Malawakang pagbubukas ng ekonomiya, kailangan ng sapat na pag-iingat

ni Korina Sanchez - @Isyung 'K' | October 17, 2020

Mas maraming pampasaherong jeepney ang pinapayagan na ngayong pumasada kung saan isang silyang pagitan na lamang ang kinakailangan. May mga negosyo na rin ang pinayagang tumanggap ng halos isang daang porsiyento ng kanilang kapasidad. May ilang hotel na rin ang pinayagan sa “staycation”. At mas maiksi na rin ang oras ng curfew. Ito ang mga hakbang na pinayagan na ng administrasyon dahil kailangan na buhayin ang ekonomiya.

Malakas ang panawagan mula sa maraming sektor na buksan na ang ekonomiya sapagkat mas dumarami pa ang nahihirapan, nagugutom at walang sahod o kita — wala namang argumento riyan.

Pero may babala ang ilang grupo sa madaliang o malawakang pagbubukas ng ekonomiya. Nariyan pa rin ang peligro ng COVID-19, baka masayang lang ang nangyayaring pagbawas sa bilang ng impeksiyon.

Ayon kay Health Undersecretary Maria Rosario Vergeire, nagkakaroon ng mabilisang pagtaas ng bilang ng mga bagong impeksiyon sa Europe dahil sa tinatawag na “pandemic fatigue” o ‘yung nagsasawa na ang mga tao sa mga alituntuning may kinalaman sa COVID-19.

Halos lahat ng nakikita natin ay nagsusuot ng face mask at face shield, lalo na sa labas ng tahanan. Maraming gumagamit ng alcohol o hand sanitizer. May mga temperature check bago pumasok sa kung saan-saan, kaya nasa atin na rin talaga kung hindi maingat, malamang ay muling darami ang bilang ng mga kaso ng COVID-19. Pero kung palaging maingat, mababawasan pa ang mga bilang nito.

Totoong marami sa atin ang pagod na sa mga nangyayari na mula sa hindi matapus-tapos na bilang ng mga kaso hanggang sa paulit-ulit na mga paalala. May mga nangangati na ang mga mukha o dumarami ang pimples dahil sa tagal ng pagsuot ng face mask.

May mga kilala tayong hindi pa rin kumportableng lumabas na walang dahilan. Mayroon ding ayaw munang sumakay ng mga pampublikong transportasyon dahil sa takot mahawaan. Hindi pa talaga normal ang sitwasyon. Wala pang magagawa riyan hangga’t wala pang mabisang bakuna na sa ngayon ay malayo pang malikha. Mag-ingat pa rin, kahit pa tila pinipilit na maging normal lahat.

Hirit ng mga eksperto...

Walang naitulong ang “white sand” sa planong ayusin ang mga problema ng Manila Bay

ni Korina Sanchez - @Isyung 'K' | October 13, 2020

Imbes na maglagay nang maglagay ng “dolomite” sa kakarampot na bahagi ng Manila Bay, dapat ginastusan na lang ang rehabilitasyon ng mga bakawan o mangroves.

Ito ang pahayag ng UP Institute of Biology na nais tumulong sa rehabilitasyon ng Manila Bay, pero sa pamamagitan ng agham at hindi sa pagpapaganda lamang. Anila, ang paglatag ng dolomite ay walang naitulong sa planong ayusin ang mga problema ng Manila Bay.

Dagdag pa nito, hindi rin umano totoong walang pangmatagalang masamang epekto ang paglatag ng dolomite sa kalikasan, kung saan pati ang mga senador ay binabatikos ang “dolomite beach” ng Department of Environment and Natural Resources (DENR). Hindi umano bahagi ng 2008 writ of mandamus ng Korte Suprema ang pagpapaganda lamang ng lugar.

Siguradong hindi makikinig ang DENR sa anumang grupo o tao na kokontra o babatikos sa nasabing “dolomite beach” sapagkat ang mahalaga sa kanila ay aprubado ni Pangulong Rodrigo Duterte ang proyekto. Aabot sa P389-M ang halaga ng proyekto, kung saan dinurog na dolomite mula Cebu ang linalatag sa Manila Bay.

Pero ang huling balita noong nakaraang buwan ay sinuspinde ni DENR Sec. Roy Cimatu ang dalawang kumpanyang nagmimina ng dolomite dahil sa umano’y peligro ng kanilang operasyon sa kalikasan partikular sa mga bahura. Anila’y iimbestigahan muna ang mga alegasyon. Naunang naglabas din si Cebu Gov. Gwendolyn Garcia ng utos na patigilin ang operasyon ng dalawang kumpanya dahil hindi sila awtorisado.

Samantala, sa kasalukuyang nagaganap na gulo sa liderato ng Mababang Kapulungan, ang pagpasa ng budget para sa darating na taon ang tila naaantala dahil hindi pa tapos ang mga deliberasyon.

Kasama sa budget ang malaking pondo kontra COVID-19 at lahat ng may kaugnayan dito. Kaya naman, minamadali na ni Pangulong Duterte ang Kamara para ipasa na ito, dahil kung hindi ay siya na ang kikilos.

Mahirap intindihin ang Palasyo na kailangan nang ipasa ang bagong budget para magamit ang nakalaang budget panlaban sa pandemya, kung may ginastos na milyun-milyon para sa pagpapaganda lamang ng Manila Bay. Maganda nga ang malalakaran ng mga tao, pero ano naman ang amoy ng Manila Bay? Kung puti ang buhangin d’yan, handa ba tayong lumangoy? Mahirap talagang intindihin ang prayoridad, baka sayang lang ang ginawa sa Manila Bay!

P-Duterte, labas kuno sa bangayan nina Cayetano at Velasco, ngek!

ni Korina Sanchez - @Isyung 'K' | October 4, 2020

“Stay out tayo riyan. No comment tayo riyan. That’s purely an internal affair of the House of Representatives.”

Ito ang pahayag ni Pangulong Rodrigo Duterte sa nagaganap na alitan nina House Speaker Alan Peter Cayetano at Marinduque Rep. Lord Allan Velasco. Ang nais umano ng ilang mambabatas ay huwag palitan si Cayetano bilang speaker at tapusin na lang ang terminong tatlong taon.

Ngunit pinalagan ito ni Velasco, at sinabing dapat respetuhin ang naging kasunduan. Minabuti nilang magtungo sa Palasyo at muling hingin ang pasya at basbas ng Pangulo, tulad nang naganap noong isang taon.

Sa nasabing pagpupulong, nagkasagutan o nagsiraan ang dalawa hinggil sa panahon nila sa Kamara. Kung ang mga balita ay paniniwalaan, nakiusap ang Pangulo kay Velasco na sa Disyembre na lang magpalitan dahil tinatalakay pa ang budget para sa susunod na taon, ngunit hindi pumayag si Velasco kaya sa Oktubre 14 ay magpapalitan na ng puwesto.

Samantala, ayon kay Cayetano, “fake news” ito. May drama pa sa mababang kapulungan nang mag-speech si Cayetano na magbitiw na bilang speaker, pero bumoto ang mga mambabatas para tanggihan ito.

Sa tingin natin ay ipinakita lang ni Cayetano kung gaano karami ang mga mambatas na kaalyado niya, kaya hindi pa natin alam ang magaganap sa Oktubre 14 kung magpapalitan. Baka kumilos ang mga kaalyado niya para pigilin ito.

Nagsasalita na si Cayetano na hindi mananalo si Velasco sa halalan para sa Speaker of the House. Kung bumaba raw siya bilang speaker, hindi raw magtatagal si Velasco at makukudeta. Wow! Hindi natin alam kung gaano karami ang kaalyado ni Velasco ngayon na baka nagbago na mula nang magkasunduan noong isang taon. Ibang klase, ang kapangyarihan nga naman—napakahirap bitawan!

Pero sino ang maniniwala na walang pakialam ang Palasyo sa Kamara kung sa Pangulo sila humihingi ng basbas para sa mga gagawing pagkilos? Eh, puwede namang sila-sila ang mag-usap. Kailangan ba talagang pumagitna ang pangulo, at doon napag-usapan ang term-sharing na 15-21 na buwan? Ngayong nagbago na ang ihip ng hangin sa Kamara, at sa Pangulo sila muling nagtungo, sasabihin lang nito na labas tayo riyan?