Kabi-kabila na ang bakuna kontra COVID-19, alin ang tunay, epektib at ligtas?

ni Korina Sanchez - @Isyung 'K' | December 10, 2020

Bakuna kontra COVID-19. ‘Yan ang madalas mapag-usapan ngayong may mga kumpanya na handang mag-alok, mag-trials at magbenta ng kani-kanilang bakuna.

Ang Indonesia ay nakatanggap na ng 1.2 milyong doses ng bakuna mula sa kumpanyang Sinovac Biotech ng China. Inaayos na ang kanilang gagawing programa para sa pagbigay ng bakuna. May makatatanggap ng libre, may mga magbabayad. May 1.8 milyong doses pa ang darating sa kanila sa Enero. Ang UK ay handa na ring bigyan ng bakuna ang kanilang mamamayan. Pfizer/BioNTech ang kumpanyang pagmumulan ng bakuna.

Nataon namang may lumabas na artikulo sa Washington Post sa Amerika na may kasaysayan ng panunuhol ang Sinovac Biotech. Ang pagsuhol sa ilang opisyal ng China ay para sila ang mangibabaw na kumpanya pagdating sa paglikha ng bakuna. Sa madaling salita, para mas nakikilala ang kumpanya. Ang Sinovac Biotech ang isa sa mga kumpanyang pinag-iisipan ng administrasyon para mag-supply ng bakuna kontra COVID. Ang ibang mga kumpanya ay Sinopharm at Clover galing China, Gamaleya mula Russia, Janssen mula Belgium, Astra Zeneca mula UK. Ang bakuna ng Pfizer/BioNTech ay kailangang maimbak sa napakalamig na temperatura. Walang kakayanan sa ngayon ang bansa para maimbak sa -70 Celsius ang bakuna. Pero sila ang unang nagpahayag na ang kanilang bakuna ay may epektibong 90%.

Kaya ang tanong, handa na ba kayong magpabakuna? Ang hamon ni Sen. Bong Go kina DOH Sec. Duque at vaccine czar Carlito Galvez Jr. ay sila ang unang magbakuna para ipakita sa taumbayan na ligtas ang mga ito. Pumayag na si Duque at ibinalik din ang hamon sa lahat ng miyembro ng gabinete. Wala pang balita kung ano ang kanilang sagot. Marami rin tayong nakakausap na hindi pa sila handang magpabakuna ngayon. May nagsasabing masyadong mabilis ang paglikha ng bakuna, may nagtatanong kung talagang walang side-effects at may nagtatanong kung pangmatagalan na ang proteksiyon. Ito ang bunga na rin ng kontrobersiya ng Dengvaxia, na sa aking palagay ay napulitika nang husto ang isyu.

Ang target ng gobyerno ay mapabakunahan ang 60-70 milyong tao, para magkaroon ng tinatawag na “herd immunity” kung saan mas mababawasan ang mahahawaan ng virus kaya kusang mawawala na lang. Maganda kung ganyan ang mangyayari. Sana lang ay pag-aralan at siyasatin nang husto ang mga inaalok na bakuna sa bansa. Mamamayan ang dapat isipin, ang mamamayan ang dapat makinabang at hindi ang bansang pagmumulan ng bakuna. Dapat makumbinsi ang marami na ligtas at epektibo ang mga bakuna.

Aprub sa mamamayan at kapulisan ang paggamit ng body cameras sa mga operasyon

ni Korina Sanchez - @Isyung 'K' | December 8, 2020

Nanawagan si Sen. Francis Pangilinan na ipasa na ang Senate Bill 427 o ang Body Camera Act para mabigyan ng kaukulang proteksiyon ang publiko sa mga maaaring pang-aabuso sa kapangyarihan ng mga awtoridad tulad ng pagtatanim ng ebidensiya o ang pagpatay ng mga suspek.

Ayon sa batas, dapat buksan ang mga body cameras bago pa magsimula ang anumang operasyon ng kapulisan. At nagbibigay din ito ng proteksiyon sa mga pulis para patunayang legal at tama ang kanilang kilos bilang tagapagpatupad ng batas.

Matagal na dapat itong ipinatupad ng PNP. Ilang hepe ng PNP na ang lumipas, wala pa tayong alam na operasyon kung saan gumamit sila ng body cams kahit matagal na itong pinag-uusapan. Ang mga CCTV pa ang nakakahuli ng mga pang-aabuso.

Noong Oktubre, hinihintay na lang ng PNP ang delivery ng 2,600 body cams. P287 milyon ang budget ng PNP para sa mga ito. Isinailalim ang ito sa testing noong Oktubre 12, 2020. Ang mga ‘anti-drug operatives’ ang unang tatanggap. Ilang operasyon kontra ilegal na droga na ang nababalitaan natin pero wala tayong naririnig hinggil sa paggamit ng mga body cams. Kaya nananawagan na si Sen. Pangilinan na ipasa na ang batas.

Hindi natin masisisi kung iisipin nating sadyang inaantala ng PNP ang paggamit ng body cams. May mga nakaraang okasyon kung saan hindi sinunod ng pulis ang tama at legal na proseso sa kanilang operasyon. Kung tama ang paggamit ng body cams, kung kailan iyon ay makikita lahat ng kanilang kilos. Maliban na lang kung may mga dahilang lilitaw tulad ng naubos ang baterya, nagalaw ang camera at hindi na sa harap nakaturo, nalaglag, nasira at kung ano pa. Para sa proteksiyon ng publiko at pati na rin ng mga pulis, patuparin na ang paggamit ng body cams.

Mahirap pigilan ang mga Pinoy na hindi magkita-kita sa Pasko sa tagal ng quarantine!

ni Korina Sanchez - @Isyung 'K' | December 4, 2020

Maaaring umabot sa kalahating milyon ang bilang ng mga kaso ng COVID-19 sa bansa sa katapusan ng taong ito. Ito ang pahayag ng OCTA Research Team dahil walang indikasyon na bumabagal ang dami ng bilang ng mga kaso sa bansa. Tumaas pa nga ito noong Nobyembre at dahil pumasok na tayo ng Disyembre at Kapaskuhan, maaari pa itong lumobo.

Ayon sa OCTA, ang mga bagong kaso sa bansa ay dulot ng “community transmission” dahil sa pagbukas ng ekonomiya. Ibig sabihin, dahil mas marami nang tao sa labas ng kanilang tahanan, dumarami ang nahahawa, partikular sa mga malalaking siyudad tulad ng Metro Manila at Davao City.

Hiniling ng nga alkalde ng Metro Manila sa IATF-EID na manatili sa ilalim ng GCQ hanggang katapusan ng taon. Ipinagbawal na rin ang caroling at Christmas party sa mga opisina. Lahat ng mga pag-iingat ay para mabawasan ang dami ng bilang ng COVID-19.

Nakapagtataka kung bakita marami naman ang nagsusuot ng face mask at face shield pero bakit dumarami pa rin ang mga kaso. Baka para sa mga opisyal hindi na kailangan ang social distancing, pero kung ordinaryong mamamayan ang gumawa niyan siguradong huli. May nangyari ba sa kaso ng mañanita ng hepe ng PNP? Hindi ba patatawarin na lang?

Sa tingin natin, tama ang pahayag ng OCTA. Mahirap pigilan ang Pilipino na magsama-sama sa panahon ng Pasko, lalo na kung matagal nang hindi nagkita. Kaya baka sumipa ang bilang ng mga kaso. Pinaalala naman ni DILG Sec. Año na ang pagtitipon ng mga kapamilya sa Pasko ay itinuturing na mass gatherings. Tila babala sa mga may plano nang magkita-kita sa Pasko. Ilan kaya ang mahuhuli o makukulong sa bisperas ng Pasko?