Makipagtulungan para mapaigting ang bakuna

ni Korina Sanchez - @Isyung 'K' | June 20, 2021

Napanood natin ang ilang video ng mga nagwawalang pasahero sa mga pampasaherong eroplano sa Amerika dahil ayaw nilang magsuot ng facemask habang nasa loob ng eroplano. Nagiging mas tensiyunado pa ngayon dahil may mga pasaherong ayaw nang sumunod dahil bakunado na umano sila.

Hindi natin malalaman kung totoo ang kanilang mga sinasabi dahil wala pa namang tinatawag na “vaccine passports” sa Amerika. May mga okasyon na dahil masyadong bayolente na ang tinutukoy na pasahero, kailangang ilihis ang lipad at ilapag sa pinakamalapit na paliparan para mahuli ang pasahero. May okasyong hinihingi ng piloto ang tulong ng ilang pasahero para pigilan ang ibang nanggugulo para maposasan o matali pansamantala.

Kailangan pa rin magsuot ng facemask kapag lumilipad kahit bakunado na o kahit marami na rin ang nababakunahan. Pero alam naman nating karamihan sa mga Amerikano — karapatan at kalayaan ang palaging dahilan kung bakit ayaw sumunod.

Samantala, sa ‘Pinas ay wala pa naman tayong nababalitaang nagwawalang pasahero sa eroplano dahil ayaw magsuot ng facemask. Hangga’t hindi nakakamit ang herd immunity sa buong mundo ay hindi tayo tunay na magiging ligtas. Ngayon pa lang, may bagong variant na muling lumalabas.

Sa Pilipinas, 4.63% ng populasyon ang nakatanggap na ng first dose ng bakuna noong June.

Gayundin, kahit nababalitaan natin ang milyun-milyong bakuna na ang dumating o parating, mukhang ang pagbigay-bakuna ang isyu na naman ngayon.

May LGUs na umaangal na hindi sila nakatatanggap ng bakuna. Ang nais ng gobyerno ay mabigyan na muna ang mga lugar sa labas ng NCR Plus kung saan dumarami ang positibong kaso. Ito ang bagong problema ng gobyerno ngayon.

At huwag nating kalimutan ang porsiyento ng populasyon na ayaw pa rin magpabakuna dahil sa sari-saring dahilan, karamihan ay dahil sa maling impormasyon. Malinaw ang mensahe ni Pangulong Rodrigo Duterte, magpabakuna o mamatay — wala na sigurong lilinaw pa riyan.

May “profiling” sa mga organizers ng community pantries?!

ni Korina Sanchez - @Isyung 'K' | April 25, 2021

Si NTF-ELCAC spokesperson Lt. Gen. Antonio Parlade, Jr. mismo ang umamin na gumawa sila ng “profiling” ng mga nasa likod ng community pantries.

Aniya, nais nilang malaman na hindi pinapasukan ng mga komunista ang kilos na ito. Natakot ang nasa likod ng community pantry sa Maginhawa, Quezon City, ang unang nagtayo ng ganitong pamamaraan para mamahagi ng tulong sa mga nangangailangan.

Samantala, bagama’t nagsara pansamantala, ngayon ay muli na itong nagbukas — lahat ay boluntaryo lamang. Boluntaryo ang mamigay ng pagkain, damit, kagamitang-bahay at kung anu-ano pa — boluntaryo ang nagbabantay sa mga pantry para walang umabuso.

At ano ang unang iisipin? Mga komunista ito at dapat malaman ng NTF-ELCAC ang lahat ng impormasyon tungkol sa kanila. Sino ang hindi matatakot kung may biglang gustong malaman ang lahat ng impormasyon mo, mas lalo na kung pulis? Itinatanggi ni Parlade na sila ay nag-“red-tagging”. Nais lang umano nilang malaman kung sino ang mga nasa likod ng mga pantry at hindi kasangga ang anumang grupo.

Ganito na ang estado ng ating bansa. May mga nais lamang tumulong sa kapwa, komunista na agad ang tingin sa kanila. Hindi nakapagtataka kung taga-suporta ang mga ito ng kasalukuyang administrasyon, batay na rin sa mga pahayag sa social media.

At hindi nag-aksaya ng panahon si Parlade at ang QCPD — agad kumilos. May mga hindi talaga matanggap kapag may ibang mas naunang nakagagawa ng mabuti kaysa sa kanila. Naaalala ba ninyo si Manuelito Luna ng PACC na nais kasuhan si VP Leni Robredo noong mga unang araw ng pandemya at lockdown dahil nauna siya sa pag-isip ng mga dormitoryo at masasakyan ng mga medical frontliners, pati ang donasyon ng mga PPE sa ospital?

Pabayaan umano na gobyerno ang kumilos at sinasapawan sila. Sa pahayag na ‘yan ay malinaw na hindi bahagi ng gobyerno ang tingin kay Robredo, kahit halal pa ng mamamayan. Mabuti na lang at sinibak agad ni Pangulong Rodrigo Duterte itong si Luna.

Nagpahayag na ang Palasyo na pabayaan ng NTF-ELCAC ang mga community pantries na nag-usbungan na sa buong bansa. Wala rin daw utos ang DILG sa PNP na alamin ang impormasyon ng mga nasa likod nito.

Nagsalita rin si DOJ Sec. Menardo Guevarra na mali ang isailalim ng pulis sa interogasyon ang tao maliban kung may paniniwalang lumalabag sa batas. Ang Palasyo, DILG, DOJ ang mga nagsalita na pabayaan ang mga community pantries. Sana, totoo talaga ang lahat ng kanilang pahayag at makinig ang NTF-ELCAC, ang PNP at lalo na si Parlade.

China, garapalan na sa pananakop sa WPS

ni Korina Sanchez - @Isyung 'K' | April 08, 2021

“Walk the talk” na ibig sabihin, samahan ng aksiyon ang salita.

Ito ang pahayag ni Surigao del Norte Rep. Robert Ace Barbers kay Defense Sec. Delfin Lorenzana matapos ang ilang palabang pahayag kaugnay sa dami ng barkong Tsino sa loob ng Exclusive Economic Zone (EEZ) ng bansa tulad ng Julian Felipe Reef at Union Banks. Kahina-hinala ang pakay ng mga barkong-pangisda diumano ng China sa mga lugar.

Umabot sa mahigit 200 ang bilang ng kanilang mga barko sa lugar mula pa noong nakaraang taon. Malinaw na pinagsamantalahan ang pandemya para lumayag sa mga lugar at tila walang ginagawa, maliban na lang kung sa gabi kumikilos ng ilegal.

Hindi tayo magtataka kung talagang mangingisda ‘yan, sira na ang kalikasan doon.

Samantala, ngayon lang nagsalita nang ganyang katapang si Lorenzana hinggil sa ginagawang pagpasok ng mga barko ng China sa ating EEZ.

Ngayon lang siya nagdemanda na umalis ang mga barko sa Julian Felipe Reef dahil wala namang masamang panahon at hindi siya maloloko. Pero medyo natawa tayo sa kanyang pahayag na hangarin ng China ay sakupin ang West Philippine Sea — matagal na.

Noong 2016 pa lang nang hangarin ng China, lalo na’t yumaman nang husto at pinalakas ang kanilang militar . Nakapaglikha na nga ng mga artipisyal na isla na kumpleto ng paliparan at kagamitang militar. Ngayon, ibang lugar naman ang minamataang maglikha ng karagdagang artipisyal na isla.

Gayunman, sa kabila ng maaanghang na salita mula sa ilang miyembro ng gabinete, nagpahayag si Pangulong Rodrigo Duterte na mapayapang resolusyon ang nais niya sa mainit na isyu dahil kaibigan ang China. Walang sorpresa sa kanyang pahayag.

Pero kung magsalita ang embahada ng China sa bansa ay sila pa ang matapang at binansagang “unprofessional” si Lorenzana. Iginiit din na sa kanila ang karagatan kaya sila nandoon. Walang epekto sa kanila ang anumang protesta ang ihain ng DFA.

Panahon na para igiit ang ating soberanya sa mga isla sa West Philippine Sea — masyado ng garapal at gahaman ang China.