Yousef Alrefai at Pinoy rider Emmanuel Dave Montemayor nanatili sila sa second at third placer sa Individual general Classification.

Sina Shulchenko at Alrefai ay magkakampi sa LCW UAE Cycling Team habang nasa Go for Gold Philippines naman si Montemayor sa event na suportado ng Metro Pacific Tollways Corp., Manny V. Pangilinan Group of Companies at Philippine Sports Commission.

Malaking grupo ng mga siklista ang tumawid sa finish line kung saan ay nahablot ng isa pang Russian rider mula sa LCW UAE Cycling Team na si Ivan Anisimov ang Stage 4.

Inirehistro ni Anisimov ang tatlong oras, 59 minuto at 41 segundo sa 165 km Palayan City - Bayombong, Nueva Vizcaya na dumating na segundo si Korean cyclist Jung Hoon Lee ng Seoul Cycling Team habang tersero si Ronnilan Quita ng 7Eleven Cliqq Roadbike Philippines.

Tumawid ng pang-apat sa meta si Antoine Huby ng France mula sa 7Eleven Cliqq Roadbike Philippines habang pang-lima si Landerson Nebres ng Dreyna Orion Cement.

Samantala, hawak pa rin ng Go for Gold Philippines ang tuktok ng Team General Classification, pangalawa ang 7Eleven Cliqq Roadbikes Philippines at pangatlo ang powerhouse Standard Insurance Philippines.