Kumpanyang responsable sa nangyari sa Skyway, dapat managot!

ni Korina Sanchez - @Isyung 'K' | November 26, 2020

Isa ang patay habang apat ang nasaktan nang bumagsak ang malaking steel girder na bahagi ng northbound Skyway extension noong Sabado ng umaga. Limang sasakyan ang nabagsakan, kabilang ang dalawang motorsiklo. Walang kalaban-laban ang mga sasakyan. Batay sa mga ulat at litrato, mukhang hindi kinaya ng crane buhatin ang mabigat na girder na gawa sa bakal. Wala pang video na lumalabas sa social media kung ano ang aktuwal na nangyari. May sinimulang imbestigasyon para malaman kung ano ang nangyari, pero hindi tayo magtataka kung may nagkamali at nauwi sa aksidente.

Malaking bagay ang pag-iingat lalo na sa ganyang mga malalaking proyekto. Maraming tanong kung bakit tila hindi kinayanan ng crane buhatin ang girder kung marami na ang naikabit sa Skyway. Mali ba ang posisyon ng girder? Masyadong malayo ba binuhat ‘yung girder kaya tumagilid at bumigay ang crane? Unang tumaob ba ang crane at tumama sa girder kaya bumagsak?

Ilan lamang ito sa mga tanong, pero malinaw na pagkakamali ang sanhi ng aksidente na maiiwasan. Mag-iimbestiga na rin ang DOLE sa aksidente kung may pagkukulang ang kumpanyang gumagawa sa Skyway at kung may mananagot. Sana ay may matutunan ang kumpanya dahil hindi pa tapos ang Skyway. Nangako naman na tutulong sa mga biktima ng aksidente. Mahalaga ang imprastruktura na kulang na kulang sa bansa. Ilang porsiyento na kaya ng mga proyekto sa ilalim ng Build, Build, Build ang natapos?

Ilang bagyo rin ang rumagasa sa iba’t ibang bahagi ng bansa. Malaking bahagi ng imprastruktura ang nasira — lahat kailangang ayusin. Kaya kailangan talagang mag-ingat sa lahat ng oras. Hindi na dapat nadadagdagan ang napipinsala. Hindi dapat buhay ng tao ang maging kabayaran ng kaunlaran.

Kahit pinaluwag ang quarantine protocols, ingat pa more sa COVID-19!

ni Korina Sanchez - @Isyung 'K' | November 24, 2020

Muling maghihigpit ang Baguio City sa pagpasok ng mga taga-labas dahil sa kakulangan ng kakayanan ng Benguet Province na magsagawa ng testing para sa COVID-19. Unang binuksan ang Baguio City sa mga turista mula sa Benguet Province lamang. Hindi pa ito binuksan sa mga taga-ibang lugar tulad ng Metro Manila. Pero dahil sa mga ulat na dumarami ang mga positibong kaso, minabuti ng probinsiya na muling maghigpit. Tutulong ang lokal na pamahalaan sa Benguet sa pag-testing.

Gayundin sa Davao at Cebu City, kung saan dumarami ang mga positibong kaso. Ang ayaw nilang mangyari ay muling maipasailalim sa enhanced community quarantine (ECQ) kaya ngayon pa lang ay kumikilos na sila para mapigilan ang pagkalat ng COVID-19. Malinaw na hindi pa normal ang sitwasyon. Pero kung kumilos ang marami, parang wala nang COVID-19 virus sa kapaligiran natin. Sa mga mall, makikita ang mga tao na walang ginagawa kundi umupo sa mga silya, partikular sa mga food court — may mga senior citizen pa nga! Alam ko na hindi na sila pinagbabawalang lumabas pero may banta pa rin talaga ang COVID-19.

Kailangan lang natin tumingin sa Europe. Maraming bansa ang nais maghigpit muli pero umaalma ang kanilang mamamayan. Pagod na sa quarantine at lockdown. Nais patakbuhin muli ang ekonomiya pero paano ‘yan magagawa? Malaking bahagi ng ekonomiya ng Europe ay turismo. Sino ang mamamasyal sa panahong ito? Baka sila-sila na muna. Baka ito rin ang dahilan kung bakit dumarami ang kaso.

Sa worldometers.info/coronavirus/ kung saan makikita ang lahat ng impormasyon, pang-26 ang Pilipinas sa dami ng kaso sa mundo. Medyo bumaba mula sa numero 20 noong huling tiningnan natin. Pero bago tayo magsaya, ang Indonesia lang ang mas maraming kaso sa atin. Ang ibang timog-silangang bansa ay malayo na.

Sunud-sunod man ang mga unos, kapit lang tayo!

ni Korina Sanchez - @Isyung 'K' | November 17, 2020

Bakit binaha nang husto ang Cagayan province? Ayon sa mga residente, ito na ang pinakamasamang pagbabaha sa loob ng 40 taon, kung saan napakalawak ng pinsalang idinulot nito. Marami ang hindi handa para sa ganitong uri ng delubyo. Pati ang mga lokal na pamahalaan sa Cagayan ay hindi rin handa, maging sa pambansang pamahalaan o sa pribadong sektor.

Ang unang sinisi ay ang pagpakawala ng tubig ng Magat Dam. Ang Magat ang siyang nagsu-supply ng tubig para sa mga lupaing agrikultura sa lalawigan at may kakayanang 360 megawatts ang hydroelectric plant nito kung kapusin ang pangangailangan ng Luzon. Dahil sa ulan na dala ng Bagyong Ulysses, napilitang magpakawala ng tubig ang Magat dahil mas peligroso kung pababayaan itong umapaw—ganito ang lahat ng dam sa mundo. Hindi puwedeng pabayaang umapaw dahil baka gumuho ang dam. Kapag mangyari ito ay mas malaki ang pinsalang mangyayari.

Pero ayon sa tagapagsalita ng National Disaster Risk Reduction and Management Council (NDRRMC), hindi ang pagpakawala ng tubig ng Magat Dam ang dahilan ng malawak na pagbabaha kundi ang pag-apaw ng Cagayan River dahil sa halos walang tigil na pag-ulan na dulot ng bagyo. Nababad nang husto ang mga lupain sa Cagayan Valley kaya sa ilog dumiretso ang tubig-ulan. Ang Cagayan River ang pinakamahaba at pinakamalaking ilog sa Pilipinas pero dahil sa sunud-sunod na bagyo at halos isang buwang pag-uulan, hindi na kinaya ng ilog kaya umapaw sa lupain.

Isa’t kalahating buwan na lang ay matatapos na ang 2020. Napakahirap ng pinagdaan ng ating bansa—ng mamamayan. Nagsimula sa pagsabog ng Bulkang Taal noong Enero, sinundan ng pandemya noong Marso at mukhang magtatapos sa mga bagyo.

Paniguradong marami ang nais palipasin na ang taong ito. Siguradong marami ang nais magdiwang ng masayang Pasko. Pero dahil sa pandemya na hindi pa nawawala, baka ibang Kapaskuhan ang mararanasan natin. Huwag nating kalimutan ang mga kapamilya nating nasalanta ng sunud-sunod na bagyo, ang iba ay hindi pa nakakabangon.

Tulungan natin sila sa kahit anong paraan. Sa panahon ngayon, walang maliit na tulong na mabibigay sa kanila.