‘Nandilim ang paningin’, hindi katwiran para pumatay ng kapwa, period!

ni Korina Sanchez - @Isyung 'K' | December 24, 2020

Ano pa ba ang pag-uusapan natin ngayon? Matagal na tayong nasa media at marami na ring nasaksing hindi magaganda, pero iba ang usaping ito. At hindi nakapagtatakang sangkot ang pulis, lalo na sa ilalim ng administrasyong ito. Sigurado maraming nakanood ng video nang walang habas na pagpatay sa mag-inang Sonya at Frank Anthony Gregorio ni Joel Nuezca — wala na tayong pakialam sa kanyang ranggo — noong Linggo ng hapon.

Sa ating palagay, walang kinalaman kung ano ang pinag-awayan ng dalawa — may kasaysayan daw ng alitan ang magkapit-bahay dahil sa right of way, at naingayan dahil sa pagpapaputok ng “boga” ng biktima na siyang ikinagalit ng suspek.

Pero ang isyu ay may karapatan ba itong halimaw na pulis na basta na lang patayin ang mag-ina na wala namang banta sa kanyang buhay at kontrolado na niya ang sitwasyon?

Kitang-kita sa video na nagmamakaawa na si Sonya sa pulis. Niyakap na ang tila nakainom na anak para huminahon. Ganito ang sitwasyon sa kahabaan ng video. Tila nagbago na lang ang sitwasyon nang dumating ang batang babaeng anak ng pulis at sinigawan ang mag-ina ng, “My father is a policeman!” habang kinukunan ng video ang pangyayari.

Kung bakit pinababayaan ng pamilyang ito na lumapit ang bata sa ganyang sitwasyon ay nagpapahiwatig ng kanilang uri ng pagpapalaki sa bata. Sa punto na ito, tumingin ang pulis sa kumukuha ng video sa kanyang kaliwa saka binaril ang mag-ina. Siniguradong patay pa si Frank Anthony nang barilin ulit kahit bumulagta na. Lahat ito sa harap ng kanyang batang anak na babae.

Ano ang iniisip nito? Kaya niya lusutan ang pamamaril dahil pulis siya sa ilalim ng kasalukuyang administrasyon? May sapat siyang dahilan kaya lumabas nang armado at nauwi sa pagpatay sa mga kapitbahay? Ano ang banta sa kanyang buhay para kumilos nang ganyan? May nakita ba kayo sa video? Nagpakitang-gilas ba siya sa kanyang anak dahil ipinagmalaki nitong pulis ang kanyang ama? Pero ang matindi, marami na palang mga nakaraang kaso ang pulis, pero bakit nasa serbisyo pa? Dahil kayang-kaya niyang pumatay ng tao?

Agad naglabas ng paliwanag ang Palasyo na “isang bugok lang ‘yan.” Paano pala kung matapatan mo ang isa pang bugok? Sigurado ba silang isa lang ang bugok sa kanilang hanay?

At huwag nilang sasabihing nandilim ang paningin nito kaya nagawa ang krimen. O kaya “isolated case” ito. Ilang beses na nating narinig ang PNP na magpaliwanag na “isolated case” ang pagkakasangkot ng pulis sa katiwalian o krimen? Kung marami na, hindi na “isolated” ‘yan. Ibig sabihin ba ay kung adik ang katunggali ng mga pulis, malinaw ang pag-iisip pero kapag ordinaryong mamamayan na hindi armado ay nandilim ang paningin?

Ilang taon kaya ang aabutin ng kasong ito bago masentensiyahan? Malinaw ang ebidensiya kaya dapat gawin itong halimbawa ng hukuman. Dapat makulong habambuhay ang halimaw na ‘yan. Hindi na dapat makalabas sa lipunan. Ilang beses na palang nasasampahan ng kaso pero nakakalusot dahil sa kung anu-anong teknikalidad kaya nakabalik pa sa serbisyo. Ganyan nga yata talaga sa Pilipinas. Tsk!

Kapalpakan sa Dengvaxia, nagdulot ng trauma sa mga Pinoy na magpabakuna!

ni Korina Sanchez - @Isyung 'K' | December 15, 2020

Kailangang ibalik ang tiwala ng taumbayan sa pagbabakuna bilang paghanda sa COVID-19 vaccine. Ito ang opinyon ni Dr. Lulu Bravo, executive director ng Philippine Foundation for Vaccination sa kanyang pangamba na marami pa ang kontra-bakuna lalo na sa social media. Walang ibang masisisi riyan kundi ang kontrobersiya sa Dengvaxia.

May ginawang pag-aaral ang First Draft kung saan nakita ang impluwensiya ng social media at pulitika sa pagpapalaganap ng maling impormasyon ng isang bagay, halimbawa sa Dengvaxia. Ang naging masamang epekto nito ay ang pagbagsak ng tiwala ng mamamayan sa lahat ng bakuna. Matatandaang noong 2019, dumami ang mga kaso ng tigdas at polio sapagkat karamihan sa mga magulang ay nangangamba umano na pabakunahan ang kanilang anak.

Pero bukod sa kontrobersya ng Dengvaxia, sa tingin natin ay marami pa ang hindi sigurado kung magpapabakuna agad kontra COVID-19 dahil sa bilis ng paglikha nito.

Halos wala pang isang taon ay naglabas na ang ilang kumpanya ng kani-kanilang bakuna kontra COVID-19. Ang bakuna ay ilang taon ang inaabot bago masabing ligtas para maibigay sa mga tao.

Ang bakuna ng Pfizer/ BioNTech na sinimulang ibigay sa mga piling tao sa UK ay may dalawang ‘allergic reaction’ nang naitala. Kaya naglabas agad ng pahayag na kung may kasaysayan ng allergy ay huwag munang magpabakuna. Hindi pa natin alam ang magiging side-effects nito mula sa ibang kumpanya tulad ng Sinovac.

Sa nais ng buong mundo na magkaroon na ng bakuna laban sa COVID para maibalik na sa normal ang buhay, baka ang kapalit ay mga reaksiyon o side-effects na hindi pa nalalaman o lumalabas. Hindi rin pare-pareho ang epekto ng bakuna sa tao. Pero malinaw na kailangan talaga ng bakuna.

Tiwala ang kailangang ibalik sa tao hinggil sa pagpapabakuna. Kung paano maibabalik, ‘yan ang malaking tanong.

Kaugnay nito, hinamon ni Sen. Christopher “Bong” Go sina DOH Sec. Duque at vaccine czar Carlito Galvez na unang magpabakuna. Gayundin, hindi ba’t nagpahayag si Pangulong Rodrigo Duterte na magpapabakuna siya agad kapag dumating ang mga bakuna na mula China? Makatulong kaya sila sa pagbalik ng tiwala sa bakuna? O, panahon na lang talaga ang makakasagot niyan?

Resolbahin muna ang gusot at problema sa cashless payment system bago ilarga!

ni Korina Sanchez - @Isyung 'K' | December 12, 2020

Sinuspinde na ni Valenzuela Mayor Rex Gatchalian ang operasyon ng NLEX Corp., ang nagpapatako ng tollways sa NLEX dahil sa kaguluhang nagaganap bunsod ng mga problema sa cashless payment system. Nagdulot ng nakakatuyong-dugong trapik sa mga tollways dahil sa iba’t ibang problema, tulad ng hindi mabasang RFID, may nawawalan pa ng load at marami pa ang hindi makakuha ng sticker. Kaya nang hindi na nakatiis ang alkalde, sinuspinde na ang kanilang operasyon. Ibig sabihin, libre na muna dumaan sa NLEX habang inaayos pa ang mga gusot at problema.

Nais naman ni Sen. Sherwin Gatchalian na magbitiw sa tungkulin ang pinuno ng Toll Regulatory Board (TRB) dahil sa gulong idinulot ng kanilang pagpapatupad ng cashless payment system. Mukhang hindi nga pinag-aralan nang mabuti ang mga magiging problema kung masyadong minadali ang pagpapatupad ng sistema. Dapat nagbigay ng mas mahabang panahon, imbes na ginulat ang mamamayan na ipatutupad ito ngayong Disyembre.

Wala namang sistema ang hindi nagkakaproblema. Kailangan lang intindihin ng DOTr na hindi puwedeng madaliin ang cashless payment system, lalo pa ngayon. Hindi lahat ng tao ay handa o nais pumila para lang makakuha ng mga aparatong ‘yan. DOTr, TRB at NLEX pati na rin ang SLEX dapat siguraduhin munang walang malalaking problema bago ipatupad ang cashless payment system. Kung mamadaliin at tatakutin pa ang mamamayan ng multa, ganyan talaga ang magiging resulta.